’Ia pūai ato’a ho’i ’oia

’Ua ha’amaita’ihia vau ia tae mai i roto i teie ’āmuira’a ’e te feiā tei mau i te autahu’ara’a o te Atua. ’Ua riro te ha’apa’o, te fa’aro’o ’e te tāvinira’a ’ā’au tae a teie pupu ta’ata ’e teie mau tamāroa ’ei temeio nō teie ’anotau. Tē parau atu nei au i teie ’āru’i i te mau ta’ata tei mau i te autahu’ara’a, te mea pa’ari ’e te mea ’āpī, i tāhō’ēhia i roto i te tāvinira’a tu’utu’u ’ore i te Fatu ia Iesu Mesia.

’Ua hōro’a mai te Fatu i tōna mana i te feiā i roto i te mau tōro’a ato’a o te autahu’ara’a ’o tē tāvini nei ma te ha’apa’o maita’i i roto i tā rātou mau ’ohipa.

’Ua fa’a’ite mai ’o Wilford Woodruff, peresideni nō te ’Ēkālesia, i tōna mau ’itera’a i roto i te mau tōro’a o te autahuara’a :

« ’Ua fa’aro’o vau i te a’ora’a mātāmua aita ā vau i fa’aro’o a’enei i roto i teie ’Ēkālesia. I te mahana nō muri iho, ’ua bāpetizohia vau… ’Ua fa’atōro’ahia vau ’ei ha’api’i. ’Ua ha’amata ta’u misiōni i taua iho taime ra… ’Ua tāvini au ē hope noa atu taua misiōni ra ’ei ha’api’i… I roto i te ’āmuira’a ’ua fa’atōro’ahia vau ’ei tahu’a… I muri a’e i tō’u fa’atōro’ara’ahia ’ei tahu’a ’ua tonohia vau… nō te hō’ē misiōni i te pae apato’a o te mau hau ’āmui nō Marite. E tau ha’apohera’a rā’au te reira nō te matahiti 1834. E hoa tō’u, ’e ’ua ha’amata māua ma te moni ’ore e te pāpa’ira’a ’ore. ’Ua rātere au ’o vau ana’e e rave rahi maire te ātea, ’e ’ua ha’api’i i te ’evanelia, ’e ’ua bāpetizo i te tahi mau ta’ata, ’aita rā i ti’a iā’u ’ia ha’amau ’ei melo nō te Ekalesia, nō te mea e tahu’a noa vau… ’Ua rātere au tau taime ma te ha’api’i i te ’evanelia hou ’a fa’atōro’ahia ai au ’ei peresibutero… 

« [I teienei] ’ua tae’ahia iā’u e pae ’ahuru ma maha matahiti tō’u rirora’a ’ei melo nō te Tino ’Ahuru ma Piti ’āpōsetolo. ’Ua rātere au nā muri iho i te reira pupu ’e i te tahi atu mau pupu e ono ’ahuru matahiti i teienei ; ’e tē hina’aro nei au e parau i teie ’āmuira’a ē, ’ua pāturu te mana o te Atua iā’u ’a mau ai au i te tōro’a ha’api’i, ’e i te taime iho ā rā ’a fa’atere ai au i roto i te ’ōvine i roto i te tōro’a tahu’a, mai tei te taime e ’āpōsetolo vau. ’Aita e ta’a-’ē-ra’a i roto i teie, mai te mea ē, e ha’apa’o tātou i tā tātou hōpoi’a. »¹

’Ua fa’a’itehia taua ti’ara’a vārua nehenehe ra nō te ta’a-’ē-’ore-ra’a i roto i te tātarara’a a te Fatu i te Autahu’ara’a ’a ’Aarona ’ei « ’āpitira’a » nō te Autahu’ara’a a Melehizedeka.² Te aura’a nō te parau ra ’āpitira’a, maori rā, ’ua tū’ati nā mea e piti. E mea faufa’a nō te autahu’ara’a teie tū’atira’a nō te riro mai ’ei pūai e ’ei ha’amaita’ira’a, i roto i teie ao ē a muri atu, i te mea ē, « ’aore tō te reira e ha’amatara’a o te mahana ’e ’aore rā e hope’a nō te mau matahiti. »³

’E tū’atira’a ’ōhie roa teie. ’E fa’aineine te autahu’ara’a a Aarona i te feiā ’apī nō te hō’ē ti’aturira’a mo’a hau atu.

