Etiwa wis non Pochokun, Pwipwi non Saion
Ren ach sipwe winiti chon aponueta pwon mi pin, sipwe keao usun ekkewe nongonongen ewe kapas allim me angei ach pwisin kapasen pwarata usun ennetin ekkei nongonong.
Met ren ei pwapwa ach sia chufengen non ei Conference Center fiti ekkewe nengin, ekkewe fopun, me fin ewe Mwichefen. Sia fokkun pwan apareni pwe mi wor ngorowun pwan ekkoch mwichen pwich kewe ra chufengen non unusen ewe fonufan ne katon ekkei mwich, me ua fokkun kinisou ren ei tufich me napanap a mut ngenikich ach achufengeni kich non ew popun non ei pwinin.
Non October 2006 [ru ngorow wonu], Preseten Gordon B. Hinckley a wau ew afanafan itenapan “Etiwa wis, O Mwan noun Kot,” a eiteit seni ew kon mi fel a mak non 1911.1 A ew kokkon foffor ngeni mwan non ewe Mwichefen ar repwe etiwa wis me eochureno. Ua ekieki usun ena afanafan nupwen ua iotek ai upwe sinei met upwe aporousa ngenikemi.
Pwi kewe, sia nonnom non “fansoun osukosuk.”2 Ekkewe napanapen ach ei fansoun resap amairu ngenikich. Ra fen osini non ngerowun ier pwe ew aurour me pesepes pwe sipwe tongeni mwoneta. Ewe awanuan sopun Mormon a ngenikich ew anoninenin awewen ekkewe napanapen ach ei fansoun. Non ei sopun, Moronai a apasa pwe a fen kuna ach ei fansoun, mi pachenong maun me porousen maun, watten nimengaw, ni manau, sona, me aramas ra urenikich pwe ese wor och ika mwan mwen mesen Kot. A awewei usun ekkewe aramas mi uren namanam tekia, ra sani ar repwe ufouf uf mi watte niwinin, me ra turunufasei namanam. A kuna aramas ra chok ekiekin mettochun fonufan ekkewe ra mutata “ekkewe mi osupwang, me ekkewe mi seneno, me ekkewe mi semwen me ekkewe mi riaffou repwe feino senikemi”3 nge ouse eteneki ir.
Moronai a eis ew kapaseisen teessin non netip ngenikich—ekkewe sia nonnom non ekkei fansoun. A apasa, “Pwata oua saw ami oupwe wata womi iten Kraist?4 Ei esit a ennetin awewei fofforun napanapan ach ei fonufan.
Joseph Smith—Matthew a affata pwe non ekkewe ranin soponon pwan mwo ekkewe mi kefinita anongonong won ewe pwon mi pin repwe tupuno.5 Ekkewe chon ewe pwon mi pin mi pachenong ekkewe nengin, ekkewe fopun, me fin ewe Mwichefen ra fen papatais me fori pwon mi pin ngeni Samach won Nang. Pwan kich sia tongeni tupuno ren afanafan mi chofona.
Pwii kana, use nuku pwe ekkewe napanap repwe ochuno. Ika mwokutukutun ikenai a ina esisinan, mi auchea sipwe mwoneta ngeni ekkewe sossot repwe feito. Epwe mecheres ach sipwe tipemwaramar, nge kich aramas pwon, sisap tipemwaramwar. Usun Elter Gary E. Stevenson a apasa, “ekkewe feioch Samach won Nang a fang ngenikich ren ach manau non ekkei fansoun osukosuk ina pwe sipwe pwan manau non unusochun fansoun.”6Ua sani kinamwein ena kapas.
Preseten Russell M. Nelson a urenikich non ewe ier a no: “Chon fiu ngeni ewe Mwichefen, an annuk, me napanapen manauach repwe napeno. Pokiten ei mettoch, mi auchea ngenikich ekkewe fefin mi wor ar pochokunen weweiti usun ewe annukun Kraist me ekkewe repwe aea ena wewe ne aiti me amari ew tappin aramas ra tongeni ungeni tipis. Mi auchea ngenikich ekkewe fefin ra tongeni esina nikotuputup non meinisin napanaper. Mi auchea ngenikich ekkewe fefin mi sinei usun ar repwe aea ewe pochokun Kot a amwonata ngeni ekkewe ir mi aneasochisi ar pwon me ekkewe ra pwarano ar nuku fiti epinukunuk me tong ennet. Mi auchea ngenikich ekkewe fefin mi wor ar pwaracho me mirit usun Inach we Eve.”7
Ei porous a peseiei ne tipeoch pwe ina mwo ekkewe napanapen ach ei fansoun, a chommong popun sipwe pwapwa me epinukunukoch. Ua nuku ren unusen netipei pwe kich sister a wor rech ewe pochokun me ewe nuku epwe mut ngenikich ach sipwe akkufu ekkewe osukosuken ach manau non ekkei ranin soponon. Pwich Sheri Dew a makkei, “Ua nuku pwe ewe fansoun sia kaeo ne amuchu ach aurouren fefin mi ekkesiwin me aneasochis, ewe muun Kot epwe mwitir siwin.”8
Epwe wor nikitu ne achocho ach sipwe siwin me apwonueta ach pwon mi pin. Ach sipwe fori, mi auchea kich nengin me fefin sipwe kaeo ekkewe annukun ewe kapas allim mi auchea me epwe wor ach pochokunen kapasen pwarata usun ennetir. Mi wor unungat kinikin ua nuku pwe ir nongonongen kapasen pwarata mi pochokun me ua ekieki pwe ir mi auchea ngeni ach weweiti.
