2010–2019
E bendishonnan di Alabansa
òktober 2016


E bendishonnan di Deboshon

Deboshon ta esensial i sentral pa nos bida spiritual. E ta algu ku nos lo mester anhelá, buska i aspirá pa eksperenshá.

Su Bishita

Un di e eksperenshanan mas remarkabel i tierno ku a wòrdu registrá den skritura sagrado ta e historia di e bishita di e Salbador na e hendenan di Amerika despues di Su morto i resurekshon. E hendenan a sufri destrukshon asina grandi ku e la kousa ku “henter e mundu [a bira] deformá.”1 E registro di e eventonan ei ta relatá ku despues di e katástrofe tur e hendenan tabata yora sin fin,2 i ku mei mei di nan angustia, nan tabata hambrá pa kurashon, pas, i redenshon.

Ora ku e Salbador a desendé for di shelu, e hendenan a kai dos biaha na Su pia. E promé bia a pasa despues ku E la pronunsiá, ku outoridat divino:

“Wak, Ami ta JesuCristu, di ken e profetanan a testifiká ku ta bai bini den mundu.

“I Wak, Ami ta e lus i e bida di mundu.”3

E la kontinuá invitando esnan presente pa “lanta i bini dilanti serka Mi, ku boso por hinka bosnan man den mi kustia, i tambe ku boso por fula e imprentanan di e klabunan den mi man i na mi pia, ku boso por sa ku Ami ta e Dios di Israel, i e Dios di henter mundu, i ku a wòrdu matá pa e pikanan di henter mundu.

“I ora nan tur a bai dilanti i a eksperenshá pa nan mes, nan a sklamá huntu, bisando:

“Hosana! Bendishoná sea e nòmber di E Dios Mas Haltu!”4

I despues di esei, pa un di dos biaha, “nan a kai na pia di Jesus.” Pero e biaha aki ku un meta, paso nos ta siña ku nan “a alab’E.”5

Awendia

Mas promé den e aña aki mi tabata otorgá pa bishitá un Staka na wèst di Estadonan Uní. Tabata un Djadumingu normal, un reunion normal, ku miembronan di Iglesia normal. Mi tabata wak ora ku hendenan tabata drenta e kapia i reverentemente tabata bai na e stulnan ku tabata disponibel. E lastu susuranan tabata zona dor di e hal. Mama i tatanan tabata purba—tin biaha en vano--- pa tene muchanan energétiko ketu. Normal.

Pero na e momentu ei, promé ku e reunion a kuminsá, palabranan inspirá dor di e Spiritu a drenta den mi mente.

E miembronan aki no a bini djis pa kumpli ku un deber òf skucha e diskursantenan.

Nan a bini pa un rason mas profundo i hopi mas signifikante.

Nan a bini pa “alabá”

Segun e reunion a sigui, mi a opservá vários miembronan den e kongregashon. Nan tabatin un ekspreshon kasi divino, i un aktitut di reverensha i pas. Un kos tokante di nan a kalentá mi kurason. E eksperensha ku nan tabata tin e Djadumingu ei tabata algu hopi ekstraordinario.

Nan tabata alabando.

Nan tabata eksperensiá shelu.

Mi por a Wak esaki na nan kara.

I mi a gosa i alabá huntu ku nan. I miéntras ku mi tabata hasi esaki, e Spiritu a toka mi kurason. I e dia ei, mi a siña un kos over di mi mes, over di Dios, i over di e ròl di deboshon berdadero den nos bida.

Deboshon den nos bida diario

Santunan di e delaster Dianan ta eksepshonal ora ku nos ta papia over di sirbi den yamamentunan den Iglesia. Pero tin biaha nos por ta hasi nos obra di rutina, manera ta djis nos ta hasi un trabou. Tin biaha nos partisipashon na reunionnan i servisio den e reino por falta e elemento sagrado di deboshon. I sin esei, nos ta falta un enkuentro spiritual inkomparabel, ku e Infinito----unu ku nos tin derecho riba dje komo yunan di un amoroso Tata Selestial.

