Ang Doktrina ni Kristo

Ang Pag-ula ni Kristo naghimo sa mga kondisyon diin kita mosalig sa “mga maayo nga buhat, kalooy, ug grasya sa Balaang Mesiyas,”⁶ “[ma]hingpit diha [ni Kristo]”,⁷ moangkon sa matag maayo nga butang,⁸ ug moangkon sa kinabuhing dayon.⁹

Ang doktrina ni Kristo sa laing bahin mao ang paagi—ang bugtong paagi—diin mahimo natong maangkon ang tanang mga panalangin nga anaa alang kanato pinaagi sa Pag-ula ni Jesus. Ang doktrina ni Kristo ang nagtugot kanato nga makagamit sa espirituhanong gahum nga mobayaw kanato gikan sa atong kasamtangang espirituhanong kahimtang ngadto sa usa ka kahimtang diin kita mahimong hingpit sama sa Manluluwas.¹⁰ Bahin niini nga proseso sa pagkatawo pag-usab, si Elder D. Todd Christofferson mitudlo: “Ang pagkatawo pag-usab, dili sama sa atong pisikal nga pagkatawo, mas labaw pa sa usa ka proseso kay sa usa ka hitabo. Ug ang pag-apil niana nga proseso mao ang labing importante nga katuyoan sa pagkamortal.”¹¹

Atong tukion ang matag elemento sa doktrina ni Kristo.

Una, hugot nga pagtuo diha ni Jesukristo ug sa Iyang Pag-ula. Ang mga propeta nagtudlo nga ang hugot nga pagtuo magsugod sa pagpaminaw sa pulong ni Kristo.¹² Ang mga pulong ni Kristo nagpamatuod sa Iyang maulaong sakripisyo ug nagsulti kanato kon unsaon nato pag-angkon og kapasayloan, mga panalangin, ug kahimayaan.¹³

Sa pagkadungog sa pulong ni Kristo, mopakita kita og hugot nga pagtuo pinaagi sa pagpili sa pagsunod sa mga pagtulun-an ug ehemplo sa Manluluwas.¹⁴ Aron mabuhat kini, si Nephi mitudlo nga kita kinahanglang mosalig sa “hingpit diha sa mga maayo nga buhat [ni Kristo], kinsa gamhanan sa pagluwas.”¹⁵ Tungod kay si Jesus usa ka Dios sa premortal nga kinabuhi,¹⁶ nagpakabuhi nga walay sala,¹⁷ ug panahon sa Iyang Pag-ula mitagbaw sa gipangayo sa kaangayan alang kaninyo ug kanako,¹⁸ Siya adunay gahum ug mga yawe aron sa pagpahinabo sa pagkabanhaw sa tanang tawo,¹⁹ ug gihimo Niyang posible alang sa kalooy nga mabuntog ang kaangayan pinaagi sa mga kondisyon sa paghinulsol.²⁰ Sa higayon nga atong masabtan nga makaangkon kita og kalooy pinaagi sa mga maayong buhat ni Kristo, kita “makabaton og hugot nga pagtuo ngadto sa paghinulsol.”²¹ Niana, ang hingpit nga pagsalig sa mga maayong buhat ni Kristo mao ang pagsalig nga Iyang gibuhat ang unsay gikinahanglan aron sa pagluwas kanato ug dayon molihok sumala sa atong pagtuo.²²

Ang hugot nga pagtuo makapahunong usab kanato nga mabalaka pag-ayo kon unsay hunahuna sa uban kanato ug magsugod nga mas magpakabana sa unsay gihunahuna sa Dios kanato.

