Eb’ li osob’tesink re li loq’onink

Jun reheb’ li numsihom q’axal sachol ch’oolej ut q’un tz’iib’anb’il wi’ resil sa’eb’ li loq’laj hu, a’an li esil chirix naq li Kolonel kirula’aniheb’ li tenamit sa’ li ch’och’ America chirix lix k’amik ut lix waklijik chi yo’yo. Li tenamit ke’xk’ul li rahilal ut li xnimal ru xsachlijik li kixb’aanu naq lix b’een chixjunil li ch’och’ kijalaxiik ru.”¹ Li tz’iib’anb’il esil chirix li k’a’ru kik’ulman naxye naq chirix naq kiwan li nimla sachok, kiwan li ayaynak ut yaab’ak rajlal sa’ xyanqeb’ li tenamit,² ut sa’ xyi lix chamal lix rahileb’, kichal xtz’okajik re li k’irtesiik, li tuqtuukilal, ut li ach’ab’aak.

Naq li Kolonel kikub’e chaq sa’ choxa, li tenamit ke’t’ane’ wiib’ sut chiru li roq. Li xb’een sut kik’ulman chirix naq kixye rik’in choxahil wankilal:

“K’ehomaq reetal, laa’in li Jesukristo, li ke’xch’olob’ chaq xyaalal li profeet naq taachalq sa’ li ruchich’och’.

“Ut k’ehomaq reetal, laa’in lix saqen ut lix yu’am li ruchich’och’.”³

Tojo’ naq kixb’oqeb’ li wankeb’ aran ut kixye, “Waklinqex ut chalqex wik’in, re taaruuq teech’ik eeruq’ sa’ xk’atq insa’, ut jo’kan ajwi’ re taaruuq teech’e’ xk’ob’olal li klawx sa’ wuq’ ut sa’ woq, re taaruuq teenaw naq laa’in lix Dios laj Israel, ut lix Dios chixjunil li ruchich’och’, ut kinkamsiik choq’ re lix maak li ruchich’och’. …

“Ut chirix naq chixjunileb’ ak xikenaqeb’ chi ub’ej ut ke’xk’e reetal xjuneseb’, ke’xjap re sa’ junajil, ut ke’xye:

“Hossana! Osob’tesinb’ilaq taxaq xk’ab’a’ li Dios Q’axal Taqenaq!”⁴

Chirix a’an, sa’ xkab’ sut, “ke’t’ane’ chi roq li Jesus,” A’b’an anajwan wan rajomeb’, ut naqatzol naq eb’ a’an “ke’xloq’oni.”⁵

Wiib’ oxib’ po chaq anajwan, taqlanb’ilin chirula’aninkil jun oqech sa’ rokeb’aal li saq’e re li Estados Unidos. A’an chaq jun domingo, yal jun ch’utam rik’ineb’ li komon re li Iglees jo’ nab’aanuman chi kok’ aj xsa’. Kiwileb’ li yookeb’ chi ok sa’ li kapiiy ut rik’in oxloq’ink ke’chunlan. Sa’ chixjunil li na’ajej kiwab’i li aatinak sa’ hasb’. Eb’ li na’b’ej ut yuwa’b’ej ke’xyal xq’e chirilb’aleb’ lix kok’al xuleb’—ut wan naq maak’a’ na’ok wi’ a’an. Kama’an nak’ulman chi kok’ aj xsa’.

A’b’anan, naq toj maji’ natikla li ch’utam, kichal sa’ lin k’a’uxl li musiq’anb’il aatin re li Musiq’ej.

Eb’ li komon a’in moko ke’k’ulun ta ka’ajwi’ re xtzʼaqobʼresinkil li teneb’anb’il sa’ xb’eeneb’ malaj yal re rab’inkil li raatineb’ li ani te’aatinaq.

Ke’k’ulun b’an rik’in jun rajb’al nim xchamal ut k’a’jo’ wi’chik xnimal ru chiru a’an.

Ke’k’ulun re loq’onink.

Naq yoo li ch’utam, kiwileb’ naab’al sa’ li ch’utam. Chanchan naq choxahil lix naq’eb’ ru, wan rik’ineb’ li oxloq’ink ut li tuqtuukilal. Wan k’a’ruhaq rik’ineb’ li kixtoch’ inch’ool. Li k’a’ru ke’xnumsi sa’ li domingo a’an, k’a’jo’ xchaq’alil ru.

Yookeb’ chi loq’onink.

Yookeb’ chireek’ankil li choxa.

