Me Ngii me le Dirrek el mo Mesisiich
Ak meluluuch me bol sebeched el ngosuterir ar bebil er kid el mekiis el mer er tial klebokel el reng ra omesiou.
Ak ngeltengat el ngar tial miting lobengterir a roba priesthood er a Dios. Blakelreng, klaumerang, me a omesiou er tial chelchad er a resechal me a rebuik a mengasireng er a chelechal taem. Ak mengedecheduch er a chelechal kesus el mora roba priesthood, el dmak loba keltalreng el mesiou er a Rubak el Jesus Kristo.
A Rubak a nguu a Klisichel mesterir a rokui el ngara obis er a priesthood el blak a rengrir mesiou a ngerchelir er a priesthood.
A Wilford Woodruff, sera le President er a Ikelesia, eng mesaod er ngii er sera le ngara obis er a priesthood.
“Ak rirngesii a kot el osisechakl er a chelsel tial Ikeleesia. A bol kukuk ak mle metecholb. … Ak milchedaol el Sensei. A urerek a di mle mereched lomuchel. … Ak mle melemolem el mesiou el Sensei. … Sera bol temel a conference ak milchedaol el Priest. … Uriul er a mechedaol el Priest e ak mlora mission er a beluu er a south. Tia mle sera fall er a 1834. Ng mlar ngii a keldemek, me a ki mlara mission el diak a ududam ma ngera er kemam. Ak mirael a kemanget lomerael lolisechakl el kirel Ebangkelio, e betok el chad a miltecholb e dimlak el sebechek lolterekokl er tir el mo chad er a Ikelesia, le ak dirk Priest. … Ak mirael lomerk er a Ebangkelio el muut el telkib el taem e mo moterekokl el Elder. …
“[Chelechang] eng mla mo okeim me a eua el rak el chedal a chelechad er a Teruich me a terung el Apostol. Ak mla ngara omerael lobengkel a bebil er a chelechad el okolem el rak; e soak el melekoi er tial keldibel el kmo ak mloterekokl el mo oba osisiu el klisiich er a Dios el di mle oba obis er a Sensei, oumesingd er a taem el kureor er a chelsel a ikelesia el Priest, el di uaia blek Apostol. Ng diak a kmal klekakerous er tiang ngii di moruul a ngerchelem.”1
Tial klebokel techall er a chedaol tekoi a diak el ngodech me sel Rubak a mesaod er ngii er a Aaronic Priesthood el “tebechedel” a Melchizedek Priesthood.2 A tekoi eltebechedela belkul a kmo ng dmak el tekoi. Tia kmal klou a belkul el mo er a priesthood el uchul a klengeltengat, er tial beluulechad me a diak a ulebengelel, le tiang a “diak a uchelel e diak a ulebengelel.”3
Ng beot omesodel. A Aaronic Priesthood a kudmeklii a ngeasek el buik el kirel a lmuut el ngarbab el chedaol ngerachel.
“A klisichel a ngarbab, malechub eng Melchizedek Priesthood, a olab aikel rokui el kiis er a chedaol tekoi er a chelsel a ikelesia—
“A uchul a techall el mengai a berrotel er a rengedel a babeluades, me a babeluades a obok a chesmerel, e mor ngii a cheldecheduch me tirkel keldibel er a ikelesia er a Kristo, e mo ngara chelsel a rengedel a Dios el Chedam, me a Jesus el ngara delongeled er a chelsel a beches el telbiil.”4
Aikal kiis er a priesthood a di lolab a tal chad er a tal taem, a President me a ngarbab el priest er a Ikelesia er a Rubak. E okiu, a ngerachel er a President, e a bek el chad loba Melchizedek Priesthood a sebechir el nguu a ngerachel me a techall el melekoi e meruul a ureor loba ngklel a Mesisiich el Dios. Tia kmal mesisiich el klisiich. Ng melutk el kirel a klengar me a kodall, lobengkel a telungalek me a Ikelesia, lultuil er a teletelel a Dios me a diak a ulebengelel Urerel.
A Rubak a mengedmokl er a chad loba Aaronic Priesthood el mo elder e mesiou el ngara klaumerang, klisiich, me a omereng el saul er a chetengakl el Melchizedek Priesthood.
