Lanta Pará ku Forsa, Hermananan di Siòn

Ki goso e ta pa ta huntu den e Sentro di Konferensia aki ku e muchanan muhé, muhénan hóben, i muhénan di Iglesia. Nos tambe sa di e míles di otro gruponan di hermananan, huntá rònt mundu, mirando e konferensia aki, i mi ta gradesido pa e oportunidat i rekursonan ku ta permití nos pa ta huntu den unidat i propósito awe nochi.

Na òktober 2006, Presidente Gordon B. Hinckley a duná un diskurso yamá “Lanta Para, O Hòmbernan di Dios,”nombrá pa un himno di 1911.¹ E tabata un yamada pa akshon pa e hòmbernan di Iglesia pa lanta pará i mehorá nan mes. E diskurso ei a bin na mi mente ora mi a resa pa haña sa kiko pa kompartí ku bosonan.

Hermananan, nos ta biba den “temporadanan difísil.”² E kondishonnan di nos dia no mester ta un sorpresa pa nos. Nan a wòrdu profetisá hopi mil aña pasá komo un atvertensia i amonishon pa asina nos por ta prepará. E di 8 kapítulo di Mormon ta duna un deskripshon ku ta mortifiká eksakto di e kondishonnan di nos dia. Den e kapítulo, Moroni ta bisa ku el a wak nos dia, i e tabata inkluí gueranan i rumornan di gueranan, gran polushon, matamentu, hòrtamentu, i hendenan ku ta bisa nos ku no tin bon i malu den e wowonan di Dios. E ta deskribí hendenan kende ta yen ku orguyo, preokupá ku bistimentu di paña karu, i kende ta hasi bofon di religion. E la wak hende kende ta asina opseshoná ku kosnan di mundu ku nan ta laga “esun ku nesesidat, i esun sunú, i esun malu, i esun aflihí pasa [na] banda”³ sin nota nan.

Moroni ta puntra un pregunta ku ta buska nos alma—nos ku ta bibando den e temporadanan aki. E ta bisa, “Di kon boso tin bèrgwensa pa tuma riba boso e nòmber di Cristo?”⁴ E akusashon aki ta deskribí eksaktamente e kondishon di mundu ku ta birando mas i mas sekular.

Joseph Smith—Mateo ta indiká ku den e delaster dianan asta esnan “eligí … segun e kombenio”⁵ mes lo wòrdu engañá. Esunnan di e kombenio ta inkluí e muchanan muhé, e muhénan hóben, i e hermananan di Iglesia kende a wòrdu boutisá i a hasi kombenionan ku nan Tata Selestial. Asta nos ta na rísiko di wòrdu engañá pa siñansanan falsu.

Hermananan, mi no ta kere ku kondishonnan ta bai mehorá bayendo dilanti. Si tendensianan aktual ta un indikashon, nos mester prepará pa e mal tempunan ku ta dilanti nos. E lo tabata fásil pa tira nos mannan na laira ku desesperashon, pero komo hendenan di kombenio, nos nunka mester desesperá. Manera Elder Gary E. Stevenson a bisa, “Tata Selestial su kompenshion gèneroso pa biba den temporadanan difísil ta ku nos tambe ta biba den e kumplimentu di temporadanan.”⁶ Mi ta stimá e konsuelo di e deklarashon ei.

Presidente Russell M. Nelson a bisa nos un aña pasa: “Atakenan kontra di Iglesia, su doktrina i nos manera di bida lo bai oumentá. Pa motibu di esaki nos mester di muhénan ku tin un komprendementu sólido di e doktrina di Cristo i ku lo usa e komprendementu ei pa instruí i yuda lanta un generashon risistente pa piká. Nos mester di muhénan ku por detektá desepshon den tur su formanan. Nos mester di muhénan ku sa kon pa tin akseso na e poder ku Dios ta pone disponibel pa esnan ku ta tene nan kombenionan i pa esnan ku ta ekspresá nan kerensia ku konfiansa i karidat. Nos mester di muhénan ku tin e mesun kurashi i vishon ku nos Mama Eva.”⁷

E mensahe aki ta sigurá di nobo mi ku apesar di e kondishonnan di nos dia, nos tin hopi rasonnan pa regosihá i ta optimista. Mi ta kere ku henter mi kurason ku nos hermananan tin e forsa natural i fe ku ta permití nos pa enfrentá e desafionan di biba den e delaster dianan. Hermana Sheri Dew a skirbi, “Mi ta kere ku na e momentu ku nos ta siña pa laga los e influensia kompletu di muhénan kombertí i kende ta tene kombenionan, e reino di Dios lo kambia di biaha.”⁸

E lo tuma esfuerso di akuerdo mutuamente pa ta kombertí i tene nos kombenionan. Pa hasi esei, nos mester ta muchanan muhé i muhénan kende ta studia e doktrinanan esensial di e evangelio i tin un testimonio firme di nan berasidat. Tin tres áreanan mi ta kere ku ta fundamental pa testimonionan fuerte i ku mi ta konsiderá pa ta esensial pa nos komprendementu.

