Ip Yohk ac Olwelah
Kuht enenuh karihngihn mahno lasr ac nuhnak lasr ke kuht ukwe ip yohk ma oasr ke Kahs in Lahlmwetmwet, plwacn lucng me se.
Ofong, tamuhlwel, nga pruhe ke kolyuck luhn Pahpah Lucng ke nga akacsruhi pweng luhk yuruwos.
Ke yac 1833 Leum El ahkkahlwemye nuh sel Mwet Pahluh Joseph Smith plwacn se ke moul kuh. Plwacn se inge konweyuckyak ke sapta 89 luhn Doctrine and Covenants ac pahngpahng Kahs in Lahlmwetmwet. El sang kolyuck suwohs ke kain mongo kuht in kanglah, ac fahk ma kuht tiac kuh in orekmakihn ma koluk ke mahnosr.
Elos suc ahkos masap luhn Leum ac suc moulkihn ke luhlahlfongi Kahs in Lahlmwetmwet uh uliyucklac nuh selos kuhtuh mwe insewowo, kuhtuh ma wi kac pa falkac wo ac kuh in mahno yohk likina met.1
Piacng ah nga riti sramsram pwacye se ke ohiyac ma olwelah inge ahkkahlwemyeyucklac. Mempucr luhlahlfongi se ke Alu uh, John A. Larsen , el kuhlwacnsap ke Mweun Ahk Luo ke United States Coast Guard ke oak USS Cambria. Ke sie mweun fin acn Philippines, pweng tuhkuh ke sie u luhn bombers ac kamikaze fighter planes. Ke srihpen USS Cambria el som tari, John ac mwet tolu suc welal oracni ma lalos ac silahklahk nuh ke lihkihn pot, finsrak in wi soko oak ma ahkolah in som. Na ma na wo, soko oak srihsrihk sruhkuhlosyak ac suhlahklahk in som nuh ke oak luhlahp sahflah ke inahlok uh. Mwet ke oak ma ahkolah in som, suc orekma sa in ahkolah in som, elos kahfofo fin oak ac oasr lusen pacl srihk tuh elos kuh in tohllah sucl nuh ke mwet ahkosr, tuh elos in muh kuh in fan nuh fin oak an.
John, ke sie radio toasr oasr ke fintohkohl, konwaclwack oasr ke sahflahiyacn sucl ma lusen 40 feet (12 m), sisken oak soko ma kahsruhsr nuh ke meoa. El sifacna muhtwacack fanyak, paho nuh ke paho, ac etuh lah el fin puhtatlac, el ac misac. Tukun el fanyak lusen sie tahfuh tolu an, el puhla pahol kweok yohk. El muhnahslac nuh upac tuh el puhla el tiac kuh in kalweni sruokyac.
Ke wacngihnlac kuh lal, ke el motko ke puhtatlac lal, John el pruhe sifacna nuh sin God, fahk nuh Sel lah el karihngihn Kahs in Lahlmwetmwet pacl nuh kwewa ac el moul sie moul nwacsnwacs—ac el ingena enenuh yohk mwe insewowo olweyucklac an.
John el fahk tohkoh lah ke el ahksahfye pruhe lal, el puhla kuh yohk sel. El sifilpac muhtwacack fanyak ac sa in fan sucl an. Ke el sun fin oak an, el momong oacna sie ac tiacna ullac an. Mwe insewowo ke falkac wo ac kuh in mahno yohk likina met ma olweyucklac ke Kahs in Lahlmwetmwet uh, tuhkuh nuh sel. El sang kuloh nuh sin Pahpah tuhmwacl Inkuhsrao ke pacl sacn, ac nuh ke moul lal nohfohn, ke top nuh ke pruhe enenweyuck lal in eis kahsruh.2
Tamuhlwel, kuht enenuh karihngihn mahno lasr ac nuhnak lasr ke kuht ukwe ip yohk ma oasr ke Kahs in Lahlmwetmwet, plwacn lucng me se. Ke insiyuck ac nguhnihk nohfohn, nga fahkwack ke mwe insewowo wolacna ma sano kuht ke kuht oruh. Ke ma inge, nga pruhe ke inen Leum ac Mwet Lahngo lasr, Jisus Kraist, amen.