Ouchais er a mla Moluut el Ebangkelio
Sel domekedong er ngii el kmo “rechad er a ikelesia loureor el misionari” a diak el prokram engdi bai omilkinged ra beltik el reng e oldars a ngeseu el mora re ngara re bita er kid.
I.
Ngolkeldang ra mecha rekil lolsisechakl ra beluulechad a Osebeled ra, Jesus Kristo, eng nguleldurech ra re mesiungel el kmo: “Bo morael, e lolsisechakl a bekl el beluu” (Mateus 28:19) e “Morael ra beluulechad el rokir, e molsisechakl ra ebangkelio elmo ra rokui el chad” (Markus 16:15). A rokui el kristiano a ngerchelir lokiu ikal llach el louchais ra ebangkelio el mora re bekl el chad. Te re betok omekedong er tiang el kmo “sel klou el lureor.”
A Elder Neil L. Andersen a milngedechedu er kid er chelchal tutau el kirel a re Uriul-klebesei el Santo a bleketakl el teloi er tirkel kot el loltirakl er tial klou ngerachel. E kmal kired le kede medengei el kmo a Dios a betik a rengul ra rengelekel e tia mocha ra ulebongel e Ngii a mla oluut a meklou el tebedechel a klemedengei ma klisiich el mo omekngeltengat er tir el rokui. A Osobel a ulsisecheklid elmo betik a rengud er a rebek el chad, e kid oldanges er sel lolsisechakl e louchais ra kle sioning ma klumech er a olutel a ebangkelio “el mora bekl el beluu, telungalk, tekoi, ma re rechad” (D&C 112:1). Tiang a usbechal el rechelel a kmo kede reua techang a de Uriul-klebesei el Santo. Kede omes er ngii e lomerolel a deurreng.Ngera lmuut el klou el deurreng a douchais a klemerang lobengetrir a rengelekel a Dios?
Chelechal sils e kede olab a betok el donguu el louchais ra ebangkelio el di mlak el ngar ngii ra ngaramong el telecheroll. Ngarngii a TV, ma internet, ma simbung. Ngar ngii er kid a betok el meklou el chais e lolecholt er a mla moluut el ebangkelio. Ng mesisiich a Ikelesia ra betok el beluu. Te mla melketek a idisir a re missionaris. Engdi kid ke dousbech a ikal donguu el morsel tkul re bab e lusbechel? A kumerang el betok er kid a kmung diak. Ng soad el lmuut elmo bedochel el mengetmokl a chedaol el telutk el ngerecheled e lomerek er a mla moluut el ebangkelio el meliuekl ra beluulechad.
Ng betok a ungil luldasu el kmong mekerang a domerek er a ebangkelio me bo loureor ra derta el stake malechub eng beluu. Engdi, kede kmal klou el Ikelesia, eng soak el tmu a ikel luldasu el mo ureor ra ngidil ker, ngara ikel beches chelchad el mora ikel mla medalem, teletael ra klengar el mla mo renges er a ebangkelio ra Jesus Kristo el mora siukang ma beluu eldi merael mo etirir a tekingel a klechelid. Ng soak el melekoi a uldasu el sebechemiu el lousbech el mora rechad el mellemolem e loumerang er a Jesus Kristo me a rechad el direkak a ta el rengesii a Ngklel, e lobengterir a rechad eldi ungil rengrir ra klengar er tir me tirkel el meringel el mengedechuul a klengar er tir moungil.
Ngera bok dung el mo ngosukau sel mouchais ra ebangkelio, el ka lobosech leng klengar er kau? Ke dousbech er a bekl el chad e lolengeseu, e a rebek el chad a sebechir e lolngeseu, leng kmal betok a ureor el ketmekill sel douchais er a mla moluut el ebangkelio el mora bekl el beluu, telungalk, tekoi, ma rechad.