« Nā te pūai ’e te mana o te autahu’ara’a teitei ’e ’aore rā, te Autahu’ara’a a Melehizedeka, e mau i te mau tāviri o te mau ha’amaita’ira’a vārua ato’a o te ’Ēkālesia—

« Nō te roa’a te ha’amaita’ira’a e fāri’i ai i te mau parau ’aro o te bāsileia o te ao ra, nō te ’īriti i te mau ra’i ia rātou, nō te paraparau i te ’āmuira’a rahi ’e te ’ēkālesia a te Fānautahi, ’e nō te fana’o i te ’āparau ’e i te ti’a i mua i te aro o te Atua te Metua, ’e ’o Iesu te ārai o te fafaura’a ’āpī. »⁴

Hō’ē noa iho ta’ata ’e fa’a’ohipa i taua mau tāviri nō te autahu’ara’a ra i te taime hō’ē, te Peresideni ’e te tahu’a rahi fa’atere o te ’Ēkālesia a te Fatu. ’E nā roto i te hōro’ara’a a te Peresideni, e nehenehe te mau ta’ata ato’a e mau nei i te Autahu’ara’a a Melehizedeka e fāri’i i te mana ’e i te ha’amaita’ira’a nō te paraparau ’e nō te ’ohipa i te i’oa o te Manahope. ’Aore e hope’ara’a tō taua mana ra. Tei roto te parau o te ora ’e te pohe, te parau o te ’utuāfare ’e te ’Ēkālesia, te nātura rahi o te Atua iho ’e Tāna ’ohipa mure ’ore.

Tē fa’aineine nei te Fatu i te feiā e mau i te Autahu’ara’a a Aarona ’ia riro mai ’ei peresibutero ’o te tāvini ma te fa’aro’o, te pūai ’e te māuruuru i roto i taua Autahu’ara’a hanahana ra a Melehizedeka.

Nō te mau peresibutero, e mea faufa’a te ’ā’au mēhara rahi nō te rave i tā ’outou tuha’a i roto i te ’ohipa tāvinira’a autahu’ara’a hope. ’E ha’amana’o ’outou i te taime ’a riro ai ’outou ’ei diakono, ’ei ha’api’i ’e ’aore rā, ’ei tahu’a, ’a toro mai ai te feiā tei mau i te autahu’ara’a teitei i te rima nō te fa’ateitei ’e nō te fa’aitoito ia ’outou i roto i tō ’outou tere autahu’ara’a.

Tē vai ra teie huru ha’amana’ora’a i roto i te mau ta’ata ato’a tei mau i te autahu’ara’a a Melehizedeka, terā rā, ’ua morohi paha te ’ā’au mēhara i te roara’a o te mau matahiti. Tē hina’aro nei au ’ia fa’a’āpī-fa’ahou-hia taua mana’o ra ’e ’ia ’āpitihia mai te hina’aro tu’utu’u ’ore ’ia hōro’a i te mau ta’ata ato’a i te reira huru tauturu tā ’outou i fāri’i i te hō’ē taime.

Tē ha’amana’o nei au i te hoē episekopo tei rave iā’u mai te mea ra ē, ’ua tae a’ena vau i terā fāito pūai nō te mana o te autahu’ara’a. ’Ua pi’i mai ’oia iā’u i te hoē Sābati, e tahu’a noa ā vau. Nā ’ō maira ’oia ē, tē hina’aro ra ’oia iā’u ’ei hoa nōna nō te haere e fārerei i te tahi mau melo nō tā mātou pāroisa. I roto i tāna mau huru parau, mai te huru pa’i ē, ’o vau ana’e tāna e ti’aturi ra e manuia ai ’oia. ’Aita ’oia i hina’aro mau iā’u. Tē vai ra tōna nā tauturu maita’i roa i roto i tāna ’episekōpora’a.

’Ua haere māua e fārerei i te hō’ē vahine ’ivi moni ’ore ’e te po’ia. ’Ua hina’aro ’oia ’ia tauturu vau iāna ’ia ha’aputapū i tōna ’ā’au, ’ia ani iāna ’ia hāmani i te hō’ē tāpura ha’amau’ara’a ’e ’ia ha’apa’o i te reira, ’e ’ia parau fafau atu iāna ē, e nehenehe tāna e tītau i te hō’ē fāito ’eiaha nō te aupuru noa iāna, nō tauturu ato’a rā ia vetahi ’ē.

