Xwotzb’al li evangelio k’ojob’anb’il wi’chik
Xb’aanunkil “lix k’anjel li misioneer jo’ komon” jo’ naqaye re, a’an jun k’anjel re xraab’al ut xtenq’ankileb’ li ani wankeb’ chiqasutam.
I.
Sa’ xraqik lix k’anjel sa’ ruchich’och’ laj Kolol qe, li Jesukristo, kixtaqlaheb’ lix tzolom: “Ayuqex b’i’, ut k’ehomaqeb’ choq’ intzolom chixjunileb’ li tenamit” (Mateo 28:19) ut “Ayuqex sa’ chixjunil li ruchich’och’ ut chepuktesi li chaab’il esilal junsut junrub’el choxa” (Markos 16:15). Chixjunileb’ aj Kristiano taqlanb’ileb’ chi jo’kan chixwotzb’al li evangelio rik’in chixjunileb’. “Li xnimal ru taqlahom” yeeb’il re xb’aan naab’aleb’.
Jo’ yeeb’il resil xb’aan li Elder Neil L. Anderson sa’ li ch’utam re eq’la, wankeb’ b’i’ laj Santil Paab’anel sa’ xyanqeb’ li ani q’axal k’eeb’ileb’ xch’ool sa’ li nimla teneb’ank a’in. Us naq jo’kan, xb’aan naq naqanaw naq li Dios naxraheb’ chixjunil li ralal xk’ajol ut naq sa’eb’ li roso’jik li kutan a’in a’an xk’ojob’ xkomon chik li na’leb’ ut wankilal aajeleb’ ru re rosob’tesinkileb’ chixjunil. Li Kolonel kixk’ut chiqu naq taqaraheb’ chixjunil jo’ qas qiitz’ineb’, ut naqoxloq’i li k’utum a’an rik’in xwotzb’al li ch’olob’ahom ut li esil re li evangelio k’ojob’anb’il wi’chik “sa’ xyanqeb’ chixjunil li tenamit, junkab’al, aatinob’aal, ut teepal” (Tz. ut S. 112:1). A’an a’in aajel ru choq’ re li wank jo’ aj Santil Paab’anel. Sa naqil li k’anjel a’in. Ma wan tab’i’ li sahil ch’oolejil naxq’ax ru li sahil ch’oolejil re xwotzb’al li junelikil yaal rik’ineb’ li ralal xk’ajol li Dios?
Anajwan wan naab’aleb’ li k’anjeleb’aal choq’ re xwotzb’al li evangelio li maak’a’eb’ chaq junxil. Wan li kaxlan mu, li internet, ut eb’ li redes sociales. Wan qe naab’aleb’ li esil ninqeb’ xtz’aq re xwotzb’al li evangelio k’ojob’anb’il wi’chik. Nawb’il chi us li Iglees sa’ k’iila tenamit. K’a’jo’ xnimal li rajlankileb’ li qamisioneer. A’ut, ma yooko chiroksinkileb’ chixjunil li k’anjeleb’aal a’in chi chaab’il? Nink’oxla naq lix k’ihaleb’ qe te’xye naq ink’a’. Naqaj chaab’ilo’k sa’ xtz’aqob’resinkil ru li qachoxahil teneb’ank re xjultikankil li evangelio k’ojob’anb’il wi’chik sa’ chixjunil li ruchich’och’.
Wankeb’ naab’al li chaab’il na’leb’ chirix xwotzb’al li evangelio li naru te’k’anjelamanq sa’ junjunqeb’ li oqech malaj tenamit. A’b’anan, rik’in naq natawman li Iglees chiru chixjunil li ruchich’och’, nawaj aatinak chirixeb’ li na’leb’ li naru te’k’anjelamanq sa’ chixjunil na’ajej, jo’ sa’ li teep toje’ k’ojob’anb’il jo’ ajwi’ sa’ li oqech junxil xk’ojob’ankil, jo’ sa’eb’ li tenamit li neke’raj xk’ulb’al lix evangelio li Jesukristo jo’ ajwi’ sa’eb’ li tenamit xik’ neke’ril li paab’ank. Nawaj aatinak chirixeb’ li na’leb’ li naru teewotz rik’ineb’ laj paab’aneleb’ ak k’eek’ookeb’ xch’ool chiru li Jesukristo, rik’ineb’ li ani maajun sut rab’ihomeb’ lix k’ab’a’ jo’ ajwi’ rik’ineb’ li neke’xsik’ xchaab’ilob’resinkileb’ rib’ chi anchaleb’ xch’ool.
