Cov Koob Hmoov ntawm Kev Teev Tiam

Ib qho zoo kawg nkaus nyob hauv cov vaj lug kub yog ib zaj uas hais txog tus Cawm Seej txoj kev los xyuas cov neeg nyob hauv Amelikas tom qab Nws tuag thiab Sawv Rov Los. Cov neeg nyob ntawd twb raug kev puas tsuaj loj heev ua rau “tag nrho thaj av tau rais los mus txawv txav.”¹ Zaj lus txog tej xwm txheej ntawd qhia tias tom qab kev puas tsuaj puas ntsoog ntawd tag nrho cov neeg quaj tsis tu ncua,² thiab vim lawv nyuaj siab heev, lawv xav tau kev kho mob, kev kaj siab lug, thiab kev txhiv dim.

Thaum tus Cawm Seej nqis los, cov neeg tau vau rau hauv av ob zaug. Zaum thib ib yog tom qab Nws tshaj tawm nrog txoj cai los ntawm Vajtswv, hais tias:

“Saib seb, kuv yog Yexus Khetos, tus uas tej yaj saub tau ua tim khawv tias yuav los rau hauv lub ntiaj teb.

“Thiab saib seb, kuv yog qhov kaj thiab txoj sia ntawm lub ntiaj teb.”³

Ces Nws caw cov uas nyob ntawd kom lawv “sawv thiab los cuag kuv, xwv kom nej yuav tau muab nej tej tes xuas kuv sab tav, thiab kom nej yuav tau xuas tej qhov ntsia hlau hauv kuv tes thiab hauv kuv taw, xwv kom nej yuav paub tias kuv yog Ixayees tus Vajtswv, thiab tus Vajtswv ntawm tag nrho lub ntiaj teb, thiab tau raug tua rau tej kev txhaum ntawm lub ntiaj teb. …

“Thiab thaum lawv tau mus tag nrho thiab tau ua tim khawv rau lawv tus kheej, lawv tau qw nrov nrov tawm ua ib ke, hais tias:

“Hauxanas! Vajtswv tus uas Siab Kawg Nkaus lub npe tau koob hmoov!”⁴

Ces zaum ob, “lawv tau vau rau ntawm Yexus ko taw.” Tiam sis zaum no lawv ua vim lawv xav “teev tiam nws.”⁵

Xyoo no kuv tau mus xyuas ib ceg txheem ntseeg nyob hauv lub Teb Chaws Amelikas sab hnub poob. Yog ib hnub Sunday zoo li qub, kev sib ntsib thiab cov mej zeej ntawm lub Koom Txoos uas tsis txawv hlo li. Kuv saib cov neeg nkag los rau hauv chav teev tiam thiab zaum. Tej kev sib tham ua ntej yuav pib nrov ua suab yau yau nyob hauv chav ntawd. Cov niam tsev thiab txiv tsev sim ua kom cov me nyuam nyob ntsiag to—txawm ntshe ib txhia ua tsis taus. Yeej zoo li qub.

Tiam sis, ua ntej kev sib ntsib yuav qhib, tus Ntsuj Plig hais lus rau kuv lub siab.

Cov mej zeej tsis tau lam tuaj xwb kom ua hauj lwm los yog mloog cov uas yuav hais lus.

Lawv twb tuaj vim muaj ib qho tseem ceeb tshaj.

Lawv tuaj kom teev tiam tus Tswv.

Thaum peb sib ntsib, kuv saib cov mej zeej hauv ceg ntseeg ntawd. Zoo li lawv los saum ntuj los, lawv nyob tswm seeb thiab kaj siab lug. Muaj ib yam dab tsi txog lawv uas ua rau kuv lub siab sov so. Hnub Sunday ntawd lawv txais tau ib yam dab tsi zoo kawg nkaus.

Lawv teev tiam Vajtswv.

Lawv tab tom txais tus Ntsuj Plig.

Kuv pom tau nyob hauv lawv lub ntsej muag.

