Agud Sia Mangin Mabakod Man

Ginbugayan ako nga ari diri sa miting, kaupod ang mga nagaangkon sang priesthood sang Dios. And debosyon, ang pagtuo, kag ang di-makinaugalingon nga pag-alagad sining katawhan sang mga lalaki kag batang mga lalaki isa ka modernong milagro. Nagapamulong ako karon nga gab-i sa mga nagaangkon sang priesthood, may edad ukon batan-on, naghiliusa sa lubos tagipusuon nga pag-alagad kay Ginuong JesuCristo.

Ang Ginuo naghatag sang Iya gahum sa yadtong ara sa tanan nga palangakuan sang priesthood nga nagaalagad sing takus sa ila mga katungdanan.

Si Wilford Woodruff, bilang Presidente sang Simbahan, naglaragway sang iya inagihan sa mga palangakuan sang priesthood:

“Nabatian ko ang pinakaunang sermon nga akon nabatian sa Simbahan. Sunod nga adlaw, ginbunyagan ako. … Gin-ordinan ako nga Teacher. Ang misyon ko sa gilayon nagsugod. … Gintapos ko inang bug-os nga misyon bilang isa ka Teacher. … Sa konperensya gin-ordinan ako nga Priest. … Pagkatapos sina, ginpadala ako … sa misyon padulong sa bagatnan nga pungsod. Ina natabo sa Tigpulak sang 1834. May kaupod ako, kag naglakat kami nga wala sang kahita kag kwarta. Nagpanglakaton ako sang malayo kag nagwali sang Ebanghelyo, kag nagbunyag sa pila ka tawo nga indi ko makumpirmahan sulod sa Simbahan, bangud isa lang ka Priest ako. … Nagpanglakaton ako sang pila ka panahon nga nagawali sang Ebanghelyo antes ako gin-ordinan nga isa ka Elder. …

“[Karon] halos mga singkwentay kwatro na ka tuig nga miyembro ako sang Napulogduha ka Mga Apostoles. Nagbiyahe ako upod sa sina kag sa iban pa nga mga korum mga saisiyenta anyos na karon; kag luyag ko ihambal ini sa mga nagtililipon nga ako ginsustener sang gahum sang Dios bilang isa ka Teacher, kag labi na samtang nag-obra ako sa ulubasan bilang isa ka Priest, subong nga ako ginsustener bilang isa ka Apostoles. Wala sang pagkatuhay ini basta ginahimo naton ang aton katungdanan.”¹

Inang matahum, espirituhanon nga posibilidad sang walay pagkatuhay ginpanugyan sa paglaragway sang Ginuo sang Aaronic Priesthood bilang “appendage” sang Melchizedek Priesthood.² Ang tinaga nga appendage nagakahulogan nga ang duha nagatabid. Ining koneksyon importante sa priesthood agud ini mangin pwersa kag bugay nga dapat mangin, sa sining kalibutan kag sa padayon, kay ini “walay sinugoran sa adlaw ukon katapusan sa tinuig.”³

Ang koneksyon simple. Ang Aaronic Priesthood nagahanda sa batan-on nga mga lalaki para sa mas dugang nga sagradong katungdanan.

“Ang gahum kag awtoridad sang mas mataas, ukon Melchizedek Priesthood, amo ang paghupot sang mga yabi sang tanan nga espirituhanon nga mga bugay sang simbahan—

“Ang makaangkon sang pribilihiyo sang pagbaton sang mga misteryo sang ginharian sang langit, ang mabuksan ang mga langit sa ila, ang makig-ugyon sa kabilogan nga pagtililipon kag simbahan sang Unang Nabun-ag, kag mag-agum sang pag-upod kag presensya sang Dios nga Amay, kag ni Jesus ang tagapatunga sang bag-o nga katipan.”⁴

Yadtong mga yabi sang priesthood lubos nga ginagamit sang isa lang ka tawo sa isa ka tion, ang Presidente kag nagapangulo nga high priest sa Simbahan sang Ginuo. Dayon, paagi sa pagdelegar sang Presidente, ang kada tawo nga nagaangkon sang Melchizedek Priesthood mahatagan sang awtoridad kag pribilihiyo sa paghambal kag pagbuhat sa ngalan sang Makagagahum. May wala sang dulonan inang gahum. Nagasakop ini sa kabuhi kag kamatayon, sa pamilya kag sa Simbahan, upod ang kinaiya sang Dios mismo kag ang Iya buluhaton nga walay katubtoban.

Ang Ginuo nagahanda sa nagaangkon sang Aaronic Priesthood nga mangin isa ka elder nga nagaalagad sa pagtuo, gahum, kag pagpasalamat sa sinang mahimayaon nga Melchizedek Priesthood.

