ឱបងប្អូនស្ត្រីក្នុងស៊ីយ៉ូនអើយ ចូរក្រោកឡើងក្នុងភាពរឹងមាំ
ដើម្បីធ្វើជាពួកអ្នករក្សាសេចក្ដីសញ្ញាដែលបានប្រែចិត្តជឿ យើងត្រូវសិក្សាគោលលទ្ធិសំខាន់ៗនៃដំណឹងល្អ ហើយមានទីបន្ទាល់មិនងាករេពីសេចក្ដីពិតដ៏ពេញលេញរបស់ពួកគេ ។
ខ្ញុំមានអំណរដែលមកជួបជុំគ្នាក្នុងមជ្ឈមណ្ឌលសន្និសីទនេះជាមួយកុមារី យុវនារី និង ស្ត្រីក្នុងសាសនាចក្រ ។ យើងក៏ដឹងដែរថា មានក្រុមបងប្អូនស្រីរាប់ពាន់ក្រុមទៀតដែលជួបជុំគ្នាពាសពេញពិភពលោក មើលការចាក់ផ្សាយនេះ ហើយខ្ញុំមានអំណរគុណចំពោះឱកាស និង មធ្យោបាយដែល អនុញ្ញាតឲ្យយើងចូលរួមដោយសាមគ្គីភាព និង គោលបំណងនាល្ងាចនេះ ។
ក្នុងខែ តុលា ឆ្នាំ ២០០៦ ប្រធាន ហ្គរដុន ប៊ី ហ៊ិងគ្លី បានថ្លែងសុន្ទរកថាក្រោមចំណងជើងថា « ក្រោកឡើង ឱបុរសនៃព្រះអើយ » យកឈ្មោះតាមទំនុកតម្កើងនិពន្ធក្នុងឆ្នាំ ១៩១១ ។១ នោះជាការអំពាវនាវចំពោះបុរសក្នុងសាសនាចក្រឲ្យធ្វើសកម្មភាព ដោយក្រោកឡើង ហើយកែលម្អខ្លួន ។ កាលខ្ញុំអធិស្ឋានឲ្យដឹងថាត្រូវចែកចាយអ្វីជាមួយបងប្អូន នោះខ្ញុំនឹកឃើញសុន្ទរកថាមួយនេះ ។
បងប្អូនស្រីអើយ យើងរស់នៅក្នុង « គ្រាលំបាកណាស់ » ។២ ស្ថានភាពក្នុងជំនាន់យើងនេះមិនគួរជារឿងគួរឲ្យភ្ញាក់ផ្អើលនោះទេ ។ វាត្រូវបានព្យាករទុកច្រើនសហស្សវត្សរ៍ទុកជាការព្រមាន និង ការដាស់តឿន ដើម្បីឲ្យយើងអាចត្រៀមខ្លួន ។ ជំពូក ទី ៨ ក្នុងគម្ពីរមរមន ផ្ដល់ការបកស្រាយដ៏ជាក់ស្ដែងយ៉ាងរំជួលចិត្តអំពីស្ថានភាពក្នុងជំនាន់យើងនេះ ។ ក្នុងជំពូកនេះ មរ៉ូណៃមានប្រសាសន៍ថា លោកមើលឃើញជំនាន់យើងនេះ ដែលរួមមាន សង្គ្រាម និង ពាក្យចចាមអារ៉ាមអំពីសង្គ្រាម ការបំពុលយ៉ាងធំ ឃាតកម្ម ឆក់ប្លន់ និងមនុស្សដែលប្រាប់យើងថា គ្មានត្រូវ ឬខុសឡើយនៅចំពោះព្រះនេត្រព្រះ ។ លោកពិពណ៌នាអំពីមនុស្សដែលពេញដោយភាពឆ្មើងឆ្មៃ ខ្វាយខ្វល់តែរឿងសម្លៀកបំពាក់ថ្លៃៗ ហើយមើលងាយសាសនា ។ លោកប្រាប់អំពីមនុស្សដែលគិតតែរឿងលោកិយ រហូតដល់ទុកឲ្យ « អ្នកកម្សត់ទុគ៌ត និងអ្នកអាក្រាត និងអ្នកឈឺ និងអ្នកដែលរងទុក្ខវេទនាដើរទៅហួស »៣ ដោយពុំយកចិត្តទុកដាក់ ។