Kinru chirilb’al sa’ xnaq’eb’ ru.

Kisaho’ inch’ool ut kinloq’onink rik’ineb’. Ut naq kinb’aanu jo’kan, li Musiq’ej kinraatina sa’ li waam. Ut sa’ li kutan a’an, wan kintzol chiwix, chirix li Dios, ut chirix li na’leb’ nawan chirix li tz’aqal loq’onink sa’ li qayu’am.

K’a’jo’ xchaab’ilal chanru neke’k’anjelak laj Santil Paab’anel sa’ Roso’jikeb’ li Kutan sa’ xb’oqb’aleb’ sa’ li Iglees. A’b’an wan naq maare ak nokok’ay xb’aanukil, jo’ chanchan naq a’an jun trab’aaj. Wan naq, us ta naqach’utub’ qib’ ut nokok’anjelak sa’ li awa’b’ejihom, moko wan ta qik’in li choxahilal yiib’anb’il wi’ li k’a’aq re ru re li loq’onink. Wi ta maak’a’ a’an, naqasach raj qib’ chixk’ulb’al sa’ musiq’ejil li k’a’ru maak’a’ rosojik—li wan qak’ulub’ chixk’ub’al jo’ ralalo jun Choxahil Yuwa’b’ej aj rahonel.

Li loq’onink ink’a’ yal nak’ulman chi maak’a’ rajb’al yalaq jo’q’e, a’an b’an aajel ru ut wan sa’ tz’aqal xyi li qamusiq’ejil yu’am. Tento naq taqaj, taqasik’, ut taqayal qaq’e re xnumsinkil.

Naq naqaloq’oni li Dios, naqajilosi qib’ chiru rik’in rahok, tuulanil ch’oolej, ut nimank-u. Naqak’e reetal ut naqak’ulub’a a’an jo’ li qanimajwal Rey, aj Yo’ob’tesihom re li choxa ch’och’, li qaraarookil Yuwa’ aj rahonel chi maak’a’ roso’jik.

Naqoxloq’i ut naqanima ru.

Naqak’e qib’ rub’el xwankil a’an.

Naqataqsi li qaam sa’ li tijok rik’in anchalil ch’oolej, naqak’uula chi tamresinb’il li raatin, nasaho’ qach’ool rik’in li rusilal, ut naqak’e qib’ chixtaaqenkil a’an chi q’axal tiik qach’ool.

Xloq’oninkil li Dios a’an jun na’leb’ jwal aajel ru sa’ lix yu’am jun lix tzolom li Jesukristo ut wi ink’a’ naqak’ul a’an sa’ li qaam, taqasik’ chi maak’a’ xyaalal sa’ li qach’uut, kapiiy, ut santil ochoch.

Eb’ li tz’aqal aj tzolom musiq’anb’ileb re “[xloq’oninkil] li ani kiyiib’ank re li choxa, ut li ch’och’, ut li palaw, ut eb’ lix yo’leb’aal li ha’—[xpatz’b’al] xk’ab’a’ li Qaawa’ chi kutan ut chi q’eq.”⁶

Naru naqatzol naab’al chirix li tz’aqal loq’onink rik’in xtz’ilb’al rix chanru naq jalaneb’—li ani maare moko nim ta xjalanileb’ qik’in—ke’xtaw, ke’xb’eresi rib’, ut ke’loq’onin chiru li choxahilal.

Sa’ li xb’een raqal re li b’elelaju chi cient chihab’, eb’ laj Kristiano ak yookeb’ chixkanab’ankil li na’leb’ naq li Dios toj naraatina li winq. A’b’anan, sa’ xtiklajik li saq’ehil re li chihab’ 1820 kijale’ chi junajwa li na’leb’ a’an naq jun tuulanil saaj winq xko’o sa’ jun k’iche’ ut kiwiq’la chi tijok. Chalen chaq li kutan a’an, jun xnimal ru xnumsinkil li sachol ch’oolejil k’utb’esinb’il matk’, li k’utb’esinb’il na’leb’, ut li choxahil k’utb’esink-ib’ yoo chixnujob’resinkil li ruchich’och’, xtiqib’ankileb’ li ani wankeb’ sa’ xb’een rik’in li nawom terto xtz’aq chirix lix choxahilal ut li rajom li Dios, ut chanru naxk’am rib’ rik’in li winq.

