Waklinqex sa’ kawilal, ex komon ixq re Sion

K’a’jo’ xsahil naq wanko chi ch’utch’u sa’ li ch’utamil kab’l a’in rik’ineb’ li kok’ ixqa’al, eb’ li saaj ixq, ut eb’ li ixq re li Iglees. Jo’kan ajwi’ wan sa’ li qach’ool naq k’iila mil li ch’uut chi ixq ch’utch’uukeb’ sa’ chixjunil li ruchich’och’ chirilb’al li ch’utam a’in, ut ninb’antioxi naq wan lin hoonal ut eb’ li k’anjeleb’aal li neke’xk’e naq tooruuq chi wank chi junajinb’ilo sa’ komonil ut sa’ qak’a’uxl sa’ li q’ojyin a’in.

Sa’ li po octubre re 2006, li Awa’b’ej Gordon B. Hinckley kixk’e jun li aatin “Waklinqex, ex winq re Dios.” Li raatin kixk’ab’a’i’ chi kama’an xb’aan jun li b’ich tz’iib’anb’il sa’ 1911.¹ A’an jun li b’oqb’al chi k’anjelak reheb’ li winq re li Iglees re te’wakliiq ut te’chaab’ilo’q. Li aatin a’an kikana sa’ lin k’a’uxl naq yookin chi tijok re xnawb’al k’a’ru tinwotz eerik’in.

Ex komon ixq, yooko chixnumsinkileb’ “li xiwxiw kutan.”² Li k’a’ru yooko chixnumsinkil ink’a’ raj naxsach qach’ool. Ak yeeb’il chaq qe chiru naab’al mil chihab’ jo’ chaq’rab’ink ut q’usum re naq kawresinb’ilaqo. Li ch’ol 8 re laj Mormon naxch’olob’ chi saqen li k’a’ru taak’ulmanq sa’ li qakutan. Sa’ li ch’ol a’in, laj Moroni naxye naq kiril li qakutan ut kiril li ninqi pleet ut resilebʼ li pleet, li ninqi muxuk, li kamsink, li elq’ak, ut eb’ li tenamit li neke’xye qe naq moko wan ta li us malaj li ink’a’ us sa’ rilob’aal li Dios. A’an naxye resileb’ li tenamit numtajenaq lix qʼetqʼetileb’, chapchookeb’ rik’in roksinkil li aq’ej terto xtz’aq, ut li neke’reetz’u li paab’aal. Nak’ute’ chiru jun li tenamit li q’axal xikenaqeb’ xch’ool rik’in li k’a’aq re ru wan sa’ ruchich’och’, jo’kan naq neke’xkanab’ “li maak’a’eb’ wan re, ut li t’ust’u, ut li yaj, ut li tawasinb’il chi nume’k chiruheb’,”³ ut ink’a’ neke’xk’e reetaleb’.

Laj Moroni naxpatz’ qe jun patz’om aj tz’ilol rix qach’ool—laa’o li wanko sa’ xq’ehil kutan a’in. A’an naxye, “Kʼaʼut naq nekexxutaanak chixkʼulbʼal saʼ eebʼeen lix kʼabʼaʼ li Kristo?”⁴ Lix jitom a’in naxtz’il rix chi tz’aqal naq yoo chi numtaak li ruchich’och’il na’leb’ re li qakutan.

Li hu Jose Smith—Mateo naxye naq sa’ roso’jikeb’ li kutan, eb’ a’an ajwi’ “li sik’b’ileb’ ru jo’ chanru li sumwank”⁵ b’alaq’inb’ilaqeb’. Li ani wankeb’ sa’ sumwank a’aneb’ ajwi’ li kok’ ixqa’al, li saaj ixq, ut li komon ixq re li Iglees li kub’enaqeb’ xha’ ut wankeb’ sa’ sumwank rik’in lix Choxahil Yuwa’. Jo’kan ajwi’ laa’o wanko sa’ xuwajel chi b’alaq’iik xb’aaneb’ li k’utum aj b’alaq’.

