Moruul a ngercheliu loba Klisiich, Rodos er a Zion
Sel lobult a rengud el mo meruul a telbiil, eng kired el mo mesuub a meklou a belkul el osisecheklel a ebangkelio ma mesisiich el klaumerang el kirel.
Ng dmeu a rengud el keldibel er tial Conference Center lobengterir a rekebil, ngeasek el redil, ma remeklou el redil er a Ikelesia. Aki dirrek el medengei el kmo retelael el rodos a keldibel el meliuekl era beluulechad el lomes er tial ongdibel, e dirrek el kuureng a saul er aikel techall el luchul meng sebeched el keldibel el ta a uldesued ma moktek er a chelechal kesus.
Sera Ongeteruich el buil era 2006, a President Gordon B. Hinckley a milskid a cheldecheduch el “Rise Up, O Men of God,”el milngai er sel chelitakl era ikelesia el miluches er a 1911. 1 Ngulumekedong er tirkel resechal era Ikelesia mebol loruul a ngerchelir e lomesmechokl a teletelir. Tial cheldecheduch a mlara uldesuek sera kululuuch el kmo ngera bo kulekoi el mo er kemiu.
Rodos, kid a kiei er a “kengaol el taem.”2 Aikal teletael era chelechal taem a diak el kirel mechas a rengud er ngii. Aika a blel lomlaoch era ngara mong el mellach e olisechakl er kid mede bo dekeldmokl. Sel eiai el bliongel er a babier er a Mormon a meskid a kora kdekudl el omsodel a teletael er a chelechal taem. Chelsel tial bliongel, a Mormon a dilu mla mesang sel temed, el luldimukl a mekemad ma chisel a mekemad, kikiongell, omekeuad, merechorech, ma rechad louchais er kid el kmo ngdiak a melemalt ma chebirukl er a osengel a Dios. Nguluuchais er a rechad el ngarbab a rengrir, sorir loubail a meringel a cheral bail, e melenguul a klechelid. Moroni a milsterir a rechad el sorir a teletael er a beluulechad e mechititerir a “remechebuul, me a remeau, resmecher me a rengar er a ringel el mengelakl er kau”3e diak mosterir.
A Moroni a uleker er a nger el merkid el kirel a teleteled—kid el kiei era chelechal taem. Ng dilu, “Ngerang me ko merur el mo oungakl er a ngklel a Kristo?” 4 Tial mongk a kmal ungil smodii tial teltael era beluulechad el kmal di merael mo diak lungil.
Joseph Smith—Matteus a uluchais el kmo aikel uriur el sils luldimukl er a “tirkel milngilt … lokiu a telbiil”5 a mo mechebelad. Tirkel ngara telbiil a uldimuklk er a rekebil, ngeasek el redil, ma rodos era Ikelesia el mla metecholb e mla meruul a telbiil lobengkel a Demad er a Babeluades. Kidel dirrek a sebeched el mechebelad er aikel diak el klemengar el olisechakl.
Rodos, ngak a diak kumerang el kmo aikal teletael a mo merael el mo ungil. Alsekum maikal teletael er a chelechal taem a olechotel, eng kired el mo keldmokl el kirel a ringel el ngar medad. Ng beot sel bol mechitechut a rengud, engdi sel de rechad er a telbiil, eng diak el kired el mo mechitechut a rengud. A Elder Gary E. Stevenson a dilung, aikel klengeltengat el beskid a Demad er a Babeluades ele kedi dirk kiei er a kengaol el taem e de dirrek el kiei er chelecha el mecherungel a rokui el tekoi.”6 Tial tekoi a rulii a rengud el mo ungil.
A President Russell M. Nelosn a uluchais er kid er tial mlo merek el rak: “Uldechelakl er a Ikelesia, ma osisecheklel, ma teleteled a de kiei a merael el mo klou. Eleng tiakid, kid a ousbech er a redil el mesisiich a klaumedengei er tir era osisecheklel a Kristo mo ousbech er tial klaumedengei el mo olisechakl e olngeseu ra telcheroll el mo cheroid er a klengit. Kid a ousbech er a redil el sebecherir medengei el kmo ngera a blulak. Kid a ousbech er a redil el medengei el kmo mekerang sel klisichel a Dios el lebeskid el mo er tirkel meruul a telbiil e ouchais a klaumerang er tir loba mesisiich el reng ma beltik el reng. Kid a ousbech a redil el klou a rengrir ma klaumedengeier tir el kirel a Chedil el Eve.”7
Tial tekoi a ngosukak el mo ungil a renguk el ngar tial teletael er a chelechal taem, ng betok a uchul me kede oldeu a rengud e oumerang. Ak kumerang loba renguk el rokir el kmo kid el rodos a ngar ngii er a chelsed sel klisiich ma klaumerang el ngii a mo ngosukid el melisiicher a ikal ringel er a chelechal taem. A Sister Sheri Dew a milluches, “Ak oumerang el kmo sel tal bomodengei e meruul aikel mui el teletael, el redil er a telbiil, ea rengedel a Dios a mereched el mo ngodech.”8
Ng kirel blak a rengud er a klisichedsel debo doruul e oltirakl aikel telbiled. Mesel bo doruul, kid a ousbech era rengeasek el redil ma meklou redil el mesuub aikel meklou a belkul el olisechakl era ebangkelio e ngar ngii a mesisiich el testimony era mui el klaumerang. Ngar ngii a edei el uchul el kumerang el ngii a ulechetemel a mesisiich el testimony e ngak a omdasu el ngii a klou a ututellel el mora klaumedengei er kid.
