Mwe Insewowo luhn Alu

Sie ma wolacna ac luhngse ma sikyak ke ma suhmuhslah muhtahl uh pa sramsram ke muhtwacta luhn Mwet Lahngo nuh sin mwet Macrike tukun misac ac Sifilpac Moulyak Lal. Mwet uh kweokkihn ongaiyac luhlahp tuh oruh “muhtuhn facluh nohfohn [in] eklac sienalac.”¹ Ma sihmlac ke ma sikyak ah fahkwack lah mwet uh kalweni in tuhng ke srihpen ongaiyac,² ac ke infulwacn kweok lalos, elos kena yohk ke onwelah, mihslac, ac ahkkweyelah.

Ke Mwet Lahngo El oactui liki inkuhsrao, mwet uh puhtati pacl luo nuh ke Niyacl. Pacl se met sikyak tukun El fahkwack, ke wal lucng:

“Liye, Nga pa Jisus Kraist, suc mwet pahluh fahkwack muh ac fah tuhkuh nuh facluh.

“Ac liye, Nga pa kahlwem ac moul luhn facluh.”³

Na El suli mwet oasr we in “tuyak ac tuhkuh nuh Yuruk, tuh kowos in kuh in kohlma pouwos nuh sisken inniwuck, ac oacyacpac tuh kowos in kuh in puhla iken osra ke pouk ac niuck, tuh kowos in kuh in etuh lah Nga pa God luhn Israel, ac God luhn facluh nohfohn, ac tuh acnwucki ke ma koluk luhn facluh. …

“Ac ke elos nuhkwewa som ac sifacna liye, elos tuh tuhkweni wowoyak pacl sefanna, fahk:

“Osanna! Insewowo inen God Fuhlwactlacna Emet!”⁴

Na, ke pacl ahkluo, “elos tuh puhtati nuh ke niyacl Jisus.” Tuhsruhktuh ke pacl se inge oasr srihpac, mweyen kuht lotwelah lah elos “tuh alu nuh Sel.”⁵

Ke muhtwacwackiyacn yac se inge nga pahngonyuck in muhtwacta yurin stek se ke acn rohtoh luhn United States. Pa sie Sacnri oacna pacl nuh kwewa, miting oacna sie, wi mempucr pacna luhn Alu uh. Nga liye ke mwet uh utyak nuh lohm Sacnri uh ac kihluck efahl nuh ke siyah mwesahs uh. Sramsram fototo mahmah uh wohwohn sucwuhlsrihsr uh. Ninac ac pahpah uh srihke—ac kuhtuh pacl uh tiac orekma fal—in ahkmihsye tuhlihk orahru uh. Te ma sasuc se.

Tuh ke pacl sacn, met liki toeni an muhtwacwacack, kahs moklweyuck sin Nguhn uh tuhkuh nuh ke nuhnak luhk uh.

Mempucr inge tiac tuhkuh muhkwena in ahkfalye kunohkohn se kuh lohng mwet sramsram uh.

Elos tuhkuh ke sie srihpac ma yohk ac loal na upac.

Elos tuhkuh in alu.

Ke toeni uh fahsr nuh met, nga liye kais sie mempucr ke toeni uh. Apkuhran in oasr luhmah inkuhsrao se lalos, sie ohiyac luhn efahl ac mihslac. Oasr ma se selos ma tuh ahkfucsrfucsrye insiyuck. Ma sikyak nuh selos ke Sacnri se ingacn pa sie ma wolacna.

Elos alu na.

Elos puhlakihn ma inkuhsrao.

Nga kuh in liye ke luhmahlos.

Ac nga enganwack ac alu weluhlos. Ac ke nga oruh ohinge, Nguhn sramsram nuh insiyuck. Ac ke lwen se ingacn, nga lotwelah ma se keik sifacna, ke God, ac kunohkohn ke alu pwacye ke moul lasr uh.

Mwet Luhlahlfongi ke Lwen-sahflah uh arulacna wo ke kuhlwacnsap ke pahng luhn Alu uh. Tuhsruhktuh sahp kuhtuh pacl uh kuht orekma in ahkfalye na, oacna kuht oruh ke orekma uh. Kuhtuh pacl uh wi lasr ke toeni ac kuhlwacnsap lasr ke tohkohsrahi uh wacngihnlac ma muhtahl ke alu uh. Ac fin wacngihn ma ingacn, oasr ma tuhlac luhn nguhn sesr in wi ma pahtpaht—ma se kuht usrukihn in eis mweyen kuht pa tuhlihk nuhtin sie Pahpah luhngse Inkuhsrao.

Loes liki na in sie ongaiyac, sikyak ke engan, alu uh yohk srihpac ac enenuh in infulwacn moul luhn nguhn lasr. Pa ma se kuht enenuh in kena nuh kac, suk kac, ac srihke in puhla.

