Ina Ia Faamalosia Foi o Ia

Ua ou lagona le faamanuiaina i le faatasi ai i lenei sauniga ma i latou o loo umiaina le perisitua a le Atua. O le tuuto, o le faatuatua, ma auaunaga le manatu faapito o lenei tinotele o alii ma taulelea o se vavega faaonapo nei. Ou te lauga atu i le po nei i ē o umiaina le perisitua, matutua ma talavou, ua lotogatasi i auaunaga ma le loto atoa i le Alii o Iesu Keriso.

Ua faamatuu mai e le Alii Lona mana ia i latou i tofiga uma o le perisitua o e o loo auauna atu ma le agavaa i o latou tiute faaleperisitua.

Sa faamatalaina e Uilifoti Uitilafi, a o avea ma Peresitene o le Ekalesia lona aafiaga i tofiga o le perisitua:

“Sa ou faalogo i le lauga muamua lava na faato’a ou faalogo i ai i lenei Ekalesia. O le aso na sosoo ai, na ou papatiso ai. ... Sa faauuina a’u o se Aoao. Sa vave ona amataina la’u misiona. ... Sa ou alu i lena misiona atoa o se Aoao. I le konafesi sa faauuina ai au o se Ositaulaga. ... Ina ua uma ona fauuina au o se Ositaulaga sa auina atu au ... i se misiona i le itu i saute o le atunuu. O le taimi lena o le tautoulu o le 1834. Sa ma faatasi ma se soa, ma sa ma amata e aunoa ma se etetupe ma se ato. Sa ou faimalaga na o au i le tele o maila ma talai atu le Talalelei, ma sa ou papatisoina le toatele o tagata o ē sa le mafai ona ou faamauina i le Ekalesia ona sa na o au o se Ositaulaga. … Sa umi sina taimi o ou faimalaga e talai atu le Talalelei a o lei faauuina au o se Toeaina. …

“[O lenei] ua tusa ma le lima sefulufa tausaga o avea au ma se uso o Aposetolo e Toasefululua. Ua ou faimalaga ma lena tofi ma isi korama mo le ono sefulu nei tausaga; ma ou te fia faapea atu i lenei potopotoga e tutusa lava le lagolagoina o au e le mana o le Atua a o umiaina le tofi o se Aoao, aemaise a o taitai ai i le tovine o se Ositaulaga, ma le taimi ua avea ai au ma se Aposetolo. E leai lava ma se eseesega i lenei mea pe afai e fai o tatou tiute.”¹

O le gafatia faaleagaga matagofie o le leai o se eseesega ua fautuaina mai i le faamalamalamaga a le Alii o le Perisitua Arona o se “faaopoopoga” o le Perisitua Mekisateko.² O le upu faaopoopoga o lona uiga ua fesootai ni mea se lua. O lenei fesootaiga e taua i le perisitua i le avea ai ma malosiaga ma faamanuiaga e mafai ona avea ai, i lenei lalolagi ma le faavavau, aua “e leai se amataga o aso po o se iuga o tausaga.”³

O le fesootaiga o se mea faigofie. E saunia e le Perisitua Arona alii talavou mo se faatuatuaga sili atu ona paia.

“O le mana ma le pule o le perisitua maualuga, po o le Perisitua Mekisateko, o le umia lea o ki o faamanuiaga uma faaleagaga o le ekalesia—

“O le mauaina o le avanoa e maua ai mealilo o le malo o le lagi, e tatala mai ai le lagi ia te i latou, e mafuta ai ma le faapotopotoga aoao ma le ekalesia a le Ulumatua, ma olioli i le mafutaga ma le afio ai o le Atua le Tamā, ma Iesu le puluvaga o le feagaiga fou.”⁴

O na ki o le perisitua e faaaogaina atoatoa e le tamalii e toatasi i le taimi e tasi, le Peresitene ma le faitaulaga sili pulefaamalumalu i le Ekalesia a le Alii. Ona auala lea i le pulefaamatuu a le Peresitene, o alii uma e mauaina le Perisitua Mekisateko e mafai ona faaee atu i ai le pule ma le avanoa e saunoa ai ma galue i le suafa o le Silisili ese. O lena mana e le muta. E faatatau i le ola ma le oti, i le aiga ma le Ekalesia, i le natura sili o le Atua lava Ia ma Lana galuega e faavavau.

O loo saunia e le Alii ē o umiaina le Perisitua Arona ia avea ma se toeaina e auauna atu ma le faatuatua, mana, ma le lotofaafetai i lena Perisitua Mekisateko mamalu.