Ikaduha, paghinulsol. Si Samuel ang Lamanite mitudlo, “Kon kamo motuo sa [kang Kristo nga] ngalan kamo maghinulsol sa tanan ninyo nga mga sala.”²³ Ang paghinulsol usa ka bililhon nga gasa gikan sa atong Langitnong Amahan nga nahimong posible pinaagi sa sakripisyo sa Iyang Bugtong Anak. Kini ang proseso nga gihatag sa Amahan kanato diin kita mousab, o mobaling, sa atong mga hunahuna, mga lihok, ug ato mismong pagkatawo aron kita mahimong mas sama sa Manluluwas.²⁴ Dili lamang kini alang sa dagkong mga sala apan usa ka inadlaw nga proseso sa pagtimbang-timbang sa kaugalingon ug pag-uswag²⁵ nga makatabang kanato nga mabuntog ang atong mga sala, atong mga kasaypanan, atong mga kahuyang, ug atong mga kakulangan.²⁶ Ang paghinulsol makapahimo kanato nga “tinuod nga mga sumusunod” ni Kristo, nga mopuno kanato sa gugma²⁷ ug mopapahawa sa atong mga kahadlok.²⁸ Ang paghinulsol dili usa ka backup nga plano kon ugaling mapakyas ang atong plano nga perpektong magpakabuhi.²⁹ Ang padayon nga paghinulsol mao lamang ang dalan nga makahatag kanato og malungtarong kalipay ug magtugot kanato nga makabalik og puyo uban sa atong Langitnong Amahan.

Pinaagi sa paghinulsol mahimo kitang manunuton ug masulundon sa kabubut-on sa Dios. Karon, dili kini buhaton nga mao lang. Ang pag-ila sa kamaayo sa Dios ug sa atong kawalay pulos,³⁰ inubanan sa atong labing maayong mga paningkamot nga mahisubay ang atong kinaiya sa kabubut-on sa Dios,³¹ magdala og grasya sa atong kinabuhi.³² Ang grasya “mao ang balaang paagi sa tabang o kalig-on, nga gihatag pinaagi sa buhong nga kalooy ug gugma ni Jesukristo … sa pagbuhat og maayo nga mga buhat nga dili unta [nato] mahimo kon magsalig lang kita sa [atong] kaugalingong gahum.”³³ Tungod kay ang paghinulsol sa tinud-anay mao ang pagkahimong sama sa Manluluwas, nga imposible kon kita ra, nagkinahanglan gayud kita sa grasya sa Manluluwas aron sa paghimo sa gikinahanglan nga mga kausaban sa atong kinabuhi.

Sa atong paghinulsol, atong ilisan ang atong karaan, dili matarung nga mga kinaiya, mga kahuyang, mga kakulangan, ug mga kahadlok uban sa bag-o nga mga kinaiya ug mga tinuohan nga magpaduol nato ngadto sa Manluluwas ug nagtabang kanato nga mahimong sama Kaniya.

Ikatulo, bunyag ug ang sakrament. Si propeta Mormon mitudlo nga “ang unang mga bunga sa paghinulsol mao ang bunyag.”³⁴ Aron makompleto, ang paghinulsol kinahanglang lakipan sa ordinansa sa bunyag nga ipahigayon pinaagi sa tawo nga naghupot sa awtoridad sa priesthood sa Dios. Alang sa mga miyembro sa Simbahan, ang mga pakigsaad sa bunyag ug sa ubang mga okasyon mabag-o samtang moambit kita sa sakrament.³⁵

Sa mga ordinansa sa bunyag ug sakrament, nakigsaad kita sa pagsunod sa mga sugo sa Amahan ug sa Anak, sa kanunay mohinumdom ni Kristo, ug andam sa pagdala sa ngalan ni Kristo (o sa Iyang buhat ug mga hiyas³⁶) diha kanato.³⁷ Ang Manluluwas, agi og balos, nakigsaad sa pagpasaylo, o pagwagtang, sa atong mga sala³⁸ ug “mobu-bu sa kabuhong sa iyang Espiritu [ngari kanato].”³⁹ Si Kristo usab nagsaad sa pag-andam kanato alang sa kinabuhing dayon pinaagi sa pagtabang kanato nga mahimong sama Kaniya.⁴⁰