Ke kuht alu nuh sin God, kuht ahkfototo nuh Sel ke luhngse efahl, insepuhsisacl, ac ahkfuhlwactye. Kuht ahkkahlwemye ac insese nuh Sel ke Tohkohsrah fuhlwact lasr, Mwet Oraclah luhn ma nuh kwewa, Pahpah tuhmasr wolacna ac luhngse ma pahtpaht.

Kuht suhnakihn ac ahkfuhlwactye El.

Kuht iskuhtyang sifacna nuh Sel.

Kuht sruhkwack insiyacsr ke pruhe yohk, sacohkkihn kahs Lal, enganwack ke kuhlwacng Lal, ac olwelah in ukwacl ke ohiyac suwohs.

Alu nuh sin God pa sie ip yohk emet ke moul luhn mwet tuhma lutlut luhn Jisus Kraist tuh kuht fin tiac esacl ke insiyacsr, kuht ac Sokol ke wacngihn srihpac ke un mwet kahsruh, alu, ac tempuhl lasr uh.

Mwet tuhma lutlut pwacye uh moklweyuck in alu nuh sel suc oraclah inkuhsrao, ac facluh, ac meoa, ac kof sohrohr—pahngon inen Leum ke lwen ac fong.”⁶

Kuht kuh in lotwelah yohk ke ohiyacn alu pwacye ke kuht porongo mwet sahyac uh—mwet uh suc tiac arulacna siena liki kuht sifacna—oasr we, mukwikwi wo, ac alu ye muhtuhn wolacna.

Ke muhtwacwackiyacn century ahk 19, facluh luhn mwet Kristin uh apkuhran in nohfohn suhlahlahlfongi lah God El srwackna sramsram nuh sin mwet uh. Tuhsruhktuh ke spring ke yac 1820 ah, ma sacn eklac ma pahtpaht ke sie mukul fuhsr insepuhsisacl utyak nuh ke sie insack ac sikuckmuhtuhntei in pruhe. Ke pacl se inge nuh tok, infacl luhn aruhrruhma, fwackyak, ac atac inkuhsrao uh tuhkuh nuh facluh, in sang nuh sin mwet oasr we ke lahlmwetmwet sacohk ke ohiyac ac srihpac luhn God ac kuhpahsr Lal yurin mwet uh.

Oliver Cowdery el pahngon lwen ingacn in tiac kuh in muhlkihnyucklac. Na el ahkkahlwemye engan, wolacna, ac askuhlacna ma elos puhla!⁷

Kahs lal Oliver ahkkahlwemye ip se emet ma wi ohiyac in alu pwacye ke ma lucng—sie ma usrnguck wolacna ac sruikihn yohk.

Lwen nuh kwewa, tuhsruhktuh yohkna ke lwen Sahpuht, oasr pacl wowo lasr in wi ma wolacna luhn inkuhsrao ac sang kaksyak lasr nuh sin God ke ohiyac wowo ac kuhlwacng yohk Lal.

Ma se inge fah kol kuht nuh ke finsrak. Pa inge ip se emet ke alu.

Ke lwen insewowo luhn Pentecost, Nguhn Muhtahl ac utyak nuh ke insiyac ac nuhnak luhn mwet tuhma lutlut luhn Kraist, nwackuhloslac ke kahlwem ac lahlmwetmwet.

Nuh ke lwen se ingacn oasr pacl elos tahfuhluo ke ma elos enenuh in oruh. Jerusalem tuh eklac sie acn sensen nuh sin mwet fahsr tukun Mwet Lahngo, ac sahp elos enenuh in motko ke ma ac sikyak nuh selos.

Tuhsruhktuh ke Nguhn Muhtahl nwacklah insiyaclos, tahfuhluo ac suhfal wacngihnlac. Nuh ke ma sikyak wolacna luhn alu pwacye, Mwet Luhlahlfongi luhn God uh elos eis kahlwem, lahlmwetmwet, ac luhlahlfongi kuh luhn inkuhsrao. Ac ma ingacn kol nuh ke luhlahlfongi.

Ke pacl se inge nuh tok, Mwet sap ac Mwet Luhlahlfongi uh mukwikwi ke finsrak oaru. Ke ohiyac kuh, elos luti ke Kraist Jisus nuh fin facluh nohfohn.

Ke kuht alu ke nguhn, kuht suli kahlwem ac ma pwacye in utyak nuh ke nguhnasr, ma ahkfokokoye luhlahlfongi lasr. Ma inge pac enenweyuck ke alu pwacye.

Ke Puk luhn Mormon kuht lotwelah ke pacl Alma Fuhsr el eis nuhnak muhnahs ke kweok ma tuhkuh ke srihpen ohiyac lihkkeke lal, tiac sifil el met ah. El kuh in “fuhfahsryucsr fin acn nohfohn … ac inmahsrlon mwet ah nohfohn … , kena yohk in srihke in ahkwoyelah kuhnausyuck nuhkwewa ma [el] oraclah nuh ke alu uh.”⁸

Ohiyacn alu pacl nuh kwewa Lal nuh sin God Kuhlwacna oraclah atacn mwet tuhma lutlut kuh uh.

