Pwe En Pil Kak Iang Kehlailla

I pehm me I ahniki kapai ai iang mihting ehng irail kan me kolokol prihsduhd en Koht. Loaloapwoat, pwoson, oh papah me pwihn en ohl oh pwukat kan kin wia iei ehu kemwekid kopwuriamwei en rahn pwukat. Ahi padahk pwohnget ohng me ahneki prihsduhd kan, me mah oh me pwulepwul. me kin ehupene oh papah ni mohngiong unsek ong atail Kaun Sises Krais.

Kauno ketkihengehr Sapwellime manaman ong irail kan koaros me mihmier nan ohpis en prihsduhd me warohng wia pwukoah kan en prihsduhd.

Wilford Woodruff, ni ah wia President en Mwomwohdiso wet, koasoaiahda irair ehu me e lelehng nan ah iang ahneki pwukoah kan nan priesthood:

”Keieun padahk I rongada I rongasang nan mwomwohdiso wet. Mwurin rahno I pepdaisla. ... I kasarawiheng en wiahla emen Sounpadahk. Ahi misin ansouohte tepida. I papah nan misino pwon ni ahi wia Sounpadahk men. ... Ni kapokon lap ehu I kasarawiheng Priest.... Mwurin ahi kasarawihengehr Priest I pekederlahng ... nan ahi misin nan pali pah en wein Amerika. Met wiawi nan pahr 1834 . Mie iengei misineri, oh se mweselahng nan aht misin ni aht sohte wahda mwohni de kepwe. I kelehpw seilongkihla mwaihl kei oh padahngki seli Rongamwahu wet, oh I pepdaisialahr aramas tohto me I sohte kak kasarawiala en wiahla towe mehlel en Mwomwohdiso wet, pwehki wiahte Priest men.... I seiloak kihla wen ansou ehu padapadahki Rongamwahu wet mwohn ahi kasarawihengala Elder.  …

“[Met] I wia emen tohn Wahnpoaron Ehk-riemeno ki erein sounpar limeisek pahieu. I pil ahnekiher pwukoah wet oh pwukoah teikan erein sounpar weneisek; oh I men padahkiheng pokon wet me I alehdier soangen utuhto sang ni manaman en Kauno ni ai wia emen Sounpadahk, oh ni mehlel ni ai wia pwukoahn Priest men nan Mwomwohdiso, duwehte ahi wia Wahnpoaron men. Sohte wekila ehu ma kitail wia atail pwukoah.”¹

Iei me e kakete sohte mie wekpeseng ehu nan Sapwelimen Kauno kawehwe en Prihsduhd en Aronic me iei e wia “kisehn” Prihsduhd en Melkesidik.²Lepin lokaia kisehn wehwehki meh riau wia ehu. Ehupene wet kesempwal ohng priesthood en wiahla kehl oh kapai me e kak wiahla, nan sampah oh kohkohlahte pwehki prihsduhd wet sohte imwi.”³

Ehupene wet iei mehkot mengei ehu. Prihsduhd en Aron kin kaunopehng pwutak pwulopwul kan ohng likilik en wia doadoahk sarawi.

“Manaman oh mweimwei me ileilehu, de Prihsduhd en Melkesikid, me kolokol kih kan koaros en kapai sarawi kan en Mwomwohdiso—

Kapai sarawi kan en Mwomwohdiso iei me iangahki en ahneki pwungen alehdi soahng me rir kan en wein nanleng, pwe en kak ritingadahng kitail nanleng, en padahk ohng kapokon laud oh mwomwohdisohn me Keieun Ipwidio, oh en insenamwahuki ehupenehn madamadau oh pepehm oh ieias en Samatail Koht, oh Sises me weliepatail nan inou kapwo.”⁴

President oh me kaunda priest lapalap kan nan Sapwellimen Kauno mwomwohdiso wet iei ihte me kolokol oh kak doadoahngki ni unsek kih kan en prihsduhd. Eri, sang ni en President mweimwei en pilada weliepe kan, ohl koaros me kolokol Prihsduhd en Melkesidik kak kapaikihda mweimwei oh pwuhng en padahk oh doadoahngk ni mwaren Koht Lapalahpie. Manaman wet sohte imwi. Iei e dapwin mour oh mehla, peneinei oh Mwomwohdiso, Sapwellimen Koht ieias oh Sapwellime doadoahk soutik.

Kauno kin kaunopada me kolokol Prihsduhd en Aron en wiahla emen elder me kin papah ni pwoson, manaman, oh kaping kalahnganki Prihsduhd en Melkesidik.