Thiab kuv nrog lawv zoo siab thiab teev tiam Vajtswv. Thaum kuv ua li ntawd, tus Ntsuj Plig hais rau kuv lub siab. Thiab hnub ntawd, kuv tau kawm ib yam dab tsi txog kuv tus kheej, txog Vajtswv, thiab txog kev teev tiam tiag tiag nyob hauv peb lub neej.

Haiv Neeg Ntseeg hauv Hnub Nyoog Kawg yeej zoo heev thaum lawv ua hauj lwm rau lub Koom Txoos. Tiam sis tej lub sij hawm peb lam ua peb tej hauj lwm, zoo li yog ib txoj hauj lwm li ua niaj hnub xwb. Tej lub sij hawm peb koom kev sib ntsib thiab pab lwm tus es tsis muaj kev teev tiam Vajtswv. Thiab yog tsis muaj qhov ntawd, ces ntshe peb lub cib fim nrog Vajtswv koom siab koom ntsws yuav ploj mus—yog ib lub cib fim uas peb muaj vim yog peb Leej Txiv Saum Ntuj Ceeb Tsheej cov me nyuam.

Tsis yog ib yam uas peb zoo siab lam ua xwb, kev teev tiam yeej tseem ceeb rau peb lub neej ntawm sab ntsuj plig. Yog ib yam uas peb yuav tsum xav thiab sim ua.

Thaum peb teev tiam Vajtswv, peb muaj kev hlub, txo hwj chim, thiab qhuas Nws. Peb lees yuav Nws ua peb tus vaj ntxwv, tus uas tau Tsim txhua yam, peb Leej Txiv uas hlub peb mus ib txhis.

Peb hwm thiab qhuas Nws.

Peb ywj rau Nws lub siab nyiam.

Peb thov Vajtswv kawg siab kawg ntsws, ua raws li Nws txoj lus, zoo siab rau Nws txoj kev tshav ntuj, thiab cog lus tias peb yuav rau siab coj raws li Nws.

Kev teev tiam Vajtswv yeej tseem ceeb heev nyob hauv Yexus Khetos ib tug pab coj lub neej ntshe yog peb tsis txais yuav Nws nyob hauv peb lub siab, peb yuav nrhiav tsis tau Nws nyob hauv peb pawg sab laj, lub koom txoos, thiab lub tuam tsev.

Cov pab coj tseeb yeej xav “teev tiam tus uas tsim ntuj, thiab ntiaj teb, thiab dej hiav txwv, thiab tej qhov dej txhawv—hu tus Tswv lub npe txhua hnub thiab txhua hmo.”⁶

Peb kawm tau ntau yam txog kev teev tiam tiag tiag thaum peb saib lwm tus—cov uas tej zaum tsis txawv ntawm peb—tau ua li cas, coj li cas thiab teev tiam li cas thaum lawv ntsib Vajtswv.

Thaum nyuam qhuav pib ib puas xyoo thib 19, cov neeg ntseeg Khetos feem coob tsis ntseeg tias Vajtswv tseem hais lus rau tib neeg. Tiam sis thaum lub caij nplooj ntoo hlav xyoo 1820, ua rau tib neeg xav txawv thaum ib tug tub hluas txo hwj chim mus rau hauv ib koog ntoo thiab txhos caug thov Vajtswv. Txij hnub ntawd los, muaj kev ua yog toog pom, kev tshwm sim, thiab cov tim tswv tau los rau hauv lub ntiaj teb, pub kev txawj ntse uas muaj nqi txog Vajtswv lub hom phiaj thiab txog qhov uas peb yog Nws cov me nyuam.

Oliver Cowdery piav tias tej hnub no yog tej uas “yuav tsis hnov qab hlo li. … Kev xyiv fab cuag tsi! kev xav tsis tas cuag tsi! kev xav tsis thoob cuag tsi!”⁷

Oliver tej lus hais txog ob yam uas muaj thaum yus teev tiam Vajtswv tiag tiag—kev xav tsis thoob thiab kev ris txiaj.