Ohiyacn alu pwacye ikihlkuhtlac nuh ke mwet tuhma lutlut sacohk ac suwohs luhn Mwet Kol luhngseyuck ac Mwet Lahngo, Jisus Kraist. Kuht eklac ac oacna El yohk likina met ah.

Kuht eklac in kahlwem ac karihngihn yohk likina met ah. Nuhnak muhnahs liki met ah. Luhngse yohk likina met ah.

Kuht kahlwem lah ma na upac se in fahk lah kuht luhngse God ke pacl sacn pacna kuht sruhnga, tiac nuhnkuh, kuh muhlkuhnlah mwet rauni kuhtlac uh.⁹

Ohiyacn alu pwacye uh kol nuh ke ohiyac oaru in fahsr ke inkacnek luhn mwet tuhma lutlut. Na kol nuh ke luhngse muhtahl. Ma inge pac pa ip yohk luhn alu.

Ke nga motko ke muhtwacwacyacn sie lututacng in Sacnri oacna sie, ke lohm alu oacna sie, ke stek oacna sie sac, finne mihsenge nga moklweyuck ke ma sikyak wolacna luhn nguhn ma ac fah ahkinsewowoye moul luhk nuh tok ma pahtpaht.

Nga lotwelah lah finne kuht suwohs in karihngihn pacl, pahng, ac kunohkohn lasr—finne kuht ahkfalye ip nuh kwewa ke tahk lasr luhn sie mwet, sucu, kuh mwet kol “suwohswohs” —kuht fin tiac alu nuh sin Mwet Molwelah kuhlwacng lasr, Tohkohsrah inkuhsrao an, ac God wolacna, kuht suhfal in eis engan ac mihslac yohk luhn wosasuc.

Ke kuht alu nuh sin God, kuht ahkkahlwemye ac eisacl ke efahl se pacna luhn mwet mahtuh fin acn Macrike ah. Kuht ohsun nuh Sel ke puhla wolacna ac yohk ma kuht tiac kuh in kahlwem kac. Kuht sesseslah ke kuloh ke ohiyac wo luhn God. Na, kuht eis finsrak.

Kuht motko ke kahs luhn God, ac ma inge nwacklah nguhnasr ke kahlwem ac pwacye. Kuht kahlwem ke ma kahto luhn nguhn ma kuh in liyeyuck muhkwena ke kahlwem luhn Nguhn Muhtahl.¹⁰ Na, kuht eis luhlahlfongi.

Ke kuht alu, nguhnasr ahkwoyeyuck ac kuht olwelah in fahsr ke falkacn Mwet Lahngo wolacna lasr, Jisus Kraist. Ac ke mukwikwi inge, kuht eis luhngse muhtahl.

Ke kuht alu, insiyacsr som nuh ke ahkfuhlwactye nuh sin God insewowo lasr ke lututacng, ekuh, ac fong.

Kuht ahkmuhtahlye ac ahkfuhlwactye El pacl nuh kwewa—ke lohm alu, lohm uh, tempuhl an, ac ke orekma lasr uh.

Ke kuht alu, kuht ikucslah insiyacsr nuh ke kuh in onwelah ke Iwaclah luhn Jisus Kraist.

Moul lasr eklac in akucl ac mwe ahkkahlwemyeyuck luhn alu lasr.

Tamuhlwel ac tahmtahel wiyuck, mukwikwi luhn nguhn tiacna wiwina ma sikyak yohrohsr uh tuhsruhktuh ma nuh kwewa ke ma sikyak lun insiyacsr. Pa mwe loh luhk lah alu pwacye uh fah eklac toeni luhn Alu oacna sie nuh ke ma yohk luhn nguhn. Ac fah ahkwoye moul lasr, ahkyohkye kahlwem lasr, ac ahkfokokoye luhlahlfongi lasr. Ke kuht sang insiyacsr nuh sin God, oacna mwet suhmuhslah Psalm emet ah, kuht “utyak nu in mutunoa sel ke kulo, Ac nu in kalkal lal ke kaksak. [Kuht] sang kulo nu sel ac kaksakin Inel.

“Tuh Leum God El wo, Lungkulang lal oan ma pahtpat, Ac oaru lal nu sin fwil nukewa.”¹¹

Ke alu pwacye ac luhngse, kuht kapwack ac mahtuhlah ke finsrak, luhlahlfongi, ac luhngse muhtahl. Ac ke mukwikwi inge, kuht eis kahlwem inkuhsrao nuh ke nguhnasr ma ac sang kahlwem lucng, mihslac yohk, ac engan ma pahtpaht ke moul lasr uh.

Pa inge mwe insewowo luhn alu nuh ke moul lasr uh. Ke ma inge nga puhsisacl in fahkwack ke ine muhtahl luhn Jisus Kraist, amen.