K’a’ru naru tinye li taatenq’anq eere chixwotzb’al li evangelio, maak’a’ naxye b’ar ta wankex? Na’ajman ru xtenq’ankil chixjunileb’ li komon, ut naru taatenq’anq li junjunq chi komon xb’aan naq wankeb’ naab’al li k’anjel tento te’b’aanumanq naq naqawotz li evengelio k’ojob’anb’il wi’chik rik’in chixjunileb’ li tenamit, junkab’al, aatinob’aal, ut teepal.
Chiqajunil naqanaw naq aajel ru li tz’aqonk sa’ lix k’anjel li misioneer re naq taa’uxq li jalok ch’oolej jo’ ajwi’ li kanaak sa’ li Iglees. Li Awa’b’ej Thomas S. Monson kixye “Ak xwulak xhoonalil naq te’xjunaji rib’ li komon ut li misioneer … [re] k’anjelak sa’ rawimq li Qaawa’ re xk’amb’aleb’ chaq li aamej rik’in. A’an ak kixkawresi k’iila k’anjeleb’aal taqawotz wi’ li evangelio, ut a’an taatenq’anq qe sa’ li qak’anjel wi took’anjelaq rik’in paab’aal re xtz’aqob’resinkil ru lix k’anjel.”1
Xwotzb’al li evangelio k’ojob’anb’il wi’chik, a’an li qateneb’ankil ut li qosob’tesinkil chiru chixjunil li qayu’am jo’ aj Kristiano. Li Elder Quentin L. Cook kixjultika qe: “Lix k’anjeleb’ li misioneer moko chanchan ta jun reheb’ li 88 chi tecla sa’ li piano li moko rajlal ta na’oksiman; a’an b’an jun reheb’ li tecla li nim xwankil ut rajlal na’oksiman sa’ xwajb’ankil, ut tento taawajb’aaq rajlal chiru li qayu’am wi sahaq toowanq sa’ li k’a’ru teneb’anb’il sa’ qab’een jo’ aj Kristiano ut rik’in lix evangelio li Jesukristo.”2
II.
Wankeb’ oxib’ li k’anjel naru tixb’aanu chixjunileb’ li komon re tenq’ank sa’ xwotzb’al li evangelio, maak’a’ naxye li na’ejej malaj li trab’aaj wankeb’ wi’. Chiqajunil tento taqab’aanu a’in.
Xb’een, naru tootijoq re xk’ulb’al qajom chi tenq’ank sa’ li aajel ru k’anjel re li kolb’a-ib’. Chixjunil lix yalb’al qaq’e natikla rik’in li qajom.
Xkab’, naru too’ab’inq chiruheb’ li chaq’rab’. K’a’jo’ xnimal lix wankilaleb’ li komon tiikeb’ chi paab’ank sa’ q’unb’esink ch’oolej rik’in xch’olob’ahomeb’ chirix lix yaalalil ut lix tz’aq li evangelio k’ojob’anb’il wi’chik. Ut q’axal wi’chik aajel ru, eb’ li komon tiikeb’ chi paab’ank junelik taawanq rik’ineb’ lix Musiq’ li Kolonel re xb’eresinkileb’ naq neke’xsik’ chi tz’aqonk sa’ li xnimal ru k’anjel re xwotzb’al lix evangelio li Jesukristo k’ojob’anb’il wi’chik.