Kede medengei el rokui el kmo sel dolngeseu ra ureor ra kle missionarii a ngarngii a belkul mel kerekerngii sel lomult me a utebechelel. A President Thomas S. Monson a dilu el kmo: “Chelechang e a taem ra rechedad ma re missionaries el me dmak … [e] oureor ra sersel a Rubak el lobterir a rechad elmo re Ngii. Ngii a mla kutmokl a donguu el kired me douchais ra ebangkelio ra betok el rolel, e Ngii a mo ngosukid ra urered alsekum e kede ouedikel el kutmokl a urelel.”1
Ouchais er a olutel a ebangkelio a mellemolem el ngerecheled a re Kristiano e lemelted. A Elder Quentin L. Cook a omeklatk er kid, “A kle missionarii e lureor a diak eldi ta el techetechel a ebangkelio el derta el taem el de rurret el kirel, ng klou el telengtengil a ebangkelio el kired el loureor el kirel eldi mellemolem el mora kodeled alsekum me kede uldelomel ra keltareng e delalem ra rengud a kle Kristiano mesel ebangkelio ra Jesus Kristo.”2
II.
Ngarngii edei el tekoi el bekl el chad ra ikelesia a sebechir el remuul e lolngeseu e lomerek er a ebangkelio, e diak el bol ior ra teletael ra delengcheklir ma urerir. A rebek el chad el kirir el kutmokl a ikal rokui.
Kot, ng sebeched el rokui el meluluuch el kirel a klemeriar reng el molngeseu er tial lorechudel el telkib er sel lureor ra olsobel. A blak el reng omuchel ra klemeriar reng.
Ongerung, ng sebeched el loltirakl a llach. A re mekedung, e orenges el chad er a ikelesia a re kot el morenges el sioning ra klemerang ma belkul a mla moluut el ebangkelio. E a lmuut el klou el tekoi, a re mekedeung el chad ra ikelesia a blechoel loba Reng er Ngii lobengterir el lomtebechel er tir sel losiik el lolengeseu er tial klou e klebokel el lureor el louchais ra olutel ebangkelio ra Jesus Kristo.
Ongedei, ng sebeched el meluluuch el kirel a ulekrael ra bo doruul ra ikel derta el teletael de ngar ngii el mo ouchais ra ebangkelio el mo ra rebebil. Tiang a ngodech ra kuk di doluluuch el kirir a re missionaries malechub eng nglunguuch el mora a ikel bol ruul a rebebil. Kede bai meluluuch el kirel a ikel sebeched el kutmokl. Sel doluluuch, e dolbedebek el kmo a nglunguuch el kirel tial bedengel a ulekrael a mo nger alsekum e ngobengkel sel delalem er a rengud—ng tekoi el chedaol lechukl omekedong er ngii el kmo ng “keltmokl ra rengud” malechub eng “meral ngara rengum.” Moluluuch el delalem er a rengum el uedikel ra ulekrael el mngai, el yaksok er a Rubak el kmo alsekum eng mo mekrolau el mo mengedecheduch ra kmung techang, e ke mong.
Kede ousbech a ulengesuil a Rubak leng ngidil taem e te ngar ngii a re keltmokl ma diak el ngmai a dechelel a klemerang ra olutel a ebangkelio. Ng kired el diak el mengetiit el kmong techa a keltmokl ma diak. A Rubak a medengei rengrir a rokui el Ngelekel, e alsekum e kede meluluuch el kirel a ulekrael, E Ngii a ngosikid el metik ra rechad el Ngii a medengelterir el “mla meketmokl el lorenges er a ebangkelio” (Alma 32:6).