Leu for di ta un suseso aksidental i alegre, deboshon ta esensial i sentral pa nos bida spiritual. Ta algu ku nos lo mester anhelá, buska i aspirá pa eksperensiá.

Kiko ta Deboshon?

Ora ku nos ta alabá Dios, nos ta yega serka Dje ku amor reverensia, humildat, i adorashon. Nos ta rekonosé i asept’é komo nos rei insuperabel, e Kreador di universo, nos estimado i infinitamente amoroso Tata.

Nos ta respetá i reverensiÉ.

Nos ta someté nos mes na Dje.

Nos ta alsa nos kurashonnan den orashon poderoso, apresiá Su palabra, gosa di Su miserikòrdia, i primintí pa siguié ku lealtat dediká.

Alabá Dios ta asina un elemento esensial den e bida di un disipel di JesuCristu, ku si nos falta di risibiÉ den nos kurason, nos lo busk’É en vano den nos konseho-, iglesia- i tèmpelnan.

Disipelnan berdadero ta atraé pa “Alabá Esun ku a traha shelu, i tera, i e laman, i e fuentenan di awa---sklamando e nòmber di Señor di dia i anochi.”6

Nos por siña hopi over di deboshon berdadero dor di eksaminá kon otro hendenan—hendenan ku por ta no ta masha diferente for di nos mes—a enkontrá, a komportá, i a alabá den e presensia di e divino.

Asombro, Gratitut, i Speransa

Den e promé parti di e siglo 19, e mundu Kristian a mas ku bandoná e idea ku Dios ainda ta papia ku hende. Pero den e primavera di 1820, esei a kambia pa semper ora ku un mucha hòmber kunukero humilde a drenta un arboleda i a rudia pa hasi orashon. For di e dia ei, un fluho di vishonnan remarkabel, revelashonnan, i aparensianan selestial a baña tera, dotando su abitantenan ku sabiduria presioso di e karakter i meta di Dios i Su relashon pa ku hende.

Oliverio Cowdery a deskribí e dianan ei komo “nunka pa lubidá. ... Ki goso! Ki milager! Ki asombro!”7

Oliverio su palabranan ta traspasá e promé elementonan ku ta kompaña deboshon berdadero di e Divino--- un sentimentu di un asombro total mahestuoso i un gratitut profundo.

Tur dia, pero spesialmente riba e Sabat, nos tin e oportunidat ekstraordinario pa eksperensha e milager i asombro total di shelu i ofresé nos alabansa na Dios i Si bondat bendishoná i miserikòrdia aplastante.

Esaki ta guia nos pa tin speransa. Esakinan ta e promé elementonan di deboshon.

Lus, Konosementu, i Fe

Riba e dia bendishoná di Pentekòste, e Spiritu Santu a drenta den e kurason i mente di e disipelnan di Cristu, yenando nan ku lus i sabiduria.

Te na e dia ei, tabatin momentunan ku nan tabata insigur di loke nan lo mester a hasi. Yerusalèm a bira un lugá peligroso pa un siguidó di e Salbador, i nan mester a puntra nan mes kiko lo a para bira di nan.

Pero ora e Spiritu Santu a yena nan kurasonnan, duda i des gustu a desaparesé. Dor di e eksperensia transendental di deboshon berdadero, e Santunan di Dios a risibí lus selestial, konosementu, i un testimonio fortalesé. I esei a trese fe.

For di e momentu ei, e Apòstelnan i Santunan a aktua ku determinashon enfoká. Ku kurashi nan a prediká Cristu Jesus na henter mundu.

Ora ku nos alabá spiritualmente nos ta invitá lus i bèrdat den nos alma, loke ta fortalesé nos fe. Esakinan tambe ta elementonan nesesario di deboshon berdadero.

Disípulado i Karidat

Den e Buki di Mormon, nos ta siña ku for di e momentu ku Alma (hóben) a wòrdu reskatá for di e konsekuensianan di su mes rebeldia, e no tabata meskos mas. Ku oudasia e la “biaha rònt dor di henter e pais ... i entre tur e hendenan… , ku hopi selo tratando di drecha tur e maldatnan ku e la hasi kontra di Iglesia.”8

Su deboshon konstante di Dios todopoderoso a tuma un forma di disípulado energétiko.