Rox, naru tootijoq re taak’ehe’q qana’leb’ chirix li k’a’ru naru naqab’aanu laa’o qajunes qib’ re xwotzb’al li evangelio rik’in li jun ch’ol chik. Wan xjalanil li tijok a’an rik’in li tijok choq’ reheb’ li misioneer malaj li tijok chirix li k’a’ru naru te’xb’aanu jalaneb’. Tento tootijoq chirix li k’a’ru naru taqab’aanu laa’o qajunes qib’. Naq nokotijok, tento taajultiko’q qe naq eb’ li tij li neke’xpatz’ li musiq’anb’il na’leb’ ka’ajwi’ te’sumeeq wi ochb’eeninb’ileb’ rik’in xk’eek’ookilal li qach’ool—wan naq chi anchal li qajom malaj chi anchal rajom li qach’ool yeeb’il re a’in sa’eb’ li loq’laj hu. Tijonqex rik’in xk’eek’ookilal eech’ool sa’ xk’anjelankil li musiq’anb’il na’leb’ teek’ul, ut chi jo’kan xyeeb’al re li Qaawa’ naq wi a’an taamusiq’anq eere sa’ aatinak rik’in anihaq chirix li evangelio, teeb’aanu a’an.
Naqaj ru lix b’eresinkil li Qaawa’ xb’aan naq chi yalaq jo’q’e wankeb’ li ani li kawresinb’ileb’, jo’kan ajwi’ li ani maji’ kawresinb’ileb’, re xk’ulb’aleb’ lix yaalil na’leb’ li evangelio k’ojob’anb’il wi’chik. Maamin us xxaqab’ankil qib’ jo’ aj raqol aatin chirix ani yo’on wan ut ani ink’a’. Li Qaawa’ naxnaw ru xch’ooleb’ chixjunil li ralal xk’ajol, ut wi tootijoq re xk’ulb’al li musiq’anb’il na’leb’, a’an toxtenq’a chixtawb’aleb’ li ani nawb’ileb’ xb’aan li “wankeb’ chi kawresinb’il re rab’inkil li aatin” (Alma 32:6).
Jo’ jun lix Apostol li Qaawa’, nin’elajink chiru chixjunileb’ li komon ut li junkab’al sa’ li Iglees naq te’tijoq naq li Qaawa’ tixtenq’aheb’ chixtawb’aleb’ li ani kawresinb’ileb’ re xk’ulb’al li resil lix evangelio li Jesukristo k’ojob’anb’il wi’chik. Li Elder M. Russell Ballard kixk’e li na’leb’ a’in jwal aajel ru, ut laa’in ajwi’ ninxaqab’ xwankil: “Kanab’omaq eerib’ chiru li Qaawa’. A’an li Chaab’il aj Ilol Karneer. A’an naxnaweb’ ru lix karneer. … Wi ink’a’ k’eeb’ilo qib’ chi anchal qach’ool, yal toonume’q chiru naab’aleb’ li te’rab’i raj resil lix k’ojob’ankil wi’chik li Iglees. … Moko ch’a’aj ta li na’leb’ a’in—tijonqex, eejunes eerib’ ut sa’ lee junkab’al re teek’ul lee hoonal chixwotzb’al li evangelio.”3 Naq naqak’anjela li qapaab’aal, te’chalq li hoonal a’in chi ink’a’ “minb’ileb’ ru chi moko pak’b’ileb’ ta. Te’chalq xjuneseb’ rib’ sa’ xk’ab’a’ li qarahom choq’ reheb’ li qas qiitz’in.”4
Ninnaw naq yaal a’in. Nintiq ajwi’ li waatin laa’in naq rik’in qapaab’aal chirix lix tenq’ankil li Qaawa’, taak’ame’q li qab’e, taak’ehe’q li musiq’anb’il na’leb’ qe, ut taqataw xnimal li sahil ch’oolejil sa’ li junelikil ut aajel ru k’anjel re rahok. Taqataw ru naq li usaak sa’ xwotzb’al li evangelio, a’an xb’oqb’aleb’ li jun ch’ol chik rik’in rahok ut rik’in jun yaalil qajom chixtenq’ankileb’, maak’a’ naxye k’a’ru lix sumenkileb’.
III.
Wahe’ junjunqeb’ chik li k’anjel li naru taqab’aanu re xwotzb’al li evangelio chi chaab’il.