Sa mga elder, ang tudok nga pagpasalamat kinahanglan sa pagbuhat sang inyo bahin sa lubos nga pag-alagad sa priesthood. Madumdoman ninyo ang mga adlaw bilang deacon, teacher, ukon priest sang ang yadtong nagaangkon sang mas mataas nga priesthood nag-ulikid agud magtib-ong kag padasigon kamo sa inyo nga pagpanglakaton sa priesthood.

Ang kada nagaangkon sang Melchizedek Priesthood may amo nga mga handurawan, apang ang pagpasalamat basi nagdiutay sa paglakat sang tinuig. Ginalauman ko nga mabuhi ko liwat inang balatyagon kag upod sini ang determinasyon nga maghatag kamo sa tanan nga sarang hatagan ninyo sang amo man nga bulig nga sang kaisa nabaton ninyo.

Madumdoman ko ang bishop nga nagkabig sa akon nga daw may ara na ako sang gahum sa priesthood. Gintawag niya ako isa ka Domingo sang ako isa ka priest. Siling niya kinahanglan niya ako nga kaupod agud magbisita sang pila ka mga miyembro sa ward. Ginsiling niya ini sa paagi nga daw ako lang ang iya paglaum para sa kadalag-an. Indi niya ako kinahanglan. May ara sia sang labing maayo nga mga manuglaygay sa iya bishopric.

Nagbisita kami sa waay kwarta kag gutom nga balo. Luyag niya nga buligan ko sia nga magtandog sa tagipusuon sang babayi, buyokon sia nga maghimo kag maggamit sang badyet, kag magpromisa sa iya nga sarang sia mag-uswag agud makaatipan sa iya kaugalingon kag makabulig sa iban.

Naglakat kami sunod agud pasulhayon ang duha ka batang babayi nga nagaistar sa mabudlay nga sitwasyon. Sang kami nagkabos, ang bishop nagsiling sa akon sing mahipos, “Yadtong kabataan indi gid malimot nga nagbisita kita sa ila.”

Sa sunod nga balay, nakit-an ko kon paano niya gindapit ang diutay kaaktibong lalaki nga magbalik sa Ginuo paagi sa pagkumbinsi sa iya nga kinahanglan sia sang mga miyembro sa ward.

Inang bishop isa ka nagaangkon sang Melchizedek Priesthood nga nagpataas sang akon mga panan-aw kag nagpadasig sa akon paagi sa halimbawa. Gintudloan niya ako nga makaangkon sang gahum kag kaisog nga maglakat bisan diin sa pag-alagad sa Ginuo. Madugay na sia nga nagtaliwan padulong sa iya padya, apang madumdoman ko sia gihapon bangud sia naglab-ot kag nag-alsa sa akon sang ako wala pa sang inagihan nga nagaangkon sang Aaronic Priesthood. Nabal-an ko sang ulihi nga nakit-an niya ako sa palaaboton nga banas sang priesthood nga may mas dakong mga responsibilidad, nga wala ko makit-an.

Ginhimo man ini sang amay ko sa akon. Sia batid kag maalam nga nagaangkon sang Melchizedek Priesthood. Sang kaisa ginpangabay sia sang isa ka Apostoles nga magsulat sing malip-ut parte sa ebidensya sang siyensya sa edad sang kalibutan. Mainandamon niya nga ginsulat ini, nakabalo nga basi ang pila nga makabasa sini may mabaskog nga mga balatyagon nga ang kalibutan mas manubo ang edad sangsa ginpanugyan sang ebidensya sa siyensya.

Madumdoma ko pa ang akon amay nga nagdaho sa akon sang iya ginsulat kag nagsiling, “Hal, may espirituhanon ka nga kaalam nga mabal-an kon bala ipadala ko ini sa mga apostoles kag mga propeta.” Indi ko na madumdoman ang kalabanan sang sinulat, apang nagapasalamat ako sing padayon bangud sang isa ka dakong nagaangkon sang Melchizedek Priesthood nga nakit-an sa akon ang espirituhanon nga kaalam nga wala ko makit-an.

Isa ka gab-i, pila ka tuig ang nagligad, pagkatapos nga naordinan ako nga Apostoles, ang propeta sang Dios nagtawag sa akon kag nagpangabay nga basahon ko ang isa ka sinulat parte sa doktrina sang Simbahan. Ginbasa niya sina nga gab-i ang mga kapitulo sang isa ka libro. Siling niya nga nagakadlaw, “Indi ko matapos ang tanan nga ini. Indi ka dapat magpahuway samtang nagatrabaho ako.” Kag dayon gingamit niya ang halos pareho nga mga tinaga sang akon amay sa tinuig nga nagligad: “Hal, ikaw ang dapat ang magbasa sini. Mabal-an mo kon husto nga ibantala ini.”