មរ៉ូណៃសួរសំណួរស្វែងយល់ខាងព្រលឹងអំពីយើង—ជាអ្នកដែលរស់នៅក្នុងជំនាន់នេះ ។ លោកសួរថា « ហេតុអ្វីក៏អ្នករាល់គ្នាខ្មាសអៀននឹងលើកដាក់លើខ្លួននូវព្រះនាមនៃព្រះគ្រីស្ទ ? »៤ ការចោទឡើងដូចនេះពិពណ៌នាយ៉ាងជាក់ស្ដែង អំពីស្ថានភាពលោកិយនេះដែលមិនជឿសាសនា ។
យ៉ូសែប ស្ម៊ីធ--ម៉ាថាយសរសេរថា នៅថ្ងៃចុងក្រោយ សូម្បីតែ « ពួករើសតាំង ស្របតាមសេចក្ដីសញ្ញា »៥ ក៏នឹងត្រូវគេបញ្ឆោតដែរ ។ បុគ្គលដែលស្របតាមសេចក្ដីសញ្ញារួមមានកុមារី យុវនារី និង បងប្អូនស្រីក្នុងសាសនាចក្រដែលបានជ្រមុជទឹក ហើយចុះក្ដីសញ្ញាជាមួយព្រះវរបិតាសួគ៌ ។ សូម្បីតែយើង ក៏ប្រថុយនឹងការដែលត្រូវគេបញ្ឆោតដោយការបង្រៀនក្លែងក្លាយដែរ ។
បងប្អូនស្រីអើយ ខ្ញុំមិនជឿថា ស្ថានភាពនោះនឹងរីកដុះដាលទៅមុខឡើយ ។ បើនិន្នាការបច្ចុប្បន្ននេះគឺជាទីសម្គាល់មួយ នោះយើងត្រូវត្រៀមខ្លួនទប់ទល់នឹងព្យុះដែលនឹងបក់បោកមក ។ វាស្រួលដើម្បីធ្លាក់ទៅក្នុងការអស់សង្ឃឹម ប៉ុន្តែក្នុងនាមជារាស្ត្រនៃសេចក្ដីសញ្ញា យើងមិនត្រូវអស់សង្ឃឹមឡើយ ។ ដូចអែលឌើរ ហ្គែរី អ៊ី ស្ទីវ៉ែនសុន មានប្រសាសន៍ថា « ការតបស្នងដ៏សប្បុរសរបស់ព្រះវរបិតាសួគ៌ចំពោះការរស់នៅក្នុងគ្រាលំបាក ក៏មានចំពោះការរស់នៅក្នុងកាលដ៏ពេញកំណត់ផងដែរ » ។៦ ខ្ញុំចូលចិត្តការលួងលោមចិត្តមកពីការថ្លែងនោះ ។
ប្រធាន រ័សុល អិម ណិលសុន មានប្រសាសន៍មួយឆ្នាំមុនដូចនេះ ៖ « ការវាយប្រហារទាស់នឹងសាសនាចក្រ គោលលទ្ធិ និងមាគ៌ានៃជីវិតរបស់យើង នឹងកើនឡើង ។ ដោយសាររឿងនេះ យើងត្រូវការស្ត្រីដែលមានការយល់ដឹងរឹងមាំអំពីគោលលទ្ធិនៃព្រះគ្រីស្ទ និងអ្នកដែលនឹងប្រើការយល់ដឹងនោះដើម្បីបង្រៀន និងជួយបីបាច់ដល់ជំនាន់ដែលកំពុងទប់ទល់នឹងអំពើបាប ។ យើងត្រូវការស្ត្រីដែលអាចទប់ទល់នឹងការបញ្ឆោតគ្រប់ទម្រង់ ។ យើងត្រូវការស្ត្រីដែលចេះទទួលព្រះចេស្ដាដែលព្រះធ្វើឲ្យមាន សម្រាប់អ្នករក្សាសេចក្ដីសញ្ញា និងអ្នកដែលបង្ហាញជំនឿរបស់ពួកគេដោយទំនុកចិត្ត និងសេចក្ដីសប្បុរស ។ យើងត្រូវការស្ត្រីដែលមានភាពក្លាហាន និងទស្សនវិស័យ របស់មាតាអេវ៉ារបស់យើង » ។៧
