2010–2019
Kesihnenda Kehlail, Riei Lihakan en Saion
Oakotohpe 2016


Kesihnenda Kehlail, Riei Lihakan en Saion

Pwe kitail en wekila oh kolokol atail inou kan, kitail anahne onopki padahk kesempwal akan en rongamwahuwo oh ahniki kadedeh kehlail en mehlel en rongamwahuwo.

E wia mehkot kaperen iou atail kin patpene nan Conference Center wet iang irail serepein kan, peinakapw kan oh lien Mwomwohdisoht. Se pil ese me mie irail pwihn en lih kid kei sang wasa teikan nan sampah me iang kilkilang ehupene wet, oh I kaping ki ansou mwahu me kitail ahneki pene ni ah eleiong atail kak kohpene oh wia ehu te ong ni kahrepe iou soutik wet.

Nan Okotohpe 2006, Presiden Gordon B. Hinckley wia padahk iou me kosoia, “Rise Up, O Men of God,” me kohsang ni koul en sarawi iou me ntingdi nan 1911.1 E wia peneu iou ong ohlakan en uhda oh kakehla irail. Padahk wet kin pwurpwurehng nan moangeiet sang ni ahi kapakap ki dahme Ien kak ehukiong kumwail.

Riei lihoko, kitail koukousoan nan “ mwehi apwal iou.2Dahme wihwiawi nan rahn pwukat sohte wia mehkot koapwuriamwei iou ong kitail. E kokohpadahr nan irair en ansou kei samwalahro ni ah wia mehn kepehm oh kaweid pwe kitail en kak kaunopada. Nan irelaud 8en Mormon kihdo kosaonsuwed iou ni ah kawehwehda mwahu irair en atail rahn aka. Nan irelaud wet, Moroni kosoia me e kilangehr rahn me kitail mihmi loaleht, oh e audaudkihda mahwin kan oh rongen mahwin, kasamin laud, kam aramas, pirap, oh songen aramas me kin ndahng kitail me sohte pwung oh sapwung pahn sihlangen Kauno. E kosoiada songen aramas me direkihla aklapalap, me kin nsenohkihte irail en likawih likou pweilaud, me kin kepit ki mwomwohdiso. E pil kasalehda irail akan me kesempwalki dipwisoun sampah ni arail kin pohnsehse me paisuwed akan, me kilisou kan, me soumwahu kan oh me mih nan kahpwal akan oh dawlihirail”3 ahpw sohte kin sewese irailda.

Moroni peidek ki ,mwomwen kadeik iou ong kitail—kitail me ieiang koukousoan nan mwehi wet. E kosoia, “ dahme kumwail namenek ki alehda mwaren Kauno rehmwail?”4Kadeik wet udahn pidada atail wahkihla mour en sampah rehtail.

Joseph Smith—Madiu ntingdi me ni imwin rahnoko me“ pil irail me pilpilda sang ni inouo”5 pahn pil ale kasongsong. Irail me iang mih nan inou wet iei serepein kan, serepein pwulepwul kan, oh Lih souleng en Mwomwohdisoht me pepdaislahr oh iang eh wiada arail inou ong Samatail Nanleng. Pil kitail ansouwet iang sohpai apwal wet ni padahk sapwung kan ah pahn kakete pitih kitail di.

Riei lihoko, I sohte kamehlele me kahpwal pwuka pahn mwahula nan atail pahn kohkohwei. Ma tiahk en mahs ka wia mehn kasansal kei, kitail anahne kaunopada mwoahn atail pahn lel apwal me sohsohpai kitail met. Ele e mengei kitail en audahte pwilikihdi soang koaros pwe kitail pwang ehr, ahpw ni atail wia aramas en inou kei, kitail deh luwetala. Duwehte dahme Elder Gary E Stevenson kosoia ier nek, Kapai mwahu me Samatail Nanleng pwilikihdiong kitail nan mwehi apwal wet iei rohngamwahu unsek me mihmi rehtail.”6 I kesempwalki meleilei me kosoi wet wia.