I muri iho, ’ua haere māua e tāmāhanahana e piti tamāhine na’ina’i e mea fifi te orara’a. I tō māua ho’ira’a, parau marū mai nei ’oia iā’u ē : « E ’ore roa e mo’ehia i terā nā tamari’i ē, ’ua haere mai tāua ia rāua ra. »

I te fare nō muri iho, ’ua ’ite au e nāhea ’ia ani manihini i te hō’ē ta’ata paruparu ’ia ho’i fa’ahou mai i te Fatu ra nā roto i te ha’apāpūra’a iāna ē, tē hina’aro nei te mau melo o te pāroisa iāna.

Teie ’episekōpo, ’ua mau ’oia i te autahu’ara’a a Melehizedeka ’e ’ua tauturu iā’u ’ia ’ite i tō’u pūai ’e ’ua fa’auru iā’u nā roto i te hi’ora’a. ’Ua ha’api’i ’oia iā’u ’ia fāri’i i te mana ’e te itoito ’ia haere i te mau huru vāhi ato’a nō te tāvini i te Fatu. Era ’ē te tau tōna fa’aru’era’a mai, terā rā tē ha’amana’o noa nei ā vau iāna nō te mea ’ua toro mai ’oia i te rima nō te fa’ateitei iā’u i te taime e mea mātau ’ore noa ā vau i roto i autahu’ara’a a Aarona. ’Ua ha’api’i mai au i muri a’era ē, ’ua ’ite ’oia iā’u i ni’a i te hoē ’ē’a autahu’ara’a nō te mau hōpoi’a rahi atu a muri a’e, ’o tā’u i ’ore roa i māramarama i taua taime ra.

’Ua rave ato’a tō’u metua tāne i te reira nō’u. ’Ua riro ’oia ’ei melo autahu’ara’a Melehizedeka ’aravihi ’e te pa’ari. I te hō’ē taime ’ua ani te hō’ē ’āpōsetolo iāna ’ia pāpa’i i te hō’ē parau poto nō ni’a i tā te ’ihi fa’a’itera’a i te matahiti o te fenua. ’Ua pāpa’i maita’i ’oia i te reira, ma te ’ite ē, te tahi mau ta’ata ’o te tai’o i te reira, e ’itera’a pūai tō rātou ē, e mea ’āpī a’e te fenua i tā te ’ihi e mana’o nei.

Tē ha’amana’o noa nei ā vau i te hōro’ara’a mai tō’u metua tāne i te parau tāna i pāpa’i ma te parau mai ia’ū ē, « E Hal, tei roto ia ’oe te pa’ari vārua nō te ’ite ē, e hāpono ānei au i teie i te mau ’āpōsetolo ’e te mau peropheta ra. » ’Aita tā’u e nehenehe e ha’amana’o rahi roa i tei pāpa’ihia i ni’a i te ’api parau, terā rā, e ta’ita’i au ē a muri noa atu i te māuruuru tā’u i fāri’i nō te hō’ē melo tei mau i te Autahu’ara’a a Melehizedeka tei ’ite i roto iā’u i te pa’ari vārua o tā’u i ’ore e ’ite.

’E rave rahi matahiti i muri mai, i te hō’ē pō, i muri a’e i tō’u fa’atōro’ara’ahia ’ei ’āpōsetolo, ’ua pi’i mai te peropheta o te Atua iā’u ’e ’ua ani mai iā’u ’ia tai’o i te hō’ē parau tei pāpa’ihia nō ni’a i te ha’api’ira’a tumu a te ’Ēkālesia. ’Ua ao te pō tōna tai’ora’a i te mau pene o te hō’ē buka. ’Ua parau maira ’oia ma te ’ata : « E’ita tā’u e nehenehe e tai’o pauroa i teie. ’Eiaha ’oe e fa’afa’aea, ’e ’o vau rā, tē rave nei ïa i te ’ohipa. » ’E i muri iho, ’ua parau mai ’oia i te mau parau fātata roa mai tā tō’u metua tāne i parau mai e rave rahi matahiti nā mua a’e : « Hal, ’o ’oe te ta’ata e ti’a ia tai’o i teie. E ’ite iho ā ’oe ē, e mea tano ānei ’ia ha’aparare i te reira. »

