Kapai kan en Kaudok

Ehu irair keieu kesempwal me ntingdi nan pwuhk sarawi kan iei en Sounkomouro ketla rehn aramas akan nan Amerika mwurin Sapwellime pwoulao oh Iasadao. Aramasko patohier pahn kahpwal inenen laud mehlel ehu me kahrehda “nan sahpwo pwon ohla oh wekila.”¹ Rekoht kasalehda me aramasko wie sengiseng sohte uhdi mwurin kahpwalo²oh nan eilepen arail pahtou loal irail anahne kakehlail, meleilei, oh poadondorla.

Ni ansou me Sounkomouro ketdihdo sang nanleng, aramasko kelepwkihdi pak riau ni Alualuwehko. Keieuo wiawi mwurin E ketin mahsani. ni manaman sarawi:

“Kilang, Ngehi Sises Krais, me soukohpko kohpadahr me pahn ketdo nin sampa.

“Oh kilang, Ngehi me kamarain oh komour pen sampa.”³

Ih eri luke irail me mihmi wasao en “uhda oh kohdo rehi, pwe kumwail en kak doahkehki pehmwail akan nan pengepengeiet, oh kumwail en pil kehn lipwen mete kan nan pehikat oh ni nehikat, pwe kumwail en ese me ngehi iei Koht en Israel, oh Koht en sampa unsek oh me melahr pwehki dipen sampa. …

“Oh ni ansou me irail koaros kolahr oh pein irail kadehdehier, irail koaros wiahkintehieu werida, weriweriki:

“Osahna! Meid pai mwaren Koht me Lapalahpie!”⁴

Oh ni ansouo, keriepak en arail wia, “irail eri pwupwidihongehr ni [Aluweluwehkan].” Ahpw ansouo mie kahrepe pwe, kitail esehda me irail “pwongi Ih.”⁵

Ni tepin pahr wet I pwukoahki pwarek ehu stake nan pali eir en United States. Rahn sarawio sohte weksang rahn sarawi teikan, duwehte sakramen mihtingo oh toweh kan. I kilekilang en aramasko pedelong oh kosoansondi nan imwen kaudeko. Karuwaruhlong oh mwenginingin kohlong nan ihmw sarawio. Nohno oh pahpa kan song—ahpw sohte pweida—arail men serihko en nennenla. Duwehte soahng me kin wiawi wasa koaros.

Eri ahpw, mwohn kaudeko eh tepda, Ngehno kamarainihkinie mepwukat nan ahi madmadau.

Towe pwukat sohte kohdohte pwe irail en kapwaiada arail pwukoa de rong soun kapahrek kan.

Irail kohkihdo kahrepe loal oh kesempwal ehu.

Irail kohdo pwe irail en “kaudok.”

Ni en kaudoko eh wie doudoula, I kilekilang ekei towehkan nan pokono. Pohn meserail kan inenen poh mwakelekel, mwomwen aramas waun oh meleilei. Mehkot rehrail sair mohngiongi. Irair me re mihmi loalle ni Rahnsarawio wia mehkot me inenen kapwuriamwei mehlel.

Irail wie kaukaudok.

Irail wie pepehm nanleng.

I kak kilang met pohn meserail kan.

Oh ngehi eri perenda oh iang irail kaudok. Oh ni ei wia mwo, Ngehno ahpw sair mohngiongi. Oh ni rahno, I kasawiada mehkot me pid ngehi, me pid Koht, oh me pid pwukoahn kaudok mehlel nan atail mour kan.

Souleng en Imwin Rahn-akan kin pwerisek wia arail pwukoah nan Mwomwohdiso. Ahpw ekei ansou kitail kin wia atail pwukoah ko likamw doak en wai kei. Ekei ansou kitail kin iang sarawi ahpw kitail sohte kin koudok ni pwungih. Oh ni atail wia mwo, kitail kin pein katiasang atail ansou mwahu en ale kapai sarawi—me dokedoke kitail ni atail wia seri kempoake en Sahm Nanleng.

Kaudok sohte wia mehkot kaperen me kin pein pwarada, ahpw e konehng wia pahson en pali ngenitail. E wia mehkot me kitail anahne kasik, rapahki, oh nantiheng en wehwehkihla.