សារលិខិតនេះអះអាងដល់ខ្ញុំថា ទោះជាស្ថានភាពនៅជំនាន់យើងនេះដូចម្ដេចក្ដី ក៏យើងមានធនធានជាច្រើនដើម្បីរីករាយ ហើយមានសង្ឃឹមដែរ ។ ខ្ញុំជឿអស់ពីចិត្តថា យើងជាបងប្អូនស្រីមានភាពរឹងមាំពីកំណើត និង សេចក្ដីជំនឿដែលនឹងជួយយើងប្រឈមមុខនឹងឧបសគ្គក្នុងជីវិតរស់នៅនាថ្ងៃចុងក្រោយនេះ ។ ស៊ិស្ទើរ សឺរី អិល ឌូវ បានសរសេរថា « ខ្ញុំជឿថា ខណៈពេលដែលយើងរៀនដើម្បីបញ្ចេញឥទ្ធិពលរបស់ស្ត្រីដែលបានប្រែចិត្តជឿ ហើយបានរក្សាសេចក្ដីសញ្ញា នោះនគរព្រះនឹងរីកចម្រើនយ៉ាងរហ័ស » ។៨
វាតម្រូវឲ្យមានការប្រឹងប្រែងដោយយកចិត្តទុកដាក់ ដើម្បីបានប្រែចិត្តជឿ ហើយរក្សាសេចក្ដីសញ្ញា ។ ដើម្បីធ្វើដូចនេះ យើងត្រូវតែក្លាយជាកុមារី និង ស្ត្រីដែលសិក្សាគោលលទ្ធិសំខាន់ៗនៃដំណឹងល្អ ហើយមានទីបន្ទាល់ដ៏រឹងមាំអំពីភាពពេញលេញនៃក្ដីពិតរបស់គោលលទ្ធិទាំងនោះ ។ ខ្ញុំជឿថា មានចំណុចបីដែលជាគ្រឹះនៃទីបន្ទាល់ដ៏រឹងមាំ ហើយដែលខ្ញុំចាត់ទុកថាចាំបាច់ចំពោះការយល់ដឹងរបស់យើង ។
ទីមួយ យើងត្រូវទទួលស្គាល់សារៈសំខាន់នៃព្រះជាព្រះវរបិតាអស់កល្ប និង បុត្រាទ្រង់ ព្រះយេស៊ូវគ្រីស្ទ មានចំពោះសេចក្ដីជំនឿ និង ការសង្គ្រោះយើង ។ ព្រះយេស៊ូវគ្រីស្ទ គឺជាព្រះអង្គសង្គ្រោះ និង ព្រះប្រោសលោះយើង ។ យើងត្រូវសិក្សា ហើយយល់អំពីដង្វាយធួនទ្រង់ និង របៀបអនុវត្តវាប្រចាំថ្ងៃ ដ្បិតការប្រែចិត្តគឺជាពរជ័យមួយដ៏មហិមាដើម្បីយើងម្នាក់ៗបន្តនៅក្នុងផ្លូវសុចរិត ។ យើងត្រូវចាត់ទុកព្រះយេស៊ូវគ្រីស្ទជាគំរូសំខាន់ និង ជាបុគ្គលដែលយើងត្រូវប្រែក្លាយឲ្យដូច ។ យើងត្រូវបន្តបង្រៀនគ្រួសារ និងសិស្សអំពីផែនការនៃសេចក្ដីសង្គ្រោះដ៏មហិមារបស់ព្រះវរបិតា ដែលរួមមានគោលលទ្ធិនៃព្រះគ្រីស្ទ ។