Ex komon ixq, moko ninpaab’ ta naq li qakutan taa’chaab’ilo’q sa’ li chalel. Wi li k’a’ru yoo chi uxmank anajwan naxk’ut qe, ajb’il ru naq taqakawresi qib’ chirixeb’ li kaq-sut-iq’ nokohe’royb’eni. Moko ch’a’aj ta raj xkanab’ankil qib’ rik’in roso’jik qach’ool, a’b’anan jo’ tenamit re’ li sumwank, maajun wa taqakanab’ qib’ chixsachb’al li qayo’onihom. Jo’ kixye chaq li Elder Gary E. Stevenson: “Lix chaab’ilal q’ajkamunk re li qaChoxahil Yuwa’ rik’in naq yo’yooko sa’ li xuwajel kutan a’in, a’an ajwi’ naq wanko sa’ lix kʼojlajik lix tzʼaqalil ru li kutan.”⁶ K’a’jo’ naq nak’ojob’aak inch’ool rik’in li esil a’an.

Jun chihab’ chaq anajwan, li Awa’b’ej Russell M. Nelson kixye qe: “Te’k’ihanq li pleet chirix li Iglees, lix tzol’leb’, ut chanru naqab’eresi qib’. Jo’kan ut, ajb’il ru naq eb’ li ixq te’xkawresi rib’ chixtawb’al ru lix tzol’leb’ li Kristo ut naq te’roksi lix nawom re xtzolb’aleb’ ut xtenq’ankil xk’iresinkileb’ jun tasal tenamit kawaqeb’ chiru li maak. Ajb’ileb’ ru li ixq li te’ruuq chixk’eeb’al reetal li b’alaqink’ sa’ chixjunil naxk’ut rib’. Ajb’ileb’ ru li ixq li neke’xnaw chanru xtawb’al li wankil naxk’e chaq qe li Dios chiruheb’ li neke’paab’an re lix sumwank ut li neke’xwotz lix paab’ahom rik’in xk’eek’ookilal xch’ool ut tz’aqal rahok. Ajb’ileb’ ru li ixq li wan rik’ineb’ li kawil ch’oolej ut li rilob’aal li qana’ li xEva.”⁷

Li esil a’in naxk’e inkawilal naq us ta li cha’ajkilal sa’ li qakutan a’in, wan ajwi’ naab’al li taasaho’q wi’ qach’ool chi wan qayo’onihom. Ninpaab’ chi anchal inch’ool naq laa’o, li komon ixq, wan qakawilal ut li qapaab’aal li tixk’e qe li qametz’ew re xnumsinkile’b li ch’a’ajkilal sa’ li roso’jikeb’ kutan a’in. Li Herman Sheri Dew kixtz’iib’a, “Ninpaab’ naq sa’ li hoonal taqatzol wi’ rach’ab’ankil lix tz’aqalil li wankilal reheb’ li ixq ak neke’jale’ xch’ool ut neke’xpaab’ li sumwank, lix awa’b’ejihom li Dios taajalmanq sa’ jun xnumik jun li q’ojyin.”⁸

Na’ajman ru naq taqak’e qach’ool sa’ komonil re naq taajale’q qach’ool ut naq taqapaab’ li qasumwank. Re xb’aanunkil, aajel ru kama’anaqo li saaj ixq ut ixq li neke’xtzol li aajel ru tzol’leb’ re li evangelio ut wankeb’ xnawom xch’ool li ink’a’ na’eek’aman chirix lix yaalalil. A’aneb’ a’in oxib’ li na’leb’ li nink’oxlaheb’ jo’ lix xe’el li nawom ch’oolej kaweb’ ut li nink’oxlahe’ jo’ aajel ru choq’ lix tawom qu.

Xb’een, tento taqak’e reetal naq li Dios li qaJunelikil Yuwa’b’ej ut li Ralal, li Jesukristo, wankeb’ sa’ xyi li qapaab’al ut li qakolb’al. Li Jesukristo a’an laj Kolol qe ut aj Tojol qix. Aajel ru chiqu xtzolb’al ut xtawb’al ru lix tojb’al rix li maak ut chanru roksinkil rajlal kutan; li jalb’a-k’a’uxlej a’an jun chiruheb’ li xnimal ru osob’tesink li wan qe chiqajunqal re naq tookanaaq sa’ xyi li b’e. Na’ajman chiwu rilb’al li Jesukristo jo’ li xb’eenil k’utb’il eetalil choq’ qe ut li reetalil chanru taqayal qaq’e chi wulak jo’ naraj a’an. Na’ajman chiqu xtzolb’aleb’ rajlal li qajunkab’al ut li qatzoleb’aal chirix li nimla k’uub’anb’il na’leb’ re li kolb’a’-ib’ re li qaChoxahil Yuwa’, li wan wi’ lix tzol’leb’ li Kristo.

