Tutula’i A’e i le Malolosi, Uso e i Siona

O se fiafiaga le faatasi ai i lenei Maota Autu mo Konafesi ma teineiti, tamaitai talavou, ma tamaitai o le Ekalesia. Matou te iloa foi e faitau afe isi vaega o uso o loo potopoto i le lalolagi atoa e maimoa i nei taualumaga, ma ou te faafetai mo le avanoa ma auala ua mafai ai ona tatou auai faatasi i le lotogatasi ma le faamoemoega i lenei afiafi.

Ia Oketopa 2006, sa saunoa ai Peresitene Gordon B. Hinckley i se lauga sa faaulutalaina “Tutulai A’e Alii o le Atua,” sa faaulutalaina i se viiga na tusia i le 1911.¹ O se valaau ia faatino mo alii o le Ekalesia ina ia tutulai a’e ma faaleleia i latou lava. Na tatagi pea lena lauga i lo’u mafaufau a o ou tatalo ia iloa po o le a se mea e faasoa atu ia te outou.

Uso e, o loo tatou ola i “aso faigata.”² O tulaga o o tatou aso e le tatau ona faate’ia ai i tatou. Ua uma ona muai ta’u mai mo le tele o meleniuma o se lapataiga ma apoapoaiga ina ia mafai ai ona tatou saunia. Ua maua i le mataupu e 8 o le Mamona se faamatalaga maoti faaatuatuvale o tulaga o o tatou aso. I lenei mataupu, ua fai mai ai Moronae na vaai o ia i o tatou aso, ma ua aofia ai taua ma tala o taua, mea leaga, fasioti tagata, gaoi, ma tagata e ta’u mai ia i tatou e leai se sa’o po o se sese i fofoga o le Atua. Ua ia faamatalaina tagata ua tumu i le faamaualuga, e manao lava ia ofuina lavalava taugata, ma ē e faatauemu i tapuaiga. Na faaali atu ia te ia tagata ua pūpū i mea o le lalolagi ma latou tuu “ē ua matitiva, ma e ua lē lavalavā, ma ē ua mama’i ma puapuagatia, e ui ane”³ e aunoa ma le amana’iaina.

Na fai e Moronae se fesili sailiili lagona e uiga ia i tatou—o ē o loo ola i nei aso. Fai mai o ia, “Aisea ea ua outou maasiasi ai e ave i o outou luga le suafa o Keriso?⁴ O lea tuua’iga ua faamatala tonu ai le faateleina o tulaga faaletino o lo tatou lalolagi.

I le Iosefa Samita—Mataio, o loo faailoa ai o aso e gata ai e oo lava i “e ua filifilia e tusa ma feagaiga”⁵ o le a faaseseina. O tagata o le feagaiga ua aofia ai ma teineiti, tamaitai talavou, ma uso o le Ekalesia ua papatisoina ma osia feagaiga faatasi ma lo latou Tama Faalelagi. E oo lava ia i tatou ua lamatiaina i le faaseseina i aoaoga sese.

Uso e, ou te le talitonu o le a faaleleia tulaga [o le lalolagi] i le agai i luma. Afai o tifiga ua i ai nei o se faailoga lena, e manaomia la ona tatou saunia mo afā o loo i luma atu. O le a faigofie lava le togi o lima i luga pe a faalotovaivaia, ae i le avea ai ma tagata o le feagaiga, e le manaomia ona tatou lotovaivai. E pei ona saunoa mai Elder Gary E. Stevenson, “o le taui lotoalofa a le Tama Faalelagi mo le ola ai i taimi faigata, o lo tatou ola lea i le atoaga o taimi.”⁶ Ou te fiafia i le mafanafana o lena saunoaga.

