Xwv Kom Nws Yuav Muaj Zog Thiab

Kuv tau koob hmoov nyob hauv kev sib ntsib no nrog cov uas tuav Vajtswv lub pov thawj hwj. Qhov uas cov txiv neej thiab cov tub hluas no rau siab, muaj kev ntseeg, thiab pab lwm tus yog ib qho txuj ci tseem ceeb. Kuv hais lus hmo no rau cov uas tuav lub pov thawj hwj, tsis hais cov laus thiab cov hluas, uas koom siab xav ua hauj lwm rau tus Tswv Yexus Khetos.

Tus Tswv muab Nws lub hwj chim rau tag nrho cov uas muaj lub luag hauj lwm pov thawj hwj thiab uas tsim nyog ua lawv dej num pov thawj hwj.

Wilford Woodruff, thaum nws yog tus Thawj Tswj Hwm ntawm lub Koom Txoos, piav txog nws tej luag hauj lwm ntawm lub pov thawj hwj hais tias:

“Yog thawj zaug kuv mloog ib zaj lus hauv lub Koom Txoos no. Hnub tom qab ntawd kuv tau ua kev cai raus dej. … Lawv tsa kuv ua ib tug Xib Hwb. Ces tam sim ntawd kuv pib mus ua tub txib. … Tag nrho lub sij hawm kuv ua tub txib kuv yog ib tug Xib Hwb. … Nyob hauv lub rooj sab laj lawv tsa kuv ua ib tug Pov Thawj. … Tom qab kuv yog ib tug Pov Thawj kuv txais kev txib … mus ua tub txib rau sab qab teb. Yog thaum lub caij nplooj ntoos zeeg xyoo 1834. Kuv muaj ib tug khub, thiab wb tsis nqa hnab nyiaj los yog hnab thoob puab. Kuv taug mus ntau mais thiab qhia txoj Moo Zoo, thiab kuv muab ob peb tus neeg ua kev cai raus dej uas kuv tsis tau muab pom zoo hauv lub Koom Txoos, vim kuv yog ib tug Pov Thawj xwb. … Kuv twb siv sij hawm qhia txoj Moo Zoo ua ntej lawv tsa kuv ua ib tug Txwj Laug. …

“[Nim no] kuv yog ib tug mej zeej ntawm Pawg Kaum Ob tug Thwj Tim tau tsib caug plaub xyoos lawm. Kuv tau nrog pawg no thiab lwm pawg tau rau caum xyoo lawm; thiab kuv xav hais rau nej hais tias thaum kuv yog ib tug Xib Hwb, thiab thaum kuv ua tub txib thaum kuv yog ib tug Pov Thawj, Vajtswv lub hwj chim tau txhawb nqa kuv thaum ntawd ib yam li thaum kuv yog ib tug Thwj Tim. Lub hwj chim no yeej yuav tsis hloov yog peb ua raws li peb lub luag hauj lwm xwb.”¹

Tus Tswv tej lus piav tias lub Pov Thawj Hwj Aloos txuas rau lub Pov Thawj Hwj Mekixedes qhia txog qhov uas lub hwj chim no yeej yuav tsis hloov.² Qhov kev sib txuas no tseem ceeb rau lub hwj chim pov thawj hwj txoj kev pab tib neeg, nyob hauv lub ntiaj teb no thiab nyob mus ib txhis, vim lub pov thawj hwj “tsis muaj hnub pib thiab tsis muaj hnub kawg.”³

Qhov kev sib txuas no yog ib qho yooj yim. Lub Pov Thawj Hwj Aloos npaj cov tub hluas kom txais tau ib txoj kev lav ris dawb ceev ntxiv.