Akkaewin, sipwe etiwa auchean Kot Samach Ese Much me Noun we, Jises Kraist, ngeni ach nuku me manau ese much. Jises Kraist I ach Chon Amanau me Chon Angasano. Mi auchea sipwe kaeo me weweiti An Achasefan me ifa usun sipwe aea iteiten ran; aier ina ew me nein ekkewe auchean feioch a wor rech ach sipwe nom won ewe an mi wenechar. Mi auchea sipwe etiwa Jises Kraist pwe I ewe popunapen nenien appiru sipwe winiti usun. Mi auchea sipwe soposopono ne aiti ach famini me klas usun an Semach we kokkotun manau esemuch, minne mi pachenong ewe annukun Kraist.
Oruwan, mi murino sipwe weweiti auchean niwinsefaniton ewe annuk, tettenin, me kiien mumuta non ekkei ranin soponon. Mi auchea epwe wor ach kapasen pwarata pwe ewe Soufos Joseph Smith a kefinita me kapunguno me ren ewe Samon an epwe wato ei niwinsefanito me esinna pwe a etetteni ekkewe fin ewe Mwichefen anongonong won ewe tetten mi fis non an Kraist Mwichefen me nom.9
Me aunungatin, mi auchea sipwe kaeo me weweiti annukun tempel me pwon mi pin. Ewe tempel a amwochu nenien ionapen ach nuku mi fel, me ewe Samon a tingor pwe sipwe no non, ekipwichi, kaeo, me pwisin kutta auchean ngenikich. Epwe feito ewe fansoun sipwe weweiti pwe seni ekkewe annukun tempel, ewe manamanen Kot epwe pwano non manauach10me pokiten annukun tempel, sia tongeni mwoneta ren an Kot manaman me Itan epwe nonnom woch, An ning epwe pwennikicheno, me noun chon nang repwe tumunu kich.11 Ua ekieki ika kich mi unusen anongonong won manamanen ekkena pwon.
Pwii kana, pwan mwo ewe kukkunufoch me non ei mwich a tongeni etiwa wis non nuku me awora wisan mi auchea ne aueata ewe muun Kot. Semirit ra angei pwisin ar kapasen pwarata ren ar aneani are ausening ngeni ekkewe pukefel, iotek iteiten ran, angei ewe sakramen non ew napanap murino. Semirit meinisin me ekkewe fopun ra tongeni pesei pwinin famini me fiti. Oua tongeni akkom ne fotopukutiw nupwen ami famini ra chufengen ren iotekin famini. Ika mwo imwemi kewe rese unusoch, ami nenien appirun manauen ewe kapas allim a tongeni siwini manauen om famini me chiechiemi.
Mi auchea ekkewe fopun non ewe Mwichefen repwe apareni pwe ir mi auchea ngeni ewe angangen pristut ren manau esemuch nge esap ir chok chon katon me chon aninis. A wor wisemi me chon amwochu kiien ewe pristut ra ewisa ngenikemi wis ren ami oupwe chon emwen ren manaman me mumuta non ei angang. Nupwen oua apwonueta wisemi non presetensin klas me mwoneta non pekin ngun, aurour fengen, anisi chon om we klas, me kait fengeni ewe kapas allim, oua angei neniemi non ei angang iwe en me chienom kewe oupwe feioch.
Mi auchea fefin meinisn repwe apareni pwe ir mi auchea non ewe angangen ewe pristut. Fefin non ei Mwichefen ir preseten, chon aninis, sense, chon aurour, pwipwi, me in, me ewe muun Kot ese tongeni mwokut tiwenon chok ika sipwe uta me apwonueta wisach ren nuku. Fan ekkoch mi auchea sipwe weweiti met mi tufich.