Ohng elder kan, kaping laud kin inenen kesempwal ni amwail kin kapwaiada amwail pwukoahn prihsduhd ni unsek. Kumwail pahn tamataman amwail ansou ni amwail wia dihken, sounpadahk, oh priest ansou me irail me ahneki prihsduhd laudo kin kakehlailih kumwailda oh koangoange kumwail nan amwail pwukoah kan.

Koaros me kolokol Priesthood en Melkesidik ahneki soangen mehn kataman pwukat, ahpw pepehm en kasapahl kalahngan kakete tikitiklahr pwehki ansou reirei douwer powe. Dahme I men songen wia iei ien kakehlakahla pepehmo oh ni ngoang en kak sewesehki wen aramas tohto me ke kak kieng me duwehte soangen sawasohte me ke alehdiero.

I taman emen pisop me kin tehk ie ni mwomwen me I ahnekier koahiek doadaohngki manaman en prihsduhd. E lukwerie ehu Rahn Sarawio ni ansou me I wia priest. E inda me e anahne ien iangih kohla mwamwaitih tohn mwomwohdiso kei nan aht wardo. Dahme e indahko likamwete ngehite me kak sewese pwehn pweida ah doadoahk. E sohte anahne ie. E ahneki sounsawas kaselel nan ah pisoprik.

Se pwarek lihohdi paisued men. E men ien sowese liho oh esehda ah anahn,oh koangoangoahki en wiahda oh doadoahki mwahu nah mwohni, oh inoukiheng me e kak kesihnenda nan pwukoah en apwali pein ih oh sowese mehteikan.

Mwuri se kohla koaloalamwahuih sin serepein riemen me mihmi nan irair en kahpwal ehu. Ni ansou me se mweselsang mwo, pisopo ndadohng ie, ”Serihkoa sohte pahn moanokehla me kita mwamwaitih ira.”

Ni ihmw me se uhd kohla ieu, I kilangada mwomwen ahi pahn luke emen me wereisangehr sarawi en pwurodo rehn Kauno ni ahi pahn padahkiheng me tohn wardo anahne.

Pisop meno iei emen me ahneki Prihsduhd en Melkesidik me seweseweseie I en kilangada soahng kan me I kak wiahla oh kamarainih kinie ah karasaras. E kaweid kin ie ien ahneki manaman oh komwad en kak lel wasa koaros ni ahi papah Kauno. Ohl menet melahr oh alehdier ah kapai sang nanleng, ahpw I tamatamante pwehki ah engidi oh pwokiehda ni ahi wia emen Prihsduhd en Aronic soakoahiek men. Mwuhr I esehda me pisop menet kilangada me I kak alehdi pwukoah kesempwal en prihsduhd ehu rahn, mehkot me I sohte kak pein kilangada.

Ahi pahpahu pil wia ieng ie soahngohte. Ih emen Prihsduhd en Melkesidik me inenen koahiek oh erpit. Mie ehu pak me emen Wahnpoaron indahng en ntingihada ehu ire mwotomwot me pid sounpar en sampah. E ntingihada ni keneinei, ni ah ese me ekei me kak wadek ahneki pepehm kehlail me sampah pwulopwul sang dahme pelien sains kasaledahr.

I tamatamante ahi pahpahu ah kieng ie dahme e ntingihdau oh e kosoaiahieng ie, ”Hal, ke ahneki erpit en palingehn en ese ma I anahne kadarala met rehn wahnpoaron koa oh soukohp koa. I sohte taman dahme nting nan doaropwehu, ahpw I pahn kolokolete wen kaping laud me I ahniki ong Prihsduhd en Melkesidik me kilangada rehi erpit en palingehn me pein ngehi sohte kak kilang.

Ehu pwohngo, mwurin pahr tohto kei, mwurin ahi kasarawihengehr wahnpoaron, Sapwelimen Koht soukohpo ahpw lukwerih ie oh indahng ie ien wadekada mehkot me ntingdahr duwen padahk en Mwomwohdiso wet. E pepehdehr nihpwongo wadewadek iralaud en ehu pwuhk. E kouruhr ahpw kosoaia, ”I sohte kak wadekala koaros. Ke sohte kak komkomoal ah I wie doadoahk.” Ih eri pil kosoaia mehkot me karanih dahme ahi pahpahu kosoaia pahr ekei samwalahro: ”Hal, kowe me anahne wadek met. Ke pahn ese ma met konehng en ntingda.”

