Sawv Ntsug Khov Kho, cov Viv Ncaus Hauv Xi-oos
Kom thiaj ua tau cov neeg uas ua raws li tej kev khi lus uas hloov siab tiag tiag, peb yuav tsum kawm txog tej lus qhuab qhia ntawm txoj moo zoo thiab muaj zaj lus tim khawv txog qhov tseeb.
Zoo siab kawg uas tau tuaj koom ua ke hauv lub Tsev rau Rooj Sab Laj no nrog cov me nyuam ntxhais, cov ntxhais hluas, thiab cov poj niam ntawm lub Koom Txoos. Peb yeej paub hais tias muaj cov viv ncaus coob heev thoob plaws ntiaj teb uas tuaj koom ua ke saib tej no thiab, peb zoo siab kawg uas muaj lub cib fim rau peb los koom ua ke rau ib lub hom phiaj hmo no.
Lub Kaum Hli Ntuj xyoo 2006, Thawj Tswj Hwm Gordon B. Hinckley tau hais ib zaj lus hu tias “Sawv Kom Ntseg, cov Txiv Neej ntawm Vajtswv,” uas yog lub npe ntawm ib zaj nkauj uas sau thaum 1911.1 Nov yog ib qho hais kom cov txiv neej ntawm lub Koom Txoos sawv kom ntseg thiab coj kom zoo. Kuv pheej xav ntsoov txog zaj lus no thaum kuv thov Vajtswv saib kuv yuav tsum hais txog dab tsi rau nej.
Cov viv ncaus, peb nyob rau hauv ib sij hawm uas “muaj teeb meem loj heev.”2 Lub sij hawm no peb yeej paub hais tias yuav muaj los. Twb muaj lus ceeb toom thiab lus qhuab qhia tau ntev los lawm kom peb thiaj li paub npaj. Nyob hauv tshooj 8 ntawm phau Maumoos twb qhia txog peb lub caij nyoog. Nyob hauv tshooj no Maulaunais twb hais tias nws pom tau peb lub caij nyoog, thiab nws muaj kev ua rog thiab hais lus xaiv txog kev ua rog, tej liam sim, kev tua neeg, kev ua tub sab tub nyiag, thiab yuav muaj neeg hais rau peb hais tias tsis muaj kev yog thiab tsis yog ntawm Vajtswv hlo li. Nws piav txog cov neeg uas muab hlob, hnav tej ris tsho kim kim, thiab thuam kev ntseeg Vajtswv. Nws twb pom tau cov neeg uas xav yuav tej yam nyob hauv ntiaj teb xwb es cia “cov neeg xav tau kev pab, thiab cov neeg liab qab, thiab cov neeg txom nyem mus dhau”3 es tsis pom li.
Maulaunais nug ib lo lus txog peb—cov uas nyob rau lb sij hawm no. Nws hais tias, “Ua li cas nej txaj muag los ris Khetos lub npe?”4 Qhov no piav meej heev txog tej yam uas muaj txog kev ntseeg Vajtswv hauv peb lub ntiaj teb.
Phau Yauxej Xamiv—Mathais twb hais tias hauv hnub nyoog kawg txawm hais tias tus zoo tshaj plaws raws li kev khi lus5 yeej yuav raug dag ntxias. Cov neeg hauv kev khi lus no, yog cov me nyuam ntxhais, cov ntxhais hluas, thiab cov viv ncaus ntawm lub Koom Txoos uas twb ua kev cai raus dej thiab twb khi lus nrog lawv Leej Txiv Saum Ntuj Ceeb Tsheej. Twb yog peb los yeej yuav raug dag ntxias tau los ntawm tej kev qhia uas tsis muaj tseeb.
Cov viv ncaus, kuv yeej tsis ntseeg hais tias tej no yuav zoo tuaj yav tom ntej no. Yog hais tias tam sim no twb zoo li no lawm, peb yuav tsum npaj rau cov nag xob nag cua uas tseem yuav los nawb. Yuav yooj yim dhau yog hais tias peb poob siab xwb, tab sis peb yog neeg khi lus, peb yeej tsis poob siab li. Ib yam li Txwj Laug Gary E. Stevenson tau hais tias, “Leej Txiv Saum Ntuj Ceeb Tsheej txoj kev ua siab dawb pab peb ua neej rau tej lub sij hawm muaj teeb meem kuj yog kom peb ua neej nyob rau lub caij uas muaj txhij txhua thiab.”6 Kuv nyiam cov lus nplij siab no heev li.