-
Tento taajultiko’q qe naq “junaq natzolok naq yo’on wan chi tzolok, ink’a’ naq yo’on wanko chixtzolb’al.”5 Li k’a’ru naqaj xnawb’al laa’o, jo’ xkomon chik li aajel ru na’leb’ chirix jun tzol’leb’ sa’ li Iglees k’ojob’anb’il wi’chik, moko a’an ta li k’a’ru nek’raj xnawb’aleb’ li jun ch’ol chik. Chi kok’ aj xsa’, li k’a’ru neke’raj li jun ch’ol chik, a’an li ruuchinihom li tzol’leb’, ink’a’ yal li tzol’leb’ xjunes rib’. Naq te’ril malaj te’xk’ul li ruuchinihom lix evangelio li Jesukristo k’ojob’anb’il wi’chik sa’ lix yu’ameb’, te’reek’a li Musiq’ej ut te’ok chirajb’al xnawb’al chirix li tzol’leb’. Maare te’ok chirajb’al xtawb’al xkomon chik li sahil ch’oolejil, li nach’ok rik’in li Dios, malaj xkomon chik lix nawom chirix li rajb’al li yu’amej.6 Jo’kan ut, tento taqasik’ qana’leb’ chi aj ajaq qu ut rik’in tijok chirix chanru xpatzb’al re anihaq wi naraj xtzolb’al xkomon chik. Jalan jalanq chanru nab’aanuman a’in a’ yaal jo’ chanru xyu’am li kristiaan a’an ut chanru naqanaw ru. A’an a’in jun chaab’il na’leb’ naru too’aatinaq wi’ sa’eb’ li ch’utam, lix molameb’ li tijonelil, ut li Komonil re Tenq’ank.
-
Naq noko’aatinak rik’ineb’ li jun ch’ol chik, tento taajultiko’q qe naq jun b’oqok chi tzolok chirix li Jesukristo ut lix evangelio, a’an q’axal chaab’il wi’chik chiru jun b’oqok chi tzolok chirix li qaIglees.7 Naqaj naq li jun ch’ol chik te’xk’ul jun xjalajik lix ch’ooleb’ xb’aan li evangelio. A’an a’an li xnimal ru rajb’al lix Hu laj Mormon. Li k’a’ru te’reek’a chirix li qaIglees nachal chirix naq ak jalb’ileb’ xch’ool rik’in li Kristo; ink’a’ chi rub’elaj. Wankeb’ naab’al li ink’a’ mas nawulak chiruheb’ li jar iglees a’ut toj neke’xra li Kolonel. K’e sa’ xb’eenil li k’a’ru xb’een.
-
Naq naqayal xk’utb’al li evangelio k’ojob’anb’il wi’chik chiru anihaq, tento taqab’aanu a’in chi k’eeb’il chi yaal li qak’a’uxl chirix rik’in rahok. Nak’ulman a’in naq naqayal xtenq’ankil junaq rik’in lix ch’a’ajkilal malaj naq nokok’anjelak wochb’een sa’ li qak’aleb’aal, xb’aanunkil li k’anjel jo’ xtenq’ankileb’ li ani wankeb’ sa’ rahilal, xch’olaninkileb’ li neb’a’ ut li maak’a’ wan reheb’, malaj xchaab’ilob’resinkil xyu’ameb’ li jun ch’ol chik.
-
Ink’a’ us naq ka’ajwi’ naqawotz li evangelio rik’ineb’ li qamiiw malaj li qech aj k’anjel. Chiru xhoonalil li Juegos olímpicos xqanaw ru jun aj ch’e’ol taxi sa’ Rio de Janeiro li kixk’am chirix junjunqeb’ lix Hu laj Mormon sa’ wuqub’eb’ li aatinob’aal ut kixk’eheb’ re li ani k’eraj xk’ulb’al. “Li misioneer aj ch’e’ol taxi” kixye rib’. A’an kixye, “Lin mision … a’an wan sa’ xb’ehil li Rio de Janeiro.”8
Laj Clayton M. Christensen, li jwal chaab’il lix k’anjel re xjultikankil li evangelio jo’ jun komon, kixye naq “chiruheb’ jun may chihab’, xqak’e reetal naq ma naqanaw ru anihaq yal b’ayaq malaj chi chaab’il, a’an maak’a’ na’ok wi’ rik’in ma taaraj tzolok chirix li evangelio malaj ink’a’.”9
-
Eb’ li obispil naru te’xk’uub’ jun ch’utam re li loq’laj wa’ak b’oqb’ileb’ wi’ li komon chixk’amb’aleb’ chaq li ani neke’raj xtz’ilb’al rix li Iglees. Ink’a’ te’wiib’anq xch’ooleb’ li komon sa’ li teep chixk’amb’aleb’ li ramiiw sa’ li ch’utam a’an xb’aan naq te’xnaw naq kawresinb’ilaq chi us choq’ reheb’ laj tz’ilol rix li Iglees ut tixk’ut ajwi’ xchaab’ilal li Iglees.