Txhua hnub, qhov tseem ceeb yog thaum Hnub Caiv, peb muaj cib fim xav tsis thoob txog tej uas los saum ntuj los thiab qhuas Vajtswv vim Nws foom koob hmoov rau peb thiab hlub tshua peb.

Ua li no yuav ua rau peb cia siab. Nov yog tej yam tseem ceeb ntawm kev teev tiam.

Thaum txog hnub Peetekos, tus Vaj Ntsuj Plig Dawb Huv tau nkag mus rau hauv Khetos cov thwj tim lub siab, ua rau lawv muaj txoj kev kaj thiab kev txawj ntse puv npo.

Ua ntej hnub ntawd lawv tsis paub tseeb lawv yuav tsum ua dab tsi. Nyob hauv Yeluxalees, cov uas coj raws li tus Cawm Seej feem ntau raug xwm txheej, thiab lawv xav paub tias yuav ua li cas rau lawv.

Tiam sis thaum tus Vaj Ntsuj Plig Dawb Huv ua rau lawv lub siab puv npo lawm, kev ua xyem xyav thiab kev ntshai twb ploj mus. Dhau los ntawm kev teev tiam tiag tiag, Haiv Neeg Ntseeg tau txais txoj kev kaj, kev txawj ntse, thiab tau txhawb nqa lawv zaj lus tim khawv. Thiab ua rau lawv muaj kev ntseeg.

Txij thaum ntawd, cov Thwj Tim thiab Haiv Neeg Ntseeg txiav txim siab yuav ua li cas. Lawv ua siab loj qhia txog Yexus Khetos rau txhua tus neeg.

Thaum peb teev tiam Vajtswv, peb txais tau txoj kev kaj thiab qhov tseeb, uas ua rau peb txoj kev ntseeg tau dag zog. Tej yam no kuj tseem ceeb rau kev teev tiam tiag tiag.

Nyob hauv Phau Ntawv Maumoos peb kawm tias txij thaum Amas tus Hluas dim ntawm kev txom nyem uas los ntawm nws txoj kev ntxeev siab los, nws yeej tsis zoo ib yam li qub. Nws ua siab loj “mus ncig thoob plaws rau tag nrho hauv thaj av … thiab rau tag nrho cov neeg … , rau siab ntso npaj kho tag nrho tej uas [nws] tau ua rhuav piam rau cov ntseeg lawm.”⁸

Nws txoj kev siv zog ua ib tug pab coj yog Nws txoj kev teev tiam Vajtswv tsis tu ncua.

Kev teev tiam tiag tiag ua rau peb hloov los ua cov pab coj ncaj ncees ntawm peb tus Xib Hwb thiab Cawm Seej, Yexus Khetos. Peb hloov siab thiab los ua neeg zoo li Nws.

Peb rais los ua neeg uas muaj siab zoo ntxiv. Zam txim ntxiv. Muaj kev sib hlub ntxiv.

Peb to taub hais tias peb tsis muaj peev xwm hlub Vajtswv yog tias peb ntxub thiab txhob quav ntsej cov uas nyob ib puag ncig peb.⁹

Kev teev tiam tiag tiag ua rau peb txiav txim siab peb yuav taug kev li ib tug pab coj tsis tu tsis tseg. Thiab txoj kev ntawd ua rau peb muaj kev siab hlub. Tej yam no kuj tseem ceeb rau kev teev tiam.

Thaum kuv xav txog hnub Sunday sawv ntxov uas zoo li qub, nyob hauv lub tsev sib ntsib uas zoo li lwm lub, nyob hauv ceg txheem ntseeg uas tsis txawv hlo li, ua rau kuv txais kev tshoov siab vim kuv tau hnov tus ntsuj plig thaum ntawd uas yuav foom koob hmoov rau kuv lub neej mus ib txhis li.