Thawj Tswj Hwm Russell M. Nelson twb qhia rau peb ib xyoo tas los no hais tias: “Tej kev tawm tsam lub Koom Txoos, cov lus qhuab qhia, thiab peb txoj kev ua neej yuav loj zuj zus. Yog li ntawd, peb xav tau cov poj niam uas to taub Khetos cov lus qhuab qhia tiag tiag thiab yuav siv txoj kev to taub ntawd kom qhia thiab pab tu ib tiam neeg uas tsis xav ua txhaum. Peb xav tau cov poj niam uas muaj peev xwm pom tau txhua yam kev ntxias. Peb xav tau cov poj niam uas paub siv Vajtswv lub hwj chim uas Nws muab rau cov uas ua raws li lawv tej kev khi lus thiab cov uas ua siab loj thiab muaj kev siab hlub qhia txog lawv txoj kev ntseeg. Peb xav tau cov poj niam uas ua siab loj thiab muaj lub zeem muag li peb Niam Evas.”7
Cov lus no ua rau kuv xav hais tias txawm hais tias muaj tej yam phem los muaj ntau ntau yam zoo thiab ua rau peb muaj kev cia siab. Kuv ntseeg tias peb cov viv ncaus yeej muaj zog thiab muaj kev ntseeg uas yuav pab peb kov yeej tej kev cov nyom hauv lub neej hauv hnub nyoog kawg. Viv Ncaus Sheri Dew sau tseg hais tias, “Kuv ntseeg hais tias thaum uas peb xyaum tau los thuav lub hwj chim ntawm cov poj niam khi lus, ces Vajtswv lub nceeg vaj yuav hloov sai.”8
Yuav tsum rau siab kawg li thiaj muaj kev hloov siab los ntseeg thiab muaj kev khi lus. Kom ua tau li no, peb xav kom muaj cov me nyuam ntxhais thiab cov poj niam uas kawm txog tej lus qhuab qhia ntawm txoj moo zoo thiab muaj zaj lus tim khawv txog qhov tseeb. Muaj peb qho uas kuv xav tias yog lub hauv paus ntawm kev muaj lus tim khawv muaj zog thiab tseem ceeb heev rau peb txoj kev to taub.
Qhov thib ib, peb yuav tsum paub hais tias Vajtswv peb Leej Txiv Nyob Mus Ib Txhis thiab Nws Leej Tub, Yexus Khetos, yog lub hauv paus ntawm peb txoj kev ntseeg thiab txoj kev cawm seej. Yexus Khetos yog peb tus Cawm Seej thiab tus Txhiv Dim. Peb yuav tsum kawm thiab to taub txog Nws txoj Kev Theej Txoj thiab paub siv rau hauv peb lub neej txhua hnub; kev hloov siab lees txim yog ib qho koob hmoov zoo heev rau peb txhua tus kom pab peb taug txoj kev ncaj ncaj. Peb yuav tsum pom hais tias Yexus Khetos yog peb tus yam ntxwv thiab peb yuav tsum coj raws li Nws. Peb yuav tsum rau qhia rau peb tsev neeg thiab tej hoob kawm txog peb Leej Txiv txoj kev cawm seej, uas muaj Khetos cov lus qhuab qhia.
Qhov thib ob, peb yuav tsum to taub tias yuav toob kas txoj kev txum tim txoj moo zoo rov qab los ntawm tej lus qhuab qhia, lub koom haum, thiab tej yawm sij ntawm txoj cai hauv hnub nyoog kawg. Peb yuav tsum muaj tim khawv hais tias tus Tswv tau xaiv tus Yaj Saub Yauxej Xamiv los txum tim txoj moo zoo rov qab los thiab paub hais tias nws yog tus uas txhim tsa cov poj niam ntawm lub Koom Txoos raws li Khetos lub KoomTxoos thaum ub.9
Thiab qhov thib peb, peb yuav tsum kawm thiab to taub tej kab ke thiab kev khi lus ntawm lub tuam tsev. Lub tuam tsev yog lub hauv paus ntawm peb txoj kev ntseeg dawb huv, thiab tus Tswv txib kom peb mus rau hauv, xav txog, kawm thiab nrhiav tej kev tseem ceeb rau peb. Peb yuav rais los to taub hais tias los ntawm tej kab ke ntawm lub tuam tsev muaj Vajtswv tej hwj chim los rau hauv peb lub neej10 thiab vim tej kab ke ntawm lub tuam tsev peb muaj Vajtswv lub hwj chim thiab Nws lub npe yuav nyob ntawm peb, Nws lub yeeb koob yuav nyob ib ncig peb, thiab Nws cov tim tswv yuav saib xyuas peb.11 Peb puas yuav xav txog tej hwj chim ntawm cov lus cog tseg no.