Presiden Russell M. Nelson padahkiong kitail nan pahr teio: “kahpwal kan me wihwiawi ong Mwomwohdisoht, rongamahu wet, oh duwen atail momour pahn lalaudla. Pwehki kahrepe wet, kitail anahne lih akan me audaudkihda paohson teng en rongamwahu en Krais oh me pil doadoahngki marain wet oh kaweid ki oh sewese katikada ehu dih me pahn soikala me suwed kan koaros. Kitail anahne lih ekei me kak kasawihda likamw akan wasa koaros. Kitail anahne lih me ese ia mwomwen arail pahn kak alehdi manaman en Kauno oh kamengei wei rehn irail kan me kolokol inou sarawi kan oh me kak kasalehda dahme re kamehlele ni koapworopwor oh limpok. Kitail anahne lih koaiok pwuka oh iang iroir wei duwehte atail nohno Eve.”7

Kaweid wet kiong ie koapworoapwor mendahte dahme wihwiawi rahnwet nan atail mour, e me tohto kahrepe kan me kitail en perenkihda oh koapwoaropworki. I kamehlele nan ahi mongiong unsek me kitail lih souleng ka mie rehtail kehlail loal oh pwoson wet, me pahn sewese kitail kalowehdi kahpwal me kitail momourki ni imwin rahn pwuka. Sister Sheri Dew intingidier, I kamehlele me ansou me kitail pahn ese oh uhkihda pein kitail ni atail wia lih kei me kolokol teng inou sarawi kan, Wehin Koht pahn wekidek ni ansou mwadang.”8

E pahn anahne mie ngong rehtail pwe kitail en kak wekila oh kolokol atail inou sarawi kan. Kitail anahne songen serepein oh lih me kin kaskaskuhlki irepit en rongamwahu wet oh me arail kadehde inenen laud sang ni duwen mehlel wet. Mie dake siluh me I kamehlele wia poahson en kadehde kehlail oh I pil ese me e wia mehkot mwahu me konehng kitail en esehla.

Keiou, kitail anahne ese kesempwal en Koht Samatail Nanleng Soutuk oh Sapwellime Iehros, Sises Krais, ong atail pwoson oh mour soutuk. Sises Krais iei atail Sounkomour oh Soundor. Kitail anahne onopiki oh wehwehkihla duwen Sapwellime Tomwo oh mwomwen atail pahn kak doadoahngki nan ehu rahn; koluhla iei ehu kapai keiou laud me emen emen kitail pahn kak katengeteng kihdi. Kitail anahne kilang Sises Krais ni duwen ah wia karasaras mwahu oh kiong kitail en men wiala ehu rahn. Kitail anahne nantiengete padahkieng atail peneinei oh me kitail kin kaskuhlih kan duwen en Samatail pilahn en komour kesempwalo, me audaudkihda rongamwahu en Krais.

Keriau, kitail anahne wehwehki anahne pen kapwurpwurdohn rongamwahu wet, koasondi kan, oh manaman en kih me mieier ni imwin rahnpwukat. Kitail anahne en mie sounkadehde me Soukohp Joseph Smith pilada oh malipe sang Kauno en kapwurehdo rongamwahu wet oh kilang me e koasonehdier lien Mwomwohdisoht ni duwen koasoandi me tepidasang mahso nan mwein en Krais Mwomwohdisohn keilahn aio.9

Kesiluh, kitail anahne onopki oh wehwehki doadoahk en nan tehnpas sarawi oh inou sarawi kan. Tehnpas sarawi iei wasa atail pwoson sarawi poahson da ie, oh Kauno kaweid ki kitail en kohla ie, medewe loal ki, onopki, oh rapahkiong pein kitail kesempwalih oh duwen atail pahn doadoangki rehn emen emen kitail. Kitail pahn wehwehkihla sang ni tiahk sarawi en nan tehnpas sarawi kan, duwen manaman en Kauno ah kin doadoahk nan atail mour10oh pwehki doadoahk sarawi en tehnpaso, kitail pahn kehlail ki manaman en Kauno oh Mwarehda ni mware, Sapwellime manaman pidahki kitail pene, oh Sapwellime tohnleng kan pahn ieiang kitail.11I men ese ma kitail udahn nannantieng manaman en inou pwukat en mih rehtail.

