Pagpaambit sang Ginpanumbalik nga Ebanghelyo

Sang ang aton Manluluwas nga si Jesucristo nagahilapit na sa katapusan sang Iya dutan-on nga pag-alagad, ginsugo Niya ang iya mga disipulo: “Busa lakat kamo kag himuon nga mga gintoton-an ang tanan nga kapungsuran” (Mateo 28:19) kag “Lakat kamo sa bug-os nga kalibutan kag iwali ang maayong balita sa tanan nga tinuga” (Marcos 16:15). Ang tanan nga mga Kristiyano napaidalom sa sining mga sugo sa pagpaambit sang ebanghelyo sa tanan-tanan. Madamo ang nagatawag sini nga “dakong sugo.”

Litrato

Ang Manluluwas nagatudlo sa aton nga maghigugma

Subong sa paglaragway ni Elder Neil L. Andersen sa sesyon sa aga, ang Mga Santos sa Ulihing mga Adlaw pat-od nga nalakip sa mga labing matutom sa sining dako nga responsibilidad. Dapat kita amo sini bangod nakahibalo kita nga ginahigugma sang Dios ang tanan Niya nga mga anak kag sa sining katapusan nga mga adlaw ginpanumbalik Niya ang importante nga dugang nga ihibalo kag gahum agud bugayan sila tanan. Ang Manluluwas nagtudlo sa aton nga higugmaon ang tanan bilang aton mga kauturan, kag ginatahod naton inang panudlo paagi sa pagpaambit sang panaksihon kag mensahe sang ginpanumbalik nga ebanghelyo “sa tunga sang tanan nga mga nasyon, mga kaliwat, mga hinambalan, kag mga katawhan” (D&C 112:1). Ini importante nga bahin sang pagka-Santos sa Ulihing mga Adlaw. Ginakabig naton ini bilang makalilipay nga pribilihiyo. Ano pa abi ang mas makalilipay kundi ang pagpaambit sang wala’y katapusan nga mga kamatuoran sa mga anak sang Dios?

Sa karon may madamo kita nga mga pamaagi sa pagpaambit sang ebanghelyo nga wala pa sa nagligad nga mga henerasyon. May ara kita sang TV, sang Internet, kag sari-sari nga klase sang social media. May madamo kita sang importante nga mga mensahe nga makabulig sa pagpresentar sang ginpanumbalik nga ebanghelyo. May ara kita sang kabantog sang Simbahan sa madamo nga mga pungsod. May ara kita sang mas madamo nga mga misyonero. Apang ginagamit bala naton ining mga pamaagi sing labing epektibo? Nagapati ako nga kalabanan sa aton masiling nga wala. Nagahandum kita nga mangin mas epektibo sa pagtuman sang aton diosnon nga responsibilidad sa pagpahayag sang ginpanumbalik nga ebanghelyo sa bilog nga kalibutan.

May madamo nga maayong ideya sa pagpaambit sang ebanghelyo nga mangin epektibo sa tagsa ka mga stakes ukon mga pungsod. Apang, tungod ang aton Simbahan yara sa bug-os nga kalibutan, luyag ko maghambal parte sa mga ideya nga mangin epektibo bisan diin lang, halin sa pinakabag-o nga mga yunit tubtob sa pinakadugay na, halin sa mga kultura nga sa karon bukas sa ebanghelyo ni Jesucristo kag sa mga kultura kag mga pungsod nga padayon nga nagakontra sa relihiyon. Luyag ko maghambal parte sa mga ideya nga sarang ninyo ipaambit sa mga tawo nga tampad nga mga tumuluo ni Jesucristo subong man sa mga tawo nga wala pa gid nakabati sang Iya ngalan, sa mga tawo nga nalipay na sa ila kabuhi sa karon subong man sa mga tawo nga tuman nga nagatinguha sa pag-improbar sang ila mga kaugalingon.

Ano ang mahambal ko nga makabulig sa inyo sa pagpaambit sang ebanghelyo, ano pa man ang inyo mga sirkumstansya? Kinahanglan naton ang bulig sang tagsa ka miyembro, kag ang tagsa ka miyembro makabulig bangod madamo kaayo ang mga buluhaton nga dapat himuon sa aton pagpaambit sang ginpanumbalik nga ebanghelyo sa tagsa ka pungsod, kaliwat, hinambalan kag katawhan.