Sa ta’u mai e Peresitene Russell M. Nelson ia i tatou i le tausaga ua te’a: “O le a faateleina osofaiga e faasaga i le Ekalesia, o ona aoaoga faavae, ma le ala o loo tatou ola ai. Ona o lena mea, tatou te manaomia ai tamaitai o e ua i ai se malamalama mausali i aoaoga faavae a Keriso ma o le a faaaogaina lena malamalama e aoao atu ai ma fesoasoani e atinae se tupulaga e mafai ona tetee atu i le agasala. Tatou te manaomia tamaitai o e e mafai ona iloa le taufaasese i ona foliga uma. Tatou te manaomia tamaitai o e ua iloa le ala e maua ai le mana ua faaavanoa mai e le Atua i e tausia feagaiga ma e e faaalia o latou talitonuga ma le talitonuga maumaututu ma le alofa moni. Tatou te manaomia tamaitai o e lotototoa ma i ai le vaaiga mamao a lo tatou Tina o Eva.”⁷

O lenei savali ua faamautinoa mai ai ia te a’u e faapea e ui lava i tulaga o o tatou aso, ae e tele ni mafuaaga tatou te olioli ai ma i ai se faamoemoe. Ou te talitonu ma lo’u loto atoa ua i ai ia i tatou o uso le malosiaga faalenatura ma le faatuatua o le a mafai ai ona tatou faafetaia’ia luitau o le ola ai i aso e gata ai. Na tusia e Sister Sheri Dew e faapea, “Ou te talitonu o le taimi lava tatou te aoao ai e tatala atu le faatosinaga atoa o tamaitai osifeagaiga ua liuaina, o le a vave ona suia le malo o le Atua.”⁸

O le a alu ai se taumafaiga malosi ina ia liuaina ai ma tausia a tatou feagaiga. Ina ia faia lea mea, e manaomia ona avea i tatou ma teineiti ma tamaitai e suesue i aoaoga faavae taua o le talalelei ma maua se molimau mausali o lo latou moni a’ia’i. E tolu ni vaega ou te talitonu o mea faavae ia i ni molimau malolosi ma ou te manatu e taua i lo tatou malamalama.

Muamua, e manaomia ona tatou faamamaluina le taua tele o le Atua lo tatou Tama Faavavau ma Lona Alo, o Iesu Keriso, i lo tatou faatuatua ma le faaolataga. O Iesu Keriso o lo tatou Faaola ma le Togiola. E manaomia ona tatou suesue ma malamalama i Lana Togiola ma le auala e faaaoga ai i aso taitasi; o le salamo o se tasi o faamanuiaga silisli e maua e i tatou taitoatasi ia tumau ai i le ala. E manaomia ona tatou vaai atu ia Iesu Keriso o lo tatou faataitaiga autu ma le faataitaiga o le tagata e manaomia ona tatou avea ai. E manaomia ona tatou aoao pea o tatou aiga ma vasega e uiga i le fuafuaga sili o le faaolataga a lo tatou Tama, lea e aofia ai le aoaoga faavae a Keriso.

Lua, e manaomia ona tatou malamalama i le manaomiaina o le toefuataiga o le aoaoga faavae, faatulagaga, ma ki o le pule i nei aso e gata ai. E manaomia ona i ai sa tatou molimau i le filifilia o le Perofeta o Iosefa Samita mai le lagi ma tofia e le Alii e aumaia lenei toefuataiga ma faamamaluina o ia na faatulagaina tamaitai o le Ekalesia e tusa ma le faatulagaga na i ai i le Ekalesia anamua a Keriso.⁹

Ma le tolu, e manaomia ona tatou suesue ma malamalama i sauniga ma feagaiga o le malumalu. Ua tu mausali le malumalu i le totonugalemu o o tatou talitonuga sili ona paia ma ua faatonuina i tatou e le Alii ia auai, mafaufau loloto, suesue, ma saili ia maua le uiga patino ma le faaaogaina e le tagata lava ia. O le a tatou malamalama ai e ala i sauniga o le malumalu, o le a faaalia ai le mana o le amioatua i o tatou olaga¹⁰ ma ona o na sauniga o le malumalu, e mafai ai ona faaauupegaina i tatou i le mana o le Atua ma o le a i ai Lona suafa i o tatou luga, o le a siomia i tatou e Lona mamalu, ma o le a leoleoina i tatou e Ana agelu.¹¹ Ou te tomanatu pe o tatou faalagolago atoa atu ea i le mana o na folafolaga.