A denguu er a re elders, e a dmolech lomereng el saul a klou a belkul er a ikel ngerchelem el mui loba priesthood el mesiou. Ko mo lematk aikel sils el kemiu a mle deacon, sensei, malechub e kom priest el tirkel mle oba ngarbab el priesthood a ulngeseu el mesebechakl e melisiich er kemiu sel moba tial priesthood.
A bek loba Melchizedek Priesthood a olab aikal uldasou, eng di sel omereng el saul a locha mla remiid el meketeketang el rak. A urungulek a lmuut lolutii sel ble momelchesiu er ngii er a omobang lobengkel a blak el reng el mo odars aikel rokui el sebechem a osisiu el ngesou el ua ikel kau a ngilai.
Ak lotkii a bishop el miruul er ngak meng mo ngar ngii a techellek el mo oba klisiich er a priesthood. Ng mle omekedong er ngak er a tal Sandei er a kdirk priest. Ng millekoi el uase ng ousbech er ngak el mo keldemel el mo oldingel er a rebebil er a rechedal a ward. Ng millekoi el uai a kmal di ngak el tang a sebechek el obengkel kudmeklii tiang. Ng dimlak lousbech er ngak. Ng mlar ngii a kmal meduch el counselor ngii er a klebishop.
A ki mlo mesa chebuul e kesai a kelel dil mla melakl. Ng mle soal ak ngesuir el sumechii a rengul ngika el redil, e rullii el mo sebechel kiei lousbech aikel kerekerengel, e yaksok er ngii el uase ng sebechel el kuk mo ungil besul e mo olngeseu er a rebebil.
Aki kuk merolang el mlo mengelaod er a teru el mekekerei el ngalek el redil el mlara chelsel a meringel el klengar. Sera ki morolang, eng dilu er ngak el kmo, “Tirkel ngalek a kmal diak bo lobes el kmo kid a mle oldingel er tir.”
Sel kuk tara blai, ak mlo meduch el siotai er a diak el sal mesisiich el chedal a ikelesia el muut el mei er a Rubak el millekoi er ngii el uase a rechad er a ward a ousbech er ngii.
Ngkal bishop a uleba Melchizedek Priesthood e mle olngeseu er ngak e omekellomes er ngak lokiu okesiul. Ng mle osischeklak el mo mesisiich a renguk e blak a renguk el mo er a ngii di el ker e mesiou er a Rubak. Ng meketeketang er a bol dibus, eng di a kmal dirk medengelii le ngii el mle sobecheklak er a taem el dimlak sal meduch loba Aaronic Priesthood. A uriul, ak mlo medengei el uase ngii a milsekak er sel rael er a priesthood er medad er a ngarbab el ngerachel, lengelakl er sel mle osengek.
A demak a miruul er a osisiu el tekoi el mei er ngak. Ng mle meduch e mellomes loba Melchizedek Priesthood. A tang e a Apostol a ulengit er ngii luchesii a kekerei el babier el kirel a tekoi er a science er a rekil a beluulechad. Ng kmal mlo ungil luchesii, e medengei el uase a mo menguiu er ngii a mo omelchesuar el uase a beluulechad a kmal ngeasek er a ikel lolekoi a science.
Ak dirk medengei el demak a milskak tial babier el blal lechesii e kmo, “Hal, kau a mellomes a rengum el medengei el uase ng locha kirek lodureklii tial babier el mora re apostol me a re profet.” Ng diak sal medengei a betok el mle llechukl er tial babier, eng di ak mellemolm loba sel omereng el saul el kirel a mesisiich loba Melchizedek Priesthood el chad el milsa chedaol llomes er ngak el ngii a dimlak kisang.
A tal kesus, er a sesei el rak ruriul, er a blak moterekokl el Apostol, e a profet er a Dios a ulemekedong er ngak e ulengit me chiuii a tekoi el mla meluches el kirel a osisechakl er a Ikelesia. Ng tal kesus el bla longuiu er tial hong. Ng mle ocherchur e melekoi el kmo, “Ng diak el sebechek el menguiu aikal rokui. Ng diak molengull e ngak kureor.” E dilung a kmeed el osisisu el tekoi el demak a dilung ruchei: “Hal, kau a kirem el menguiu er tiang. Kau a medengei el uase ng di ungil a bol meluches.
