Li na’leb’ ch’olob’anb’il ut li osob’tesink yeechi’inb’il

Sa’ li ewu a’in, ex was wiitz’in, nintz’aama intenq’ankil rik’in li qaChoxahil Yuwa’ naq tinye li waatin eere.

Sa’ 1833, li Qaawa’ kixk’utb’esi chiru li Profeet aj Jose Smith jun k’uub’anb’il na’leb’ choq’ re xkawilal li qoq quq’. Li k’uub’anb’il na’leb’ a’an natawman sa’ li tasal 89 re Tzol’leb’ ut Sumwank, ut li Aatin re Chaab’il Na’leb’ nayeeman re. Naxk’e qana’leb’ chirix k’a’ru li tzakemq naqatzeka, ut naxram chiqu li k’a’aq re ru ink’a’ us choq’ re li qatib’el.

Choq’ reheb’ li neke’ab’ink reheb’ lix taqlahom li Qaawa’ ut neke’xpaab’ chi tiik li Aatin re Chaab’il Na’leb’, wan li osob’tesink yeechi’inb’il, sa’ li wan wi’ xkawilal li qoq quq’, ut xkanajik li qametz’ew.¹

Moko najter ta, xinwil sa’ hu jun esil sa’ li xtz’aqlok wi’ ru li osob’tesink a’in li yeechi’inb’il. Jun komon sa’ li Iglees, laj Jwan  A. Larsen xk’ab’a’, kiwan sa’ li Segunda Guerra Mundial jo’ aj puub’ choq’ re li tenamit Estados Unidos, sa’ jun jukub’ Cambria xk’ab’a’. Naq yoo chi uxk li pleetik, kiwulak resil naq te’chalq jun teep chi so’sol ch’iich’ li te’xb’aanu bombardear. Kiyeeman reheb’ laj puub’ naq sa’ junpaat te’elq chaq aran. Ak xikenaq li jukub Cambria, jo’kan naq laj Jwan ut oxib’ li rochb’een ke’xch’utub’ li k’a’ru reheb’ ut xkoheb’ sa’ junpaat chire li ha’, ut ke’xsik’ ani taak’amoq reheb’ toj rik’ineb’ li ninqi jukub’. Ke’ok sa’ jun ch’ina jukub’ li ok re chi xik rik’in li roso’jikil nimla jukub’ li taa’elq chaq aran. Ak yoo chi elk li nimla jukub’, ut laatz’eb’ ru li ani wankeb’ chi sa’, jo’kan naq ka’ajwi’ ke’ru chixkutb’al jun k’aam reheb’ li kaahib’ chi winq, re naq te’ruuq chi taqe’k sa’ li jukub’.

Laj Jwan yoo chixk’amb’al jun radio li mas aal, ut aran kixtaw rib’ chi chapcho chiru jun k’aam, kab’laju metro xteram, sa’ xk’atq jun nimla jukub’ li yoo chi nume’k chiru xb’oolam li palaw. A’an ki’ok chi taqe’k chi uq’ej, ut naxnaw naq wi narach’ab’ li k’aam, ch’olch’o ru naq taakamq. Chirix junpaat, ki’ok chi reek’ankil xrahil lix tib’el sa’ ruq’. Xq’uno’ chik lix metz’ew, ut kireek’a naq ink’a’ chik naxkuy wank chi chapcho.

Naq ak xlaj lix metz’ew, ut yoo chixk’oxlankil li ok re chixk’ulb’al, laj Jwan ki’ok chi tz’aamank sa’ xch’ool chiru li Dios, ut kixye re naq junelik wanjenaq chixpaab’ankil li Aatin re Chaab’il Na’leb’ ut saq ru chaq lix yu’am—anajwan q’axal narajeb’ ru li osob’tesink li yeechi’inb’il.

Laj Jwan moqon kixye naq sa’ xchoyb’al lix tij, kireek’a chi numtaak lix metz’ew. Ki’ok wi’chik chixtaqsinkil rib’, ut sa’ junpaat kitaqe’ sa’ li jukub’. Naq ki’wulak sa’ xb’een li jukub’, sa nareek’a ut ink’a’ kaw yoo chi musiq’ak. Li osob’tesink re xkawilal roq ruq’ ut metz’ew, li yeechi’inb’il sa’ li Aatin re Chaab’il Na’leb’, ak xk’eeman re. A’an kixb’antioxi chiru lix Choxahil Yuwa’ sa’ li kutan a’an, ut chiru chixjunil lix yu’am, naq kixsume lix tij naq kixpatz’ xtenq’ankil.²

Ex was wiitz’in, chiqak’uula xkawilal li qatib’el ut li qak’a’uxl rik’in xpaab’ankil li na’leb’ k’eeb’il sa’ li Aatin re Chaab’il Na’leb’, jun k’uub’anb’il na’leb’ k’eeb’il xb’aan li Dios. Chi anchal inch’ool ut chi anchal li waam, ninch’olob’ xyaalal li chaq’al ru osob’tesink li na’oyb’enink qe wi naqab’aanu chi jo’kan. Chi’uxq taxaq a’an, nintz’aama, sa’ xk’ab’a’ li Qaawa’ ut aj Kolol qe, li Jesukristo, amen.