ទីពីរ យើងត្រូវយល់អំពីតម្រូវការឲ្យមានការស្ដារឡើងវិញនៃគោលលទ្ធិ ការរៀបចំ និង កូនសោនៃសិទ្ធិអំណាចនៅថ្ងៃចុងក្រោយនេះ ។ យើងត្រូវមានសាក្សីមួយប្រាប់យើងថា ព្យាការី យ៉ូសែប ស្ម៊ីធ ត្រូវបានជ្រើសរើស ហើយតែងតាំងដោយព្រះអម្ចាស់ ដើម្បីនាំឲ្យមានការស្ដារឡើងវិញ ហើយត្រូវទទួលស្គាល់ថាលោកបានរៀបចំស្ត្រីក្នុងសាសនាចក្រឲ្យដូចនឹងសាសនាចក្រព្រះគ្រីស្ទកាលពីបូរាណ ។៩
ទីបី យើងត្រូវសិក្សា ហើយយល់អំពីពិធីបរិសុទ្ធក្នុងព្រះវិហារបរិសុទ្ធ និង សេចក្ដីសញ្ញានានា ។ ព្រះវិហារបរិសុទ្ធមានតួនាទីយ៉ាងសំខាន់ដល់ជំនឿដ៏ពិសិដ្ឋរបស់យើង ហើយព្រះអម្ចាស់ស្នើឲ្យយើងទៅ សញ្ជឹងគិត សិក្សា ហើយស្វែងរកអត្ថន័យផ្ទាល់ខ្លួន និង ការអនុវត្តដោយខ្លួនឯង ។ យើងនឹងយល់ថា តាមរយៈពិធីបរិសុទ្ធក្នុងព្រះវិហារបរិសុទ្ធ នោះព្រះចេស្ដានៃព្រះមានក្នុងជីវិតយើង១០ ហើយដោយព្រោះពិធីបរិសុទ្ធក្នុងព្រះវិហារបរិសុទ្ធ នោះយើងអាចបំពាក់ដោយព្រះចេស្ដាព្រះ និងព្រះនាមទ្រង់មកលើយើង សិរីល្អមានជុំវិញយើង ហើយទេវតាទ្រង់នៅថែរក្សាយើង ។១១ ខ្ញុំឆ្ងល់ថាតើយើងពឹងផ្អែកលើអំណាចនៃការសន្យានោះដែរឬទេ ។
បងប្អូនស្រីអើយ ទោះជាអ្នកមានអាយុក្មេងជាងគេនៅទីនេះក្ដី ក៏អ្នកអាចក្រោកឡើងក្នុងសេចក្ដីជំនឿ ហើយដើរតួយ៉ាងសំខាន់ក្នុងការស្ថាបនានគរព្រះដែរ ។ កុមារចាប់ផ្ដើមបង្កើនទីបន្ទាល់របស់ខ្លួនដោយការអាន ឬ ការស្ដាប់ព្រះគម្ពីរ ការអធិស្ឋានរាល់ថ្ងៃ ហើយទទួលទានសាក្រាម៉ង់តាមរបៀបដ៏មានអត្ថន័យ ។ កុមារ និង យុវនារីទាំងអស់អាចលើកទឹកចិត្តឲ្យធ្វើរាត្រីជួបជុំក្រុមគ្រួសារ និង ធ្វើជាអ្នករួមចំណែកពេញលេញ ។ អ្នកអាចធ្វើជាមនុស្សដំបូងដែលលុតជង្គង់នៅពេលគ្រួសារប្រជុំគ្នាអធិស្ឋាន ។ ទោះជាគ្រួសាររបស់អ្នកមិនល្អឥតខ្ចោះក្ដី គំរូរបស់អ្នកក្នុងការរស់នៅតាមដំណឹងល្អយ៉ាងស្មោះត្រង់ អាចមានឥទ្ធិពលលើជីវិតគ្រួសារ និង មិត្តភក្ដិរបស់អ្នក ។