Lub hwj chim thiab txoj cai ntawm lub siab zog, los yog lub Pov Thawj Hwj Mekhixedes, yog tuav cov yuam sij ntawm tag nrho lub koom txoos tej koob hmoov ntawm sab ntsuj plig—

Kom muaj lub cib fim txais tau tej txuj ci neeg paub tsis txog ntawm lub nceeg vaj ceeb tsheej, kom ntuj qhib rau lawv, kom mus koom nrog txoj kev sib txoos thiab lub koom txoos ntawm tus Tub Hlob, thiab kom xyiv fab rau txoj kev sib raug zoo thiab yeeb haum ntawm Vajtswv uas yog Leej Txiv, thiab Yexus uas yog tus neeg nruab nrab ntawm txoj kev khi lus tshiab.⁴

Tsuas muaj ib tug uas siv tau cov yuam sij tag nrho thaum tib lub sij hawm xwb, yog tus Thawj Tswj Hwm thiab tus pov thawj hlob uas tswj hwm ntawm tus Tswv lub Koom Txoos. Ces, raws li tus Thawj Tswj Hwm txib, yuav muab txoj cai rau txhua tus txiv neej uas tuav lub Pov Thawj Hwj Mekixedes kom hais lus thiab ua tej yam los ntawm tus Siab Tshaj Plaws lub npe. Lub hwj chim no yeej nyob mus ib txhis. Lub hwj chim no tseem ceeb rau txoj sia thiab kev tuag, rau tsev neeg thiab lub Koom Txoos, rau Vajtswv tus xeeb ceem thiab Nws txoj hauj lwm nyob mus ib txhis.

Tus Tswv npaj tus uas tuav lub Pov Thawj Hwj Aloos kom rais los ua ib tug txwj laug uas tuav lub Pov Thawj Hwj Mekixedes ua hauj lwm nrog kev ntseeg, lub hwj chim thiab kev ris txiaj.

Nej cov txwj laug yuav tsum ris Vajtswv txiaj heev kom siv nej lub pov thawj hwj ua nej tej hauj lwm pab lwm tus. Nej yuav nco txog thaum nej yog ib tug dikas, tus xib hwb, los yog pov thawj thaum cov uas muaj lub pov thawj hwj siab zog tau txhawb nqa nej thaum nej siv nej lub pov thawj hwj.

Txhua tus uas tuav lub Pov Thawj Hwj Mekixedes nco txog tej lub sij hawm zoo li no, tiam sis tej zaum lawv txoj kev ris txiaj tau ploj zuj zus lawm. Kuv cia siab tias kuv yuav ua rau lawv rov qab muaj tej kev xav zoo li no thiab ua rau nej txiav txim siab tias nej yuav pab tau lwm tus zoo ib yam li nej tau txais kev pab dhau los.

Kuv nco txog ib tug npisov uas coj yam ntxwv rau kuv zoo li kuv twb rais los ua ib tug uas paub siv lub hwj chim pov thawj hwj lawm. Muaj ib Hnub Caiv nws hu kuv thaum kuv yog ib tug pov thawj. Nws hais tias nws xav kom kuv ua nws tus khub mus xyuas ob peb tug mej zeej ntawm peb pawg ntseeg. Nws hais lus ua rau kuv xav tias kuv yog tib tug uas pab tau nws xwb. Nws yeej tsis tas muaj kuv. Nws twb muaj ob tug pab cuam zoo nyob hauv pawg npisov.

Wb tau mus xyuas ib tug poj ntsuam uas tsis muaj nyiaj. Kuv tus npisov xav kom kuv pab tshoov tus poj ntsuam lub siab, hais kom nws tswj hwm nws cov nyiaj txiag, thiab cog lus rau nws tias yuav muaj sij hawm thaum nws yuav muaj txaus pab nws tus kheej thiab pab lwm tus.

Ces wb mus nplij ob tug me nyuam ntxhais lub siab uas ua neej nyuaj heev. Thaum wb tab tom tawm mus, tus npisov hais rau kuv tias, “Ob tug me nyuam ntawd yeej yuav nco ntsoov tias wb tuaj xyuas nkawd.”

Lub tsev tom qab ntawd, kuv pom tias yuav tsum ua li cas kom caw ib tug txiv neej uas tsis tshua muaj siab ntseeg rov qab los cuag tus Tswv thaum tus npisov hais rau nws tias cov mej zeej hauv pawg ntseeg xav tau nws.