Riei lihoko, lel me keiou pwulepwul nan pokon lap wet kak iang kesihnen kihda arail pwoson oh iang wia doadoahk kesemwpwal wet oh iang kauwada Wehin Koht. Seri kin tepda kalaude pein arail kadehde sang ni arail pahn wadek oh rong iren pwuhk sarawi, kapakap rahn koaros, oh alehda kamadipw sarawi ni kahrepe kesempwal. Seri koaros oh serepein pwulepwul kan kak kakehla sarawi en soutik en peneinei ni arail pahn kin iang towehda ansou koaros. Ke kak tepkihda ni amw pahn kelepwdi ansou me amwail peneinei mwohd pene oh wia kapakap en peneinei. Mendahte ma nihmwo sohte unsek, ahmw karasaras ni amw ahneki pwoson oh momouriki rongamwahu wet kak kaweid mour en omw peneinei oh kompokepahmw kan.

Peinakapw en Mwomwohdisoht anahne kilang irail ni arail wia towe mehlel kesemwpwal en doadoahk en komour me mih pahn kaweid en prihstuhd wet, kaidehn soun kilkilangete ahpw soun apwalih. Kumwail iang kolokol pwukoa oh kasarawilahr sang irail me kolokol prihstuhd kih kan, pwe kumwail en doadoahk ni duwen amwail wia soun kaweid kei ni manaman oh mweimwei. Ni amwail pahn kalaudehla amwail pwukoa kan ni amwail wia presiden en ehu class kan oh kin kaunopada sang ni wahu en ngehn sarawi, kumwail eri kin kosoi pene, kihwei pehmwail kan oh kalohk ong iengomw me mih nan amw pwihn en, oh papah ki pene rongamwahu wet, ke wihwia ier omw pwukoa nan doadoahk wet oh kumwail koaros, kowe oh iengomw kan pahn kapai da.

Lih koaros anahne kilang irail ni arail iang wia towe kesempwal en doadoahk en prihstud. Lien tohn Mwomwohdisoht iang wia presiden, soun sawas kei, sounpadahk, iang towe council kan, lih perien kei, oh nohno, oh wehin Koht sohte kak pweida ma kitail sohte kesihnen da oh wia atail pwukoa ka ni pwoson. Ekei pak kitail anahne irong mwahu ong dahme kak pweida.

Kilel
Sister Maldonado iangahki Sister Oscarson

I apwtehn tuweng emen lih souleng nan Mexico me ese ia wehwehn kalaudehla ah pwukoah ni pwoson. Marfissa Maldonado lukwerdahr en wia sounpadahk en nan santy skuhl pahr siluh samwalahro. Nah tohnskuhl meh isimen ansou me e tepda wia ah pwukoahu, ahpw met nah tohnskuhl meh 20 me kin ieiang ansou kaoros. I idek reh, ni ei perenkihda, dahme e wia me e kakete mwadang naineki uwen tohtohlahn tohn skuhl ko. E sapeng ie ni karakarahk oh nda, “Oh, kaidehn ngehi. Nei tohn skuhl ka koaros sawas.”Irail ehupene, oh kilangada eden irail me sohla pwuredo ko nan tehn doaropwehu oh eri kohseli pwurehng lukei iraildo en iang sarawi. Mie pil neirail me iang pepdaisla pwehki sang ni arail pein nan nanti.

Kilel
Sunday School class in Mexico

Sister Maldonado wiada ehu wasa me irail kin patpene loale nan mehn kapehse en dipwisoun wai en rahnwet ongete nah tohn skuhlko oh kieng eden wasao “ Ngehi Serien Koht,” oh ih eri kin kihda loale iren kaweid kaselel oh iren pwuhk sarawi loale pak kei nan ehu wihk. E pil kin text ih nah tohnskuhl ko kieng irail assignment oh pil kin kakehla irail. E pehm me e konehng en kin alei iraildi wasa me irail keiou perenki mihmiseli ie, oh e doadoahk. E ndahng ie. “I pokpoke nei tohnskuhl ka. “I kak kehn limpok sang ni arail kin nantieng, I mwomwen ah ndahng ie, oh ah karasaras kataman ong ie ia mwomwen emen aramas me ahneki pwoson oh ngoang kak wia pweida nan doadoahk wet sang sawas me Kauno ketkihdo.