Kot, e ng kired el mo medengei el kmo a Dios el Demad el mo Cherechar ma Ngelekel Sechal, el Jesus Kristo, a klou a ututelir el mo er a klaumerang er kid ma osobeled. A Jesus Kristo a Osobeled. Kid a kired el mesuub e mo medengelii sel Tngakireng er Ngii e mekerang a dousbech er ngii er a bek el sils; ouuchel er a kengtid a tara klou el klengaltengat me kid a mellemolem el ngara llemalt el rael. Kid a ousbech er a Jesus Kristo el kot el okesiu e olechotel a kid a kired el mo uai Ngii. Kid a kired el melemolem el olisechakl er a telungalek er kid ma klas er kid el kirel a sel moktel a Chedam er a rolel a mo suobel, el uldimukl er a osisecheklel a Kristo.
Ongerung, kid a kired el mo medengelii a ulsbechel a sel oltel a olisechakl, urebetellel, ma kiis er a klisiich er aikal uriur sils. Kid a ousbech a rechad el sioning el kmo a Profet Joseph Smith a milngiit el mlara Rubak el mo nguu sel oltel a ebangkelio e mo medengei el kmo ngii a rirelii a urebetellel a redil er a Ikelsia el di uasei el urebetellel a Ikelesia er a Kristo er a ngara mong.9
Ongedei, ngkired el mesuub e mo medengei aikel ruoll er a templo ma telbiil. A templo a oreked er sel basio el ngii a klou a ututelel er tial edaol el klaumerang er kid, ea Rubak a ulengit mede bora templo, domedasu, mesuub, e dosiik aikel tekoi el ngii a doruul el mo10 ngosukid. Kid a mo medengei el kmo ngokiu a ruoll er a templo, ea klisichel a tekingel a dios a mo chemolt er klengar er kid eleng ikel ruoll er a templo, meng sebeched e keldmokl loba klisichel a Dios ma Ngklel a bo dobang, ea Klebkellel a iliuekl er kid, ea re anghel er Ngii a mo ngosukid.11 A kumedasu alsekum kid a meral melai a klisichel aikel telbiil.
Rodos, ngdirrek el rekebil el ngar tiang a sebecherir el mo remuul a ngerchelir loba klaumerang e klou a ututelir el lomekedechor er a Rengedel a Dios. A rengalek a omuchel el mo er ngii a testimony er tir sel longuiu malechub e lorenges a chedaol llechukl, meluluuch er a bek el sils, e lolai er a chedaol belsoil el ngar ngii ra rengrir. Bek el rengalek ma rengeasek el redil a sebechir loutkeu el kirel a ongdibel er a telungalek e blak a rengrir. Ng sebechem el mo kot el chad el mo choutibaruach sel telungalek er kau a mo keldibel e meluluuch. Malta a blim a diak el lungil, aikal omeruul a okesiul a kiei loba klaumerang er a ebangkelio el ngii a sebechel ngusuterir a klengar er a rechad er a blim ma sechelim.
A rengeasek el redil er a Ikelesia a kirir mesterir el klou a ututelir era urelel a priesthoo-el ureor er a olsobel e diak el di lomes e loldubech. Kemiu el rengeasek el dil a olab a okedong e mla omekngeltengat lokiu tirkel loba kiis er a priesthood el meruul a urelir el meredel loba klisiich ma ngerachel er tial lureor. Sel molisiich a okedong lureliu er chelsel a class presidency e mengedmokl el kirel a chedaol el tekoi, bom dak el kadecheduch, e molngeseu er tirkel chedal a class er kemiu, e molisechakl ra ebangkelio el mo ra ta ma ta, kau a ngar ngii a basio er kau er tial lureor ea resechelim a mo ngmai a klengeltengat.
Rokui el redil a kirir mesterir el klou a ututelir er a urellel a priesthood. Redil er a Ikelesia a president, e counselor, e sensei, e chedal a council, rodos, e chedil, ea Rengedel a Dios a diak el sebechel lungil remurt eng di merkong kid a temat e remuul a ngercheled loba klaumerang. A lebebil ra taem e kid a kirel ngar ngii a klou klaumedengei er kid el kmo ngarngii sebechel dubech.