Tus npisov yog ib tug uas tuav lub Pov Thawj Hwj Mekixedes uas coj yam ntxwv kom pab txhawb nqa kuv lub zeem muag. Nws qhia kuv paub muaj hwj chim thiab ua siab loj mus pab ua tus Tswv tej hauj lwm. Nws twb tso lub ntiaj teb no tseg tau ntev lawm, tiam sis kuv tseem nco ntsoov nws vim nws xyab tes pab txhawb nqa kuv thaum kuv yog ib tug tuav lub Pov Thawj Hwj Aloos uas tsis tshua paub ua tej yam. Tom qab ntawd kuv twb kawm tias nws pom kuv taug ib txoj kev pov thawj hwj uas muaj kev lav ris loj tshaj kuv pom tau kuv tus kheej.

Kuv txiv ua zoo ib yam li ntawd rau kuv. Nws yog ib tug tuav lub Pov Thawj Hwj Mekixedes uas muaj tswv yim heev. Muaj ib hnub ib tug Thwj Tim hais kom nws sau ib zaj lus txog qhov uas lub ntiaj teb muaj hnub nyoog npaum li cas. Nws ua tib zoo sau ntawv, vim nws paub tias ib txhia uas yuav nyeem nws cov ntawv twb xav tias lub ntiaj teb tsis qub npaum li tej yam puav pheej hauv ntiaj teb qhia.

Kuv tseem nco ntsoov tias kuv txiv tau muab cov ntawv nws sau rau kuv thiab hais tias, “Hal, koj muaj laj lim tswv yim ntawm sab ntsuj plig txaus kom paub seb puas tsim nyog kuv xa cov ntawv no rau cov thwj tim thiab cov yaj saub.” Kuv tsis nco qab zoo tias nws sau li cas, tiam sis kuv yeej yuav nco ntsoov kuv txoj kev xav ua tsaug rau ib tug tuav lub Pov Thawj Hwj Mekixedes uas pom laj lim tswv yim uas kuv tsis pom nyob hauv kuv tus kheej.

Muaj ib hmo, ntau xyoo tom qab ntawd, tom qab kuv yog ib tug Thwj Tim, Vajtswv tus yaj saub hu kuv thiab hais kom kuv nyeem ib yam uas muaj neeg sau ntawv txog lub Koom Txoos cov lus qhuab qhia. Nws twb siv ib hmo nyeem tej tshooj ntawm ib phau ntawv. Nws luag nyav hais tias, “Kuv yeej nyeem tsis tau tag nrho. Tsis tsim nyog uas koj so thaum kuv khwv ua hauj lwm.” Ces nws twb siv yuav luag tib co lus uas kuv txiv twb hais rau kuv ua ntej hais tias: “Hal, tsim nyog uas koj yog tus nyeem cov ntawv no. Koj yuav paub hais tias puas tsim nyog muab luam tawm.”

Muaj ib hmo kuv twb kawm txog tus txheej txheem ntawm ib tug uas tuav lub Pov Thawj Hwj Mekixedes kev txhawb nqa lub zeem muag nyob hauv ib lub rooj sab laj hais zaj lus uas lub Koom Txoos ua. Kuv muaj 17 xyoo, thiab kuv yuav hais rau ib pawg neeg loj. Kuv tsis tau paub tias kuv yuav tsum ua li cas. Lawv tsis tau qhia kuv tias kuv yuav tsum hais txog dab tsi, yog li ntawd kuv npaj ib zaj lus uas hais txog tej yam uas kuv tsis paub zoo txog txoj moo zoo. Thaum kuv hais lus, kuv paub tias kuv twb ua yuam kev. Kuv tseem nco qab tias, tom qab kuv hais lus, kuv xav tias kuv twb hais tsis zoo hlo li.

Tus uas hais lus kawg yog Txwj Laug Matthew Cowley ntawm Pawg Kaum Ob tug Thwj Tim. Nws yog ib tug txawj hais lus—txhua tus hauv lub Koom Txoos hlub nws heev. Kuv tseem nco qab thaum kuv zaum saum kuv lub rooj zaum saib nws sawv saum lub sam thiaj.

Nws lub suab muaj hwj chim thaum nws pib hais lus. Nws hais tias kuv zaj lus ua rau nws xav tias nws nyob hauv ib lub rooj sab laj zoo kawg. Nws yeej luag nyav thaum nws hais li ntawd. Kuv txoj kev poob siab twb ploj mus thiab ua rau kuv xav tias tej zaum muaj ib hnub kuv yuav rais los ua zoo li tus neeg uas nws xav txog kuv tam sim ntawd.