Osisiu el teletael er a oba Melchizedek Priesthood el mo medengei e ansing a mlei er a tal kesus er a kungedecheduch er a seked er a Ikelesia. Ng mle teruich me a euid a rekik, e mlongit el mo mengedecheduch er a klou el seked. Ng dimlak kudengei el kmo ngera bok dung. Ng dimlak a kerbai er a cheldecheduch el beskak, me ak kildmeklii a cheldechedechak el kuk kmal chengelakl er a klemedengei er ngak er a ebangkelio. Sera kungedecheduch, e ak mlo metik el kmo ngak a mla rulli a cheleuid. Ak dirk dobedebekak e omelchesiu er a telemall.
A mlo ulebongel el mengedecheduch a Elder Matthew Cowley er a Chelechad er a Teruich me a terung el Apostol. Ng kmal mle meduch el mengedecheduch—el rechad er a Ikelesia a di sorir ngii. Ak dirk medengei lomes e rngii er a kdengchokl er a kingellek.
Ng mle omuchel loba mesisiich el tekoi. Ng millekoi el uase a cheldechedechak a rullii meng uaia sal chetengakl el chad er a ongdibel. Ng mle klikmechur er a lolekoi. Ng mlo diak el moalech a renguk e mlo ansing er ngak el sebechek el tara klebesei e ak mor sel ngii a lomes er ngak el ngar ngii.
Sel kudengelii er sel kesus a dirk mellemolem el mekrolak el mo ungil lorenges sel sekum a oba Aaronic Priesthood a mengedecheduch. A omerellel a Elder Cowley el mei er ngak a uchul, e ak blechoel medengei el uase ak mo remenges a tekingel a Dios. Ng diak el sal blechoel mo kesib a renguk, ak bai blechoel mechas a renguk, e mo klikmechur el di uaia Elder Cowley.
Betok el tekoi a sebechel ngosuterir a rengeasek lodam er kid el ngoriakl er a priesthood, eng di diak a lemuut el mesisiich el uaia ngesou el kid a mesterir el mo toketekii a klaumerang er tir me bol sebechir lousbech er a klisichel a Dios el ngara omesiou er a priesthood.
A klaumerang me a olisiich a diak di lolemolem el ngar tir lokiu a di tal teletael el mesebechakl er a meduch loba Melchizedek Priesthood. Sel duch el melai aikal klisiich a kirel mukeroul lokiu a betok lolchotel er tirkel tir a lmuut el meduch loba priesthood.
A roba Aaronic Priesthood a dirrek lousbech a ngesou er a bek el sils me a dirrek el olisiich er a Rubak lokiu a Chedaol Reng. Tia mo mekedmokl el mo er tir alsekum e tir a melilt el mellemolem el klikiid. Ngultuil er a ikel lolilt el meruul.
Seikid a uchul eng kired lolisechakl lokiu okesiu me a klaumerang me a tekingel a ngarbab loba Melchizedek Priesthood el King Benjamin el kmo ng klemerang.5 Ng tekoi er a beltik el reng el mildung el ngara ngklel a Rubak, el ngii tiang a Priesthood er ngii. A King Benjamin olisechakl er kid el mo mellemolem el klikiid me bo dengai a olisiich me a osisechakl er a Rubak:
“A ulebongel, ng diak el sebechek el kmung er kemiu a rokui el tekoi el uchul e kom ruebet er a klengit; leng kmal betok el teletael, el kmal imis el betok el diak el sebechek el mechur.