Soangen mwohmwohte ohng emen me pil ahneki Prihsduhd en Melkesidik kadaiala ah madamadau oh kiheng koapwoaroapwoar wiawi ehu pwohngo ni kapokon ehu me Mwomwohdiso wet utungada. Ni ahi sounpar 17 , I alehdi pekipek ehu me I en iang kapahrek ohng pokon laud ehu. I sohte ese dahme irail kasik sang ie. Sohte ahi ire me irail kiheng ie, eri I kaunopada ehu padahk me loalsang dahme I ese me pid rongamwahu wet. Ni ahi kapkapahreko, I tehkada me I wiadahr sapwung ehu. I kak tamatamante, me mwurin ahi koasoio, I pepehm me I sapwungalahr.

Kaimwseklahn kapahrek kohsang Elder Matthew Cowley sang Pwihnen Wahnpoaron Ehkriemeno. E wia soun kapahrek koahiek men —me tohn mwomwohdiso wet poakehng. I taman ahi kin kilkilendahng ni ahi mwomwohd nan deweio limwahn wasahn kapahreko.

E tepkihda ngihl kehlail ehu. E kosoaia me ahi padahko kiheng ih pepehm ehu me e iang towehda kapokon laud ehu. E poh komwokomw ni ah kosoaia mepwukat. Ahi pepehm en sapwungalau kohsang ie oh pepehm en koapwoaroapwoar me I uhd ahnekihdi me ehu rahn I kak wiahla dahme e lemeleme me I wialahr.

Ahi mehn kataman en pwohngo kin kahrehieng ie ahi kin rong mwahu ansou me emen me kolokol Priesthood en Aronik kin kapahrek. Pwehki dahme Elder Cowley wiahieng ie, I kin ansou koaros kasik me I pahn rong mahsen en Koht. Pak malaulau I kin sohte itariki oh pak tohto I kin pwuriamweila, oh I kin pohkomwokomw duwehte Elder Cowley.

Soahng tohto kak sawas kakehlailih riatail pwutak tikitik kan en keirda nan prihsduhd, ahpw sohte me pahn manaman sang atail pahn sawaski kakehlailih arail pwoson oh kamehlele me irail kak koapwoaroapwoarki manaman en Koht nan arail pwukoahn prihsduhd kan.

Pwosono oh pepehm en me mehlelo sohte kak mihmi rehrail sang ni ehute irair me kin kak kakehlaka iraila ma pil sang rehn irailPrihsduhd en Melkesidik me kin kolokol kisakis me keieu laud. Koahiek en doadoahngki manaman pwukat ahahne kakairada sang kangoang tohto sang irail koa me koahieklahr nan pwukoahn prihsduhd.

Irail kan me kolokol Prihsduhd en Aronicpahn kin pil anahne kaweihd en kakehlail nan ehu ehu rahn akan oh pil nan awa kan koaros oh kopwungpwunglah kan en sang rehn Kauno kelehpw ni doadoahk en Ngehn Sarawi. Met iei pahn kak mie ong irail ma irailpilada en warehngete. E pahn sang ni pilpil kan me irail pahn wiahda.

Ihme kahrehda kitail anahne padahngki sang ni atail karasaras mwahu oh atail kadehde me kaweid kan meNahnmwarki Benjamin me ahneki Prihsduhd en Melkesidik koasoia ier udahn e mehlel.⁵ Irail wia mahsen en limpoak kei me mahsendahr ni mwaren Kauno me prihsduhd wet iei Sapwelime. Nahnmwarki Benjamin padahngki dahme kitail anahne wia pwe kitail en warehng alehdi kangoang oh kopwungpwung sang Kauno:

”Oh eri, I sohte kak indaiong kumwail koaros mehkan me kin kahrehiong kumwail en kak wiahda dihp; pwe mie ahl tohto kei oh soahng tohto kei, me inenen tohto ie me I sohte kin kak wadekada irail.

”Ahpw met iei uhwen ei kak indaiong kumwail, pwe ma kumwail sohte kin kaleke pein kumwail, oh amwail madamadau kan, oh amwail lokaia kan, oh amwail tiahngkan, oh amwail kin kolokol kosonned en Koht akan, oh amwail kin nantihlahte pwoson dahme kumwail rongehr duwen ketidohn atail Kauno, lao lel imwin amwail mour, kumwail eri pahn udahn lekdekla. Oh met, O aramas koaros, tamataman, oh kumwail en dehr lekdekla.”⁶

Kitail koaros ese mwomwen kasongosong kan sang tepelo me kin ipido duwehte ehu kisinieng laud ohng riatail prihsduhd pwulopwul kan me kitail poakehng. Ong kitail, irail duwehte pwutak pwulopwul komwad koa, me kin inda me irail nein Helaman. Irail kak komourla, duwehte  sounpei pwulopwul koa, ma irail kaleke irail ni duwen en Nahnmwarki Benjamin ah kaweid.