Kuv txoj kev nco txog hmo ntawd ua rau kuv ua tib zoo mloog thaum ib tug uas tuav lub Pov Thawj Hwj Aloos hais lus. Vim Txwj Laug Cowley ua li ntawd rau kuv, kuv yeej xav tias kuv yuav mloog Vajtswv txoj lus. Feem ntau kuv tsis poob siab thiab ua rau kuv xav tsis thoob, thiab kuv yeej luag nyav zoo ib yam li Txwj Laug Cowley.

Muaj ntau yam uas yuav pab txhawb nqa peb cov tub hluas kom lawv muaj zog ntawm lub pov thawj hwj, tiam sis tsis muaj ib yam dab tsi uas muaj hwj chim ntau tshaj kev txhawb nqa lawv txoj kev ntseeg tias lawv txais tau Vajtswv lub hwj chim thaum lawv ua hauj lwm pov thawj hwj.

Lawv yuav tsis muaj kev ntseeg li ntawd los ntawm ib lub sij hawm xwb txawm ib tug tuav lub Pov Thawj Hwj Mekixedes zoo tshaj txhawb nqa lawv. Cov uas paub siv lub pov thawj hwj yuav tsum hais ntau zaus hais tias lawv tso siab rau cov tub hluas qhia lawv tias lawv paub siv tej lub hwj chim ntawd.

Cov uas tuav lub Pov Thawj Hwj Aloos yuav tsum txais kev txhawb nqa thiab kev qhuab ntuas ntawm tus Tswv dhau los ntawm tus Vaj Ntsuj Plig Dawb Huv txhua hnub los yog txhua teev sij hawm. Yuav muaj li ntawd thaum lawv xaiv ua neeg tsim nyog txais tej ntawd. Nyob ntawm seb lawv xaiv ua tej yam twg.

Yog li ntawd peb thiaj yuav tsum coj yam ntxwv thiab ua tim khawv qhia tias tus uas tuav lub Pov Thawj Hwj Mekixedes, tus Vaj Ntxwv Npeyamis, tej lus muaj tseeb.⁵ Nws hais tej lus no nrog kev hlub los ntawm tus Tswv lub npe. Tus Vaj Ntxwv Npeyamis qhia tias peb yuav tsum ua li cas kom ua neeg huv txaus peb thiaj li txais tau tus Tswv tej kev txhawb nqa thiab kev qhuab ntuas:

“Thiab thaum kawg no, kuv tsis muaj peev xwm qhia nej tag nrho txhua yam uas nej ua yuav txhaum; vim muaj ntau txoj kev thiab ntau hom, twb muaj ntau heev uas kuv tsis muaj peev xwm suav lawv txheeb.

“Tiam sis kuv muaj peev xwm qhia nej npaum li no tias, yog nej tsis xyuas nej tus kheej, thiab nej tej kev xav, thiab nej tej lus, thiab tej uas nej ua, thiab ceev Vajtswv tej lus txib, thiab nyob nraim hauv txoj kev ntseeg uas nej tau hnov txog txoj kev uas peb tus Tswv yuav los, kom mus txog thaum nej txoj sia kawg, nej yuav tsum piam sij. Thiab nim no, Au neeg es, nco ntsoov, thiab tsis txhob piam sij.”⁶

Peb txhua tus paub txog tej xib xub hluav taws uas tus yeeb ncuab ntawm kev ncaj ncees tua zoo li cua hlob uas nplawm cov tub hluas uas tuav lub pov thawj hwj uas peb hlub heev. Peb xav tias lawv zoo li cov tub rog hluas, uas hu lawv tus kheej ua Hilamas cov tub. Lawv yeej yuav tsis tuag, ib yam li cov tub rog hluas ntawd, yog lawv ua tej yam xws li tus Vaj Ntxwv Npeyamis ntuas lawv.

