Na Veivakalougatataki ni Sokalou

Dua vei ira na ka cecere ka totoka a yaco e volai tu ena ivolanikalou vakatabui o ya na itukutuku ni nona rairai yani na iVakabula kivei ira na lewei Amerika ni oti toka na Nona mate kei na Tucaketale. Era a sotava na tamata e kea e dua na veivakarusai levu ka vakavuna me “tavuki vakalevu sara na irairai ni vuravura taucoko.”¹ Na itukutuku ni veika a yaco a vakamacalataka ni oti na vakacaca levu oqo, era a tagi tikoga na tamata kece,² kei na gauna era tagiyaso tiko kina, era sa gadreva vakabibi dina me ra vakabulai, vakacegui, ka sereki.

Ni sa siro sobu mai lomalagi na iVakabula, era a bale sobu vakarua e Yavana. Na kena imatai ni gauna a yaco ena gauna a tukuna kina o Koya, ena lewa vakalou:

“Raica koi au ko Jisu Karisito, ka ra a tukuna na parofita ni na lako mai ki vuravura.

“Ia koi au na rarama kei na vu-ni-bula kei vuravura.”³

Oti sa qai sureti ira era tu e kea me ra “tu cake ka lako mai vei au; dou daramaka na ligamudou ki na sarisariqu, ka tara talega na we ni vako ena ligaqu kei na yavaqu mo dou kila kina ni sai au na Kalou ni Isireli kei na Kalou ni vuravura kecega, kau sa mate ena vuku ni nodra ivalavala ca na kai vuravura. …

“Ia ni ra sa lako kece yani ka vakadinadinataka sara, era sa qai kailavaka kece:

“Osana! Sa kalougata na yaca ni Kalou sa Cecere Sara!”⁴

Ia ena ikarua ni gauna, “era sa cuva sobu vei Jisu.” Ia ena gauna oqo sa caka ena inaki, ni da sa kila era sa “vakarokoroko vua.”⁵

Ena tekivu ni yabaki oqo au a lesi meu laki sikova e dua na iteki ena ra kei Amerika. E dua ga na Siga Tabu, siga ga ni soqoni, vata kei ira na lewe ni Lotu. Au raica ni ra sa curu mai na tamata ki valenilotu ka ra laki dabe ena vakanomodi. Ena iotioti ni sekodi, e voqa na vakasolokakana ena olo taucoko. Era sasaga na tina kei na tama—ka so na gauna a sega ni rawa—me ra vagalui ira na gone yavavala vakalevu. Dodonu tu oya.

Ia, ni vakarau tekivu na soqoni, sa vakauqeta na noqu vakasama na vosa ni Yalotabu.

Era sega walega ni gole mai na lewenilotu me ra mai cakava na nodra itavi se rogoci ira era vosa.

Era gole mai ena vuku ni dua na inaki e titobu ka bibi sara.

Era gole mai me ra mai “sokalou”.

Ni sa toso tiko na soqoni, au a raici ira yani eso na lewenilotu ena ivavakoso. Na matadra sa vaka na ituvaki vakalomalagi, ena itovo ni vakarokoroko kei na vakacegu. E dua na ka e laurai vei ira e vakavinakataka na yaloqu. Na veika era sotava tiko ena Siga Tabu o ya sa dua dina na ka cecere sara.

Era a sokalou tiko.

Era sa sotavi lomalagi tiko.

Au a raica rawa ena iserau ni matadra.

Au a reki ka sokalou vata kei ira. Niu cakava o ya, a vosa ki yaloqu na Yalotabu. Ena siga o ya, au a vulica kina e dua na ka baleti au, baleta na Kalou, ka baleta talega na itavi ni sokalou dina ena noda bula.

Era duatani toka na Yalododonu Edaidai ena gauna era dau qarava kina na nodra veikacivi ena Lotu. Ia eso na gauna ni da cakava yani na noda cakacaka ena kena gauna, me vaka eda sa cakava tiko e dua ga na cakacaka. Eso na gauna na noda tiko ena soqoni kei na veiqaravi ena matanitu e dau yali kina na gacagaca tabu ni sokalou. Ni sega oqo, eda sa calata tiko e dua na veikilai vakayalo sega ni vakamacalataki rawa kei koya sa tawamudu—e dua eda sa lavaki kina ni da sa luvena na Tamada Vakalomalagi sa dauloloma.

E sega sara ni ka vakacala-ka, me cakacaka rekitaki, na sokalou sa ka bibi ka usutu ni noda bula vakayalo. Oqo e dua na ka meda na gadreva, vakasaqara, ka sasagataka meda bulataka.