Mo toeaina, o le a taua le lotofaafetai loloto i le faataunuuina o la tatou vaega i auaunaga atoatoa i le perisitua. O le a outou manatuaina ō outou aso o ni tiakono, aoao, po o se ositaulaga ina ua aapa atu i latou sa umiaina le perisitua maualuga e siitia ma faamalosia outou i la outou malaga faaleperisitua.

E tofu tagata uma e umiaina le Perisitua Mekisateko ma ni manatuaga faapena, ae o le lagona o le lotofaafetai atonu e faaitiitia i le aluga o tausaga. O lo’u faamoemoega ia toe faamumu lena lagona faatasi ai ma se naunautaiga e avatu i tagata uma e te mafaia lea lava ituaiga e tasi o fesoasoaniga na e mauaina muamua.

Ou te manatua se epikopo na taulimaina au e peiseai ua ia te au le gafatia atoa e avea ai ma tagata e umia le mana o le peristua. Sa ia valaau mai i se tasi Aso Sa a o avea au ma se ositaulaga. Sa ia fai mai sa ia manaomia au e avea ma ana soa e asiasi atu i nisi o tagata o le matou uarota. Sa foliga mai i lona leo sa na o au lava lona faamoemoe mo le tulaga manuia. Sa ia le manaomia au. Sa lelei tele ona fesoasoani i lana au epikopo.

Sa ma asiasi atu i se tina ua oti lana tane sa mativa ma fiaai. Sa ia manao ia ou fesoasoani atu ia te ia ia pa’i atu i le loto [o le tina], ia lu’i o ia e fai se paketi ma faaaoga, ma folafola ia te ia e mafai ona ia tulai a’e i se tulaga e le gata e tausi ai o ia lava ae faapena foi ona fesoasoani ai i isi.

Sa sosoo ai ma lo ma o atu e faamafanafana ni teineiti se toalua sa ola i se tulaga faigata. A o ma savavali ese atu, sa ia saunoa lemu mai ia te au, “O le a le galo lava i nai teineiti la lo ta o mai ia i laua.”

I le fale na sosoo ai, sa ou vaai ai i le auala e valaaulia ai se tagata le toaga e foi mai i le Alii e ala i le faatalitonuina o ia sa manaomia o ia e tagata o le uarota.

O lena epikopo o se na umiaina le Perisitua Mekisateko sa siitiaina la’u vaai ma uunaiaina au e ala i faataitaiga. Sa ia aoao au ia maua le mana ma le lototele e alu ai i soo se mea i auaunaga mo le Alii. Ua leva ona maliu o ia ma tauia, ae ou te manatua pea o ia ona sa ia aapa mai ma sii a’e au i luga a o avea au ma sē na umiaina le Perisitua Arona sa leai se potomasani. Sa ou iloaina mulimuli ane, sa ia vaai ia te au i luga o le ala o le perisitua i le lumanai ma ni tiutetauave sili atu, lea sa ou lei malamalama i ai i lena taimi.

Sa faia foi e lo’u tama le mea lava e tasi mo au. O ia o se tagata potomasani ma atamai na umiaina le Perisitua Mekisateko. Sa talosagaina o ia i se tasi taimi e se Aposetolo e tusi se tamai faamatalaga e uiga i faamaoniga faasaienisi mo le umi talu ona i ai le lalolagi. Sa ia tusia ma le faaeteete, ma le iloaina e ono faitau i ai nisi e malolosi ni lagona e faapea e laitiiti ifo le matua o le lalolagi nai lo faamaoniga faasaienisi ua fautuaina.

Ou te manatua pea le tuuina mai e lo’u tama ia te au o le mea sa ia tusiaina ma faapea mai, “Hal, o loo ia te oe le poto faaleagaga e iloa ai pe tatau ona ou auina atua lenei tusi i aposetolo ma perofeta.” Ou te le o manatuaina le tele o mea na tusia i le pepa, ae o le a ou tauaveina e faavavau le lotofaafetai sa ou lagonaina mo sē maoae na umaina le Perisitua Mekisateko na vaaia ia te au le poto faaleagaga sa lei mafai ona ou vaaia.

I se tasi po, i nai tausaga mulimuli ane, ina ua uma ona faauuina au o se Aposetolo, sa valaau mai ai le perofeta a le Atua ia te au ma faatonuina au e faitau se mea na tusiaina e uiga i se aoaoga faavae o le Ekalesia. Sa ia faaaluina le po e faitauina ai ni mataupu o se tusi. Sa ia fai mai ma se ataata, “E le mafai ona ou faitauina uma lenei mea. E le tatau ona e malolo ae o lea ou te galue.” Ona ia faaaogaina lea o upu toeitiiti lava a tutusa ma upu na faaaoga e lo’u tama i tausaga na muamua atu: “Hal, o oe e tatau ona faitauina le tusi lenei. O le a e iloaina pe o sa’o ina ia lolomiina.”

