2010–2019
Mesiou
October 2016


Mesiou

Rokui el chad er a Ikelesia a ulsbechall, ea rokui el chad er a Ikelesia a kirir el mo er ngii a techelir el mo mesiou.

Serak kekerei el buik e ng kmal mle soak loureor lobengkel a okdemelek el Lyman me a bechil el Aunty Dorothy el nga er a sersir. A okdemelek er a Lyman a milngitikaik er kemam e ra ikal urelam, ea Aunty Dorothy a ulngeseu e omekall er sel torak. Ak lotkii sel klemerial reng sel kim ngelt er a dechudech malechub eki molengasech er a ngesachel: A okdemelek er a Lyman a oldiu, “Nguu tial mlai el mo er a compound, e Dorothy!” Seikid e ngak a omechelang el meluluuch. Meng uaisei, ngoba ngesuil a Rubak ma mengitituuk er a kia, ea Aunty Dorothy a metik er sel compound. Me a taia mecheseches e mocha merael, me tial torak a merolang ma ki mellemolm a urelam.

“Sel nguu loia er a compound” a belkul a kmo omekngodech er sel kia el betok el taem el di merkong sel kakerous el kia a mo dmak meng mo sebechel meliuekl.1 Tial compound el kia, luldimukl aikel four-wheel drive, a rulii meng sebechel a mlai el mo soro, e mesisiich, e merael.

siasing/Llecheklel
Compound el kia

Ng soak lomdasu el kmo kid a uasel compound el kia sel de dak el mesiou er a Ikelesia—chelsel a ward me a branch, me a chelechad me a telengtengil a ikelesia. Di uai aikel kia sel bol dak e ng sebechel el mo mesisiich, kid a klou a klisiched sel bo dedak. Sel dedak el mesiou er a tang me a tang, e ng betok a deruul er a bai di kid el tang. Kmal lungil sel de dak el mesiou, e mo mesisiich, e olngeseu er a urelel a Rubak.

Mesiou a Klengeltengat

Sel techall el mo mesiou a kot el klou el klengeltengat el mo er a rechedal a Ikelesia.2 A Rubak a dilung, “Alsekum e ng betik a rengum er ngak, e bo mesiou er ngak,”3 e kid a mesiou er Ngii sel dosiou a rebebil er a rechad.4

Sel dosiou, e kid a mo kmeed er a Dios.5 Ke de mo medengelii lokiu a rael e locha dimlak dodengelii. A klaumerang er kid el mo er Ngii a mo klou. Ea ikel chetituokl a mo ngar ngii a belkul. Ea klengar a mo ungil. A beltkil a rengud el mo er a rebebil a mo klou, e mo ngar ngii a rengud a soad el mo mesiou. Ngokiu tial klengeltengat el teletael, e kid a mo uai a Dios, e kid a mo ungil keldmokl el lemuut el mo er Ngii.6

A President Marion G. Romney a ululsisechakl: “A omesiou a diak el teletael el ngii a kired el meruul er tial beluulechad me bol sebeched el mo kiei er sel rengedel a celestial. A omesiou a kmal klou a ututelel el rulii sel diak a ulebengelel klengar er sel rengedel a celestial.”7

Omesiou a Sebechel Mo Meringel

Sel dosiou er a chelsel a Ikelesia, mal uaisei, a sebechel el mo meringel alsekum te ulengit er kid el mo meruul er a tekoi el ngii a mektektid, alsekum mo mesaul a rengud el mesiou, malechub alsekum ke mlokedong el mo meruul er a tekoi el ngii a diak el sal soam.

Ak dirk mlokedong el mo er a beches el ngerchelek. Ngak a mle mesiou el ngara Africa Southeast Area. Ng meral mle ungil a renguk el mesiou er sel basio el Ikelesia a dirk mlo er ngii, e mle betik a rengmam er tirkel Santo. E ng di ak mlokedong el lemuut el mer tial headquarter er a Ikelsia, meng meral tekoi, ng dimlak el sal ungil a renguk. Sel bol ngodech a ngerachel eke mo chemau a omeruul e diak msal medengei.

