2010–2019
Pedped ko im Kallim̧ur ko
Oktoba 2016


Pedped ko im Kallim̧ur ko

Em̧m̧aan ro jeiū im jatū, jemaron̄ ke kōjparok ānbwinnid im kōļmenļo̧kjeņ ko ad ilo ad kōjparok pedped in katak ko litok ilo Naan in Mālōtlōt, juon karōk ekwojarjar.

Joteenin, em̧m̧aan ro jitōn bōro, ij jar kōn tōl an Jemedwōj Ilan̄ ilo aō kwaļo̧k ennaan in aō ippemi.

Ilo 1833 Irooj eaar kwaļo̧k n̄an Rikanaan Josep Smith juon karōk in mour emourur. Karōk in ej waļo̧k ilo 89th jekjōn in Katak im Bujen ko im jeļā kake āinwōt Naan in Mālōtlōt. Ej letok wāween tōl kōn m̧ōn̄ā ko jej kan̄i, im ej kamo̧ kōjerbal jabdewōt men ko rej kakkure ānbwinnid.

Ro rej pokake kien ko an Irooj im ro rej tiljek kōjparok Naan in Mālōtlōt rej bōk kallim̧ur im kōjeram̧m̧an ko rejenolo̧k, ekoba ilo kōjeram̧m̧an kōn ājmour im ļapļo̧k in kajoor ilo ānbwin.1

Jem̧aanļo̧k, ikar riiti juon bwebwenato em̧ool kōn juon men ekanooj kabwilōn̄lōn̄ kōn kallim̧ur kein. Juon membōr etiljek uwaan Kabun̄ in, John A. Larsen, ekar jerbal ilo Pata eo Kein Karuo ilo United States Coast Guard ioon tim̧a eo USS Cambria. Ilo juon kōbata ilo Philippines, ekar itok ennaan kōn juon kumi ejjeļo̧k baam̧ im baļuun ko robrak kōn kein rubrub ko. Kean̄ ko rekar itok kōn jidimikōj in juon em̧m̧akūt. Kōnke USS Cambria emōj an kar jerak, John im jilu m̧ōttan rekar aiin kein jerbal ko im m̧ōkajļo̧k n̄an ioon pok iparijet, kōjatdikdik bwe renej iuwe ioon juon iaan tim̧a ko rej itōn jerak. Jeram̧m̧an, juon tim̧a waan ektak m̧weiūk ekar ektak er im kar m̧ōkaj im jerakļo̧k n̄an tim̧a eo āliktata ej em̧m̧akūt jān bay eo. Em̧m̧aan ro ioon tim̧a eo ej jerak, kōn wōt aer ekkairir in em̧m̧akūt, rekar lukkuun boub ioon teek eo im kōn wōt an dik aer iien rekar maron̄ wōt joļo̧k to ko n̄an em̧m̧aan rein emān kōjatdikdik bwe remaron̄ tallōn̄ tok n̄an ioon teek eo.

John, eo ekar likwōje juon retio eddo ņae ilikin, ekar loe an make alitoto ilo jem̧ļo̧kin to eo 40 ne aitokan (12 m) itōrerein juon tim̧a ej diwōjļo̧k n̄an m̧aļo eo. Ekar jino kotak e lōn̄ļo̧k tallōn̄e to eo, juon pā lōn̄ļo̧k im bar juon pā lōn̄ļo̧k, jeļā bwe eļan̄n̄e enej rōļo̧k pein jān to eo, enaaj bōlen mej. Ālkin an kar tallōn̄ e m̧ōttan jilu in to eo, pein ekar bwil kōn metak. Ekar jino lukkuun m̧ōjņo̧ bwe ekar en̄jake ke ejjab maron̄ dābdeb wōt.

Ilo an dikļo̧k wōt kajoor eo an, ilo an kejōkļo̧kjeņ kōn an tōn jako, John ekar jar ilo būruwōn n̄an Anij, ba n̄an E bwe aolep iien ekar kōjparok Naan in Mālōtlōt im mour juon mour erreo—im kiiō ekanooj in aikuji kōjeraam̧m̧an ko kar kallim̧ur kaki.

Tokālik John ekar ba ke ej kajem̧ļo̧k jar eo an, ekar en̄jake juon kajoor eļap. Ekar jino bar tallōn̄ im kar lukkuun mōkaj an tallōn̄e to eo. Ke ekar tōpar teek eo, an emenono ekar ejjeļo̧k oktakin im ekar jab maron̄ kajjinōk. Kōjeram̧m̧an ko kōn ļapļo̧k in kajoor in ānbwin, kar kallim̧ur ilo Naan in Mālōtlōt, ekar an. Ekar leļo̧k kam̧oolol n̄an Jemedwōj Ilan̄ innām, im aolepān mour eo an kōn uwaak eo n̄an lukkuun jar eo n̄an jipan̄.2

Em̧m̧aan ro jeiū im jatū, jemaron̄ ke kōjparok ānbwinnid im kōļmenļo̧kjeņ ko ad ilo ad kōjparok pedped in katak ko litok ilo Naan in Mālōtlōt, juon karōk ekwojarjar. Kōn aolepān būruwō im aō, ij kam̧ool kōn kōjeram̧m̧an ko raiboojoj ko rej kōttar kōj eļan̄n̄e jenej. Bwe en āindein, ij jar, ilo etan an Irooj im Rilo̧mo̧o̧r, Jisōs Kraist, amen.

Kakeememej ko

  1. Lale Katak im Bujen ko 89:18–21.

  2. Lale John A. Larsen, in Robert C. Freeman im Dennis A. Wright, comps., Saints at War: Experiences of Latter-day Saints in World War II (2001), 350–51; kōjerbale kōn mālim.