Inang pareho nga sulundan nga ang isa ka nagaangkon sang Melchizedek Priesthood nagapataas sang mga panan-aw kag nagahatag sang kumpiyansa natabo sa isa ka speech festival nga ginsakdag sang Simbahan. Sa edad nga diesesiete, ginpangabay ako nga magpamulong sa isa ka madamong manugpalamati. Wala ako sang ideya kon ano ang ginalauman sa akon. Wala ako ginhatagan sang topiko, kag ako naghanda sang pamulong nga kapin sa nabal-an ko parte sa ebanghelyo. Samtang nagahambal ako, nabal-an ko ang akon sayup. Madumdoman ko pa pagkatapos ko sang hambal, ang akon balatyagon sang kahuya nga ako nalugaw-an.

Ang sunod kag katapusan nga manughambal amo si Elder Matthew Cowley sang Korum sang Napulogduha ka Mga Apostoles. Bantog sia nga orador—pinalangga sa bug-os nga Simbahan. Madumdoman ko sa gihapon nga nagtangla ako sa iya halin sa akon pulongkoan sunod sa pulpito.

Nagsugod sia sa isa ka gamhanan nga tingog. Siling niya ang akon pamulong naghimo sa iya nga magbatyag nga sia daw ara sa isa ka dakong konperensya. Nagyuhum sia sang ginhambal ini. Ang balatyagon ko nga nalugaw-an nadula kag nasundan sang kumpiyansa nga sa pila ka adlaw mangin subong ako sang iya ginhunahuna.

Ang handurawan sinang gab-i sa gihapon nagagiya sa akon nga magpamati sang maayo kon ang nagaangkon sang Aaronic Priesthood nagahambal. Bangud sang ginhimo sa akon ni Elder Cowley, dalayon ako nagalaum nga mabatian ko ang pulong sang Dios. Talagsa ako malugaw-an kag masami nagakatingala, kag indi ko mapugngan nga magyuhum subong sa ginhimo ni Elder Cowley.

Madamo nga mga butang ang makabulig magpabakod sa aton lamharon nga mga kautoran nga mag-uswag sa priesthood, apang wala na sing mas gamhanan sangsa pagbulig naton sa ila nga magpalambo sang pagtuo kag kumpiyansa nga sila makakuha sang gahum sang Dios sa pag-alagad nila sa priesthood.

Inang pagtuo kag kumpiyansa indi magpabilin sa ila halin sa solo nga inagihan bisan nga natib-ong sila sang pinakabatid nga nagaangkon sang Melchizedek Priesthood. Ang abilidad nga magkuha sa yadtong mga gahum dapat mapalambo paagi sa madamo nga pagpakita sang kumpiyansa halin sa yadtong mga mas batid sa priesthood.

Ang mga nagaangkon sang Aaronic Priesthood nagakinahanglan man sang inadlaw kag bisan inoras nga pagpadasig kag pagtadlong halin sa Ginuo mismo paagi sa Balaan nga Espiritu. Ina ara sa ila samtang sila magpili nga magpabilin nga takus sini. Ini nagadepende sa mga pagpili nga pagahimuon nila.

Amo ina kon ngaa dapat kita magtudlo paagi sa halimbawa kag pagpamatuod nga ang mga pulong sang bantog nga nagaangkon sang Melchizedek Priesthood nga lider nga si Haring Benjamin matuod.⁵ Ang mga ini pulong sang pagpalangga nga ginhambal sa ngalan sang Ginuo, nga nagapanag-iya sining priesthood. Si Haring Benjamin nagatudlo kon ano ang ginapangayo sa aton agud magpabilin nga nagakaigo nga putli agud makabaton sang pagpadasig kag pagtadlong sang Ginuo:

“Kag sa ulihi, indi ko mahambal sa inyo ang tanan nga butang sa paagi nga kamo makasala; kay may nanuhay-tuhay nga mga paagi kag pahito, sa pagkadamo nga indi ko maisip ang mga ini.

“Apang ini tanan ang masiling ko sa inyo, nga kon indi ninyo pagbantayan ang inyo mga kaugalingon, mga panghunahuna, mga pulong, kag mga buhat, kag magtuman sa mga sugo sang Dios, kag magpadayon sa pagtuo parte sa inyo nabatian nahanungod sa pag-abot sang Ginuo, bisan pa tubtob sa katapusan sang inyo mga kabuhi, pat-ud nga kamo indi maluwas. Kag karon, O tawo, dumdoma, kag maluwas.”⁶

Nabal-an naton tanan ang nagakalayo nga mga baslay ni Satanas nga daw sa buhawi batok sa batan-on nga nagaangkon sang priesthood nga tuman naton ka palangga. Sa aton, sila subong sang mga lamharon nga hangaway, nga nagtawag sa ila kaugalingon nga mga anak nga lalaki ni Helaman. Maluwas sila, subong sa  yadtong mga hangaway, kon sila magpalayo sa katalagman, subong sa pagbuyok ni Haring Benjamin nga himuon nila.