យុវនារីក្នុងសាសនាចក្រត្រូវចាត់ទុកខ្លួនគេជាអ្នករួមចំណែកយ៉ាងសំខាន់ ក្នុងកិច្ចការនៃការសង្គ្រោះដែលដឹកនាំដោយបព្វជិតភាព ដោយមិនគ្រាន់តែធ្វើជាអ្នកឈរមើល និង អ្នកគាំទ្រឡើយ ។ អ្នកមានការហៅបម្រើ ហើយត្រូវបានញែកចេញដោយអ្នកកាន់កូនសោបព្វជិតភាព ដើម្បីកាន់តំណែងជាអ្នកដឹកនាំដែលមានអំណាច និង សិទ្ធិអំណាចក្នុងកិច្ចការនេះ ។ ពេលអ្នកតម្កើងការហៅរបស់អ្នកក្នុងគណៈប្រធានថ្នាក់ ហើយត្រៀមខ្លួនខាងវិញ្ញាណ ប្រឹក្សាជាមួយគ្នា ជួយសមាជិកក្នុងថ្នាក់ ហើយបង្រៀនដំណឹងល្អដល់គ្នាទៅវិញទៅមក នោះអ្នករួមចំណែកក្នុងកិច្ចការនេះ ហើយទាំងអ្នក និង មនុស្សដែលអ្នកបម្រើនឹងមានពរ ។
ស្ត្រីទាំងអស់ត្រូវចាត់ទុកខ្លួនឯងជាអ្នករួមចំណែកដ៏សំខាន់ក្នុងកិច្ចការបព្វជិតភាព ។ ស្ត្រីក្នុងសាសនាចក្រនេះគឺជាប្រធាន ទីប្រឹក្សា គ្រូបង្រៀន សមាជិកក្រុមប្រឹក្សា បងប្អូនស្រី និង ម្ដាយ ហើយនគរព្រះមិនអាចដំណើរការបានទេ លុះត្រាតែយើងក្រោកឡើង ហើយបំពេញករណីយកិច្ចដោយក្ដីជំនឿ ។ ពេលខ្លះ យើងត្រូវមានទស្សនៈកាន់តែច្បាស់អំពីអ្វីដែលអាចកើតមាន ។
ថ្មីៗនេះ ខ្ញុំបានជួបនឹងបងស្រីម្នាក់នៅប្រទេសម៉ិកស៊ិក ដែលយល់អត្ថន័យនៃការតម្កើងការហៅរបស់គាត់ដោយសេចក្ដីជំនឿ ។ ម៉ាហ្វីស្សា ម៉ាលដូណាដូ ត្រូវបានហៅឲ្យបង្រៀនថ្នាក់សាលាថ្ងៃអាទិត្យសម្រាប់យុវវ័យកាលពីបីឆ្នាំមុន ។ គាត់មានសិស្សនៅក្នុងថ្នាក់ ៧នាក់ ប៉ុន្តែឥឡូវនេះគាត់មានសិស្ស ២០នាក់ ។ ខ្ញុំបានសួរគាត់ដោយងឿងឆ្ងល់ ថាតើគាត់ធ្វើដូចម្ដេចដើម្បីឲ្យចំនួនសិស្សកើនឡើង ។ គាត់ឆ្លើយយ៉ាងសុភាពថា « មិនមែនខ្ញុំតែម្នាក់ទេ ។ សិស្សទាំងអស់បានជួយកិច្ចការនេះ » ។ ពួកគេបានមើលក្នុងបញ្ជីឈ្មោះសិស្សមិនសូវសកម្ម ហើយចាប់ផ្ដើមចេញទៅទាំងអស់គ្នាដើម្បីអញ្ជើញពួកគេត្រឡប់មកវិញ ។ ដោយសារតែការប្រឹងប្រែងនេះ ពួកគេក៏បានធ្វើបុណ្យជ្រមុជទឹកដែរ ។