Laj Oliver Cowdery naxye resileb’ li kutan a’an jo’ “maajo’q’e taasachmanq sa’ inch’ool. … K’a’jo’ xsahil li qach’ool! K’a’jo’ li kiqak’oxla! K’a’jo’ lix sachik qach’ool!”⁷

Li raatin laj Oliver naxk’ut qe li xb’eenil k’a’aq re ru neke’ochb’eenink re li tz’aqal loq’onink re li choxahilal—jun k’oxlahom chirix li nimajwal loq’al re oxloq’ink ut li chamal b’antioxink.

Rajlal kutan, a’ut tz’aqal sa’ li hilob’aal kutan, naqataw li xnimal ru hoonal chireek’asinkil li sachb’a-ch’oolej ut oxloq’ink chirix li choxa, ut chixnimankil ru li Dios xb’aan lix osobʼtesinbʼil chaab’ilal ut xnimal ru ruxtaan.

A’an nokoxk’am sa’ li yo’onink. A’aneb’ li xb’eenileb’ na’leb’ re li loq’onink.

Sa’ li osob’tesinb’il kutan re Pentecostes, li Santil Musiq’ej ki’ok sa’ xch’ooleb’ ut xk’a’uxleb’ lix tzolom li Kristo, ut kixnujob’resiheb’ rik’in saqen ut na’leb’.

Toj sa’ li kutan a’an, neke’xnumsi hoonal b’ar wi’ ink’a’ neke’xnaw k’a’ru te’xb’aanu. Xuwajel li wank sa’ li tenamit Jerusalen choq’ reheb’ laj taaqenel re li Kolonel, ut relik chi yaal naq neke’xpatz’ rib’ k’a’ru taak’ulmanq rik’ineb’.

A’b’anan, naq li Santil Musiq’ej kixnujob’resi lix ch’ooleb’, ki’oso’ li wiib’ank ch’oolej. Sa’ xk’ab’a’ li xnimal ru ke’xnumsi chirix li tz’aqal loq’onink, eb’ laj Santil Paab’anel re li Dios ke’xk’ul li choxahil saqen, na’leb’, ut kawresinb’il xnawomeb’ xch’ool. A’an kixk’ameb’ sa’ li paab’aal.

Chalen chaq li hoonal a’an, eb’ li Apostol ut eb’ laj Santil Paab’anel k’eek’o xch’ooleb’ sa’ xb’aanuhomeb’. Ke’xjultika aatin chirix li Jesus li Kristo rik’in xkawilal lix ch’ooleb’ sa’ chixjunil li ruchich’och’.

Naq nokoloq’onink sa’ musiq’ej, naqab’oq li saqen ut li yaal sa’ li qaam, li naxkawresi li qapaab’aal. A’aneb’ ajwi’ li aajeleb’ ru re li tz’aqal loq’onink.

Sa’ lix Hu laj Mormon naqil naq chalen chaq naq laj Alma, alalb’ej, ki’ach’ab’aak chiru xk’ulb’al li rahilal xb’aan lix tz’aqal po’resink ch’oolej, maajun wa chik kixsutq’isi rib’. Rik’in xkawilal lix ch’ool “[xko’o] chiru chixjunil li ch’och’… ut sa’ xyanqeb’ chixjunil li tenamit … , ut q’axal [k’eek’o] xch’ool chixtuqub’ankil chixjunil li ra [kixb’aanu] chaq re li iglees.”⁸

Li loq’onink kixb’aanu sa’ chixjunil hoonal chiru li Nimajwal Dios kik’ub’esiman jo’ jun kawil ch’oolej chi tzolomil.

Li tz’aqal loq’onink nokoxjaltesi chi ok choq’ aj tzolom anchal qach’ool ut nim qametz’ew chiru li qaraarookil Qaawa’ ut Kolonel, li Jesukristo. Nokojale’ ut nokowulak chi wank b’ayaq chik jo’ a’an.

Naniman lix tawb’al qu ut li qajom chi ch’olanink. Naniman li qajom chixk’uyb’al xmaak jalaneb’. Naniman li qarahom.

Naqataw ru naq ink’a’ tooruuq chixyeeb’al naq naqara li Dios naq yooko chixtz’eqtaanankil malaj xik’ yooko chirilb’al li ani wankeb’ qasutam.⁹

Li tz’aqal loq’onink nokoxk’am sa’ jun kawil xk’eek’okilal qach’ool re b’eek sa’ lix b’ehil li tzolomil. Ut a’an naxk’am qab’e sa’ li tz’aqal rahok. A’ineb’ ajwi’ aajel ru re li loq’onink.