Xkaab’, na’ajman chiqu xtawb’al ru lix aajelil ru lix k’ojob’ankil wi’chik lix tzol’leb’, lix k’uub’lajik, ut lix lawil re wankilal sa’ roso’jikeb’ li kutan a’in. Tento taawanq lix nawom qach’ool naq li profeet aj Jose Smith kisik’e’ ru ut kik’ojob’aak xb’aan li Qaawa’ re xk’eeb’al chi uxmank li k’ojob’ank wi’chik ut tento taqak’e reetal naq a’an kixk’uub’eb’ li ixq re li Iglees jo’ chanru k’uub’anb’ileb’ chaq sa’ lix Iglees li Kristo sa’ najter q’e kutan.⁹

Ut rox, na’ajman chiqu xtzolb’aleb’ ut xtawb’aleb’ ru li k’ojob’anb’il k’anjel ut li sumwank re li santil ochoch. Li santil ochoch wan xna’aj sa’ xyi li qapaab’ahom jwal loq’eb’, ut li Qaawa’ naxpatz’ naq tooxik, took’oxlaq sa’ qach’ool, tootzoloq, ut taqataw xyaalal ut taqoksi sa’ junjunqal sa’ li qayu’am. Toowulaq chixtawb’al ru naq rik’ineb’ li k’ojob’anb’il k’anjel re li santil ochoch, nak’utman li wankilal re choxahilal sa’ li qayu’am¹⁰ ut xb’aaneb’ li k’ojob’anb’il k’anjel re li santil ochoch, tooruuq chixkawresinkil qib’ rik’in lix wankilal li Dios, ut lix k’ab’a’ taawanq sa’ qab’een, lix loq’alil toxsuti, ut k’eeb’ilaq qatenq’ankil xb’aaneb’ lix anjel.¹¹ Ninpatz’ ma yooko chiroksinkil chi tz’aqal lix wankilal li yeechi’ihom a’an?

Ex komon ixq, us ta li ixqa’al q’axal saaj sa’ li ch’utam a’in neke’ru chi wakliik sa’ paab’aal ut chixb’aanunkil junaq k’anjel jwal nim ru sa’ xwaklesinkil lix awa’b’ejihom li Dios. Eb’ li kok’al neke’ok chixtawb’al lix nawom xch’ool naq neke’ril malaj neke’rab’i li raatinuleb’ li loq’laj hu, naq neke’tijok rajlal kutan, ut naq neke’okenk sa’ li loq’laj wa’ak chi anchaleb’ xch’ool. Chixjunileb’ li kok’al ut eb’ li saaj ixq naru te’xwaklesi xch’ool lix junkab’al naq te’xb’aanu li q’ojyin re li junkab’al ut naru te’okenq chi tz’aqal re ru. Naru naq laa’aqex li xb’een nawiq’la naq lee junkab’al neke’xch’utub’ rib’ chi tijok. Us ta wan b’ayaq li ch’a’ajkilal sa’eb’ lee rochoch, li k’a’ru nekeb’aanu chiruheb’ chixyu’aminkil li evangelio chi anchal eech’ool naru tixtoch’ lix yu’ameb’ lee junkab’al ut lee ramiiw.

Eb’ li saaj ixq re li Iglees tento te’ril rib’ jo’ aj tz’aqonel aajel ru sa’ li k’anjel re li kolb’a-ib’ b’eresinb’il xb’aan li tijonelil, ut ink’a’ ajwi’ jo’ aj ilonel ut aj taaqenel. Laa’ex wan lee b’oqb’il k’anjel ut xaqab’anb’ilex xb’aan li ani neke’k’amok re li tijonelil re k’anjelak jo’ aj jolominel k’eeb’il xwankil sa’ li k’anjel a’in. Naq nekenimob’resi lee b’oqb’il k’anjel sa’eb’ lee awa’b’ejil re yalaq ch’utam ut nekekawresi eerib’ sa’ musiq’ej, naq nekek’uub’a eena’leb’ sa’ komonil, naq nekeye’ lee ruq’ re xtenq’ankileb’ lee komon sa’ li tzoleb’aal, ut naq nekek’ut li evangelio li jun rik’in li jun chik, yookex chixtawb’al lee na’aj sa’ li k’anjel a’in, ut laa’ex jo’ ajwi’ lee komon tex’osob’tesiiq.