បងស្រី ម៉ាលដូណាដូ បានបង្កើតទំព័រក្នុងបណ្ដាញសង្គមសម្រាប់សិស្សក្នុងថ្នាក់គាត់ឈ្មោះ « ខ្ញុំជាកូនរបស់ព្រះ » ហើយគាត់ចុះផ្សាយគំនិតខាងវិញ្ញាណ និង បទគម្ពីរបីបួនដងក្នុងមួយសប្ដាហ៍ ។ គាត់តែងផ្ញើសារទៅសិស្សគាត់ដោយមានលំហាត់ និង ការលើកទឹកចិត្ត ។ គាត់ដឹងថា វាសំខាន់ដែលត្រូវទាក់ទងតាមរបៀបដែលពួកគេចូលចិត្ត ហើយវាដំណើរការល្អ ។ គាត់ប្រាប់ខ្ញុំដោយសាមញ្ញថា « ខ្ញុំស្រឡាញ់សិស្សរបស់ខ្ញុំ » ។ ខ្ញុំអាចទទួលអារម្មណ៍នៃក្ដីស្រឡាញ់នោះ ពេលគាត់ប្រាប់ខ្ញុំអំពីការប្រឹងប្រែងរបស់ពួកគេ និង គំរូរបស់គាត់ ហើយវាបានរំឭកខ្ញុំអំពីអ្វីដែលបុគ្គលដែលមានក្ដីជំនឿ និង សកម្មភាពអាចសម្រេចក្នុងកិច្ចការនេះដោយមានជំនួយពីព្រះអម្ចាស់ ។
យុវវ័យយើងជួបប្រទះសំណួរពិបាកៗរាល់ថ្ងៃ ហើយយើងភាគច្រើនមានមនុស្សជាទីស្រឡាញ់ដែលមានការលំបាកក្នុងការស្វែងរកចម្លើយ ។ រឿងល្អនោះគឺថា មាន ចម្លើយសម្រាប់សំណួរដែលបានសួរ ។ ចូរស្ដាប់សារលិខិតថ្មីៗពីថ្នាក់ដឹកនាំ ។ យើងត្រូវបានលើកទឹកចិត្តឲ្យសិក្សា ហើយយល់ផែនការសុភមង្គលរបស់ព្រះវរបិតាសួគ៌យើង ។ យើងត្រូវបានរំឭកអំពីគោលការណ៍នានាក្នុងការប្រកាសអំពីក្រុមគ្រួសារ ។១២ យើងត្រូវបានលើកទឹកចិត្តឲ្យបង្រៀន ហើយប្រើប្រាស់ធនធាននានា ទុកជាបន្ទាត់ការពារយើងនៅលើផ្លូវតូច និង ចង្អៀត ។
ប្រហែលមួយឆ្នាំមុន ខ្ញុំបានជួបនឹងម្ដាយម្នាក់មានកូនតូចៗ ដែលបានសម្រេចរើសយកវិធីដ៏សកម្មមួយដើម្បីការពារកូនៗនាងឲ្យរួចផុតពីឥទ្ធិពលមិនល្អជាច្រើន ដែលមាននៅអ៊ិនធើរណែត និងនៅឯសាលា ។ រាល់សប្ដាហ៍នាងរើសយកប្រធានបទមួយ ជារឿយៗជាប្រធានបទដែលបង្កើតឲ្យមានការពិភាក្សាច្រើនលើអ៊ិនធើរណែត ហើយនាងបង្កើតឲ្យមានការពិភាក្សាដ៏មានអត្ថន័យរៀងរាល់ថ្ងៃ ជាពេលដែលកូនៗនាងអាចសួរសំណួរ ហើយនាងធ្វើឲ្យប្រាកដថា ពួកគេទទួលបានទស្សនៈស្មើភាពមួយលើបញ្ហាលំបាកជាញឹកញាប់ ។ នាងបានធ្វើឲ្យផ្ទះនាងក្លាយជាទីសុវត្ថិភាពដើម្បីសួរសំណួរ ហើយបង្រៀនដំណឹងល្អដ៏មានអត្ថន័យ ។