Kuv kawm tias txawm peb txawj tswj hwm peb lub sij hawm thiab peb tej hauj lwm—txawm yog peb txawj hais tias peb ua txhua yam zoo li ib tug neeg, tsev neeg, los yog thawj coj “zoo tag nrho” ua—yog peb tsis teev tiam peb tus Txhiv Dim, peb tus Vaj Ntxwv saum ntuj ceeb tsheej, thiab peb tus Vajtswv, peb yuav txais tsis tau feem ntau ntawm txoj kev xyiv fab thiab kev kaj siab lug ntawm txoj moo zoo.

Thaum peb teev tiam Vajtswv, peb lees txais Nws thiab hwm Nws zoo ib yam li cov neeg thaum ub ntawd. Peb xav tsis thoob thaum peb xav txog Nws. Peb ris Vajtswv txiaj vim Nws siab zoo. Yog li ntawd, peb thiaj li muaj kev cia siab.

Peb xav txog Vajtswv txoj lus, ua rau peb muaj txoj kev kaj thiab qhov tseeb puv npo. Peb to taub tej yam ntawm sab ntsuj plig uas tsuas pom tau dhau los ntawm tus Vaj Ntsuj Plig Dawb Huv txoj kev kaj.¹⁰ Yog li ntawd, peb thiaj li muaj kev ntseeg.

Thaum peb teev tiam, peb zoo zuj zus tuaj thiab peb cog lus tias peb yuav coj raws li peb tus Cawm Seej uas peb hlub, Yexus Khetos. Thiab thaum peb cog lus li no, peb thiaj li muaj kev siab hlub.

Thaum peb teev tiam Vajtswv, peb muaj siab xav qhuas Vajtswv thaum sawv ntxov, tav su, thiab hmo ntuj.

Peb hwm thiab qhuas Nws tsis tu ncua—nyob hauv peb lub tsev sib ntsib, lub tsev, lub tuam tsev, thiab thaum ua txhua yam hauj lwm.

Thaum peb teev tiam Vajtswv, peb qhib peb lub siab rau Yexus Khetos txoj Kev Theej Txhoj lub hwj chim kho neeg.

Peb lub neej hloov los ua ib lub cim txog peb txoj kev teev tiam.

Kuv cov kwv tij thiab cov muam, tej yam ntawm sab ntsuj plig tsis yog nyob ntawm tej yam uas muaj ib puag ncig peb thiab yog nyob ntawm tej yam uas tshwm sim rau hauv peb lub siab. Kuv ua tim khawv tias kev teev tiam tiag tiag yuav muab peb tej kev sib ntsib hauv lub Koom Txoos uas yeej ib txwm zoo li qub hloov los ua tej lub sij hawm zoo kawg nkaus thaum peb hnov tus Vaj Ntsuj Plig Dawb Huv. Yuav ua rau peb lub neej zoo dua, pab peb to taub, thiab txhawb nqa peb zaj lus tim khawv. Vim yog peb muab siab npuab Vajtswv, zoo li tus sau nkauj hais tias, peb “mus hauv nws lub Tuam Tsev thiab ua nws tsaug; [thiab] mus rau hauv tej chav tsev thiab qhuas nws. [peb] ua nws tsaug thiab qhuas nws lub npe.

“Tus Tswv yog tus uas zoo kawg nkaus; nws txoj kev hlub nyob mus ib txhis thiab nws txoj kev ncaj ncees nyob mus ib txhis tsis kawg.”¹¹

Thaum peb muaj siab xav teev tiam tiag tiag, peb txoj kev cia siab, kev ntseeg, thiab kev siab hlub loj zuj zus tuaj. Thiab los ntawm tus txheej txheem ntawd, peb txais txoj kev kaj rau peb tus kheej uas ua rau peb to taub Vajtswv txoj hau kev, nyob kaj siab lug, thiab muaj kev xyiv fab uas kav ib txhis.

Li ntawd yog qhov koob hmoov ntawm kev teev tiam nyob hauv peb lub neej. Kuv txo hwj chim ua tim khawv txog qhov no los ntawm Yexus Khetos lub npe dawb ceev, amees.