Cov viv ncaus, txawm hais tias tus me nyuam ntxhais me tshaj plaws hauv hoob no los yeej muaj kev ntseeg sawv khov kho thiab los txhim tsa tau Vajtswv lub nceeg vaj. Cov me nyuam yuas pib muaj lus tim khawv thaum lawv nyeem los sis mloog vaj lub kub, thov Vajtswv txhua hnub, thiab noj lub cim nco txog raws li kev tsim nyog. Cov me nyuam yaus thiab cov ntxhais hluas yeej yaum kom muaj tsev neeg hmo ua ke thiab koom tes pab. Nej ua thawj twg los txhos cuag thaum nej tsev neeg yuav koom ua ke thov Vajtswv. Txawm hais tias nej lub tsev tsis zoo tag nrho, los nej tus yam ntxwv ntawm kev ntseeg hauv txoj moo zoo yuav pab tau nej tsev neeg thiab phooj ywg.
Cov ntxhais hluas ntawm lub Koom Txoos yuav tsum saib lawv tus kheej ua ib tug los koom txoj kev cawm seej raws li lub pov thawj hwj qhia es tsis txhob ua tus tuaj sab nraud saib xwb. Nej raug hu los ua hauj lwm thiab twb yog cov uas muaj lub pov thawj hwj uas tuav cov yawm sij foom koob hmoov rau nej kom muaj hwj chim thiab muaj cai los ua nej txoj hauj lwm no. Thaum nej rau siab ua nej txoj hauj lwm hauv tej pawg thawj tswj hwm thiab npaj los sib tham ua ke, saib xyuas cov neeg hauv nej hoob, qhia txoj moo zoo ces twb yog nej pab ua txoj hauj lwm lawm ces nej thiab nej cov phooj ywg yuav tau koob hmoov.
Tag nrho cov poj niam yuav tsum xav tias lawv yog ib co pab ua txoj hauj lwm ntawm lub pov thawj hwj. Cov poj niam ntawm lub Koom Txoos twb yog cov thawj tswj hwm, cov pab cuam, cov nai khus, cov viv ncaus, cov niam tsev ces Vajtswv lub nceeg vaj yuav ua tsis tau hauj lwm yog hais tias peb tsis sawv khov kho thiab ua peb tej hauj lwm. Qee zaum peb yuav tsum pom lub hom phiaj hais tias peb yuav tsum ua li cas.
Tsis ntev tas los no kuv tau ntsib ib tug viv ncaus nyob hauv Mexico uas to taub hais tias kev ua nws txoj hauj lwm nrog kev ntseeg yog ua li cas tiag. Peb xyoo tas los no Marfissa Maldonado raug hu los qhia cov hluas hauv Hnub Caiv Kev Kawm Vaj Lug Kub. Thaum nws nyuam qhuav raug hu los ua txoj hauj lwm no, nws muaj 7 leej tub kawm xwb, tab sis tam sim no nws muaj 20 leej uas tuaj feem ntau. Kuv nug nws saib nws tau ua li cas kom thiaj muaj cov tub kawm tuaj coob ua luaj li. Nws hais tias, “Tsis yog kuv ib leeg xwb. Tag nrho cov tub kawm pab thiab.” Lawv pom cov npe rau cov neeg uas tsis tshua tuaj ces peb mus caw cov neeg no kom rov qab tuaj hauv lub koom txoos. Vim lawv txoj kev pab no kuj muaj neeg ua kev cai raus dej thiab.
Viv Ncaus Maldonado npaj ib qho kev tshaj tawm hauv computer rau nws hoob es hu ua “Kuv Yog Vajtswv Ib tug Me Nyuam,” nws rau siab sau tej lus zoo thiab tej vaj lug kub rau hauv no ob peb zaug tauj ib lim piam. Nws yeej rau siab sau ntawv hauv xov tooj mus yaum nws cov tub kawm. Nws xav hais tias tseem ceeb heev uas yuav tsum tiv tauj lawv raws li tej yam uas lawv nyiam, thiab ua li ntawd yeej pab zoo. Nws hais tias, “Kuv hlub kuv cov tub kawm.” Kuv pom tau hais tias nws hlub lawv, thiab nws tus yam ntxwv ua rau kuv xav txog tias ib tug neeg muaj kev ntseeg thiab nws ua tau txoj hauj lwm pab tus Tswv npaum li cas.