Ak dirk milsang a odos el ngara Mexico el medengei el kmo ngera belkul sel mo melisiich era okedong er ngii loba klaumerang. A Marfissa Maldonado a mlo kedong el olisechakl era sel Sunday School era rengeasek era edei rak ra mla memong. Mlar ngii a teuid el ngalek el ngar tial class sera lemekedong el mo sensei, engdi chelchang e ngar ngii a lluich el ngalek el lomais el mo er tial class. Ak uleker er ngii, leng mlo mechas a renguk, ng milkera me tial lochur a mlor bab. Ngulba ngariou el reng e dilu, “O, dimlak el ngak. Tirkel mlar tial class a ulngeseu.” Te mlo dmak, e omes a ngklir tirkel diak el blechoel mei ra ikelesia e mocha omechelang el mo siotai er tir me luut el me er a ikelesia. Mlo ngar ngii a techolb el chelid eleng mle blak a rengrir.
A Sister Maldonado a rirelii a social media el kirel a class er ngii el milngkeklii, “Ngak a Ngelekel a Dios,” e meluches a ungil luldasu me a chedaol llechukl er a chelsel a tal sandei. Ng mle blechoel el text era rengalek er a class er ngii er a urelir ma ungil loutkeu. Ng ngulmelchesuar el kmo klou a belkul sel longedecheduch loba teletael el tir a medengelii, e tiang a ulureor. Ng dilu, “Betik a renguk er a rengalek er a class er ngak.” Ng mle sebechek el lomelchesuar er tial beltik el reng sera losaod e blak a rengrir ra urelir, e tial okesiul a rirellak el mo omedasu el kirel chimol chad er a klaumerang ma teletelel el remuul a urellel loba ngesuil a Rubak.
Tirkal rengeasek er kid a mes a meringel el ker ra bek el sils, e betok er kid ngar ngii a resechelid ma telungalek el meringel er tir a metik a nger. A ungil chais a kmo ngar ngii a nger el mo raikel ker el luleker. Morenges er tial olisechakl el mlara remeredel er kid. Kid a kired el mo mesuub e mo medengelii sel uldasou er a deureng era Demad ra Babeluades. Kid a blechoel lomeklatk aikel olisechakl er sel family proclamation.12 Kid a outkeu el mo olisechakl e ousbech aikal tekoi el lousbech el melekaill er kid medi dengar sel melemalt e chibutek el rael.
Tal rak ra mla memong, Eak mlo oldingel era chedil el ngar ngii mekekerei el rengelkel el mla tibir ra rengul el mo blak a rengul el mengeluolu er a rengelkel ra ikal mekngit el omeruul el tir a mes ra online ma skuul. Ngiltii a bo losaod er a bek el sandei, el blechoel sel teletael el ngii a betok el rechad a mesaod er ngii er a online, meng omuchel el mesaod er ngii ma rengelkel a oker a ker er ngii dirrek el mo ungil a omsodel e tabesul er aikal meringel el teletael. Ng meruul er a blil el mo ungil basio el sebechel loker a nger e ngar ngii e ungil a omsodel lokiu a ebangkelio.
Ak simbai el kmo kid a kiei er a taem el diak el soad el tomall a rengrir a rechad me sel bebil ra taem eng diak el sebeched el lolisechakl a melemalt el olisechakl. Kid a mo diak dolisechakl er a rengeasek el redil el kmo a kelchedil a kot el ngarbab a belkul eleng diak el soad el tomall a rengrir tirkel diak el bechiil, tirkel diak el sebecherir loungalek, malechub eng tomer aikel soad el mo meruul ra ngar medad el taem. Ma le uaisei, kid a diak soad el mesaod el kmo a skuul a klou a ututellel eleng diak sel soad lomdasu el kmo ngkuk klou a belkul er a chelebechiil. Kid a diak el soad el mesaod el kmo a Demad er a Babeluades a smodii a chelebechiil el ngara delongelel a sechal ma redil eleng diak el soad el tomall a rengrir tirkel sechal sorir a sechal ma redil sorir a redil. Ke dirk el metik er kid el diak lungil a uldesued el mesaod el kirel tekoi er a sechal ma redil ma ungil el sexuality.
Maluaisei, rodos, ngkired lousbech er a ungil omelekoi, engdi dirrek kired lousbech a ungil uldasu ma klaumedengi er kid ra moktel er a olsobel el mo melemalt a omilkinged sel dolisechakl er a rengelked ma rengeasek ra meklou a belkul olisechakl er a ebangkelio me te mo medengei el mekera a le kiei er tial beluulechad. Alsekum meng diak dolisechakl er a rengelked ma rengeasek er a merang el olisechakl—e olisechakl er ngii lungil—ea beluulechad a mo olisechakl er a blulak el tekingel a Diablong.
Ng betik a renguk era ebangkelio er a Jesus Kristo, e oureng a saul era rael, klisiich, ma ngeseu ra bek el sils el kngai el redil er a telbiil el ngelekel a Dios. Ak ouchais el kmo a Rubak a mla omekngeltengat er kid, el de redil el kiei er tial tekudl el taem, lolab a rokui el klisiich, sengk, el dousbech el longeseu el mengedmokl era beluulechad el kirel a Ongerul taem el Rubak el Jesus Kristo a mei. Ak meluluuch mekid bo deues a aikel klisiched e debo dechor el redil er a klaumerang ma blak el reng ele Demad er a Babeluades a ousbech er kid el mo uaisei. Loba ngklel a Jesus Kristo, amen.