ខ្ញុំបារម្ភថា យើងរស់នៅក្នុងបរិយាកាសមួយដែលមិនចង់ឲ្យគេអន់ចិត្ត ដែលពេលខ្លះធ្វើឲ្យយើងមិនចង់បង្រៀនគោលការណ៍ពិត ។ យើងខកខានបង្រៀនយុវនារីយើងថា ការត្រៀមខ្លួនធ្វើជាម្ដាយគឺជារឿងសំខាន់ ព្រោះយើងមិនចង់ធ្វើឲ្យអ្នកដែលមិនរៀបការអន់ចិត្ត អ្នកដែលមិនអាចមានកូនបាន ឬ ចាត់ទុកថាការណ៍នេះជារឿងតឹងតែងសម្រាប់ជម្រើសពេលអនាគត ។ ម្យ៉ាងទៀត យើងក៏អាចខកខានក្នុងការគូសបញ្ជាក់ពីសារៈសំខាន់នៃការអប់រំ ព្រោះយើងមិនចង់ផ្ញើសារដែលថាវាសំខាន់ជាងការរៀបការ ។ យើងមិនចង់ប្រកាសថា ព្រះវរបិតាសួគ៌កំណត់អាពាហ៍ពិពាហ៍ថា ជារវាងបុរស និង ស្ត្រីទេ ព្រោះយើងមិនចង់ធ្វើឲ្យមនុស្សដែលប្រតិព័ទ្ធភេទដូចគ្នាអន់ចិត្ត ។ យើងអាចមានអារម្មណ៍មិនល្អពេលពិភាក្សាអំពីបញ្ហាតួនាទីភេទ ឬ ជីវិតផ្លូវភេទរឹងមាំ ។
ប្រាកដណាស់ បងប្អូនស្រីអើយ យើងត្រូវប្រើញាណឆាប់ស្គាល់របស់យើង តែក៏ប្រើការវិនិច្ឆ័យល្អ និង ការយល់ដឹងរបស់យើងអំពីផែនការសង្គ្រោះដែរ ដើម្បីឲ្យបានម៉ឺងម៉ាត់ ហើយមិនស្មុគស្មាញ នៅពេលយើងបង្រៀនកូនៗ និង យុវវ័យយើងអំពីគោលការណ៍ដំណឹងល្អចាំបាច់ ដែលពួកគេត្រូវតែយល់ដើម្បីតម្រង់ទិសដៅពិភពលោកដែលពួកគេរស់នៅ ។ បើយើងមិនបង្រៀនកូនៗ និង យុវវ័យយើងអំពីគោលលទ្ធិពិត—ឲ្យបានច្បាស់លាស់ទេ—នោះលោកិយនឹងបង្រៀនពួកគេអំពីការកុហករបស់សាតាំង ។
ខ្ញុំស្រឡាញ់ដំណឹងល្អនៃព្រះយេស៊ូវគ្រីស្ទ ហើយខ្ញុំមានអំណរគុណអស់កល្បជានិច្ចចំពោះទិសដៅ អំណាច និង ជំនួយដែលខ្ញុំទទួលបានរាល់ថ្ងៃក្នុងនាមជាបុត្រីក្នុងក្ដីសញ្ញានៃព្រះ ។ ខ្ញុំសូមថ្លែងទីបន្ទាល់ថា ព្រះអម្ចាស់បានប្រទានពរយើង ជាស្ត្រីរស់នៅក្នុងគ្រាលំបាកណាស់ ដោយមានគ្រប់ទាំងអំណាច អំណោយទាន និងភាពរឹងមាំចាំបាច់ដើម្បីជួយរៀបចំពិភពលោកសម្រាប់ការយាងមកជាលើកទីពីររបស់ព្រះអម្ចាស់យេស៊ូវគ្រីស្ទ ។ ខ្ញុំអធិស្ឋានសូមឲ្យយើងមើលឃើញសក្ដានុពលពិតរបស់យើង ហើយក្រោកឡើងធ្វើជាស្ត្រីដែលមានក្ដីជំនឿ និងភាពក្លាហានដែលព្រះវរបិតាសួគ៌យើងសព្វព្រះទ័យ ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។