Nein Helaman pwutak koa sohte ahneki peikasal. Irail kin peiki arail komwad oh kana pwehki irail kamehlele padahk en arail nohno koa.⁷ Kitail wehwehki manaman en pwoson en nohno limpoak men. Nohno kan kin kiheng soangen utuht laud ong neirail pwutak kan rahn pwukat. Kitail, me kolokol prihsduhd, kak oh anahne kapatahieng ni atail koasoanehdi kitail en kapwaiada atail pwukoah me ni atail weliakapwalahr, kitail anahne kakehlailih riatail ohl akan.⁸

Ahi kapakap iei me irail me ahneki Prihsduhd en Melkesidik koaros pahn alehda ansou mwahu me Kauno ketkiheng irailehr:

E ahpw mahsani ma mie emen nan pwungamwail me kehlail ni Palingehn, mweidehng en pwukoahki emen me luwet, pwe en kak kakehlailada ni karakarahk, pwe en pil kak iang kehlaila.

E mahsani me kitail anahne kahrehda irail kan me kasarawihengehr prihsduhd tikitiko, oh kadariraila irail en wiahda inou en tuhpene kan, oh irail en kaunopada ahlo, oh irail en apwalihala inou en tuhpene kan me ke sohte kak pwukoahki.

E mahsani iet mwomwen nei wahnpoaron en mahs akoa, arail kawadahngie ahi mwomwohdiso.”⁹

Kumwail me wia kaun en prihsduhd kan oh pahpa kan en irail me ahneki Prihsduhd en Aronic kan kak wia kemwekid me kopwuriamwei. Kumwail kak sewese Kauno en audehki ohpis en elder kan me loaloapwoat iangahki pwutak pwulopwul kan me aledahr pwukoah doadoahk en padahngkiwei rongomwau wet oh wia ni lelepek. Kumwail pahn kak kilang me tohto me kumwail kapaiadahr oh koangoangoahkin irail en loaloapwot, kapwopwoud nan tehnpas sarawi, oh sang ni met, pahn ka en sewesehda oh kanopada mehteikan.

E sohte pahn anahne pwirokram en kemwekid kapw, kamwahulahn dipwisoun padahk, de kasdohn kaskuhl mwahu. E sohte pahn anahne ehu pwukoah sang dahme ke ahneki met. Kaula oh inou en prihsduhd wet kiheng uhk manaman, pwuhng, oh kaweid. I koapwoaroapwoarki ke pahn kohla nan imwomw oh onopki keneinei me pid kahula oh inou en prihsduhd, me dierek nan Doctrine oh Covenants iralaud 84 [welihsek pahieu].

Kitail koaros koapwoaroapwoarki me pwutak pwulopwul tohto pahn kak en lelehng dahme Wilford Woodruff lelehng kau, me ahneki Prihsduhd en Aron, padahngkiher rongamwahu en Sises Krais wet ki manaman en weliakapwala.

I kapakapki me kitail pahn kapwaiada atail pwukoahn kakehlailih mehteikan oh kaunopehng irail ohng arail pwukoahn papah. I kapingki mehlel aramas mwahu kan me kakehlailihiedahr oh kasalehiengie ia mwomwen ahi pahn poakehng oh kakehlailih mehteikan.

I kadehdehki me President Thomas S. Monson kolokol kih koaros en prihsduhdd pohn sampa ansouwet. I wia ahi kadehde me ih, sang ni ah papahkier ereihn ah mour,, wiahier karasaras mwahu ong kitail en kakehlailih irail kan me kolokol Prihsduhd en Melkesidik. Pein ngehi kaping laudki mwomwen ah kakehlailihedahr oh kasalehiengiehier ia mwomwen ahi pahn kakehlailih mehteikan.

Koht Samatail ieias. Sises iei ih Krais. Sapwelime Mwomwohdiso oh wehi met. Sapwelime prihsduhd met. I pein ese mepwukat sang ni manaman en Ngehn Sarawi. Ni mwaren Kauno Sises Krais,amen.