Ang mga anak ni Helaman wala magduda. Sila maisog nga nag-away kag nangin madinalag-on bangud nagpati sila sa mga pulong sang ila mga iloy.⁷ Nahangpan naton ang gahum sang pagtuo sang isa ka mapinalanggaon nga iloy. Ang mga iloy nagasuporta sang dako sa mga anak nga lalaki nila karon nga adlaw. Kita nga mga nagaangkon sang priesthood sarang kag dapat nga magdugang sa sinang suporta paagi sa aton determinasyon nga magtuman sa mando nga kon kita nahaylo, kita maglab-ot kag magpabakod sa aton kautoran.⁸

Ang pangamuyo ko amo nga ang kada nagaangkon sang Melchizedek Priesthood magabaton sang oportunidad nga ginhalad sang Ginuo:

“Kag kon sin-o sa inyo ang mabakod sa Espiritu, tugoti sia nga mag-upod sa mahuyang, nga sia mapabakod sa tanan nga pagpakubos, nga sia mangin mabakod man.

“Gani, upda ninyo yadtong mga naordinan sa mas diutay nga priesthood, kag ipadala sila antes sa inyo agud maghimo sang mga pagtalana, kag maghanda sang paagi, kag magkadto sa mga pagtalana nga kamo mismo indi makakadto.

“Yari karon, ini ang paagi nga ang mga apostoles ko, sa dumaan nga mga adlaw, nagtukod sang akon simbahan para sa akon.”⁹

Kamo nga mga lider sa priesthood kag mga amay sang mga nagaangkon sang Aaronic Priesthood makahimo sang mga milagro. Makabulig kamo sa Ginuo sa pagpauno sang hanay sang himpit nga mga elder sang batan-on nga mga lalaki nga nagabaton sang tawag agud magwali sang ebanghelyo kag maghimo sini nga may kumpiyansa. Makit-an ninyo ang madamo nga inyo gintib-ong kag ginpadasig nga magpabilin nga himpit, takus nga magpangasawa sa templo, kag sa balos, magtib-ong kag maghanda sa iban.

Ini wala nagakinahanglan sang bag-o nga mga programa sang aktibidades, ginpauswag nga panudlo nga mga materyales, ukon mas maayo nga social media. Wala ini nagakinahanglan sang tawag nga mas kapin sangsa may ara kamo karon. Ang panumpa kag kasugtanan sang priesthood nagahatag sa inyo sang gahum, awtoridad, kag direksyon. Ginapangamuyo ko nga magpauli kamo kag tun-an sing maayo ang panumpa kag kasugtanan sang priesthood nga ara sa Doctrine and Covenants section 84.

Kami tanan nagalaum nga mas madamo nga batan-on nga mga lalaki ang makaagum sang mga inagihan subong kay Wilford Woodruff, nga isa ka nagaangkon sang Aaronic Priesthood sang sia nagtudlo sang ebanghelyo ni JesuCristo nga may gahum nga makahaylo.

Nagapangamuyo ako nga kita mangin angay sa aton tawag agud magtib-ong sang iban sa paghanda sa ila para sa mahimayaon nga pag-alagad nila. Ginapasalamatan ko sing lubos sa tagipusuon ang maayong katawhan nga nagtib-ong sa akon kag nagpakita kon paano ko palanggaon kag itib-ong ang iban.

Nagasaksi ako nga si Presidente Thomas S. Monson nagahupot sa tanan nga yabi sang priesthood sa kalibutan sa sining tion. Nagapamatuod ako nga sia, sa bug-os kabuhi nga pag-alagad, nangin halimbawa naton tanan parte sa paglab-ot sa iban bilang nagaangkon sang Melchizedek Priesthood. Personal ako nga nagapasalamat sa paagi nga gintib-ong niya ako kag ginpakita kon paano ko itib-ong ang iban.

Ang Dios nga Amay nagakabuhi. Si Jesus amo ang Cristo. Ini ang Iya Simbahan kag ginharian. Ini ang Iya priesthood. Nabal-an ko ini sa akon kaugalingon paagi sa gahum sang Balaan nga Espiritu. Sa ngalan sang Ginuong JesuCristo, amen.