Ni da sokalou vua na Kalou, eda gole yani Vua ena loloma vakarokoroko, yalomalua, kei na qoroqoro. Eda sa kila ka ciqomi Koya ni sa noda Tui cecere, na Dauveibuli ni vuravura taucoko sara, na Tamada tawamudu lomani ka dauloloma.

Eda sa doka ka rokovi Koya.

Eda sa soli keda Vua.

Eda sa laveta cake na yaloda ena masu sa cecere sara, vakamareqeta na Nona vosa, rekitaka na Nona loloma soliwale, ka yalataka meda muri Koya ena dina eda sa solia.

Na sokalou vua na Kalou sa gacagaca bibi sara ena bula ni dua na tisaipeli i Jisu Karisito ni gauna eda sega ni ciqomi Koya e yaloda, ena matewale na noda vakasaqarai Koya ena noda matabose, e valenilotu, kei na valetabu.

Era sa goleva yani na tisaipeli dina me ra “qaravi koya sa bulia na lomalagi kei na vuravura, kei na wasawasa kei na veimata ni wai—dou masuta na yaca ni Turaga ena siga kei na bogi.”⁶

Eda rawa ni vulica vakalevu cake na sokalou dina ena noda vakadikevi ira eso—na tamata era rairai sega ni duidui mai vei keda—sotava, rokova, ka sokalou vua na Kalou.

Ena imatai ni tiki ni 19 ni senitiuri, sa vuku vakaoti sara na vuravura va-Karisito ia era sa biuta tani na vakasama ni Kalou sa dau vosa tikoga vua na tamata. Ia ena vula itubutubu ni 1820, sa veisau vakadua  o ya ni a laki masu e dua na cauravou yalomalua ena veikau ka tekiduru ka masu. Tekivu mai na siga o ya, sa sovaraki mai ki vuravura na raivotu cecere, ivakatakila, kei na nodra rairai mai na kai lomalagi, me ra vakalougatataka na lewei vuravura ena kila-ka talei me baleta na ituvaki kei na inaki ni Kalou kei na Nona veimaliwai kei na tamata.

A vakamacalataka kina o Oliver Cowdery na veisiga oqori me “sega ni guilecava rawa.…E dua na ka rekitaki dina! sa veivakurabuitaki sara! Sa veivakadrukai vakaidina!”⁷

E vakamacalataka na vosa nei Oliver na imatai ni gacagaca e sala vata na sokalou vua na Kalou—na yalo sa qoroqoro veivakacerecerei kei na vakavinavinaka levu.

Ena veisiga, vakabibi ena Siga ni Vakacecegu, eda sotava na veimadigi totoka meda vakila kina na totoka kei na ituvaki kei lomalagi ka cabora na noda vakacaucau vua na Kalou me baleta na Nona veivakalougatataki vinaka kei na loloma veivueti cecere sara.

Oqo ena liutaki keda ki na inuinui. Sai koya oqori na imatai ni gacagaca ni sokalou.

Ena siga vakalougatataki ni Penitiko, a curuma na yalodra kei na vakasama ni tisaipeli i Karisito na Yalo Tabu, ka vakasinaiti ira ena rarama kei na kila-ka.

Me yacova na siga o ya eso na gauna era sega ni vakadeitaka na ka me ra na cakava. Sa yaco me vanua rerevaki sara o Jerusalemi vua e dua e muria na iVakabula, ka ratou rairai vakasamataka na cava ena rawa ni yaco vei iratou.

Ia ni sa vakasinaita na yalodra na Yalo Tabu, sa takali yani na lomatarotaro kei na be. Ni cecere cake na gauna ni sokalou dina, era na ciqoma na Yalododonu ni Kalou na rarama vakalomalagi, kila-ka, kei na qaqaco ni ivakadinadina. Ka veimuataki oqo ki na vakabauta.

Tekivu mai na gauna o ya, era sa cakacaka na iApositolo kei na Yalododonu ena veidusimaki gugumatua. Era vunautaki Jisu Karisito ena yaloqaqa ki na vuravura taucoko.

Ni da sokalou vakayalo, eda sa sureta tiko na rarama kei na dina ki na vu-ni-yaloda ka na vaqaqacotaka na noda vakabauta. O ira talega oqo era sa gacagaca bibi ni sokalou dina.

Eda vulica ena iVola i Momani ni gauna sa sereki kina o Alama Lailai mai na revurevu ni nona vakaduiduile, sa yaco me tamata vou. A yaloqaqa ka “lako yani e na vanua taucoko … kivei ira kece na tamata … , [ka] segata vagumatua sara me vakadodonutaka na veika ca kece a vakayacora [o koya] ki na lotu.”⁸

Ni sa tudei tiko na nona sokalou vua na Kalou Cecere Sara sa yaco kina me bula vakatisaipeli gugumatua.