$Peb cov hluas tab tom muaj tej lo lus nug nyuab heev thiab muaj peb coob tug muaj cov neeg uas peb hlub uas yeej muaj lus nug ntau yam. Zoo heev uas yeej muaj lus teb rau cov lus nug. Mloog cov lus uas peb cov thawj coj hais rau peb. Twb hais rau peb hais tias kom kawm thiab to taub peb Leej Txiv Saum Ntuj Ceeb Tsheej txoj hau kev rau kev zoo siab. Twb hais kom peb nco ntsoov txog tej ntsiab cai uas nyob hauv tsev neeg zaj lus tshaj tawm.12 Twb yaum kom peb qhia thiab siv tej kev pab no los pab peb kom peb taug txoj kev ti thiab nqaim.
Ib xyoo tas los no kuv tau mus ntsib ib leej niam uas txiav txim siab tias nws yuav pab tiv thaiv nws cov me nyuam tawm tsam tej yam phem uas lawv pom nyob online thiab tom lub tsev kawm ntawv. Leej niam no xaiv ib lub ntsiab lus txhua lub lim piam, feem ntau yog ib yam uas tib neeg sib tham ntau txog online, thiab thaum tej lub sij hawm zoo nyob rau lub lis piam ntawd nws mam li nrog nws cov me nyuam sib tham txog lub ntsiab lus ntawd, es lawv mam li nug nws txog lub ntsiab lus ntawd, kom lawv thiaj kawm tau zoo thiab ntxaws ntxaws txog lub ntsiab lus uas nws xaiv ntawd. Nws npaj ua rau nws lub tsev ua ib qho chaw puaj phais nug tej yam ntawm niam txiv thiab sib tham sib qhia txog txoj moo zoo.
Kuv txhawj tsam peb ua neej nyob es peb tsis xav hais lus siab leej twg ces qee zaum peb tso tseg tsis qhia tej ntsiab cai zoo. Peb tsis qhia peb cov ntxhais hluas hais tias txoj kev npaj ua niam tsev tseem ceeb heev vim peb tsis xav tub qaug lawv cov uas tseem tsis tau yuav txiv, los yog cov uas muaj me nyuam tsis tau, los yog peb tsis xav kom lwm tus neeg xav tias peb tab kaum peb cov ntxhais tej hauj lwm ua nyob rau yav tom ntej. Hos hais txog lwm yam, tej zaum peb yuav tsis qhia saib txoj kev kawm ntawv tseem ceeb npaum li cas vim peb tsis xav qhia hais tias txoj kev kawm ntawv tseem ceeb dua txoj kev ua txij ua nkawm. Peb tsis xav tshaj tawm hais tias peb Leej Txiv Saum Ntuj Ceeb Tsheej muab txoj kev ua txij ua nkawm txhais ua ib txoj kev sib txis ntawm ib tug txiv neej thiab ib tug poj niam vim peb tsis xav tub qaug cov neeg uas yog txiv neej nyiam txiv neej thiab poj niam nyiam poj niam. Thiab tej zaum peb yuav tsis xav sib tham txog tej yam hais txog poj niam thiab txiv neej thiab saib txoj kev ua niam txiv zoo zoo li cas.
Tiag tiag, kuv cov viv ncaus, peb yuav tsum txawj xav txog lwm tus neeg, tiam sis tsim nyog peb kuj siv peb lub laj lim tswv yim thiab qhov uas peb to taub txog txoj kev cawm seej kom ua siab loj thaum peb qhia peb cov me nyuam thiab cov tub hluas ntxhais hluas tej ntsiab cai ntawm txoj moo zoo uas lawv yuav tsum to taub kom thiaj ua neej nyob hauv lub ntiaj teb no. Yog tias peb tsis qhia peb cov me nyuam thiab cov tub hluas ntxhais hluas tej lus qhuab qhia muaj tseeb—thiab qhia tej ntawd meej meej—lub ntiaj teb yuav qhia lawv Ntxwg Nyoog tej lus dag.
Kuv nyiam Yexus Khetos txoj moo zoo heev, thiab kuv ua Vajtswv tsaug rau tej lus qhia, tej hwj chim, thiab tej kev pab txhua hnub uas kuv txais ua Vajtswv ib tug ntxhais uas tau nrog Nws sib khi lus lawm. Kuv ua tim khawv tias tus Tswv tau foom koob hmoov rau peb, ua poj niam ua neej nyob hauv tej sij hawm muaj teeb meem ntau no, kom muaj hwj chim, txiaj ntsim, thiab lub dag zog uas peb xav tau kom thiaj npaj rau Yexus Khetos txoj Kev Los Zaum Ob. Kuv thov Vajtswv pab peb pom tau hais tias peb ua tau npaum li cas thiab sawv los mus ua ib tsoom poj niam muaj siab ntseeg thiab ua siab loj kom thiaj pab tau peb Leej Txiv Saum Ntuj. Los ntawm Yexus Khetos lub npe, amees.