Chixjunileb’ li ixq tento te’ril rib’ jo’ aj tz’aqonel sa’ li k’anjel re li tijonelil. Eb’ li ixq re li Iglees a’aneb’ awa’b’ej, aj tenq’ aj k’ehol na’leb’, aj k’utunel, komon reheb’ ch’uut, komon ixq, ut na’b’ej, ut lix awa’b’ejihom li Dios ink’a’ naru chi b’eek wi ink’a’ nokowakli ut taqab’aanu li qak’anjel rik’in paab’aal. Wan naq ka’ajwi na’ajman chiqu naq taqanimob’resi li qilom re li k’a’ru naru xb’aanunkil.

Jalam-uuch

Li Hermana Maldonado rik’in li Hermana Oscarson

Toje’ xinnaw ru jun li komon ixq re Mejico li naxtaw ru li k’a’ru naraj xyeeb’al xnimob’resinkil lix b’oqb’il k’anjel rik’in paab’aal. Li xMarffissa Maldonado, oxib’ chihab’ anajwan naq kib’oqe’ jo’ aj k’utunel sa’ li Dominkil Tzoleb’aal rik’ineb’ li saaj. Wuqub’eb’ aj tzolom wankeb’ naq kib’oqe’, a’ut anajwan wankeb’ jun may li neke’wulak rajlal. Chi sachso inch’ool, xinpatz’ re k’a’ru xb’aanu re naq xniman li rajlil. Rik’in xtuulanil xch’ool xye: “Ay, moko injunes ta laa’in. Chixjunileb’ li wankeb’ wik’in xe’tenq’an.” Sa’ komonil, xe’ril lix k’ab’a’eb’ li ink’a’ yookeb’ chi wulak ut xe’ok sa’ komonil chi xik ut chixb’oqb’aleb’ naq te’sutq’iiq sa’ li Iglees. Jo’kan ajwi’ wankeb’ ani ke’kub’e xha’ xb’aan li k’anjel xe’xb’aanu.

Jalam-uuch

Tzoleb’aal sa’ li Dominkil Tzoleb’aal sa’ Mejico

Li Hermana Maldonado xk’uub’ jun na’ajej sa’ li internet choq’ reheb’ li komon sa’ lix tzoleb’aal ut xk’ab’a’i “Laa’in jun ralal li Dios,” ut a’an naxtz’iib’a li musiq’anb’il aatin ut li aatin wankeb’ sa’eb’ li loq’laj hu junjunqeb’ li sut chiru li xamaan. Rajlal ajwi’ naxtaqla li texto reheb’ li komon sa’ lix tzoleb’aal ut naxk’eheb’ xk’anjel ut naxwaklesiheb’ xch’ool. A’an nareek’a naq aajel ru raatinankileb’ jo’ chanru nawulak chiruheb’, ut chaab’il yoo chi elk. A’an yal xye we, “Ninraheb’ lin tzolom.” Xinru chireek’ankil lix rahom naq yoo chaq chixyeeb’al we lix k’anjeleb’, ut li k’a’ru naxk’ut rik’in lix k’anjel xjultika we li k’a’ru naru xb’aanunkil jun li komon li wan xpaab’aal ut nak’anjelak rik’in lix tenq’ankil li Qaawa’.

Eb’ li qasaaj ixq ut winq, rajlal kutan neke’xk’ul li patz’om jwal ch’a’aj xsumenkil, ut naab’alo laa’o wan qaraarookil komon li yookeb’ chixyalb’al xq’e re xtawb’al lix sumehom. Li chaab’il esil a’an naq wan lix sumehomeb’ lix patz’om. Ab’ihomaq resil li toje’ chaq xe’xye chaq eb’ laj jolominel qe. Yookeb’ chiqeek’asinkil chixtzolb’al ut xtawb’al ru lix k’uub’anb’il na’leb’ re sahil ch’oolejil re li qaChoxahil Yuwa’. Yookeb’ chiqajultikankil chirix li xb’eenil na’leb’ sa’ li jek’inb’il aatin chirix li junkab’al.¹² Nawaklesiik qach’ool chixtzolb’al ut roksinkileb’ li k’anjeleb’aal a’in jo’ jun che’ re b’isok re naq tookanaaq sa’ li laatz’ ut ka’ch’in ruhil b’e.