Ni atail kin kaudekiong Koht, kitail kin karanih Koht ni limpoak, wahu, oh karakarahk. Kitail kin pohnese oh ale Ih me wia atail Nanmwarki, Soun Kapikipik en nanleng oh sampah kan, Samatail kempoake oh limpoak poatopot.

Kitail kin kawauwi oh wauneki Ih.

Kitail uhpah Ih,

Kitail kin kapakap kehlailki atail mohngiong kan, kesempwaliki Sapwellime mahsen kan, perenki Sapwellime kalahngan kan oh inouki kitail en idawehn Ih ni wahu.

Kaudokiong Koht wia mehkot me inenen kesempwal nan mour en tohnpadahk men en Sises Krais oh ma kitail sohte kak ale Ih nan atail mohngiong kan, kitail sohte pahn kak diar Ih nan atail konsel kan, mwomwohdiso kan, oh nan tehnpas sarawi kan.

Tohnpadahk mehlel kan kin “kaudekiong ih me wiahda nanleng, oh sampa, oh sehd, oh utuhn pihl kan—kin likweriong mwaren Kauno nirahn oh nihpwong.”⁶

Kitail kak esehla duwen kaudok mehlel sang ni atail kin kasawih en ekei—aramas me ele sohte nohn weksang kitail—arail kin tuhong, wiewia, oh kaudok pahn sihlangin Kauno me ketiket nanleng.

Nan pali keieu en dih 19, Souleng en sampa kan koaros solahr kamehlele me Koht ketin mahsenieng aramas. Ahpw nan pahr 1820, madmadau wet wekidekla mehlel ni en pwutak pwulepwul me pedelong nan welin tuhkehko oh kelepwkidi kapakap. Sang rahno kohdo soangen kaudial tohto, oh sansal en nanleng kan audelahr sampa, kapaiakihda towehkan marain kesempwal me pid manaman oh kupwuren Koht oh Sapwellime ehuieng aramas.

Oliver Cowdery kawehwe ni rahnoko me “sohte kak manoknokla. …Ia uwen kaperen! Kaping! Kapuriamwei!”⁷

En Oliver koasoi kan kasalehda keieun irehkan me kin iang kaudok mehlel ong me sarawio—ehu pepehm kapwuriamwei mehlel oh kaping kalahngan.

Rahn koaros, ahpw mehlel Rahnsarawi, kitail kin ahneki ansou kesempwal oh mwahu kitail en kin pehm uwen kapwuriamwei oh wahu en nanleng oh meirongki atail kaping ong Koht pwehki Sapwellime kapai kaselel oh kalahngan mwuledek.

Met pahn kiheng kitail koapworopwoar. Irepwukat me wia pahson en kaudok.

Ni rahn kapai en Pendekoso, Ngehn Sarawio ahpw ketlong nan mohngiong oh mwahliel en tohpadahk en Krais kan, audehkin irail marain oh eripit.

Lel ni rahno irail ekei ansou sohte kin wehwehki dahme irail anahne wia. Serusalem wia wasa keper ehu ong me kin idawehn Sounkomouro, oh irail kin medemedewe dahme pahn wiawi ong irail.

Ahpw ni ansou me Ngehn Sarawio audehla arail mohngiong kan, arail peikasal oh pwunod sohrala. Pwehki manaman kapwuriamwei en kaudok mehlel, Souleng en Koht kan kin ale marain en nanleng, eripit oh kadehde kehlail ehu. Oh mepwukat me kin elehda pwoson.

Sang ni ansouo kohla, en Wahnparonko oh Souleng kan arail mwekid kehlaila. Irail eimahda oh padahngki duwen Sises Krais ong sampa pwon.

Ni atail kin kaudek ki ngehn, kitail kin luke marain oh me mehlel ong nan atail mour kan, me kin kakehlailih atail pwoson. Mepwukat wia ire kesempwal kei ong kaudok mehlel.

Nan Pwuken Mormon kitail kasukuhlki me sangete ansou me Alma me Pwulepwulo maiaudahsang nan kalokolok me e lelohng pwehki ah aklapalap, e wekila mehlel. E eimahda oh “seilokla wasa koaros nan sahpwo … oh rehn aramas koaros … , pwerisek nantieng en kamwahula mehkoaros me [e] kauwehla nan mwomwohdisou.”⁸

Ah kin kaukaule kaudokiong Koht Wasalapalap kahrehiong ah ahnekihla mour en tohpadahk pwerisek men.

