ຫລັກທຳ ແລະ ຄຳສັນຍາ
ຂໍໃຫ້ເຮົາຈົ່ງດູແລຮ່າງກາຍ ແລະ ຈິດໃຈຂອງເຮົາ ໂດຍການດຳລົງຊີວິດຕາມຫລັກທຳ ທີ່ຕັ້ງໄວ້ຢູ່ໃນ ພຣະວາຈາແຫ່ງປັນຍາ, ຊຶ່ງເປັນແຜນຈາກສະຫວັນ.
ອ້າຍນ້ອງທັງຫລາຍ, ຄ່ຳຄືນນີ້, ຂ້າພະເຈົ້າອະທິຖານຂໍການນຳພາຈາກພຣະບິດາເທິງສະຫວັນຂອງເຮົາ ໃນຂະນະທີ່ຂ້າພະເຈົ້າແບ່ງປັນຂ່າວສານຂອງຂ້າພະເຈົ້າກັບທ່ານ.
ໃນປີ 1833 ພຣະຜູ້ເປັນເຈົ້າໄດ້ເປີດເຜີຍແຜນສຳລັບການມີສຸຂະພາບດີ ແກ່ສາດສະດາໂຈເຊັບ ສະມິດ. ຊຶ່ງມີຢູ່ໃນ Doctrine and Covenants ພາກທີ 89 ແລະ ຮູ້ຈັກກັນວ່າ ພຣະວາຈາແຫ່ງປັນຍາ. ມັນແນະນຳເລື່ອງການກິນໂດຍສະເພາະ, ແລະ ສິ່ງທີ່ຕ້ອງຫ້າມ ຊຶ່ງເປັນພິດໄພຕໍ່ຮ່າງກາຍຂອງເຮົາ.
ຜູ້ທີ່ເຊື່ອຟັງຕໍ່ພຣະບັນຍັດຂອງພຣະຜູ້ເປັນເຈົ້າ ແລະ ຮັກສາພຣະວາຈາແຫ່ງປັນຍາ ໄດ້ຮັບຄຳສັນຍາວ່າ ຈະໄດ້ຮັບພອນພິເສດ, ຊຶ່ງຮ່ວມດ້ວຍ ການມີສຸຂະພາບແຂງແຮງ ແລະ ມີກຳລັງວັງຊາ.1
ເມື່ອບໍ່ດົນມານີ້ ຂ້າພະເຈົ້າໄດ້ອ່ານເລື່ອງຈິງກ່ຽວກັບຄຳສັນຍາເຫລົ່ານີ້. ສະມາຊິກທີ່ຊື່ສັດຄົນໜຶ່ງຂອງສາດສະໜາຈັກ, ຊື່ ຈອນ ເອ ລາເຊັນ, ໄດ້ຮັບໃຊ້ເປັນທະຫານລາດຕາເວນຂອງສະຫະລັດອາເມຣິກາ ໃນໄລຍະສົງຄາມໂລກຄັ້ງທີສອງ ຢູ່ໃນກຳປັ່ນ ຢູແອັສແອັສ ແຄມບຣີອາ. ໃນລະຫວ່າງການສູ້ຮົບຢູ່ເກາະຟີລິບປີນ, ມີຂ່າວບອກວ່າ ຂະບວນຍົນຖິ້ມລະເບີດ ແລະ ຂ້າຕົວຕາຍ ກຳລັງບິນມາ. ກຸ່ມທະຫານຖືກສັ່ງໃຫ້ອອກໜີທັນທີ. ແຕ່ເຮືອ ຢູແອັສແອັສ ແຄມບຣີອາ ໄດ້ອອກຈາກທ່າໄປແລ້ວ, ທ້າວຈອນ ແລະ ເພື່ອນທະຫານອີກສາມຄົນ ໄດ້ເປ້ເອົາເຄື່ອງຕີສາຍ ແລະ ແລ່ນລົງໄປຫາແຄມທະເລ ເພື່ອຫວັງວ່າຈະໄດ້ຮັບເອົາໄປກັບກຳປັ່ນທີ່ກຳລັງຈະແລ່ນອອກໄປ. ໂຊກດີມີເຮືອບັນທຸກລຳໜຶ່ງ ໄດ້ເອົາເຂົ້າເຈົ້າຂຶ້ນເຮືອ ເພື່ອໄປສົ່ງໃຫ້ກຳປັ່ນລຳສຸດທ້າຍ. ພວກທະຫານທີ່ໄດ້ຂຶ້ນກຳປັ່ນລຳສຸດທ້າຍກຳລັງຫຍຸ້ງຢູ່ກັບການມ້ຽນມັດຢູ່ດາດຟ້າເຮືອ ແລະ ມີເວລາແຕ່ພຽງໄດ້ໂຍນເຊືອກລົງໄປໃຫ້ທະຫານສີ່ຄົນເຫລົ່ານັ້ນ, ເພື່ອໃຫ້ເຂົາເຈົ້າປີນຂຶ້ນມາ.