Toje’ chaq jun chihab’, kinch’utub’ wib’ rik’in jun na’b’ej toj ka’ch’ineb’ li ralal xk’ajol li kixk’e xch’ool chixkolb’aleb’ lix kok’al chiru li naab’al yib’ ru wankilal li neke’ril sa’ li internet ut sa’ lix tzoleb’aal. A’an naxsik rajlal xamaan jun na’leb’, rajlal jun na’leb’ li yookeb’ chi aatinak naab’al chirix sa’ li internet, ut a’an na’ok chi aatinak rik’ineb’ chiru li xamaan naq neke’ru lix kok’al chi patz’ok, ut naxyal xq’e chixsumenkil rik’in tiikil na’leb’ lix patz’omeb’ us ta a’an jwal ch’a’aj xsumenkil. A’an yoo chixb’aanunkil naq li rochoch a’an jun na’ajej kolko b’ar wi’ naru taapatz’manq li patz’om ut taawanq li chaab’il sumenk re li evangelio.

Wan ink’a’uxl naq yooko chi wank sa’ jun na’ajej b’ar wi’ ink’a’ neke’raj xrahob’tesinkil xch’ool anihaq ut chi kama’an moko naqak’ut ta li chaab’il na’leb’. Nokosach chixk’utb’aleb’ chiru li qasaaj ixq naq xkawresinkil rib’ chi wank choq’ na’b’ej, a’an jwal aajel ru xb’aanunkil ut ink’a’ naqab’aanu xb’aan naq ink’a’ naqaj xrahob’tesinkil xch’ool li ani maji’ neke’sumla, eb’ li ink’a’ neke’ru kanaak sa’ yu’am, malaj taa’ilmanq jo’ naq yooko chixminb’aleb’ ru. Chi junpak’al, nokoru ajwi’ chi sachk naq naqak’e qach’ool chixyeeb’al lix aajelil ru li tzolok xb’aan naq ink’a’ naqaj naq te’xk’oxla naq a’an jwal nim chik chiru li sumlaak. Naqakanab’ xyeeb’al naq li qaChoxahil Yuwa’ kixk’ut li sumlaak rik’in jun li winq ut jun li ixq, xb’aan naq ink’a’ naqaj xrahob’tesinkil xch’ooleb’ li neke’raj naq wan li winq rik’in winq malaj ixq rik’in ixq. Ut naru naq moko sa ta aatinak chirix li na’leb’ a’an.

Relik chi yaal, ex komon ixq, aajel ru naq ink’a’ taqarahob’tesi xch’ooleb’ li qakomon, a’ut tento ajwi’ naq wan qachaab’il na’leb’ ut xtawb’al qu chirix li k’uub’anb’il na’leb’ re li kolb’a-ib’ re naq kawaq qach’ool ut saqen ru li qaatin naq taqatzoleb’ li qalal k’ajol ut li saaj chirix li xb’eenileb’ na’leb’ re li evangelio li tento te’xnaw ru re naq te’b’eeq sa’ li ruchich’och’ wankeb’ wi’. Wi ink’a’ naqatzoleb’ li qalal k’ajol ut li saaj li yaalil tzol’leb’—ut naqak’ut chi saqen ru—li ruchich’och’ taatzoloq reheb’ lix tik’ti’ laj Satanas.

Ninra lix evangelio li Jesukristo, ut junelik tinb’antioxi xb’aan li b’eresihom, li wankilal, ut li tenq’ank nink’ul rajlal kutan jo’ rab’in li Dios sa’ li sumwank. Ninch’olob’ xyaalal eere naq osob’tesinb’ilo xb’aan li Qaawa’, jo’ ixq li wanko sa’eb’ li xuwajel q’e kutan, rik’in chixjunileb’ li wankilal, li maatan, ut li kawilal li aajeleb’ ru xtawb’al re xkawresinkil li ruchich’och’ choq’ re xkab’ xk’ulunik li Qaawa’ Jesukristo. Nintz’aama naq chiqajunilo taqil li qatz’aqal wankilal ut toowakliiq re toowulaq chi wank jo’ li ixqeb’ re paab’aal ut kawil ch’oolej jo’ naraj li qaChoxahil Yuwa’. Sa’ xk’ab’a’ li Jesukristo, amen.