’Ua tupu ā te reira huru ’ohipa nō te hō’ē melo tei mau i te Autahu’ara’a a Melehizedeka tei fa’ateitei i te hi’ora’a ’e tei hōro’a i te ti’aturira’a, i roto i te hō’ē āru’i ta’urua ’orerora’a parau, pāturuhia e te ’Ēkālesia. 17ra’a tō’u matahiti, ’ua anihia mai iā’u ’ia paraparau i mua i te hō’ē naho’a rahi ta’ata. ’Aita roa atu vau i ’ite e aha te mea i tītauhia iā’u ’ia parau. ’Aita e parau tumu i hōro’ahia mai iā’u, nō reira ’ua fa’aineine au i te hō’ē a’ora’a tei hau ’ē roa i te mea tā’u i ’ite nō ni’a i te ’evanelia. ’A paraparau ai au, ’ua ’ite a’era vau ē, ’ua hape au. Tē ha’amana’o noa nei ā vau i tō’u mana’o nō ni’a i tō’u manuia ’ore i muri mai i tā’u a’ora’a.

’O Elder Matthew Cowley nō te pupu nō te Tino ’Ahuru Ma Piti ’āpōsetolo te ta’ata a’o i muri iho ’e te hope’a ato’a. ’Ua riro ’ōia ’ei ta’ata a’o fa’ahiahia—tei herehia i roto i te ’Ēkālesia tā’āto’a. Tē ha’amana’o noa nei ā vau i tō’u hi’ora’a atu i ni’a iāna nā ni’a atu i tō’u pārahira’a i pīha’i iho i te terono.

’Ua ha’amata ’oia nā roto i te hō’ē reo pūai. ’Ua parau ’oia ē, ’ua fa’atupu ta’u a’ora’a i te mana’o i roto iāna ē, tei roto ’oia i te hō’ē ’āmuira’a rahi. ’Ua ’ata ’oia ’a parau ai ’oia i te reira. ’Ua pe’e ’ē terā mana’o manuia ’ore tō’u ’e ’ua monohia mai i te mana’o ti’aturi ē, ’e nehenehe au ’e riro mai i te hō’ē mahana mai tāna e mana’o nei ē, ’o te reira hoa tō’u huru.

Nō te ha’amana’ora’a o taua ’āru’i ra, tē tāmau noa nei ā vau i te toro maita’i i te tari’a ’ia paraparau mai te hō’ē taea’e tei mau i te autahu’ara’a a Aarona. Maoti terā ’ohipa tā Elder Cowley i rave nō’u, e ti’aturi noa vau e fa’aro’o mai au i te parau a te Atua. E mea varavara tō’u fāri’ira’a i te mana’o ’ino’ino, ’ua pinepine rā vau i te fāri’i i te mana’o māere, ’e e’ita tā’u e nehenehe ’eiaha e ’ata mai ia Elder Cowley.

E rave rahi mea e nehenehe e ha’apūai i tō tātou mau taea’e taure’are’a ’ia haere i mua i roto i te autahu’ara’a, terā rā āore e mea pūai atu māori rā tā tātou tauturura’a ia rātou ’ia fa’ahotu i te fa’aro’o ’e te ti’aturira’a ē, e nehenehe tā rātou e tūru’i i ni’a i te mana o te Atua i roto i tā rātou tāvinira’a autahu’ara’a.

E’ita taua fa’aro’o ra ’e taua ti’aturira’a ra e vai noa i roto ia rātou nā roto i te hō’ē noa iho taime i te fa’ateiteira’ahia rātou e te hō’ē taea’e nō te autahu’ara’a a Melehizedeka, noa atu te ’aravihi rahi o teie taea’e nō te autahu’ara’a a Melehizedeka. Tītauhia ’ia aupuru i terā ti’ara’a ’ia tūru’i i ni’a i te reira mau mana nā roto e rave rahi fa’a’itera’a i te ti’aturira’a mai roto mai i te feiā tei mātau maita’i i te autahu’ara’a.