Si Douglas D. Holmes, Unang Magtatambag sa Kinatibuk-ang Kapangulohan sa Young Men, misulat: “Ang mga ordinansa sa bunyag ug sakrament nagsimbolo sa resulta ug sa proseso sa pagkatawo pag-usab. Sa bunyag, gilubong nato ang karaang tawo sa unod ug mogula sa usa ka bag-ong kinabuhi.⁴¹ Sa sakrament, atong makat-unan nga kini nga kausaban anam-anam nga proseso, [diin] sa hinay-hinay, matag semana, kita mausab samtang kita maghinulsol, makigsaad, ug pinaagi sa nagkadako nga mga pagtuga sa Espiritu [mahimong sama sa Manluluwas].”⁴²

Ang mga ordinansa ug mga pakigsaad mahinungdanon diha sa doktrina ni Kristo. Pinaagi sa takus nga pagdawat sa mga ordinansa sa priesthood ug pagtuman sa kaabin nga mga pakigsaad nga ang gahum sa pagkadiosnon mapakita diha sa atong mga kinabuhi.⁴³ Si Elder D. Todd Christofferson mipasabut nga “kining ‘gahum sa pagka-diosnon’ moabut diha sa tawo ug pinaagi sa impluwensya sa Espiritu Santo.”⁴⁴

Ikaupat, ang gasa sa Espiritu Santo. Human sa bunyag kita hatagan sa gasa sa Espiritu Santo pinaagi sa ordinansa sa kumpirmasyon.⁴⁵ Kini nga gasa, kon atong dawaton, nagtugot kanato nga makabaton sa padayong pakig-uban sa usa ka Dios⁴⁶ ug kanunay nga access sa grasya nga natural nga moabut uban sa Iyang impluwensya.

Isip atong kanunay nga kauban, ang Espiritu Santo naghatag kanato og dugang gahum o kalig-on aron sa pagtuman sa atong mga pakigsaad.⁴⁷ Siya usab nagbalaan kanato,⁴⁸ nga nagpasabut nga himoon kitang “gawasnon gikan sa sala, pagkaputli, pagkalimpyo, ug pagkabalaan pinaagi sa pag-ula ni Jesukristo.”⁴⁹ Ang proseso sa pagbalaan dili lang molimpyo kanato, apan naghatag usab kanato sa gikinahanglan nga espirituhanong mga gasa o balaanong mga kinaiya sa Manluluwas⁵⁰ ug mousab sa ato mismong kinaiya,⁵¹ maingon “nga [kita] wala nay hilig sa pagbuhat og dautan.”⁵² Matag higayon nga atong madawat ang Espiritu Santo sa atong kinabuhi pinaagi sa hugot nga pagtuo, paghinulsol, mga ordinansa, Kristohanong pagserbisyo, ug uban nga matarung nga mga paningkamot, kita mausab hangtud sa hinay-hinay, anam-anam kita mahimong sama kang Kristo.⁵³

Ikalima, paglahutay hangtud sa katapusan. Si propeta Nephi mitudlo nga human makadawat sa gasa sa Espiritu Santo, kita kinahanglang “molahutay hangtud sa katapusan, sa pagsunod sa panig-ingnan sa Anak sa buhi nga Dios.”⁵⁴ Si Elder Dale G. Renlund mihulagway sa proseso sa paglahutay hangtud sa katapusan sa mosunod: “Kita mahingpit sa padayon ug dugang nga … [pag]pakita og hugot nga pagtuo [ni Kristo], maghinulsol, moambit sa sakrament sa pagbag-o sa mga pakigsaad ug panalangin sa bunyag, ug pagdawat sa Espiritu Santo isip kanunay gayud nga kauban. Kon buhaton nato kini, mas mahisama kita kang Kristo ug makalahutay sa katapusan, [uban sa tanang gikinahanglan niini].”⁵⁵