Litrato

Ginapaisog ni Pangulong Monson ang mga miyembro kag mga misyonero nga magbinuligay

Nakahibalo kita tanan nga ang partisipasyon sang miyembro sa pang-misyonaryo nga buluhaton importante agud matigayon alangay ang pagkahaylo kag pagpabilin nga aktibo sa Simbahan. Si Pangulong Thomas S. Monson nagsiling: “Karon ang panahon para sa mga miyembro kag mga misyonero nga magbinuligay … [kag] magpangabudlay sa ulubasan sang Ginuo sa pagdala sang mga kalag sa Iya. Ginhanda niya ang mga paagi para ipaambit naton ang ebanghelyo sa madamo kaayo nga mga pamaagi kag buligan Niya kita sa aton mga pagtinguha kon magsalig kita sa Iya sa pagtuman sang Iya buluhaton.”¹

Litrato

Ang pang-misyonaryo nga buluhaton indi isa lang ka tekla

Ang pagpaambit sang ginpanumbalik nga ebanghelyo katungdanan kag pribilihiyo naton bilang mga Kristiyano sa bilog naton nga kabuhi. Si Elder Quentin L. Cook nagapahanumdom sa aton, “Ang pang-misyonaryo nga buluhaton indi isa lang sang 88 ka mga tekla sa piano nga talagsa lang ginatukar; mayor ini nga kuwerdas sa makawiwili nga tono nga kinahanglan tukaron sing tayuyon sa bilog naton nga kabuhi kon luyag naton magpabilin nga nagakasanto sa aton katampad sa Kristiyanismo kag sa ebanghelyo ni Jesucristo.”²

May tatlo ka bagay nga sarang himuon sang tanan nga miyembro agud magbulig sa pagpaambit sang ebanghelyo wala’y sapayan sang mga sirkumstansya sang ila puluy-an kag obra. Tanan kita dapat maghimo sini tanan.

Una,tanan kita makapangamuyo para sa handum nga makabulig sa sining importante nga bahin sang buluhaton sang kaluwasan. Ang tanan nga mga pagtinguha nagasugod sa paghandum.

Ika-duha,kita mismo magtuman sang mga kasuguan. Ang tampad, matutom nga mga miyembro ang pinakamapatihan nga mga saksi sang kamatuoran kag sang kaimportante sang ginpanumbalik nga ebanghelyo. Mas importante pa gid, ang tampad nga mga miyembro dalayon nga makaangkon sang Espiritu sang Manluluwas nga mag-upod sa ila agud maggiya sa ila sa ila pagpakigbahin sa dako nga buluhaton sang pagpaambit sang ginpanumbalik nga ebanghelyo ni Jesucristo.

Ikatatlo, makapangamuyo kita para sa inspirasyon sa kon ano ang atonmahimo sa aton tagsa ka mga sirkumstansya sa pagpaambit sang ebanghelyo sa iban. Lain ini sa pagpangamuyo para sa mga misyonero ukon pagpangamuyo para sa kon ano ang mahimo sang iban. Dapat kita magpangamuyo para sa kon ano ang atonpersonal nga mahimo. Kon magpangamuyo kita, dapat naton dumdumon nga ang mga pangamuyo para sa sining klase sang inspirasyon pagasabton kon ginaupdan sang katutom—butang nga ginatawag sang balaan nga mga kasulatan nga “matuod-tuod nga tinutuyo” ukon “bug-os nga katuyuan sang tagipusuon.” Magpangamuyo nga may katutom sa pag-akto sa inspirasyon nga inyo mabaton, nga nagapangako sa Ginuo nga kon paisogon Niya kamo sa paghambal sa iban parte sa ebanghelyo, himuon ninyo ini.

Kinahanglan naton ang giya sang Ginuo bangod sa bisan ano nga natalana nga tion ang pila handa —kag ang pila naman indi—para sa dugang nga mga kamatuoran sang ginpanumbalik nga ebanghelyo. Indi gid kita dapat magpamatbat sa aton mga kaugalingon kon sin-o ang handa kag kon sin-o ang indi. Ang Ginuo nakahibalo sang tagipusuon sang tanan Niya nga mga anak, kag kon mangamuyo kita para sa inspirasyon, buligan Niya kita nga makita ang mga tawo nga Iya nahibal-an nga yara sa “isa ka pagpanghanda sa pagpamati sang pulong” (Alma 32:6).