Naq nink’oxla sa’ inch’ool li kitikla jo’ yalaq domingo, sa’ jun ch’utleb’aal kab’l, sa’ jun oqech re li Iglees, toj sa’ li kutan a’in natoch’e’ inch’ool xb’aan li xnimal ru innumsihom sa’ musiq’ej li taarosob’tesi lin yu’am chi junelik.

Kintzol naq us ta chaab’ilo sa’ xk’anjelankil li qahoonal, li qab’oqb’il k’anjel, ut li qak’anjel—us ta naqatz’aqob’resi chixjunil re wank jo’ junaq kristiaan, junaq junkab’al, malaj junaq aj jolominel li “tzaqal re ru”—wi ink’a’ naqaloq’oni laj Kolol qe nim ruxtaan, li qaChoxahil Rey, ut li qaDios nim xloq’al, naqasach naab’al li sahil ch’oolejil ut li tuqtuukilal re li evangelio.

Naq naqaloq’oni li Dios, naqak’e reetal ut naqak’ul a’an rik’in juntaq’eet li oxloq’ink jo’eb’ li ke’wan najter sa’ li nimla ch’och’ America. Nokonach’ok chiru rik’ineb’ li eek’ahom moko naru ta xch’olob’ankileb’ re sachok ch’oolej ut oxloq’ink. Nasach qach’ool rik’in b’antioxink xb’aan lix chaab’ilal xch’ool li Dios. Ut chi kama’an, naqataw li yo’onink.

Naqak’oxla sa’ qach’ool li raatin li Dios ut a’an naxnujob’resi li qaam rik’in saqen ut yaal. Naqataweb’ ru li musiq’ejil qilom li ka’ajwi’ naru rilb’al rik’in lix saqen li Santil Musiq’ej.¹⁰ Ut chi kama’an, naqataw qapaab’aal.

Naq nokoloq’onink, li qaam nasaqo’bresiik ut naqak’e qib’ chixtaaqenkil lix nums li qaraarookil Kolonel, li Jesukristo. Ut chi k’eek’o qach’ool chi kama’an, naqataw li tz’aqal rahok.

Naq nokoloq’onink, li qach’ool nanumta chixnimankil ru li qaDios chiru eq’la, ewu, ut q’ojyin.

Naqasantob’resi ut naqanima ru rajlal—sa’eb’ li qach’utleb’aal kab’l, ochoch, santil ochoch, ut sa’ chixjunil li qak’anjel.

Naq nokoloq’onink, naqate li qaam chiru lix wankil aj k’irtesinel re lix tojb’al rix li maak li kixb’aanu li Jesukristo.

Li qayu’am na’ok choq’ reetalil ut xk’utb’esinkil li loq’onink naqab’aanu.

Ex was wiitz’in, li k’a’ru naqak’ul rik’in li musiq’ej moko naxk’ut ta li k’a’ru yoo chi uxmank sa’ li qasutam ut wan naab’al li naxk’ut chirix li k’a’ru yoo chi uxmank sa’ li qach’ool. Ninch’olob’ xyaalal naq li tz’aqal loq’onink naxjaleb’ li ch’utam naab’aanuman sa’ li Iglees jo’ jun nimla musiq’ejil wa’ak. Tixnima li qayu’am, tixnima li qanawom, ut tixkawob’resi lix nawom qach’ool. Rik’in naq naqaxulub’ li qach’ool chiru li Dios, jo’ laj Salmist re najter kutan, “[noko’ok] sa’ li rokeb’aal rik’in b’antioxihom, chiru xneb’aalil li rochoch rik’in loq’onihom: [naqaloq’oni ut naqosob’tesi] lix k’ab’a’.

“Xb’aan naq jwal chaab’il li Jehova; li ruxtaan wank chi junelik, ut lix tiikilal xch’ool chiru chixjunileb’ li tasal tenamit.”¹¹

Rik’in li loq’onink chi anchal ut chi kaw qach’ool, noko’atz’umak ut nokoq’ano’k sa’ yo’onink, paab’aal, ut tz’aqal rahok. Ut xb’aan a’an, naqach’utub’ li choxahil saqen sa’ li qaam li naxnujob’resi li qayu’am rik’in choxahil ajom, li tuqtuukilal li nakana, ut li sahil ch’oolej li maak’a’ rosojik.

A’an a’in li osob’tesink re li loq’onink sa’ li qayu’am. Chirix a’an ninch’olob’ xyaalal rik’in xtuulanil inch’ool sa’ lix loq’laj k’ab’a’ li Jesukristo, amen.