Kaudok mehlel kin kahrehda atail wiahla tohnpadahk ngoang oh mehlel en atail Kaun oh Sounkomour Sises Krais. Kitail kin wekila oh kereniong duwehla Ih.

Kitail wiahla aramas me wehwe oh nseno. Mahk.

Kitail wehwehki me kitail sohte kak nda me kitail poakehng Koht ah kitail ahpw kailongki, sohte katapaniki, de sohte pohnese mehn mpatail kan.⁹

Kaudok mehlel kin elehda koasondi tengeteng en ahneki mour en tohnpadahk kan. Oh met kin kahrehda limpoak mehlel. Mepwukat pil wia ire kesempwal kan en kaudok.

Ni ahi kin medewehla dahme wiawi ni Rahnsarawio, nan imwen kaudok en stake me I pwareko, lel rahn wet I kin mwekidki uwen kapwuriamwei oh manaman en ngehno me pahn kapaiada ahi mour kohkohlahte.

I pil esehier me detehn kitail samaniala apwali atail ansou, maliplip kan, oh kepwukoah kan—detehn kitail kin kak kalusala atail doadoahk en apwali peneinei de soun kaweid—ma kitail sohte kaudekiong atail Soundor, Nanmwarki en nanleng, oh Koht me lingan, kitail sohte pahn ale popohl oh meleilei en rongamwahuo.

Ni atail kin kaudokiong Koht, kitail kin pohnese oh alehki Ih soangen wahu ohte me mehn mahsoko nan Amerika kin wia. Kitail kin patohdo Reh ni atail ahneki kapwuriamwei kouwahlap. Kitail kin kaping kalahnganki kamwahu kan en Koht. Oh kitail eri kin ale koapworopwor.

Kitail kin douloali mahsen en Koht, oh audehki atail mour marain oh mehlel. Kitail kin wehwehki lingan en ngehno me kitail kak kilangkihte marain en Ngehn Sarawio.¹⁰ Oh kitail eri ale pwoson.

Ni atail kin kaudok, atail mour kan kin kiewekla oh men alu nan lipwen aluweluwen Sounkomour, Sises Krais. Oh pwehki met, kitail kin ale limpoak mehlel.

Ni atail kin kaudok, atail mohngiong kan kin kapinga Koht ni menseng, ni sawas oh ni pwong.

Kitail kin kasarawi oh wauneki Ih ansou koaros—nan imwen kaudek kan, imwatail kan, tehnpas sarawi kan, oh wasa koaros.

Ahnsou me kitail kaudok, kitail ritingehng atail mohngiong kan manaman en kamwahula en Tomw en Sises Krais.

Atail mour kan wiahla kilel oh kasansal pen atail kaudok.

Riei ohl oh lih akan, kemwekid kan en pali ngehn sohte kin peipeian dahme wiewiawi limwahtail kan ahpw dahme kin wie mwekmwekid nan atail mohngiong kan. I kadehde me kaudok mehlel pahn kahrehda mihting kan en Mwomwohdisou pahn wiahla kaudok waun oh manaman kei. E pahn kapaiada atail mour kan, kadaiala atail wehwe oh kakehlailiada atail kadehde kan. Pwe ni atail mweidehng Koht atail mohngiong kan, duwehte soun wie koul en mahso, kitail “pidekihlong nan kelen Tehnpaso atail koulen kaping, kumwail patohlong nan sapwellime mwoahl sarawi ni kapingkalahngan; [kitail] kapingakalahngan oh kapikapinga mware.

“Kauno me kalahngan; sapwellime limpoak kin poatopoatete; oh e kin ketin dadaurete sapwellime loalopwoat kohkohlahte.”¹¹

Pwehki atail kaudok ki mehlel oh atail mohngiong kan, kitail kin kekeirda oh koahiekla nan koapworopwoar, pwoson, oh limpoak mehlel. Oh sangete nan mwekido, kitail kin ale marain en nanleng ong nan atail mour kan me kin kadirehkihla atail mour kan ki wehwe sarawi, meleilei oh popohl poatopot.

Iei kapai en kaudok nan atail mour kan. Pwehki met, I kadehde ni karakarahk ni lengileng kapai en Sises Krais, amen.