Bilang Apostoles sang Ginuo, ginahangyo ko ang tagsa ka miyembro kag pamilya sa Simbahan sa pagpangamuyo nga buligan sila sang Ginuo agud makita ang mga tawo nga handa sa pagbaton sang mensahe sang ginpanumbalik nga ebanghelyo ni Jesucristo. Si Elder M. Russell Ballard naghatag sining importante nga laygay nga akon ginaugyonan: “Magsalig sa Ginuo. Sia ang Maayong Manugpahalab. Kilala Niya ang Iya mga carnero. … Kon indi kita magpakigbahin diri, madamo sang makabati kuntani sang mensahe sang Pagpanumbalik ang indi makaangkon sang oportunidad nga mabatian ini. … Ang mga prinsipyo simple lang—magpangamuyo sa inyo kaugalingon kag sa inyo pamilya para sa pang-misyonaryo nga mga oportunidad.”³Sa aton pagpakita sang aton pagtuo, ining mga oportunidad magaabot nga wala “ginpuwersa … ukon ginpilit. Ang mga ini mahapos lang matabo bilang natural nga resulta sang aton gugma sa aton mga kauturan.”⁴

Nakahibalo ako nga matuod ini. Ginadugang ko ang akon promisa nga paagi sa pagtuo sa bulig sang Ginuo, magiyahan kita, mainspirar, kag masalapuan naton ang dako nga kalipay sa sining wala’y katapusan kaimportante nga buhat sang paghigugma. Aton mahangpan nga ang kadalag-an sa pagpaambit sang ebanghelyo amo ang pag-agda sa mga tawo nga may gugma kag matuod-tuod nga tinutuyo sa pagbulig sa ila, wala’y sapayan sang ila sabat.

Yari ang pila sang iban nga mga butang nga mahimo naton nga mapaambit sing epektibo ang ebanghelyo:

Litrato

Pagpakig-abyan sang mga miyembro

Litrato

Pagbisita sang mga miyembro

Litrato

Drayber sang taxi sa Brazil Olympics

1. Kinahanglan naton dumdumon nga “ang mga tawo makatuon kon handa sila sa pagtuon, indi nga kon handa kita sa pagtudlo sa ila.”⁵ Ang mga butang nga interesadokita, subong sang importante nga dugang nga mga panudlo sa doktrina sang ginpanumbalik nga Simbahan, sa masami indi interesado ang iban. Ang kalabanan luyag sang mga resulta sang doktrina, indi sang doktrina. Kon maobserbahan ukon maeksperiyensyahan nila ang mga epekto sang ginpanumbalik nga ebanghelyo ni Jesucristo sa aton mga kabuhi, mabatyagan nila ang Espiritu kag magasugod nga mangin interesado sa doktrina. Mahimo nga mangin interesado man sila kon nagatinguha sila para sa dugang nga kalipay, kasuod sa Dios, ukon mas maayo nga paghangop sang katuyuan sang kabuhi.⁶ Gani, kinahanglan naton tinguhaan ang pagsat-om sing mainandamon kag mainampuon kon paano hibaluon ang interes sang iban sa pagtuon pa gid. Magadepende ini sa sari-sari nga mga butang, subong sang mga sirkumstansya sang isa ka tawo sa karon kag aton kaangtanan sa iya. Ini maayo nga topiko nga hambalan sa mga konseho, mga korum, kag mga Relief Society.

2. Sa aton paghambal sa iban, kinahanglan naton dumdumon nga ang pagpangagda sa pagtuon pa gid parte kay Jesucristo kag sa Iya ebanghelyo mas ginapalabi sangsa pagpangagda sa pagtuon pa gid parte sa aton Simbahan.⁷. Luyag naton nga ang mga tawo mahaylo sa ebanghelyo. Amo ina ang dako nga papel sang Libro ni Mormon. Ang mga balatyagon parte sa aton Simbahan nagasunod pagkatapos sang pagkahaylo kay Jesucristo; indi nga antes sini. Apang, madamo sang nagapangduhaduha sa mga simbahan ang may paghigugma para sa Manluluwas. Pasulabiha ang importante nga mga butang.

3. Kon nagapresentar kita sa mga tawo sang ginpanumbalik nga ebanghelyo, dapat naton himuon ini sa mga paagi nga sinsero kag nagapakita sang mapinalanggaon nga pag-ulikid sa indibidwal. Matabo ini kon nagatinguha kita sa pagbulig sa iban sa mga problema nga ila nakita ukon kon nagapangabudlay kita upod sa ila sa mga kahiwatan nga nagaalagad sa komunidad subong sang pagpaumpaw sang pag-antos, pagtatap sang mga imol kag mga nagakinahanglan ukon pagpauswag sang kalidad sang kabuhi sang iban.