Tal kesus el kumedasu er tial beches el ngerchelek, eak milrusii a demal a demal a demak el rubak el Joseph Skeen. Ak mle medengei el sel journal er ngii el kmo ngii ma bechil er a, Maria, a miluukl el mo er a Nauvoo, e ngii a mle semeriar el mo mesiou, meng ngulsiik er a Profet Joseph Smith e uleker er ngii el kmo ngerang sebechel ngosukii. A Profet a ulengit er ngii me bo loureor er sel sersir a re Smith e bol blak a rengul, meng rirelii.8

Ak kulmedasu er tial techall el Joseph Skeen se er a lenguu tial okedong. Mak di mlo mereched el mo medengei el kmo ngak meng ngar ngii a osisiu el techelek, el kid rokui meng uaisei. Rokui el okedong er a Ikelesia a mla er a Dios—lokiu tirkel mesiungel el luluutk er tir.9

Ak mlo omelchesuar er a edaol reng el louchais er ngak el kmo tial beches el lurelek a mle okedong er a Rubak. Ng klou a ututelel sel dodengelii tiang—el kmo a okedong el merkid a mlara Dios lokiu tirkel meredel er a priesthood. Uriur er tial okesiu, ea teletelek a mlo ngodech e ngak a mlo mesisiich a renguk el soak el mo mesiou. Ak oureng a saul er sel klengeltengat er a ouuchel er a klengit me a renguk lulbult. Ng meral soak tial beches el urelek.

Malta alsekum kid a omedasu el kmo sel okedong er a Ikelesia a mle uldesuel a meredel er a priesthood, ngkuk temel mo er a ngodech el chad, malechub e ng mle er kid eleng dimlak a chad el kongei er ngii, e ng di kid a mo ngeltengat sel dosiou. E ng di kid a medengelii sel ngesuil a Dios er a okedong el kid a mesiou loba mui el rengrir, ea lemut el klisiich a mo er a ureled e kid a mo meral mesiou era Jesus Kristo.

A Mesiou a Kirel Ngar Ngii a Klaumerang

Sel doruul a okedong e ng kirel ngar ngii a klaumerang. Uriur se er a Joseph me a Maria el bor sel sers, e te kmal mlo smerch. Ng dimlak a ududir e mle teloi er a rechad el diak lodengterir. Ng kmal mle meringel el taem el mo er tir. Chelsel a journal er ngii ea, Josesph a miluches, “Aki milemolm el loureor e blak a rengmam el ngara Ikelesia loba kekerei el klaumerang er kemam, me a Diablong a milasm el melemall er kemam mekim luut el merael.”10

Ngak, me a tirkel dart el kim kauchad, a kmal klou el mereng a sulel a Joseph me a Maria el dimlak lobult e lorael. A klengeltengat a mo er ngii sel blak a rengud er a okedong me a ngercheled e outekangel loba rokui el klaumerang er kid.

Ak medengelii a kmal ungil el sensei er a Gospel Doctrine el olngeseu er a chad er a ikelesia el melai er tial class sel losisechakl e omekrael a cheldecheduch, e ng di tia dimlak el blechoel el uaisei. Uriur er a lebo el chad er a Ikelesia, e ng mlokedong el mo olsisechakl er a Primary. Ngii a ulmedasu el kmo e ng diak lolab a kldachelbai e ra sensei, e ng di e ng mle medengei el kmo klou a ututelel sel dosiou, ngii a kilngei. Ng mlo chemau a sebekreng, e mlo stob lomais el mo er a ikelesia meng mo diak lolsisechakl. A home teacher er ngii a mlo medengei se er a lak lesang, e mlo oldingel er ngii, e siotai er ngii el lemuut el me er a ikelesia. A bishop me a rechad er a ikelesia a ulngeseu er ngii. Meng uaisei, a klaumerang er ngii a mlo klou, e mocha omechelang lolsisechakl er a rengalek. Ngii a ulultirakl aikel olisechakl el chelechang e tolisechaklel ngar sel Teaching in the Savior’s Way, a Rubak a ulmekngeltengat er ngii a dechal a rengul e ngii a meral mlo kldachelbai el sensei.11

Sel klechad er a tech el ngara chelsed el rokui a soal meruul er kid el kotuar el mesiou el bebil luchul a uasei “Ng diak keldmokl el mo mesiou; Ng betok a kirek el mesuub,” “Ngak a mesaul e ousbech a ulengull,” “Ak chuodel—ngkirel temel a tara chad,” malechub “Ngak a kmal mechesang.”