O le mamanu lava e tasi o le siitiaina e sē umia le Perisitua Mekisateko o le vaai ma tuu atu le talitonuga [i le isi] na oo mai i se tasi po i se faaaliga lauga na lagolagoina e le Ekalesia. I le 17 o o’u tausaga, sa talosgaina ai au e lauga atu i se aofia toatele. Sa leai ma so’u iloa po o le a se mea o faamoemoeina mai ia te au. Sa lei tuuina mai se autu, ma o lea sa ou saunia ai se lauga sa matua sili atu ma le mea sa ou iloaina e uiga i le talalelei. A o ou lauga atu, sa ou iloaina na ou faia se mea sese. Ou te manatua pea ina ua uma la’u lauga, sa i ai so’u lagona lofituina o le toilalo.

O le failauga na sosoo ai ma o le failauga faaiu foi lea o Elder Matthew Cowley o le Korama a Aposetolo e Toasefululua. O ia o se failauga maoae—sa alofagia i le Ekalesia atoa. Ou te manatua pea lo’u vaai atu ia te ia mai lo’u nofoa e sosoo ma le pulelaa.

Sa ia amata saunoa i se leo mamana. Sa ia fai mai o la’u lauga na ia lagona ai o loo i ai o ia i se konafesi maoae. Sa ia ataata a o ia saunoa ai. Sa mou atu o’u lagona o le toilalo ma na sosoo ai ma le talitonuga e ono i ai se aso e avea ai a’u ma se tagata ua manatu o ia ua ou avea ai.

O le manatuaga o lena po o loo taitaia ai pea au ia faalogo ma le toto’a pe a lauga sē o umiaina le Perisitua Arona. Ona o le mea sa faia e Elder Cowley mo au, ou te faamoemoe ai lava i taimi uma o le a ou faalogo i le afioga a le Atua. E seāseā ou le fiafia ae tele ina maofa, ma e le mafai ona taofia lo’u atata e pei ona sa faia e Elder Cowley.

E tele mea e mafai ona fesoasoani e faamalosia ai o tatou uso talavou ia tutulai a’e i le perisitua, ae e leai se mea e sili atu ona mamana nai lo lo tatou fesoasoani atu ia i latou ia atiae le faatuatua ma le talitonuga e mafai ona latou utuvai mai le mana o le Atua i a latou auaunaga faaleperisitua.

O le a le tumau ia i latou le faatuatua ma le talitonuga mai se aafiaga se tasi o le siitiaina, e oo lava i sē sili ona faamanuiaina e umiaina le Perisitua Mekisateko. O le tomai e utuvai ai mai na mana e tatau ona faafaileleina e le tele o faailoaga o le talitonuga mai ia i latou e sili atu ona tele aafiaga i le perisitua.

O le a manaomia foi e ē umiaina le Perisitua Arona ia uunaiga ma faasa’oga i aso uma e oo lava i itula uma mai le Alii lava Ia e ala i le Agaga Paia. O le a avanoa lena mea ia i latou pe a latou filifili e tumau ma le agavaa mo lena mea. O le a faalagolago i filifiliga o le a latou faia.

O le mafuaaga lena e tatau ai ona tatou aoao atu e ala i faataitaiga ma e ala i le molimau i upu a le taitai maoae o le Perisitua Mekisateko, le Tupu o Peniamina e moni.⁵ O upu na o le alofa e tautalagia i le suafa o le Alii, lē e ana lenei perisitua. Na aoao mai e le Tupu o Peniamina mea e manaomia mai ia i tatou ina ia tumau ai le lava o le mama e maua ai le uunaiga ma le aoa’iga a le Alii.

“Ma mulimuli lava, e lē mafai ona ou taʼu atu ia te outou mea uma e mafai ona outou faia ai le agasala; ona ua tele ala ma auala eseese, ua matua tele lava e lē mafai ona ou faitauina.