-
Wankeb’ naab’al chik li hoonal re xwotzb’al li evangelio. Chiru li saq’ehil a’in xink’ul jun sahil tz’iib’anb’il hu re jun ak’ komon li kixtaw li evangelio k’ojob’anb’il wi’chik naq jun li rech tzolonelil kixb’oq chaq sa’ xukub’ ch’iich’ re xpatz’b’al re chirix jun lix yajel. A’an xtz’iib’a: “Kikutanob’resiik ink’a’uxl rik’in chanru ki’aatinak wik’in. Chirix junjunqeb’ li po chi tzolok rik’ineb’ li misioneer, kikub’e inha’. Chaab’ilaq chik inyu’am chalen chaq li kutan a’an.”10 Chiqajunil naqanaweb’ li ani te’chaab’ilo’q sa’ xyu’ameb’ rik’in li evangelio k’ojob’anb’il wi’chik. Ma yooko chi aatinak rik’ineb’?
-
Li qasaaj komon jwal neke’wulak chiruheb’ li redes sociales ut rik’in a’an wankeb’ ajwi’ hoonal re aatinak rik’in li jun ch’ol chik chirix li evangelio. Sa’ xch’olob’ankil lix k’utb’esinkil rib’ li Kolonel chiruheb’ laj Nefita, laj Mormon kixtz’iib’a: “A’an kixtzoleb’ ut kik’anjelak chiruheb’ lix kok’aleb’ … , ut kirach’ab’ ru’ujeb’ li raq’ … re te’ruuq chi aatinak” (3 Nefi 26:14. Sa’ li qakutankil, maare taqaye “kirach’ab’ [ru’ujeb’ li ruq’] re te’ruuq chi aatinak.” B’aanuhomaq ut, ex saaj!
Xwotzb’al li evangelio moko a’an ta jun li rahil iiq, a’an b’an jun sahilal. Xb’aanunkil “lix k’anjel li misioneer jo’ komon” jo’ naqaye re, a’an jun k’anjel re xraab’al ut re xtenq’ankileb’ li ani wankeb’ chiqasutam. A’an ajwi’ li qahoonal re xch’olob’ankil xyaalal li k’a’ru naqeek’a chirix lix evangelio li Kolonel k’ojob’anb’il wi’chik. Jo’ kixk’ut li Elder Ballard, “Li k’utum q’axal nim xwankil chirix lix jalajik li qach’ool ut chanru naqeek’a chirix li evangelio sa’ li qayu’am, a’an li qajom chixwotzb’al rik’in li jun ch’ol chik.”11
Ninch’olob’ xyaalal li Jesukristo, a’an lix saqen ut lix yu’am li ruchich’och’ (chi’ilmanq 3 Nefi 11:11). Lix evangelio k’ojob’anb’il wi’chik naxkutanob’resi li qab’e sa’ ruchich’och’. Lix tojb’al rix li maak li kixb’aanu, a’an naxk’e qanawom chirix li yu’am nachal chirix li kamk ut li metz’ew re kuyuk toj sa’ li junelik q’e kutan. Ut lix tojb’al rix li maak li kixb’aanu, a’an naxk’e naq naru taakuye’q li qamaak ut, xb’aan lix xnimal ru k’uub’anb’il na’leb’ li Dios re li kolb’a-ib’, naru naq k’ulub’ejaqo re xk’ulb’al li yu’am maak’a’ roso’jik, “li xnimal ru reheb’ li maatan re li Dios” (D&C 14:7). Sa’ xk’ab’a’ li Jesukristo, amen.