Sel ngerchelek el Apostol ra Rubak, e ak kuriimel ra re bekl el chad ra ikelesia ma telungalk ra Ikelesia me loluluuch el mora Rubak mel ngesuterir el losiik er a rechad el keltmokl el rongesii a chisel a mla moluut el ebangkelio ra Jesus Kristo. A Elder M. Russel Ballard a uldersii tial klou a belkul losisechakl, el kengei er ngii. “Moumerang ra Rubak. Ngii e a Ungil Mengkerengel a Sib. Ngii a medengelterir a rechedal. … Alsekum meng diak kede teloi ra ureor, e te betok ra re sebecherir rongesii a klumechel a Olutel Ebangkelio a oridii a techall elmo medengelii. … A ikel losisechakl a kmal beot—moluluuch, eldi kau ma elsel a telungalk er kau, ra techall ra ureor ra kle missionarii.”3 Sel dochotii a klaumerang er kid e a ikal techall a mei el diak loiak a ngidil “lorimel malechub … ngkelsuul el chledecheduch. Ngdi beot el mo rengii el redechel a beltkil a rengud el kirir a rodam rodos er kid.”4
Ak medengelii tiang el klemerang. Ak dochelir a yaksok er ngak el kmo a doba klaumerang lultuil ra ulengesuil a Rubak, e kede mukrael, e ulekrael, e metik er klou el deurreng e mellemolem er tial lorechudel e lureor ra beltik el reng. Kede mo medengelii sel klungiolel a douchais ra ebangkelio sel de siotai ra rechad loba beltik el reng el ngara rengud el molngeseu er tir, ma bol ua ngera a longer.
III.
A ikakid a bebil ra tekoi el sebeched el remuul el louchais er a ebangkelio elmo ungil:
-
Ng diak ke dobes el “kmo a rechad a mo medengei sel le keltmokl el mo mesuub, ng diak el sel, lekid a keltmokl el molisechakl er tir.”5 A ikel kid a soad er a, uai ea meklou el telkib losisechakl er a mloluut el Ikelesia, a diak el blechoel el rebebil ra rechad a sorir. Te blechoel sorir aredechel a osisechakl, ng diak el sel losisechakl. Mesel lomtab malechub e te melchesuar a ikal redechel a olutel a ebangkelio ra Jesus Kristo ra elsel a klengar er kid, e te melchesuar ra Reng e mocha semeriar er a osisechakl. Te dirrek el locha mo sorir sel losiik a mui el deurreng, mo kmeed er a Dios, malechub a ungil klaudengei er a belkul a klengar.6 Ma le uaisei, eng kired elmo kerekikl e meluluuch e losiik e mengetiit ra kmo kede mekerang a bo dodengei a sorir meluut el suub a betok. Tiang a di moltuill ra betok el tekoi, el ua teletael ra klengar er ngii ma delongeled me tir. Tiang a ungil tekoi el seuadel er a chelechad, ongdibel ma Cheldebechel ra Redil.
-
Me sel dongedecheduch ra rebebil, eng kired el melatk el kmo a siotai elmo mesuub a kuk bebil el kirel a Jesus Kristo ma ebangkelio er Ngii a lemuut el lungil ersel siotai elmo mesuub el kirel a Ikelesia er kid7 Ng soad a rechad a lobult el mora ebangkelio. A chad a mo melchesuar el kirel a Ikelesia er kid ra uriul ra lobult el mora Jesus Kristo; ng diak el lomuchel er seikid. Te betok e loumededenger a ua ikelesia a uaisei e ngar ngii a beltkil a rengrir el mora Osobel. Bol klebechel a doruul.
-
Sel dosiik e dolecholt ra rechad el mora olutel a ebangkelio, eng kired el meruul er ngii ra teletael el merang e ochotii a beltik el reng el kirel ngkel chad. Tia dubech sel dolasem el lolngeseu ra rebebil ngar ngii a mondelngir el bla locholt malechub sel doureor lobengterir ra tekingel a beluu, el ua dolngeseu ra re cheuarem, mesiou ra re mechebuul ma re mengerem, malechub e kede melisiich a mo kungiolel a klengar ra rebebil.