Rodam me a Rodos, sel dekengei e doruul a okedong a teletelel a klaumerang. Kid a sebeched loumerang er a profet, President Thomas S. Monson, el blechoel lolsisechak el kmo: “Ngkel Rubak a milkdongii, a Rubak a medengei el kmo ngsebechel” me “Sel kid a meruul a urelel a Rubak, ea Rubak a sebechel ngosukid.”12 Malta e ng betok a ngara uldesued malechub e ng diak el soad el meruul, malta ke de medakt malechub e ng seselk a rengud, a Rubak a soal a lebol blak a rengud e mesisiich el mesiou.

Ng diak ues a olangch el kmo a President Monson me a tirkal loureor lobengkel er a Kot el Presidency me a Chelchad er a Teruich me a terung el kmal lulis el mechesang e kmal mesaul a bedengir. Te olechotel a ungil teletael sel klisiich al be er a klengar er kid sel doumerang, e kongei a ngercheled, e blak a rengud el meruul el mo er a bkul rebab el sebeched. Tir a “ngmai a [ongelngelir] el mo er a ongeu”13 el betok el rak er a mla memong, e tir a mellemolm el merael e oldubech el bedul medad.

Choi, te mesiou er a klou a ututelel el okedong, e ng di a rokui el okedong me a ngerachel a klou a ututelel. A President Gordon B. Hinckley, el mle profet e President er a Ikelesia , a dilul kmo: “Kid rokui a dmak el ngar tial klou el lureor. … A urelem a klou a belkul el ngerchelem el di uai ngak el urelek a klou a belkul. Ng diak a okedong er tial ikelesia el kekerei malechub e ng kekerei a belkul.”14 A rokui el okedong a klou a belkul.15

Bo Dosiou

Bo de dechor loba klaumerang, “e ngmai a [ongelngeled] el mo er a ongeu,” e douedikel “el meruul er a chedaol lureor.”16 Me “denguu loia er a compound,” lobengterir tirkel loba klaumerang el Aunt Dorothy. Rodam me a rodos, bo dosiou.

Alsekum e ng soam el rulii a bishop malechub e ng branch president el mo ungil a rengrir, e moker tial ker “Mekerang e sebechek el lolngeseu?” “Ngar ker a soal a Rubak a bo kuruul?” Mesel bo loluluuch el lomedasu er kau, telungalek er kau, me a ngerchelem er a urelem, e ngii a mo medengei el kmo ngera el okedong a lebol beskau. Mesel ngai a imorir loia er a btelum el lomekngeltengat er kau, e ke mo nguu a klengeltengat er a priesthood el mo ngosukau. Kau a mo ngmai a klengeltengat! Rokui el chad er a ikelesia a ulsbechall, ea rokui el chad er a ikelesia a kirir ngar ngii a techelir el mo mesiou.17

A Jesus Kristo a Okesiu el merkid

A Jesus Kristo, a kot el ungil el okesiu, e leng mlad el kirel a urelel a Demal. Mesel Klou el Ongdibel el mla er a babeluades er a uchei er a lebebii a beluulechad, a Jesus, el milngilt er a uchei, a mle soal lolngeseu, “Ngak a tiang, modureklak.”18 Mesel loruul er tiang, Ngii a mlo mesiunged el rokui. Ngokiu a Jesus Kristo me a klisiich el denguu lokiu a Tngakireng er Ngii, e kid a sebeched el mo mesiou. Ngii a mo ngosukid.19