ທ້າວຈອນ, ໂດຍທີ່ເປ້ເຄື່ອງຕີສາຍ ຢູ່ຂ້າງຫລັງ, ເຫັນຕົວເອງຈ່ອງຢູ່ສົ້ນເຊືອກທີ່ຍາວ 12 ແມັດ, ຢູ່ທາງຂ້າງກຳປັ່ນ ທີ່ກຳລັງແລ່ນອອກໄປສູ່ທະເລ. ລາວໄດ້ພະຍາຍາມປີນຂຶ້ນ, ໃຊ້ມືຊ້າຍຂວາຈ່ອງເຊືອກ, ໂດຍທີ່ຮູ້ວ່າ ຖ້າຫາກມືຫລຸດອອກຈາກເຊືອກ, ລາວກໍຄົງຕາຍຢ່າງແນ່ນອນ. ຫລັງຈາກໄດ້ດຶງຕົວເອງຂຶ້ນໄດ້ໜຶ່ງສ່ວນສາມ, ລາວຮູ້ສຶກວ່າແຂນຂອງລາວເຈັບປວດຫລາຍ. ລາວຮູ້ສຶກອ່ອນເພຍ ແລະ ຄິດວ່າຄົງບໍ່ສາມາດຍຶດເຊືອກໄວ້ອີກຕໍ່ໄປ.
ໂດຍທີ່ເຫື່ອແຮງໝົດໄປ, ໃນຂະນະທີ່ລາວກຳລັງຄິດກ່ຽວກັບການຕາຍຂອງລາວຢູ່ນັ້ນ, ທ້າວຈອນໄດ້ຮ້ອງຫາພຣະເຈົ້າຢູ່ໃນໃຈ, ທູນບອກພຣະອົງວ່າ ລາວໄດ້ຮັກສາກົດ ພຣະວາຈາແຫ່ງປັນຍາ ຂອງລາວຕະຫລອດເວລາ ແລະ ໄດ້ດຳລົງຊີວິດຢ່າງຊອບທຳ—ແລະ ບັດນີ້ ລາວຕ້ອງການພອນທີ່ຖືກສັນຍາໄວ້ ນັ້ນຫລາຍທີ່ສຸດ.
ຕໍ່ມາທ້າວຈອນໄດ້ເລົ່າວ່າ ຫລັງຈາກທີ່ລາວໄດ້ກ່າວຄຳອະທິຖານ, ລາວຮູ້ສຶກວ່າ ລາວມີກຳລັງວັງຊາຂຶ້ນທັນທີ. ລາວເລີ່ມຕົ້ນປີນອີກ ແລະ ສາມາດຂຶ້ນໄປໄດ້ຢ່າງວ່ອງໄວ. ເມື່ອລາວຂຶ້ນໄປເຖິງດາດຟ້າເຮືອ, ລາວຫັນໃຈແບບທຳມະດາ ແລະ ຄືກັນກັບບໍ່ໄດ້ເຮັດຫຍັງ. ພອນຂອງການມີສຸຂະພາບເຂັ້ມແຂງ ແລະ ມີກຳລັງວັງຊາ ຊຶ່ງຖືກສັນຍາໄວ້ຢູ່ໃນ ພຣະວາຈາແຫ່ງປັນຍາ, ໄດ້ມາສູ່ລາວ. ລາວໄດ້ຂອບພຣະໄທພຣະບິດາເທິງສະຫວັນຂອງລາວ ໃນເວລານັ້ນ ແລະ ຕະຫລອດຊົ່ວຊີວິດສຳລັບຄຳຕອບຕໍ່ຄຳອະທິຖານ ທີ່ໄດ້ໄວ້ຊີວິດລາວ.2
ອ້າຍນ້ອງທັງຫລາຍ, ຂໍໃຫ້ເຮົາຈົ່ງດູແລຮ່າງກາຍ ແລະ ຈິດໃຈຂອງເຮົາ ໂດຍການດຳລົງຊີວິດຕາມຫລັກທຳ ທີ່ຕັ້ງໄວ້ຢູ່ໃນ ພຣະວາຈາແຫ່ງປັນຍາ, ຊຶ່ງເປັນແຜນຈາກສະຫວັນ. ດ້ວຍສຸດຈິດສຸດໃຈຂອງຂ້າພະເຈົ້າ, ຂ້າພະເຈົ້າເປັນພະຍານເຖິງພອນອັນປະເສີດ ທີ່ລໍຖ້າເຮົາຢູ່ ຖ້າເຮົາປະຕິບັດຕາມກົດຂອງ ພຣະວາຈາແຫ່ງປັນຍາ. ຂ້າພະເຈົ້າອະທິຖານວ່າ ມັນຈະເປັນດັ່ງນັ້ນ, ຂ້າພະເຈົ້າອະທິຖານໃນພຣະນາມຂອງພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດ, ພຣະເຢຊູຄຣິດ, ອາແມນ.