Di promé, nos mester rekonosé e posishon sentral di Dios nos Tata Eterno i Su Yu Hòmber, JesuCristo, pa nos fe i salbashon. JesuCristo ta nos Salbador i Redentor. Nos mester studiá i komprendé Su Ekspiashon i kon pa aplik’é kada dia; arepentimentu ta un di e bendishonnan mas grandi kada un di nos tin pa keda riba e kaminda. Nos mester wak JesuCristo komo nos ehèmpel primario di ken nos mester bira. Nos mester siña kontinuamente nos famianan i klasnan tokante nos Tata su gran plan di salbashon, lokual ta inkluí e doktrina di Cristo.

Di dos, nos mester komprendé e nesesidat pa e restourashon di e doktrina, organisashon, i yabinan di outoridat den e delaster dianan aki. Nos mester tin un testigu ku e Profeta Joseph Smith a wòrdu divinamente skohé i apuntá pa Señor pa trese pa dilanti e restourashon aki i rekonosé ku el a organisá e muhénan di Iglesia segun e organisashon ku a eksistí den Iglesia di Cristo antiguamente.⁹

I di tres, nos mester studiá i komprendé ordenansanan i kombenionan di tèmpel. E tèmpel tin un lugá na e sentro di nos kerensianan mas sagrado, i Señor ta puntra nos pa bai na e tèmpel, skrudiñá, studiá, i hañá nifikashon personal i aplikashon individualmente. Nos lo yega di komprendé ku dor di e ordenansanan di tèmpel, e poder di ta manera Dios ta manifestá den nos bidanan¹⁰ i ku pa motibu di e ordenansanan di tèmpel, nos por ta armá ku Dios su poder i Su nòmber lo ta riba nos, Su gloria rònt di nos, i Su angelnan ta enkargá di nos.¹¹ Mi ta puntra mi mes si nos ta hasi uso kompleto e poder di e promesanan aki.

Hermananan, asta esun mas yòn den e oudiensia aki por lanta pará den fe i hunga un ròl importante edifikando e reino di Dios. Muchanan ta kuminsá haña nan mes testimonionan dor di lesa òf skucha na e skrituranan, resa kada dia, i tumá di e santa sena den un manera ku nifikashon. Tur muchanan i muhénan hóben por enkurashá nochi di hogar i ta partisipantenan kompletu. Bo por ta e promé riba bo rudia ora bo famia ta bini huntu pa orashon familiar. Asta si bo hogar ta menso ku ideal, bo ehèmpel personal di biba e evangelio fielmente por influensiá e bidanan di bo famia i amigunan.

Muhénan hóben di Iglesia mester wak nan mes komo partisipantenan esensial den e obra di salbashon dirigí pa e saserdosio i no solamente komo opservadónan òf sostenedó. Boso tin yamamentunan i a wòrdu poné apart pa esunnan kende tin e yabinan di saserdosio pa funshoná komo lidernan ku poder i outoridat den e obra aki. Segun ku boso ta magnifiká boso yamamentunan den presidensianan di klas i prepará spiritualmente, konsehá huntu, ekstendé man pa atministrá na boso miembronan di klas, i siñá otro e evangelio, boso ta tumando boso lugá den e obra aki i tur dos boso i boso amigunan lo wòrdu bendishoná.

Tur hende muhé mester mira nan mes komo partisipantenan esensial den e obra di e saserdosio. Muhénan den e Iglesia aki ta presidentenan, konseheronan, maestranan, miembronan di konsehonan, hermananan, i mamanan, i e reino di Dios no por funshoná si nos no ta lanta pará i kumplí ku nos debernan ku fe. Tin biaha nos djis mester tin un vishon mas grandi di loke ta posibel.

Imagen

Hermana Maldonado ku Hermana Oscarson

Resientemente, mi a konosé un hermana na México kende ta komprendé kiko e kier min pa magnifiká su yamamentu ku fe. Marffissa Maldonado a wòrdu yamá pa siña un klas di Skol Dominikal pa hóbennan tres aña pasa. E tabatin 7 studiantenan biniendo na klas ora el a wòrdu yamá, pero awor e tin 20 ku ta asistí regularmente. Mi a puntr’é, asombrá, kiko el a hasi pa trese dilanti un aumento tan grandi din numbernan. Modestamente el a kontestá, “O, e no tabata solamente ami. Tur e miembronan di klas a yuda.” Huntu, nan a wak e nòmbernan di esunnan ménos-aktivo riba e lista i a kuminsá pa sali huntu i invitá nan pa bini bèk na iglesia. Nan tambe tabatin un boutismo pasobra di nan esfuersonan.