E tītau ato’a te mau taea’e e mau nei i te autahu’ara’a a Aarona i te fa’aitoitora’a ’e i te fa’atītī’aifarora’a, i te mau mahana ato’a e i te mau hora ato’a paha, nō ’ō mai i te Fatu iho, nā roto i te Vārua Maita’i. E roa’a te reira ia rātou mai te mea ē, e fa’aoti rātou ’ia vai ti’amā noa i te reira. Tei te huru o te mau mā’itira’a tā rātou e rave.

Nō reira i tītauhia ai ia tātou ia ha’api’i nā roto i te hi’ora’a ’e te ’itera’a pāpū ē, e parau mau te mau parau a te ti’a fa’atere rahi o te autahu’ara’a a Melehizedeka, ’oia ho’i, te ari’i Beniamina.⁵ E mau parau here tei fa’ahitihia nā roto i te i’oa o te Fatu nōna teie autahu’ara’a. ’Ua ha’api’i mai te ari’i Bēniamina i te mea e tītauhia ia tātou e vai vi’ivi’i ’ore noa ai tātou, e fāri’i ai tātou i te fa’aitoitora’a ’e te fa’atītī’aifarora’a a te Fatu :

« ’Aita e ti’a iā’u ’ia fa’a’ite atu i te mau mea e hope roa a’e e hapa ai ’outou : ’ua rau te huru o te ’ē’a ’e te rāve’a, e tae atu ho’i i te rahi e ’ore ïa e ti’a iā’u ’ia tai’o.

« ’O teie parau iti rā e ti’a iā’u ’ia parau atu ia ’outou na, ’ia ’ore ’outou ’ia hi’opo’a ia ’outou iho, ’e tā ’outou mau mana’o, ’e tā ’outou mau parau, ’e tā ’outou mau ’ohipa e rave ra, ’e e ha’apa’o ho’i i te mau fa’aue a te Atua ra, ’e e mau pāpū i te fa’aro’o i tei fa’aro’ohia e ’outou nō te taera’a mai o tō tātou Fatu ra, ē tae noa atu i te hope’a o tō ’outou ora nei, e pohe mau ïa ’outou e ti’a ai. ’E tenāna, e te ta’ata ē, ’a ha’amana’o, ’ia ’ore ’ia pohe. »⁶

’Ua ’ite tātou pā’āto’a i te parau nō te mau ihe auahi a te ’enemi nō te mau parau ti’a tei tonohia mai mai te mata’i ri’ari’a i ni’a i te feiā ’apī e mau nei i te autahu’ara’a, tā tātou e here rahi nei. Nō tātou nei, e au rātou mai taua mau fa’a’ehau ’āpī ra, tei parau ia rātou iho ē, e mau tamaiti nā Helamana. E nehenehe rātou e ora, mai taua mau fa’ehau ’āpī ra, mai te mea ē, e pāruru rātou ia rātou iho, mai te au i tā te ari’i Bēniamina i fa’aitoito ia rātou.

’Aita te mau tamaiti a Helamana i fē’a’a. ’Ua ’aro rātou ma te itoito ’e ’ua upo’oti’a nō te mea ’ua ti’aturi rātou i te mau parau a tō rātou mau metua vahine.⁷ Tē ta’a ra ia tātou te mana o te fa’aro’o o te hoē metua vahine here. Tē hōro’a nei te mau metua vāhine i taua pāturura’a rahi ra i tā rātou mau tamaiti i teie mahana. Tātou e mau nei i te autahu’ara’a, e nehenehe tā tātou, ’e ’ua tītauhia ia tātou ’ia ’āpiti i taua pāturura’a ra, tō tātou hina’aro tu’utu’u ’ore ’ia fa’aoti i te hōpoi’a ra, ’ia fa’afāriuhia ho’i tātou, e toro tātou i te rima nō te fa’aitoito i tō tātou mau taea’e.⁸

Tē pure nei au ’ia fāri’i te mau melo ato’a tei mau i te autahu’ara’a a Melehizedeka i te rāve’a tā te Fatu i pūpū mai :

« ’E mai te mea e pūai te hō’ē ta’ata i rotopū ia ’outou na i te Vārua ra, ’a tu’u atu iāna ’ia rave ’oia iāna ’o tei paruparu, ’ia ti’a iāna ’ia ha’amaita’ihia i roto i te ha’eha’a ato’a, ’ia riro ato’a ’oia ’ei mea pūai ato’a.