4. Ang aton mga pagtinguha sa pagpaambit sang ebanghelyo indi dapat limitahan sa aton mga abyan kag mga kaupdanan. Sadtong Olympics nahibaloan naton ang parte sa isa ka LDS nga drayber sang taxi sa Rio de Janeiro nga nagdala sang mga kopya sang Libro ni Mormon sa pito ka tuhay nga mga lengguahe kag naghatag sang isa sa kon sin-o man ang magbaton sini. Gintawag niya ang iya kaugalingon nga “misyonero nga nagamaneho sang taxi.” Siling niya, “Ang mga kalye sang Rio de Janeiro … [akon] patag sang misyon.”⁸

   Si Clayton M. Christensen nga may makainspirar nga eksperiyensia bilang isa ka misyonero nga miyembro, naghambal nga “sa nagligad nga beinte ka tuig, amon nakita nga wala sing koneksyon sa tunga sang kadalumon sang relasyon kag sang posibilidad nga ang isa ka tawo mangin interesado sa pagtuon parte sa ebanghelyo.”⁹

5. Ang mga ward bishopric makaplano sang espesyal nga sinapol sa sakramento sa diin ang mga miyembro ginahangyo sa pagdala sang interesado nga mga tawo. Ang mga miyembro sang ward indi na masyado mag-alaala sa pagdala sang ila mga kilala sa amo nga sinapol bangod mas makasalig sila nga ang kaundan sang sinapol pagaplanohon sing maayo sa bagay nga ini magsudyot sang interes kag magrepresentar sang Simbahan sing maayo.

6. Madamo sang iban pa nga mga oportunidad sa pagpaambit sang ebanghelyo. Halimbawa, sini lang nga tig-ilinit nakabaton ako sang isa ka malipayon nga sulat gikan sa isa ka bag-o nga miyembro nga nakatuon parte sa ginpanumbalik nga ebanghelyo sang ang isa ka anay klasmeyt nagtawag sa iya agud mag-usisa parte sa balatian nga iya ginabatyag. Nagsulat sia: “Nagadayaw gid ako sang pagpresentar niya sang iya kaugalingon sa akon. Pagkaligad sang pila ka bulan sang pagtuon sa mga misyonero, ginbunyagan ako. Ang akon kabuhi nangin mas maayo humalin sadto.”¹⁰ Nakahibalo kita tanan nga madamo sang mga kabuhi ang mas mapaayo sang ginpanumbalik nga ebanghelyo. Nagadab-ot bala kita sa ila?

7. Ang interes kag kasampaton sang aton lamharon nga mga miyembro sa social media nagahatag sa ila sang pinasahi nga mga oportunidad sa pagdab-ot agud ganyaton ang iban sa ebanghelyo. Sa paglaragway ni Mormon sang pagpakita sang Manluluwas sa mga Nefinhon, nagsulat sia, “Nagpanudlo sia kag nag-alagad sa mga kabataan … , kag ginlugakan niya ang ila mga dila … agud sila makahambal” (3 Nefi 26:14). Karon ayhan masiling kita “lugakan ang ila [mga kamalagko] agud sila makahambal.” Himoa ninyo ini, mga lamharon!

Litrato

Pagpaambit sang ebanghelyo paagi sa pag-text

Ang pagpaambit sang ebanghelyo indi kabudlayan kundi kalipay. Ang aton ginatawag nga “pang-misyonaryo nga buluhaton sang miyembro” indi isa ka programa kundi kinaugali sang gugma kag pagdab-ot sa pagbulig sinang sa palibot naton. Ini oportunidad man sa pagsaksi sang aton nabatyagan parte sa ginpanumbalik nga ebanghelyo sang aton Manluluwas. Subong nga gintudlo ni Elder Ballard, “Ang labing importante nga ebidensya sang aton pagkahaylo kag sang aton nabatyagan parte sa ebanghelyo sa aton kaugalingon nga kabuhi amo ang aton kahanda sa pagpaambit sini sa iban.”¹¹

Nagasaksi ako kay Jesucristo nga amo ang Kapawa kag Kabuhi sang Kalibutan (tan-awa sa 3 Nefi 11:11). Ang iya ginpanumbalik nga ebanghelyo nagagiya sa aton kabuhi sa duta. Ang Iya Pagpasag-uli nagahatag sa aton sang kapat-uran sang kabuhi pagkatapos sang kamatayon kag sang kusog sa pagpadayon padulong sa pagkawala’y kamatayon. Kag ang Iya Pagpasag-uli nagahatag sa aton sang oportunidad nga mapatawad sang aton mga sala kag, sa idalom sang mahimayaon nga plano sang kaluwasan sang Dios, mangin kaangay para sa kabuhi nga wala’y katapusan, “nga amo ang pinakadako sa tanan nga mga dulot sang Dios” (D&C 14:7). Sa ngalan ni Jesucristo, amen.