Ua keran chok churi emon sister non Mexico ewe a weweiti ifa usun epwe apwonueta wisan ren nuku. Marfissa Maldonado a kokko ngeni an epwe asukuna ew klasin Sukunen Raninfel unungat ier a no. A wor 7 chon sukun ra fiti nupwen a kokko ngeni ewe wis, nge iei a wor 20 chon fifiti. Ua eisini, non ai ingeno, met a fori an awatteno chon an we klas. A apasa non tipetekison, “Oh, esap chok ngang. Meinisin chon ewe klas ra aninis.” Ra angang fengen ar kuna iten ekkewe rese fifiti me poputa ne feino tingorer repwe niwinsefan ngeni fan. pwan uor emon chon papatais pokiten ar achocho.
Sister Maldonado a forata ewe nenien chufengen won kampiuter ren iten chon an ewe klas a iteni “Ngang Emon Noun Kot,” me a kan pacheta ekiek me pukefel mi murino fan ekkoch non ew wik. A kan text ngeni noun chon sukun ren asaimen me pesepes. A mefi pwe mi auchea epwe poporous non napanap mi murino ngenir, me mi fisioch. A chok ureniei, “Ua tongei nei kewe chon sukun.” Ua tongeni mefi ena tong nupwen a ureniei usun ar achocho, me an nenien appiru a achema ngeniei usun met emon aramasen nuku me foffor a tongeni apwonueta non ei angang fiti aninisin ewe Samon.
Nouch serafo ra pwano ngeni kapaseis mi weires iteiten ran, me chommong me neich mi wor ach famini ra weires ne kutta ponuwer. Ewe porous mi och pwe mi wor ponuwen ekkewe kapaseis ra eis. Ausening ngeni ekkewe porous seni nouch sou emwen. Sia echimw ne kaeo me weweiti an Semach won Nang we kokkotun pwapwa. Sia fen echimw usun ekkewe nongonong non ewe taropwe an famini esinesin.12 Sia pesepes ne aiti me aea ekkei iran kapo ne annomu kich won ewe aan mi aukukkun me chokisikis.
Arap ngeni ew ier a no, ua churi emon inen ekkoch kukkun semirit ewe a finata an epwe mwoneta ne tumunu noun kewe semirit seni ekkewe chommongun pesepes mi ngaw ra pwano ngenir me won kampiuter me non sukun. Iteiten wik a finata ew itenap, napengeni ew minne mi kan cheewno won kampiuter, me a kan poporous won non ewe wik nupwen noun kewe ra kan kapaseis me a kan tumunuochu pwe repwe weweochuti ekkoch mettoch mi weires. A fori imwan epwe ew neni mi tumun ne epieta kapaseis me awora emwenin kapas allim.
Ua aureki pwe sia nonnom non ew sokkun neni kich mi opeseni assong minne fan ekkoch sia unusen epinengaw seni ach asukuna nongonong mi pung. Sa nikitano ach aiti nouch kewe fopun pwe ar amwoneta ngeni wisen in mi unusen auchea pokiten sise mochen asonga ekkewe rese pupunu, ekkewe rese tongeni nounou semirit, are sise mochen aramas repwe ekieki pwe kich chon eppeti fansoun mwach. Nge, menin sia pwan nikitano ach affata auchean sukun pokiten sise mochen pwarano pwe mi kan auchea seni apupunu. Sia epinengaw seni ach affata pwe Semach won Nang a awewei pupunu pwe nefinan emon mwan me emon fefin pokiten sise mochen asonga ekkewe mwan mi pwisin sani mwan me fefin sani fefin. Me menin sisap mefi mecheresin ach sipwe porous usun sokofesenin mwan me fefin ika nisou och.
Ennetin, pwi kana, sipwe tumunoch, nge sipwe pwan aea ach mirit me ach weweiti ewe kokkoten manau esemuch ne pwaracho me wenechar nupwen sipwe aiti nouch kewe semirit me serafo ekkewe auchean nongonongen ewe kapas allim ar repwe weweiti ne emweni ewe fonufan sia nonnom non. Ika sise aiti nouch kewe semirit me serafo annuk mi ennet—me aitir non fatafatoch—ewe fonufan epwe aitir an Setan chofona.
Ua tongei ewe kapas allimen Jises Kraist, me ua kinisou feinfeino ren ewe emwen, manaman, me aninis ua angei iteiten ran ren ai emon fopun pwon noun Kot. Ua pwarata pwe ewe Samon a fen afeiochu kich, kich fefin sia nonnom non ekkei fansoun osukosuk, ren ekkewe manaman meinisin, niffang, me pochokun mi auchea ngenikich ne anisi ne amwonetan ewe fonufan ngeni ewe Aruwen Wareton ewe Samon Jises Kraist. Ua iotek pwe sipwe kuna ennetin ach tufich me nikitu ne winiti fin nuku me pwaracho usun Samach won Nang a mochen sipwe winiti. Non iten Jises Kraist, amen.