Imagen

Klas di Skol Dominikal na México

Hermana Maldonado a kuminsá un sitio di media sosial pa su miembronan di klas yamá “Mi ta un Yu di Dios,” i e ta post pensamentunan ku ta inspirá i skrituranan algun biaha pa siman. E ta manda un teksto na su studiantenan ku tareanan i enkurashamentu. E ta sinti ku e ta importante pa komuniká den e maneranan nan ta relashoná mihó, i e ta trahando. El a simplemente bisa mi, “Mi ta stimá mi studiantenan.” Mi por a sinti e amor ora el a konta mi di nan esfuersonan, i su ehèmpel a kòrda mi di kiko un persona di fe i akshon por kumpli den e obra aki ku e ayudo di Señor.

Nos hubentut ta wòrdu eksponé na preguntanan difísil riba un base diario, i hopi di nos tin sernan kerí ku tin difikultat pa haña kontestanan. E bon notisia ta ku tin kontestanan riba e preguntanan ku ta wòrdu puntrá. Skuchá na e mensahenan resien di nos lidernan. Nan ta urgi nos pa studiá i komprendé e plan di felisidat di nos Tata Selestial. Nos a wòrdu kòrdá di e prinsipionan den e proklamashon di famia.¹² Nos ta wòrdu enkurashá pa siñá i usá e rekursonan komo e medida pa tene nos riba e kaminda stret i smal.

Kasi un aña pasa, mi a bishita ku un mama di muchanan yòn kende a disidí di tuma un posishon proaktivo pa protehá su yunan kontra e hopi influensianan negativo ku nan a wòrdu eksponé na dje riba internèt i na skol. E ta skohé un tópiko kada siman, hopi biaha unu ku a generá hopi diskushon riba internèt, i e ta kuminsá un diskushon ku nifikashon durante e siman ora su yunan por puntra preguntanan i e ta sigurá nan ta hañando un perspektiva balansá i hustu riba e asuntunan ku hopi biaha ta difísil. E ta hasiendo su hogar un lugá sigur pa lanta preguntanan i tin instrukshonnan ku nifikashon di e evangelio.

Mi ta wòri ku nos ta biba den un sierto ambiente di evitá ofensa ku nos tin biaha ta evitá siñá prinsipionan korekto. Nos ta faya di siñá nos muhénan hóben ku pa prepará pa ta un mama ta di importansia ekstremo pasobra nos no kier ofendé esunnan ku no ta kasá òf esunnan ku no por tin mucha, òf pa wòrdu mirá komo unu ku ta sofoká skohe nan futuro. Na otro banda, nos tambe por faya di enfatisá e importansia di edukashon pasobra nos no kier manda e mensahe ku e ta mas importante ku matrimonio. Nos ta evitá deklará ku nos Tata Selestial ta definí matrimonio pa ta entre un hòmber i muhé pasobra nos no kier ofendé esunnan ku ta eksperensiá atrakshon na e mes sekso. I por ta nos ta hañ’é inkómodo pa diskutí asuntunan di género òf seksualidat saludabel.

Sigur, hermananan, nos mester usá sensibilidat, pero laga nos tambe usá sentido komun i nos komprendementu di e plan di salbashon pa tin kurashi i ta kla ora e ta trata di siñá nos yunan i hóbennan e prinsipionan esensial di evangelio nan mester komprendé pa nabegá e mundu den kua nan ta biba. Si nos no ta siñá nos yunan i hóbennan doktrina berdadero—i siñ’é klaramente—e mundu lo siñá nan e mintiranan di Satanas.

Mi ta stima e evangelio di JesuCristo, i mi ta eternamente gradesido pa e direkshon, poder, i yudansa diario mi ta risibí komo un yu muhé di kombenio di Dios. Mi ta testifiká ku Señor a bendishoná nos, komo hende muhé ku ta biba den temporadanan difísil, ku tur di e poder, donnan, i forsa nesesario pa yuda prepará e mundu pa e Segundo Benida di Señor JesuCristo. Mi ta resa ku nos tur por mira nos potensial berdadero i lanta pará pa bira muhénan di fe i kurashi nos Tata na Shelu mester pa nos ta. Den e nòmber di JesuCristo, amèn.