“Eng di tiakid a sebechek el kmu er kemiu, alsekum eng diak bom kerekikl, lomes a uldesuiu, me a tekingiu, me a omerelliu, e moltirakl a llechul a Dios, e mollemolem el ngara klaumerang er a ikel bla mrenges el kirel a luut er a Rubak el mei, el mo lemuut er a ulebongel er a klengar kemiu, e ko mo remiid. Chelechang, e kemiu el chad, bo molbedebek, me lak bom riid.”6
Kid a medengei el rokui aikel cherarou er a llemalt el modurokl el mei el uaia ses el eolt el melemall er a rengeasek loba priesthood el betik a rengud er tir. Kid a, a omes er tir el uaia eru el telael el soldau, el mle okedongall el ngelekel a Helaman. Ng sebechir el melasm, el uai tirkel ngeasek el soldau, alsekum e te mesebechakl er tir el uaikel mle tekingel a King Benjamin.
A rengelekel a Helaman el sechal a dimlak loumededenger. Tem le mesisiich el ngara mekemad e mlo kats le tir el mle oumerang a tekingir a rederir.7 Kede medengelii a klisichel a klaumerang er a roubleltik el reng el chedil. A rechedil a mesterir a rengelekir el sechal a mesisiich el ngesou. Kid loba priesthood, a sebeched e kired el mesebechakl a ngesou loba blak el reng er kid el mo kudmokl a ngercheled le sel bla dobult, eng kired el melisiich er a rodam er kid.8
A nglunguchek a kmo a bek loba Melchizedek Priesthood bol kengei er a techall el Rubak a mesterir:
A le ngarngii a chad el mesisiich a Rengul, e lenguu ngkel mechitechut, me bol tang a rengir el ngara ngariou el reng, mel dirrek el sebechel mo mesisiich.
A leuaisei, e mngititerir tirkel mla moterekokl el ngara ngariou el priesthood, e moldurokl er tir loiak kuchei er kemiu, el mo mengedmokl er a rael, e bo loruul aikel tekoi el kemiu a diak el sebechiu el remuul.
Tiaikid a teletael el re apostol er ngak, er a recheuodel, a tilketekii a ikelesia er .”9
A roungerachel er a priesthood me a redemerir a roba Aaronic Priesthood a sebechir el meruul ongasireng. Ng sebechiu el mo teloi er tirkel blak a rengrir el elders lobengterir a rengeasek el sechal el kongei er a okedong el mo olisechakl er a ebangkelio e ansing er tir el meruul er ngii. Ko mo mesterir a rebetok el mosebechakl er tir e mengesuseu er tir el mellemolem el blak a rengrir, e mo bechiil er a chelsel a templo, e a kuk, mo mesebechakl e mengedmokl er a rebebil.
Ng kirel morngii a beches el prokuram, ungil klekedall er a osisechakl, malechub e ngungil social media. Ng diak bo moruul lengelakl er a ikel ngar ngii el moruul er chelechang. A telbiil me a yaksok er a priesthood a meskid a klisiich, ngerachel, me a ulekrael. Nglunguchek me ko mo remei e mesuub el kirel aikel yaksok me a telbiil er a priesthood, el debetik er a chelsel a Doctrine and Covenants bliongel 84.
Kid el rokui loureng meluut el mo betok el ngeasek el chad a mo omelchesiu el uaia Wilford Woodruff, el sera le ngara Aaronic Priesthood eng mle olisechakl er a ebangkelio er a Jesus Kristo loba mesisiich lomult el teletael.
Nglunguchek me bo dekedmokl a ngercheled el mesebechakl er a rebebil el kudmekelterir el kirel a chetengakl omesiou er tir. Ak mereng a sulir tirkel ungil chad el mla mesebechakl er ngak e mla ochotii er ngak el uase ng mekera a kubeltik el reng el mora rebebil.
A kuchais el uase a President Thomas S. Monson olab a rokui el kiis er a priesthood el ngara beluulechad er chelechal taem. A kuchais el kmo ngii, el klengar ngii a di mesiou, a kmal ungil okesiu el mei er kid el rokui el mo mesebechakl er a rebebil loba Melchizedek Priesthood. A kmal mereng a saul el ngii a mla sobecheklak e osischeklak a dolngeseu er a rebebil.
A Dios el Chedam a ngar. A Jesus a Kristo. Tiang a Ikelesia er Ngii e rengedel. Tiang a priesthood er Ngii. Aika kudengei el klemerang lokiu a klisichel Chedaol Reng. El ngara ngklel a Jesus Kristo, amen.