Na sokalou dina ena veisautaki keda meda tisaipeli dina ka gugumatua vua noda iVakavuvuli ka iVakabula, o Jisu Karisito. Eda sa veisau ka yaco meda vakataki Koya sara.

Eda sa yaco meda kila vinaka na ka ka veikauwaitaki. Veivosoti cake vakalevu. Loloma cake vakalevu.

Eda sa kila vinaka tu ni sa dredre sara meda kaya tiko ni da lomana na Kalou ka qai cudruva tiko, beca, se vakawaleni ira era tiko volekati keda.⁹

Na sokalou dina e veimuataki ki na gugumatua sega ni yamekemeke me lako voli ena sala ni bula vakatisaipeli. Ka yaco na loloma sega ni tarovi rawa. Oqo talega era sa gacagaca bibi ni sokalou.

Niu nanuma lesu na kena tekivu ena dua na Siga Tabu, ena dua na valenilotu, ena dua na iteki, nikua mada ga au sobuti tu ena veika vakayalo cecere au a sotava ka na vakalougatataka tawamudu na noqu bula.

Au sa vulica rawa ni dina ga eda sa yalomatuataka tiko na noda gauna, veikacivi, kei na ilesilesi—dina ga ni da sa tikitaka tiko na lisi ni veika “uasivi sara” vakatamata yadua, matavuvale, se iliuliu—kevaka meda qai sega ni sokalou vua na noda Dauveisereki, Tui vakalomalagi, ka Kalou lagilagi, eda sa qai calata tiko na levu ni reki kei na veivakacegui ni kosipeli.

Ni da sokalou vua na Kalou, eda sa kila ka ciqomi Koya ena yalo vakarokoroko vata ga era a cakava na kai Amerika makawa. Eda na toro yani Vua ena yalo kurabui kei na qoroqoro sega ni vakamacalataki rawa. Eda vakasakita ena vakavinavinaka na lomavinaka ni Kalou. Koya gona, eda sa rawata na inuinui.

Eda vakasamataka vakatitobu na vosa ni Kalou, ka yaco me vakasinaiti na yaloda ena rarama kei na dina. Eda sa qai kila vinaka na irairai vakayalo ena laurai rawa ga ena rarama ni Yalo Tabu.¹⁰ Koya gona, eda sa rawata na vakabauta.

Ni da sa sokalou tiko, sa na vakasavasavataki na yaloda ka da yalataka meda lako ena mawe ni yavana na noda iVakabula, o Jisu Karisito. Mai na ituvatuva oqo, eda sa rawata kina na loloma cecere.

Ni da sa sokalou, ena solibula na yaloda ena vakacaucautaka na noda Kalou sa kalougata ena veimataka, sigalevu, kei na bogi.

Eda rokova ka dokai Koya tiko ena veigauna—ena noda valenilotu, itikotiko, valetabu, kei na noda cakacaka kecega.

Ni da sa sokalou, eda sa dolava na yaloda ki na kaukauwa veivakabulai ni Veisorovaki i Jisu Karisito.

Sa yaco ki na noda bula me ivakatakilakila ka ivakaraitaki ni noda sokalou.

Kemuni na taciqu kei na ganequ, na veika vakayalo eda sotava e sega sara ni vakayaco-ka ki na veika sa yaco voliti keda tiko ia sa vakayaco-ka taucoko ena veika sa yaco tiko e yaloda. Sa noqu ivakadinadina ni sokalou dina ena veisautaka na soqoni ni Lotu me kana magiti vakayalo cecere. Ena vakabulabulataka na noda bula, vakarabailevutaka noda kila vinaka, ka vaqaqacotaka na noda ivakadinadina. Ni da solia na yaloda vua na Kalou, me vakataka na Daunisame, eda na “curu ki na nona matamata ni koro ni dou sa vakamolimoli tiko, kei na nona lomanibai ka vakavinavinaka: [eda sa] vakamolimoli vua, ka vosavinakataka na yacana.

“Ni sa yalovinaka ko Jiova; ka sa sega ni mudu na nona yalololoma; ka sa yacova na itabatamata kecega na nona lomadina.”¹¹

Ni da sokalou ena dina kei na vu-ni-yaloda, eda na kadre cake mai ka matua ena inuinui, vakabauta, kei na loloma. Mai na ituvatuva o ya, eda sa caudrevi kina ena rarama vakalomalagi ki yaloda ka na vakavurea ki na noda bula na inaki vakalou, vakaituvakitaki ena vakacegu, kei na reki tawayalani.

Sai koya oqori na veivakalougatataki ni sokalou ki na noda bula. Au sa mai vakadinadina oqo ena yalomalumalumu, ena yaca tabu i Jisu Karisito, emeni.