Deboshon berdadero ta transformá nos den disipelnan sinsero i ardiente di nos Maestro i Salbador stimá JesuCristu. Nos ta kambia i bira mas manera Dje.

Nos ta komprondé mas i care. Nos ta pordoná mas. Stima mas.

Nos ta komprondé ku ta imposibel pa bisa ku nos ta stima Dios i na mesun momentu odia, deshasí, òf menospresiá esnan rondó di nos.9

Deboshon berdadero ta trese un determinashon inmovibel pa kana e kaminda di disípulado. I esei ta hiba inevitablemente na karidat. Esakinan tambe ta elementonan di deboshon.

Drenta den Su Kamindanan ku Gratitut

Ora mi reflehá bek riba loke a kuminsá manera un Djadumingu mainta normal, den e kas di reunion normal ei, den e staka normal ei, asta awe mi ta konmoví dor di e eksperensha spiritual ekstraordinario ku pa semper lo rende mi bida.

Mi a siña ku asta si nos ta manehadónan eksepshonal di nos tempu, yamamentunan, i enkargonan—asta si nos yena tur hòki riba nos lista di e individuo “perfekto”, famia, òf lider--- si nos falta di alabá nos Libertador miserikòrdioso, Rei selestial, i Dios glorioso, nos ta falta hopi di e goso i pas di e evangelio.

Ora nos ta alabá Dios, nos ta rekonosé i risibiÉ ku e mesun reverensia ku e hendenan antiguo di Amérika e tempu ayá. Nos ta aserk’É ku sintimentunan ku no por wòrdu kaptá, di asombro i atmirashon.

Nos ta konsiderá e palabra di Dios, i esei ta yena nos almanan ku lus i bèrdat. Nos ta komprondé kosnan spiritual ku solamente por wòrdu mirá dor di e lus di e Spiritu Santo.10 I asina, nos ta atkerí fe.

Ora nos alabá, nos almanan ta wòrdu refiná i nos ta dediká nos mes pa kana den e pasonan di nos Salbador stimá, JesuCristu. I for di e desishon aki, nos ta atkerí karidat.

Ora nos alabá, nos kurason ta pintá ku alabansa pa ku nos glorioso Dios mainta, mèrdia, i anochi.

Nos ta santifiká i honr’É kontinuamente--- den nos kasnan di reunion, hogarnan, tèmpelnan, i tur nos obranan.

Ora nos alabá, nos ta habri nos kurason pa e poder pa kura di e Ekspiashon di JesuCristu.

Nos bida ta bira un muestra i ekspreshon di nos deboshon.

Rumannan, eksperensianan spiritual tin ménos ke haber ku kiko ta pasando rònt di nos i tur kos ke aber ku kiko ta pasando den nos kurason. Ta mi testimonio ku deboshon berdadero lo transformá reunionnan ordinario di misa den fiestanan spiritual ekstraordinario. E lo enrikesé nos bida, hasi nos komprondementu mas hanchu. I fortalesé nos testimonio. Pasó manera nos ta inkliná nos kurason na Dios, manera e Salmista antiguo, nos “ta drenta den Su portanan ku gratitut, i den Su kurá ku alabansa: [nos ta] gradesido na Dje, i ta bendishoná su nòmber.

“Pasó Señor ta bon; su miserikòrdia ta eterno; i Su bèrdat ta perseverá dor di tur generashon.” 11

Dor di deboshon sinsero i di kurason, nos ta floresé i madurá den speransa, fe i karidat. I dor di e proseso ei, nos ta kolekshoná lus selestial den nos almanan ku ta penetrá nos bida ku signifikashon divino, pas duradero, i goso eterno.

Esei ta e bendishon di deboshon den nos bida. Di esaki mi ta testifika humildemente den e nòmber sagrado di JesuCristu, amèn.