Uso e, e oo lava i sē aupito itiiti o lenei aofia e mafai lava ona tula’i a’e i le faatuatua ma faia se matafaioi taua i le fausiaina o le malo o le Atua. E amata ona maua e le fanau a latou lava molimau e ala i le faitauina po o le faalogologo i tusitusiga paia, tatalo i aso taitasi, ma le taumamafa i le faamanatuga i se ala anoa. E mafai e fanau uma ma tamaitai talavou ona uunaia afiafi faaleaiga ma auai ai ma le atoatoa. E mafai ona avea oe ma le tagata muamua e tootuli a o potopoto lou aiga mo tatalo faaleaiga. E oo lava i lou aiga e le atoatoa foi, ae o au faataitaiga patino o le ola faamaoni i le talalelei e mafai ona uunaia ai olaga o lou aiga ma au uo.

E manaomia foi ona vaai tamaitai talavou o le Ekalesia ia i latou lava o ni tagata auai taua i le galuega o le faaolataga o loo taitaia i le perisitua ma ia le tau na ona matamata i ai ma lagolago. Ua outou umia valaauga ma ua vaetofiaina outou e i latou o loo umiaina ki o le perisitua ia galulue ai o ni taitai i le mana ma le pule i lenei galuega. A o outou faalauteleina o outou valaauga i au peresitene o vasega ma saunia faaleagaga, fefautuaai faatasi, aapa atu ia auauna i tagata o a outou vasega, ma aoao e le tasi le isi i le talalelei, o loo outou faia o outou tofiga i lenei galuega ma o le a faamanuiaina ai outou ma a outou uo.

E manaomia e tamaitai uma ona tagai ia i latou lava o ni tagata auai taua i le galuega a le perisitua. O tamaitai i lenei Ekalesia ma peresitene, fesoasoani, faiaoga, sui o aufono, uso, ma tina, ma le malo o le Atua e le mafai ona gaoioi vagana ua tutula’i a’e ma faataunuu o tatou tiute i le faatuatua. O nisi taimi e manaomia ona i ai sa tatou vaaiga mamao sili atu o mea e mafai ona fai.

Ata

Sister Maldonado ma Sister Oscarson

Sa ou feiloai talu ai nei i se uso i Mekisiko e malamalama i le uiga o le faalauteleina o lona valaauga i le faatuatua. Sa valaauina Marfissa Maldonado e aoao se vasega a le autalavou i le Aoga Sa i le tolu tausaga talu ai. E toa 7 tamaiti na auai ina ua valaau o ia, ae o le taimi nei ua 20 tamaiti ua auai soo. Sa ou fesili atu ia te ia, ma le maofa, po o le a se mea na ia faia na aumai ai se faatelega faapea. S ia fai mai ma le lotomaualalo, “Oi, sa le na o a’u. Sa fesoasoani uma tagata o le vasega.” Sa latou tagai faatasi i igoa o tagata lē toaaga i luga o le tauvalaauga ma amata ona ō atu faatasi ma valaaulia i latou ia foi mai i le lotu. Sa i ai foi se latou papatisoga ona o a latou taumafaiga.

Ata

Vasega o le Aoga Sa i Mekisiko

Sa setiina e Sister Maldonado se saite faaagafesootai mo tagata o lana vasega ua ta’ua o le “I Am a Child of God,” ma ua ia tusia ai ni mafaufauga musuia ma ni mau i le tele o taimi o le vaiaso. Na te tesi soo lava i ana tamaiti aoga o fai ni tofiga ma faamalosiau i ai. Na te lagonaina e taua le fesootai pea i ala sili latou te talanoa ai, ma o loo aoga. Sa ia ta’u maia ia te a’u, “Ou te alofa i a’u tamaiti aoga.” Sa mafai ona ou lagonaina lena alofa a o ia ta’u maia a latou taumafaiga, ma sa faamanatu mai e ana faataitaiga ia te a’u le mea e mafai ona ausia e se tagata o le faatuatua ma faatinoga i lenei galuega faatasi ai ma le fesoasoaniga a le Alii.