Hilamas cov tub tsis tau ua xyem xyav. Lawv ua siab loj ntaus rog thiab kov yeej vim lawv ntseeg lawv niam tej lus.⁷ Peb to taub tias ib tug niam tsev uas muaj kev ntseeg muaj hwj chim npaum li cas. Cov niam tsev yeej txhawb nqa lawv cov tub niaj hnub no. Peb cov uas tuav lub pov thawj hwj yuav tsum muab kev txhawb nqa ntxiv thaum peb txiav txim siab tias peb yuav ua raws li Vajtswv txib thaum peb hloov siab los ntseeg hais tias, peb yuav tsum xyab tes los txhawb pab peb cov kwv tij.⁸

Kuv thov Vajtswv kom txhua tus uas tuav lub Pov Thawj Hwj Mekixedes yuav lees yuav qhov uas tus Tswv xav muab li no hais tias:

Thiab yog muaj ib tug neeg ntawm nej muaj zog ntawm tus Ntsuj Plig, kom nws coj ib tug qaug zog nrog nws, kom yuav txhawb nqa tus qaug zog raws li kev siab mos siab muag huv si, kom nws yuav rais los mus muaj zog thiab.

Yog li ntawd, nej cia li coj cov tau muab lub pov thawj hwj yau zog tsa rau lawm nrog nej mus, thiab xa lawv ua ntej mus teem caij sib ntsib, thiab mus npaj txoj kev, thiab mus koom tej kev sib ntsib uas nej tus kheej mus tsis tau.

Saib seb, qhov no yog txoj kev uas kuv cov thwj tim, nyob txheej thaum ub, tau txhim tsa kuv lub koom txoos rau kuv.⁹

Nej cov thawj coj pov thawj hwj thiab cov txiv tsev uas muaj tub ntawm lub Pov Thawj Hwj Aloos yeej ua tau tej txuj ci tseem ceeb. Nej yeej pab tau tus Tswv txhawb nqa cov tub hluas rais los ua cov txwj laug uas muaj siab ntseeg thiab txais kev hu mus rau siab tshaj tawm txoj moo zoo. Nej yuav pom ntau tus neeg uas nej tau pab thiab txhawb nqa rau siab ntseeg, sib yuav hauv lub tuam tsev, thiab pab thiab txhawb nqa lwm tus.

Nej tsis tas muaj tej txheej xwm tshiab, cov ntaub ntawv qhia zoo dua, los yog tej social media zoo dua ntxiv. Nej tsis tas txais kev hu tshaj qhov nej muaj tam sim no. Txoj kev lav lus thiab kev khi lus ntawm lub pov thawj hwj yuav ua rau nej muaj hwj chim, txoj cai, thiab coj nej txoj hau kev. Kuv thov kom nej mus tsev thiab ua tib zoo kawm kev lav lus thiab kev khi lus ntawm lub pov thawj hwj, nyob hauv phau Lus Qhuab Qhia thiab Kev Khi Lus tshooj 84.

Peb txhua tus cia siab tias ntau tus tub hluas yuav zoo li Wilford Woodruff, uas tau qhia Yexus Khetos txoj moo zoo kom tib neeg hloov siab los ntseeg thaum nws yog ib tug uas tuav lub Pov Thawj Hwj Aloos.

Kuv thov Vajtswv kom peb yuav ua raws li Vajtswv hu kom peb txhawb nqa lwm tus npaj lawv ua hauj lwm rau tus Tswv. Kuv hais ua tsaug rau txhua tus neeg zoo kawg nkaus uas tau txhawb nqa kuv thiab qhia kuv paub hlub thiab txhawb nqa lwm tus.

Kuv ua tim khawv tias Thawj Tswj Hwm Thomas S. Monson tuav tag nrho cov yuam sij ntawm lub pov thawj hwj hauv lub ntiaj teb thaum lub sij hawm no. Kuv ua tim khawv tias, tas nws lub neej, nws coj yam ntxwv rau peb txhua tus kom pab lwm tus vim peb yog cov uas tuav lub Pov Thawj Hwj Mekixedes. Kuv yeej zoo siab vim nws tau txhawb nqa kuv thiab tau qhia kuv paub pab lwm tus.

Vajtswv Leej Txiv muaj txoj sia nyob. Yexus yog tus Khetos. Nov yog Nws lub Koom Txoos thiab lub nceeg vaj. Nov yog Nws lub pov thawj hwj. Kuv paub li no los ntawm tus Vaj Ntsuj Plig Dawb Huv lub hwj chim. Los ntawm tus Tswv Yexus Khetos lub npe dawb ceev, amees.