Neitail me pwulepwul ka mengei en alehdi songen peidek apwal kan rahn kaoros nan arail mour, oh e me tohto rehtail me mie kompokepah me ahneki kahpwal en diarada pasapeng pen peidek ka. Ih rongamwahu en met, mie pasapeng pen peidek pwuka. Rong kaweid keren me kohsang rehn atail kaun ka. Kitail luhkong ehr en onopki oh esehla duwen en Samatail Nanleng pilahn en popohl. Kitail alahier mehn ketemen pen duwen koasondi kan me mih nan kalohk en peneinei.12Kitail aleier poangek iou en padahkngki oh doadoahngki soahng me kaunopdahr ka me duwehte mehn kairoir kan ni ah pahn doarei kitaila pwe kitail en mihmi te pohn ahl inenen oh tehtiko.

Sounpar ehu samwalahro, I mwemweitla rehn nohnohn serihkei me piladahr en doadoahngki songen koasondi en kaskuhl iou ong nah serihko, pwe en doare irail sang soang suwed me pahn mengei ong irail en kilangada nan internet ni arail imwen skuhlo. E kin pilada ehu ire nan ehu wihk, apw mehlel ehu me aramas kalapw kosoia ih eri kieng irail ansou mwahu en mwohd pene oh kosoia pene nan wihk o, pwe ni ansou me serihko pahn kak peidek en kin kaunopada mwahu pasapeng me konehng ong soang me kin kalapw wia ire apwal ong irail. E wia met pwe nihmwarailo en wia wasahn saledek oh kasalehda iren peidek oh pasapeng me pahn wehwe mwahu sang ni kaweid en rongamwahu wet.

I pwunodki atail koukousoan nan wasa me kin ekihla oh suwedki mehkot ahpw eri kahreiong atail pil iang sehsela mwomwen atail pahn kaweid ki dahme konehng kan. Kitail sohte padahkiong neitail serepein pwulepwul kan me kaunopada oh wia nohno men me keiou kesempwal pwe kitail suwedki kitail de kansensuwedihla me sohte pwopwoud kan, me sohte kak naineki serihkan, de irail de kasawih kin kitail me kitail kakose arail pilipil en ehu rahn kohla. Pil patehng, kitail sohte kawehwe mwahu kesempwal en skuhl pwe kitail sohte men kihwei kaweid me e kesempwal sang pwopwoud la. Kitail ekihla me Samatail Nanleng kawehwe me pwopwoud pahn anahne poahson kihda ohl emen oh lih emen pwe kitail sohte men kansensuwedihla irail akan me iang wie pwopwoud en lih lih de ohl ohl. Oh kitail pahn diar me e soansuwed koasoia pene pwopwoud en ohl ohl de lih lih de udahn poahson pwung en duwen pwopwoud.

Mehlel, riei lihoko, kitail pil anahne kesempwalki an ekei madamadau, ahpw kitail anahne pil doadoahngki pilipil me pwung oh atail wehwehki duwen pilahn en komouro, kitail en komwad oh inen ansou me kitail pahn kaskuhlih neitail serihkan oh me pwulepwul kan duwen kesempwal en audepen rongamwahu wet, irail anahne ese mwomwen arail pahn seiseilok pohn sampah wasa irail koukousoan loaleht. Ma kitail sohte pahn padahkiong neitail serihka oh me pwulepwul ka rongamwahu mehlel et—oh padahngki ni wehweh mwahu—sampah pahn kaweidkiong irail an Sehdan likamw kan.

I poakong rongamwahu en Sises Krais, oh I kapingki kohkohlahte kaweid kan, manaman kan, oh sawas me I kin ale rahn koaros ni ahi wia Sapwellimen Koht serepein en inou sarawi men. I kadehde ki me Kauno kapai kitaildahr, ni atail wia lih ekei me wie koukousoan nan rahn apwal ka, ni manaman, ni kisakis, oh ni kehl koaros me anahnepe mie pwe en kak sewese sampah wet ni Ketdo Keriau en atail Kaun Sises Krais. I kapakapki kitail en koaros iang kilangada atail koaiok mehlel oh iang uhhda wiahla lih pwoson oh koapwoaroapwoar kei ong Samatail Nanleng ni duwen Ah anahne kitail en wia. Ni mwaren Sises Krais, amen.