Nō reira, ’a rave ia rātou ’o tei fa’atōro’ahia i te autahu’ara’a iti i pīha’i iho ia ’outou na, ’e ’a tono atu ’ia rātou nā mua ia ’outou nō te fa’aau i te mau taime fārereira’a, ’e nō te fa’aineine i te ’ē’ā, ’e ’ia ha’apa’o ho’i i te mau fa’aaura’a ’o te ’ore e ti’a ia ’outou iho ’ia ha’apa’o.

« Inaha, ’o teie ho’i te rāve’a nō ta’u mau ’āpōsetolo, i te mau mahana tahito ra, nō te fa’atupura’a i ta’u ’ēkālesia iā’u nei. »⁹

’Outou, e te feiā fa’atere nō te autahu’ara’a, ’e ’outou, e te mau metua tāne nō te mau melo tei mau i te autahu’ara’a a Aarona, e nehenehe tā ’outou e fa’atupu i te temēio. E nehenehe tā ’outou e fa’a’ī i te ’āpapara’a o te mau peresibutero ha’apa’o i te feiā ’āpī tamāroa ’o te fāri’i i te pi’ira’a ’ia haere e poro i te ’evanelia ’e ’ia rave i te reira ma te ti’aturi. E ’ite ’outou e rave rahi o tā ’outou i fa’ateitei ’e i fa’aitoito ’ia vai ha’apa’o noa, ’ia fa’aipoipo ma te ti’amā i roto i te hiero, ’e i muri a’e, ’ia fa’ateitei ’e ’ia fa’aineine ia vetahi ’ē.

E’ita vau e rave i te mau fa’anahonahora’a fa’a’oa’oara’a ’āpī, te mau mātēria ha’api’ira’a ha’amaita’ihia, ’e ’aore rā, te mau rāve’a natira’a sōtiare maita’i a’e. E’ita te reira e tītau i te hō’ē pi’ira’a ta’a ’ē atu i tā ’outou e mau nei i teienei. Nā te tapura’a ’e te fafaura’a ’o te autahu’ara’a e hōro’a ia ’outou i te pūai, te mana, ’e te ’āvei’a. Tē pure nei au e ho’i ’outou i te fare ’e e tuatāpapa maita’i ’outou i te tapura’a ’e te fafaura’a nō te Autahu’ara’a ’o te itehia i roto i Te Parau Ha’api’ira’a ’e te mau Parau Fafau tuha’a 84.

Tē ti’aturi nei tātou pa’ato’a ē, e rahi atu te feiā ’āpī tamāroa e fāri’i i te mau ’itera’a mai ia Wilford Woodruff, ’ei melo tei mau i te autahu’ara’a a Aarona, tei ha’api’i i te ’evanelia ’a Iesu Mesia ma te mana fa’afāriu.

Tē pure nei au ia ti’a tātou i ni’a i tō tātou pi’ira’a nō te fa’ateitei ia vetahi ’ē nō te fa’aineine ia rātou i tā rātou tāvinira’a hanahana. Tē ha’amāuruuru nei au ma tō’u ’ā’au ato’a i te mau ta’ata nehenehe tei fa’ateitei iā’u ’e tei fa’a’ite mai iā’u nāhea ’ia here ’e ’ia fa’ateitei ia vetahi ’ē.

Tē fa’a’ite pāpū nei au ē, tē mau nei te peresideni Thomas S. Monson i te mau tāviri ato’a o te autahu’ara’a i ni’a i te fenua nei i teie taime. Tē fa’a’ite pāpū nei au ē, i roto i tōna orara’a tāvini tā’āto’a, ’ua riro ’oia ’ei hi’ora’a nō tātou i roto i te parau nō te fa’atorora’a i te rima nō te fa’ateitei ia vetahi ’ē ’ei melo tei mau i te autahu’ara’a Melehizedeka. Tē ’oa’oa ta’a ’ē nei au nō te huru ’oia i fa’ateitei iā’u e i fa’a’ite mai iā’u nāhea i te fa’ateitei ia vetahi ’ē.

Tē ora nei te Atua te Metua. ’O Iesu te Mesia. Nāna teie ’Ēkālesia ’e teie bāsileia. Nōna teie autahu’ara’a. ’Ua ’ite au i teie nō’u iho nā roto i te mana o te Varua Maita’i. Nā roto i te i’oa o te Fatu ’o Iesu Mesia ra, ’āmene.