-
A blak el reng el doba el louchais ra ebangkelio a diak el mesers el mora re de kaudengei ma re sechelid. Sera Olymics ra 2016 e aki mlo medengelii a LDS lomkall a taxi ra Rio de Janeiro e lolab a lecheklel a Babier ra Mormon ra euid el kakerous el tekoi e lolab a derta e lomesterir a ngidil chad el kongei el melai. Ngo mekedong er ngii el missionari lomekall a taxi. Ng kmul kmo, “ A ikal rael er a Rio de Janeiro …e a [sersek] er a mission.”8
A Clayton M. Christensen, el meketeketang el chedal a ikelesia ra ureor ra misionari, a kmul kmo “a ikal mla mo merek el lluich el rak, e aki mla mes el diak a ulekdubech el deliongel mesel mo techall el kmo a chad a mo soal el mesuub ra ebangkelio.”9
-
A re bishopric ra Ward a sebechir el kutmokl a tokubets el longdibel ra sakrament el rechad er a ikelesia a morimel el ngoititerir a rechad el mesuub er a ebangkelio. A rechad er a Ward bo lak el chetiteuokel lobengterir a le kaudengei el mora ikal longdibel le te mo meklou a rengrir le ikel mo medung er a ongdibel a selebech elmo kiis a klemeriar reng e omtechei ra Ikelesia el dirrek.
-
Ng betok a techall el douchais ra ebangkelio. Eldi ua, a ikal mlo merek el buil e ak ngiluu a ungil babilngel a beches el chedal a ikelesia el milsuub er a mloluut el ebangkelio ra le dilak el skuul ra lou dengua elmo rengii el loker el kirel a rakt e le nagrngii. Ng miluches: “Ng mlo mellomes a renguk ra teletelel sel longedecheduch er ngak. Uriul [ra] kesai el buil el lolsisechakl er ngak a re missionaris, e ak miltecholb. A klengar a mla moungil.”10 Kede medengelterir a rechad el klengar er tir a sebechel mo ungil a lokiu a mloluut el ebangkelio. Kid ke dolngeseu er tir?
-
A re ngeasek el chedal ra ikelesia el semeriar e meduch er a ureor ra melidiul a oba ungil techall el molengeseu e lomek semeriar ra rebebil ra ebangkelio. Sera longederedel ra dilubech ra Osobel ra bol cholt ra re Nephites, e a Mormon a miluches el kmo a “Kristo a ulsisechakl e milesiou el mora … , e milok a ngerir … me te mlo meduch el mengedecheduch” (3 Nephi 26:14). Chelechal taem sel kumdasu eng sebeched el kmo “lobok a ikel [imorir ra text] me bol longedecheduch.” Moureor el kirel, e re ngeasek!
Sel douchais er a ebangkelio a diak el loberaod eng bai deurreng. A domekedong er ngii el “rechad ra ikelesia e loureor el missionari” a diak el luldasu engdi bai omilkinged ra beltik el reng e loldars el molngeseu er tirkel ngar bita er kid. Ng dirrek el techall el mo sioning el kmo ngera kede melchesuar el kirel a mla moluut el ebangkelio ra Osobel. A Elder Ballard a mla olsisechakl el kmo, “Sel kot el lolchotel el kmo kede mla bult e nger kede melchesuar el kirel ebangkelio ra elsel a klengar er kid a sel soad el louchais er ngii el mora rebebil.”11
Ak sioning ra Jesus Kristo, el ngii a Llomes e Klengar er tial Beluulechad (mesa 3 Nephi 11:11). A mla oluut el ebangkelio er Ngii a omekrael er kid er tial klechad. A Tngakireng er Ngii a meskid a kellou el reng ra klengar ruriul ra kodall mesel klisiich el loutekangel el diak kede luut er a kodall. E a Tngakireng er Ngii a meskid a techall me lousubes a kengtid e, okiu er a Dios ra klebokel e luldesuel e lolsobel, el nguu a diak a ulebengelel klengar, sel kot el ngarbab ra rokui el sengk er a Dios” (D&C 14:7). Loba ngklel a Jesus Kristo, amen.