Sa laing pagkasulti, ang pagdawat sa Espiritu Santo ug ang kausaban diha kanato nga namugna niana nga pagdawat dugang nga makapalig-on sa atong pagtuo. Ang nadugangan nga pagtuo moresulta sa dugang nga paghinulsol. Sa ato dayong pagsakripisyo sa simbolikanhong paagi sa atong mga kasingkasing ug mga sala diha sa altar sa sakrament, atong madawat ang Espiritu Santo sa mas taas nga lebel. Ang pagdawat sa Espiritu Santo sa mas taas nga lebel dugang nga moduso kanato diha sa dalan sa pagkatawo pag-usab. Samtang magpadayon kita niini nga proseso ug modawat sa tanang makaluwas nga mga ordinansa ug mga pakigsaad sa ebanghelyo, atong madawat ang “grasya ug dugang grasya” hangtud makadawat kita sa kahingpitan.⁵⁶

Mga kaigsoonan, samtang atong gamiton ang doktrina ni Kristo sa atong kinabuhi, kita mapanalanginan sa temporal ug espirituhanong paagi, bisan sa mga pagsulay. Sa katapusan kita “makahupot sa mga maayo nga butang.”⁵⁷ Ako mopamatuod nga kini nga proseso nahitabo ug nagpadayon nga mahitabo sa akong kinabuhi, hinay-hinay, sa ginagmay.

Apan mas importante, kinahanglang atong gamiton ang doktrina ni Kristo sa atong kinabuhi tungod kay naghatag kini sa bugtong dalan balik ngadto sa atong Langitnong Amahan. Kini ang bugtong paagi sa pagdawat sa Manluluwas ug mahimong Iyang mga anak.⁵⁸ Gani, ang bugtong paagi nga matubos gikan sa sala ug mouswag sa espirituhanong paagi mao ang paggamit sa doktrina ni Kristo sa atong kinabuhi.⁵⁹ Isip alternatibo, si Apostol Juan mitudlo nga “bisan kinsa nga … dili magpabilin diha sa tuloohan [doktrina] ni Kristo, siya wala makapanag-iya sa Dios.”⁶⁰ Ug si Jesus Mismo misulti sa Napulog Duha ka mga Nephite nga kon kita mapakyas sa pagpakita og hugot nga pagtuo diha kang Kristo, maghinulsol, magpabunyag, ug molahutay hangtud sa katapusan, kita “isalikway ug ilabay sa kalayo, diin [kita] dili na makabalik.”⁶¹

Busa unsaon nato nga mas hingpit nga mogamit sa doktrina ni Kristo sa atong mga kinabuhi? Usa ka paagi mao ang paghimo og mahunahunaong paningkamot sa matag semana sa pag-andam alang sa sakrament pinaagi sa paggahin og panahon nga mainampoong mokonsiderar kon asang dapita kita angay nga molambo. Kita dayon makasakripisyo og labing minos usa ka butang nga nagpugong nato nga mahisama ni Jesukristo ngadto sa altar sa sakrament, mangamuyo uban sa hugot nga pagtuo alang sa tabang, mangayo sa gikinahanglang espirituhanong mga gasa, ug makigsaad nga molambo sa umaabut nga semana.⁶² Samtang ato kining buhaton, ang Espiritu Santo moabut sa atong kinabuhi sa mas taas nga lebel, ug makabaton kita og dugang nga kalig-on sa pagbuntog sa atong mga kasaypanan.

Ako mopamatuod nga si Jesukristo mao ang Manluluwas sa kalibutan ug nga Iya ang bugtong ngalan diin kita mahimong luwas.⁶³ Tanang mga butang nga maayo anaa pinaagi lamang Kaniya.⁶⁴ Apan aron tinuoray nga “makahupot sa mga maayo nga butang,”⁶⁵ lakip ang kinabuhing dayon, kinahanglan kitang kanunay nga mogamit sa doktrina ni Kristo sa atong kinabuhi. Sa sagradong pangalan ni Jesukristo, amen.