Ng soak louchais er a beltkil a renguk el mo er tirkel diak el sebechir el mesiou er a Ikelesia e leng uchul a tekoi er a klechad er tir e ng di te kiei loba sel reng er a omesiou. Ak meluluuch el kmo klengeltengat lebor kau er a dechal a rengum. Ak dirrek el mereng a sulir ti rekel blak a rengrir er a okedong er tir er a bek el sandei, me a dirrek el tirkel mochu kongei a okedong el mo mesiou. Rokui el ngeseu me a ongarm a kmal klou a belkul, el tokubets el mo er a Kristo el ngii a dosiou er ngii. Tirkel rokui el mesiou a mo nguu a krasia er a Dios.20

Ngidil rekid me a teleteled, a omesiou a kirel mo “siukang” er kid.21 Mosiou er a okedong er kau. Bo er a mission er kau. Mosiou er a delam. Mosiou er a chad el diak modengelii. Mosiou er a tonari er kau. Di mosiou.

Ma Rubak lomekngeltengat er kid er a dechal a rengud el mo mesiou e mo meral mesiungel a Jesus Kristo.22 Ak ouchais el kmo Ngii a kiei e mengedereder er tial ureor. Loba ngklel a Jesus Kristo, amen.

Uleklatk

  1. Mesa “Compound Gears,” technologystudent.com/gears1/gears3.htm; “Compound Gear Reduction,” curriculum.vexrobotics.com.

  2. Mesa Preach My Gospel: A Guide to Missionary Service (2004), 87.

  3. Doctrine and Covenants 42:29; dirrek mesa Doctrine and Covenants 59:5.

  4. Mesa Matteus 25:40; Mosiah 2:17.

  5. Mesa John 12:26.

  6. Mesa Doctrine and Covenants 81:4–6.

  7. Marion G. Romney, “The Celestial Nature of Self-Reliance,” Ensign, Nov. 1982, 93.

  8. Mesa Joseph Skeen, reminiscences and diary, 7, Church History Library, Salt Lake City; dirrek mesa Journal and History of Joseph Skeen, ed. Greg S. Montgomery and Mark R. Montgomery (1996), 23.

  9. Mesa Doctrine and Covenants 1:38; Articles of Faith 1:5.

  10. Skeen, reminiscences and diary, 8, spelling and punctuation standardized; dirrek mesa Journal and History of Joseph Skeen, 23; Luke 22:31; 2 Nephi 28:19–24; Alma 30:60; Doctrine and Covenants 10:22–27.

  11. Mesa Teaching in the Savior’s Way (2016), 37–38; Handbook 2: Administering the Church (2010), 5.3, 5.5.4.

  12. Thomas S. Monson, “Duty Calls,” Ensign, May 1996, 44.

  13. “Put Your Shoulder to the Wheel,” Hymns, no. 252.

  14. Gordon B. Hinckley, “This Is the Work of the Master,” Ensign, May 1995, 71.

    A President Hinckley a dirrek el dilung: “Kau a dirrek el ngar ngii a klou el techellem el mo ungil er a urelem el di uai ngak sel kuruul a ngerchelek. A telengtengil tial ureor a ultuil er sel de dmak loureor. Meng ngidil ngera a okedong le ko er kau, e ng mui loba osisiu el techall el meruul a ungil el di uai a urelek. Sel klou a ututelel a kmo tiang a urelel a Mastang. A ureled a mo meruul a ungil el di uai Ngii” (“This Is the Work of the Master,” 71).

    A President Thomas S. Monson a dilung: “Mekerang a chad e meruul er a okedong? Sel omoruul aikel ngii a kirel sel okedong” (“Duty Calls,” 43).

  15. Mesa Alma 37:6.

  16. “Put Your Shoulder to the Wheel,” Hymns, no. 252.

  17. Mesa Handbook 2, 3.3.1, 3.3.3, 19.1.1, 19.4. “Through the service of men and women and boys and girls, God’s work is done” (Gospel Principles [2009], 163).

  18. Abraham 3:27.

  19. Mesa Doctrine and Covenants 76:5.

  20. Mesa Mosiah 18:26.

  21. “They, the Builders of the Nation,” Hymns, no. 36.

  22. Mesa Moroni 7:48.