Lepin Padahk kan oh Inou kan

Pwohnget, riei ohloko, I kapakapki kaweid sang Samatail Nanleng ni ei ehukiha sakarada wet rehmwail.

Nan 1833 [kid welipwiki silihsek silu] Kauno ketin kasalehiong Soukohp Joseph Smith ehu pilahn en roson mwahu. Pilahno dierek nan irelaud89 [welihsek duwau] en Doctrine and Covenantsoh ihme kahdaneki Mahsen en Eripit. E patohwenda kaweid ong soangen mwenge da me kitail kak tongoale oh soahng kei me kitail sohte konehng doadoahngki pwe e kak kawehla paliwaratail.

Irail kan me kin peikiong en Kauno kosonned akan oh pwoson ideidawehn Mahsen en Eripito alehier inou pen kapai kan me iangahki roson mwahu oh kehlail lahn paliwararail.¹

Me keren I wadek koasoi mehlel pen ehu mwekid sansal me pid inou pwukat. Tohn Mwomwohdiso pwoson men, John A. Larsen, iang sounpei nan Mahwin Keriau en Sampa nan US Coast Guard pohn sohp USSCambria.Nan ehu mahwin me wiawi Philippines, pakair ahpw wiawi me ehu karis en sompihr me kin kese poakudang oh kamikaze kohkohdo. Ruwes wiawi irail en pitipit rukila. Pwehki USSCambriaeh samwalahr, kahrehda John oh ienge ohl silimen kihpene arail kepwe oh karuwaruhdihla ni oaroahro, pwe irail en kak iangada oapwoat sohp me mwesemweselko. Paiente mie pwoht en peidaid pwoat me wairailda oh walahng ni sohp me mwesel keieu mwuhr. Ohl me mih pohn sohpo, ni arail karkarwaruhn mwesel pwe irail en rukila, inenen kedirepw kahrehda irail kesehlahte sahl ong ohl pahmenko pwe irail en kak doukihda sahlko pohn sohpo.

John, wewa redio toutou ehu me pirapirieng nan tihnseweho, wie mwoatmwoatou ni imwing sahl piht paisek (mihter eisek riau) pwoat ni keilen sohp me wie tangatangehila nan madao. Ohlo tepda dou ni sahlo, wawaikada paliwereo ki pehko nan ah ese me ma e sohla kak koledi sahlo teng e kak mehla. Mwurin eh doudahr kerenieng lel nan werengen sahlo, e kehnda nan pehko weiweirengki uwen eh karakar. Uwen eh luwetala, e kehn me e solahr kak kolokol sahlo.

Ni eh inenen daulahr, e ahpw medemedewe dahme e kak lel, John ahpw kapakap oh sekerehki Koht me e kin kalap kapwaiahda Mahsen en Eripit oh e momourki mour mwakelekel ehu—oh met e inenen anahne kapai kan me miehier inoupe.

John nda mwuri me ni eh kanekehla ah kapakapo, e pehm angin kehlail ehu lel ih. E pwurehng tepda dou oh mwadangete lel poweho. Ni eh lel pohn sohpo, ah esingiko mwahu oh sohte mwoamwen me e ekis ngetida. E alehier kapai en roson mwahu oh kehlail me inoupe mie nan Mahsen en Eripito. E wia ah kaping kalahngan ong Semeo Nanleng ansouo, oh erein ah mour pwehki pasapeng me wiawihongehr ah kapakap en peki sawaso.²

Riei ohloko, kitail apwalih mwahu paliwaratail oh atail lamalam kan ni atail pahn kin idawehn lepin padahk kan me sansal nan Mahsen en Eripito, pilahn ehu me kokouda sang powe. Ni mohngiongi oh mouri unsek, I kadehde me kapai lingan kan awiawi kitail ni atail wia met. Pwe mepwukat en pweida, I kapakapki, ni mwaren atail Kaun oh Sounkomour, Sises Krais, amen.