“Ae o le mea lenei e mafai ona ou taʼu atu ia te outou, afai tou te lē vaavaaia outou lava, ma o outou mafaufauga, ma a outou upu, ma a outou galuega, ma tausi i poloaiga a le Atua, ma tumau pea i le faatuatua i mea ua outou faalogo i ai e uiga i le afio mai o lo tatou Alii, e oo lava i le iuga o o outou ola, e fano lava outou. Ma o lenei le tagata e, ia manatua, ma lē fano ai.”⁶

Ua tatou iloa uma ia ūfanafana mu a le fili o le amiotonu ua tafana mai e pei o se matagi matautia i talavou o loo umiaina le perisitua tatou te alolofa tele i ai. Ia i tatou, e foliga mai i latou o autau talavou, na ta’ua i latou lava o atalii o Helamana. E mafai ona sao mai i latou, e pei ona faia e na autau talavou, pe afai latou te faasaogalemuina i latou lava e pei ona uunaia ai i latou e le Tupu o Peniamina.

Sa lei masalosalo lava atalii o Helamana. Sa latou tau ma le totoa ma manumalo ai ona sa latou talitonu i upu a o latou tina.⁷ Ua tatou malamalama i le mana o le faatuatua o se tina alofa. O loo tuuina atu e tina lena lagolagosua tele i o latou atalii i nei aso. O i tatou, o ē umiaina le perisitua, e mafai ma e tatau ona faaopoopo atu lena lagolagosua faatasi ma lo tatou naunautaiga e tali atu i le poloaiga afai ua tatou liua, e ao ona tatou aapa atu i lalo ma faamalosia o tatou uso.⁸

O la’u tatalo ia taliaina e alii uma e umiaina le Perisitua Mekisateko le avanoa ua ofoina mai e le Alii:

“Ma afai e i ai se tagata i totonu o outou ua malosi i le Agaga, ia tuu atu ia te ia na te ave faatasi ma ia lē ua vaivai, ina ia faagaeetiaina o ia i le agamalu atoa, ina ia faamalosia foi o ia.

“O lea, ia outou ave faatasi ma outou e ua faauuina i le perisitua maualalo, ma auina atu i latou e muamua atu ia te outou e fai tuutuuga, ma saunia le ala, ma faataunuu tuutuuga ua lē mafai e outou lava ona faataunuu.

“Faauta, o le ala lenei na ati aʼe ai e aʼu aposetolo, i aso anamua, laʼu ekalesia ia te aʼu.”⁹

O outou taitai perisitua ma tama o le au Perisitua Arona e mafai ona faia ni vavega. E mafai ona outou faatumuina tulaga o toeaina faamaoni i alii talavou e taliaina le valaau ia talai atu le talalelei ma faia ma le talitonuga. O le a outou vaaia le toatele tou te siitiaina ma faamalosia e tumau ma le faamaoni, faaipoipo atu ma le agavaa i le malumalu, ma i se taunuuga, latou te siitia ma saunia foi isi.

O le a le moomia ai ni polokalama fou o gaoioiga, ni punaoa faafaiaoga ua faaleleia, po o ni alafaasalalau faaagafesootai sili atu. O le a le manaomia ai se valaauga e sili atu ma le valaauga o loo ia te oe i le taimi nei. O le tautoga ma le feagaiga o le perisitua e te maua ai le mana, pule, ma le taitaiga. Ou te tatalo ia outou o i o outou aiga ma suesue ma le toto’a le tautoga ma le feagaiga o le perisitua, o loo maua i le Mataupu Faavae ma Feagaiga 84.

Tatou te faamoemoe uma lava o le a faatoateleina alii talavou e mauaina aafiaga e pei o Uilifoti Uitilafi, o lē, a o avea ma se Perisitua Arona, sa ia aoao atu le talalelei a Iesu Keriso ma le mana e liua ai.

Ou te tatalo ia tatou tutulai a’e i o tatou valaauga e siitia isi ia saunia i latou mo a latou auaunaga mamalu. Ou te faafetai lava ma lo’u loto atoa i tagata lelei na siitiaina au ma faaali mai ia te au le auala e alofa atu ai ma siitia isi.

Ou te molimau atu o Peresitene Thomas S. Monson o loo umiaina ki uma o le perisitua i le lalolagi i aso nei. Ou te molimau atu, i ana auaunaga i le olaga atoa, ua avea ai pea o ia ma se faataitaiga mo i tatou uma o le aapa atu e siitia isi i le avea ai ma sē umiaina le Perisitua Mekisateko. Ou te faafetai lava au ia mo le auala na ia siitia ai au ma faaali mai ia te au le auala e siitia ai isi.

O loo soifua le Atua le Tama. O Iesu o le Keriso. O Lana Ekalesia ma [Lona] malo lenei. O Lana perisitua lenei. Ua ou iloaina lenei lava mea mo au lava ia e ala i le mana o le Agaga Paia. I le suafa o le Alii o Iesu Keriso, amene.