O loo fetaiai a tatou talavou ma ni fesili faigata i aso taitasi, ma e toatele i tatou e i ai nisi o ē pele o loo tauivi e su’e ni tali. O le tala fiafia e faapea o loo i ai ni tali i fesili o loo fesiligiaina. Faafofoga i savali talu ai nei mai i o tatou taitai. Ua uunaia i tatou ia suesue ma malamalama i le fuafuaga o le fiafia a lo tatou Tama Faalelagi. Ua faamanatu mai ia i tatou mataupu faavae i le folafolaga i le aiga.¹² Ua uunaia i tatou ia aoao atu ma faaaoga nei punaoa e fai ma ālāfua e faatumau ai i tatou i luga o le ala lauitiiti ma le vaapiapi.

Pe tusa ma se tausaga talu ai, sa ou asia ai se tina e laiti lana fanau o le na filifili e faia se auala mataalia e puipuia ai lana fanau mai le tele o faatosinaga le lelei ua latou vaai ai i luga o le initoneti faapena ma le a’oga. Na te filifilia se autu i vaiaso taitasi, o se autu e tele na faagaepu ai le tele o talanoaga i luga o le initoneti, ma ia faamatuā’ia ni talanoaga anoa i le aluga o le vaiaso pe a mafai ona fai e lana fanau ni fesili ma mafai ona ia faamautinoa latou te mauaina vaaiga paleni ma talafeagai i faafitauli e tele ina faigata. O loo ia faia lona fale o se nofoaga saogalemu e fai ai ni fesili ma maua ai ni aoaoga anoa o le talalelei.

Ou te popole lava o loo tatou ola i ni siosiomaga faapena o le aloese mai solitulafono lea i nisi taimi, ua tatou aloese atoa ai mai le aoaoina atu o mataupu faavae sa’o. Ua tatou toilalo i le aoaoina o a tatou tamaitai talavou i le taua tele o le sauniaina e avea ma se tina ona ua tatou le mananao ina ia faatiga i latou e le o faaipoipo, i latou e le o mafai ona fai ni fanau, po o le tagai i ai o ni filifiliga tapulaa i le lumanai. I se isi itu, e mafai foi ona tatou toilalo e faamamafa le taua o le a’oga ona tatou te le mananao e avatu se savali e faapea e sili atu lona taua i lo le faaipoipoga. Tatou te aloese mai le folafola atu o le faaipoipoga ua faauigaina e lo tatou Tama Faalelagi e na o le va lava o le tane ma le fafine ona tatou te le mananao e faatiga ia i latou e tosina atu i le itupa e tasi. Ma atonu tatou te le maua le toafimalie e talanoaina ai faafitauli tau itupa po o feusuaiga mama.

Ia mautinoa, uso e, e manaomia ona tatou nofouta, ae ia tatou faaaogaina foi le atamai ma lo tatou malamalama e uiga i le ata o le faaolataga ina ia maoti ma tuusao pe a oo i le taimi e aoao atu ai a tatou fanau ma le autalavou i mataupu faavae taua o le talalelei e tatau ona latou malamalama i ai e feoai ai i le lalolagi o loo latou ola ai. Afai tatou te le aoaoina a tatou fanau ma le autalavou i aoaoga faavae moni—ma aoao atu ma le manino—o le a aoao atu e le lalolagi ia i latou pepelo a Satani.

Ou te fiafia i le talalelei a Iesu Keriso, ma e faavavau lo’u faafetai mo le taitaiga, mana, ma fesoasoaniga i aso taitasi ou te maua o se afafine o le feagaiga a le Atua. Ou te molimau atu o loo faamanuiaina i tatou e le Alii, o ni tamaitai o loo ola i nei aso faigata, faatasi ai ma le mana uma, meaalofa, ma le malosi o loo manaomiaina e mafai ai ona fesoasoani e saunia le lalolagi mo le Toe Afio Mai Faalua o le Alii o Iesu Keriso. Ou te tatalo ina ia tatou vaaia uma lo tatou gafatia moni ma tutula’i a’e ia avea ma tamaitai o le faatuatua ma le lototele e finagalo lo tatou Tama o i le Lagi e avea ai i tatou. I le suafa o Iesu Keriso, amene.