2010–2019
Yexus Khetos cov Lus Qhuab Qhia
Kaum Hli Ntuj Xyoo 2016


Yexus Khetos cov Lus Qhuab Qhia

Khetos cov lus qhuab qhia ua rau peb siv tau lub hwj chim ntawm sab ntsuj plig uas yuav hloov peb lub siab kom peb rais los ua neeg zoo tag nrho.

Yexus tau npaj mus xyuas cov Neeg Nifais tom qab Nws Sawv Rov Los kom qhia peb txog tej yam uas tseem ceeb tshaj plaws. Nws txoj kev qhuab qhia pib thaum Leej Txiv ua tim khawv rau cov neeg hais tias Yexus yog Nws “Tib Leeg Tub, uas [Nws] hlub, [Nws] txaus siab rau [Yexus].”1 Ces Yexus nqis los thiab ua tim khawv txog Nws txoj Kev Theej Txhoj,2 thiab caw cov neeg tuaj thiab xuas qhov mob ntawm Nws sab tav thiab xuas tej qhov ntsia hlau hauv Nws txhais tes thiab hauv Nws taw kom lawv thiaj “paub tseeb” tias Nws yog tus Khetos.3 Tej lus tim khawv no qhia tseeb tiag hais tias Yexus tau ua Nws txoj Kev Theej Txhoj tiav lawm thiab Leej Txiv tau ua raws li Nws khi lus hais tias Nws yuav muab ib tug Cawm Seej rau peb. Ces Yexus qhia cov Neeg Nifais kom lawv paub txais tau tag nrho cov koob hmoov los ntawm Vajtswv txoj hau kev zoo siab, uas peb txais tau vim muaj tus Cawm Seej txoj Kev Theej Txhoj, thaum peb kawm txog Khetos cov lus qhuab qhia.4

Kuv zaj lus hnub no hais txog Yexus Khetos txoj lus qhuab qhia. Cov vaj lug kub qhia tias Khetos txoj lus qhuab qhia yog kev rau siab ntseeg Khetos thiab Nws txoj Kev Theej Txhoj, kev hloov siab lees txim, ua kev cai raus dej, kev txais lub txiaj ntsim Vaj Ntsuj Plig Dawb Huv, thiab kev nyiaj mus kom txog thaum kawg.5

Khetos txoj Lus Qhuab Qhia Ua rau Peb Txais Tau cov Koob Hmoov Los ntawm Khetos txoj Kev Theej Txhoj

Yexus Khetos txoj Kev Theej Txhoj tau npaj ib txoj kev rau peb tso siab rau “txoj hauj lwm zoo, txoj kev hlub, thiab txoj kev zoo ntawm tus Mexiyas Dawb Huv,”6 “ua kom zoo tshaj plaws [dhau los ntawm Khetos],”7 txais tau txhua yam zoo,8 thiab tau txoj sia nyob mus ib txhis.9

Tiam sis Khetos txoj lus qhuab qhia yog txoj kev—yog tib txoj kev—uas peb thiaj txais tau tag nrho cov koob hmoov uas muaj dhau los ntawm Yexus txoj Kev Theej Txhoj. Yog Khetos cov lus qhuab qhia uas ua rau peb siv tau lub hwj chim ntawm sab ntsuj plig uas yuav hloov peb lub siab kom peb rais los ua neeg zoo tag nrho zoo li tus Cawm Seej.10 Hais txog txoj kev yug dua tshiab, Txwj Laug D. Todd Christofferson qhia hais tias, “Tsis zoo li kev yug los hauv lub ntiaj teb, qhov uas yus yug dua tshiab yog ib tug txheej txheem, tsis yog ib lub sij hawm xwb. Thiab kev ua raws li tus txheej txheem ntawd yog lub hom phiaj tseem ceeb tshaj ntawm lub neej no.”11

Cia peb kawm txog txhua lub ntsiab ntawm Yexus Khetos txoj lus qhuab qhia.

Qhov thib ib, kev ntseeg Yexus Khetos thiab Nws txoj Kev Theej Txhoj. Cov yaj saub tau qhia tias yus pib muaj kev ntseeg thaum yus mloog Khetos txoj lus.12 Khetos txoj lus ua tim khawv txog Nws txoj kev theej txhoj thiab qhia peb paub ua li cas kom txais tau kev zam txim, cov koob hmoov, thiab kev tsa nto.13

Thaum peb mloog Khetos txoj lus, peb rau siab ntseeg thaum peb xaiv ua raws li tus Cawm Seej tej lus qhia thiab tus yam ntxwv.14 Yog peb yuav ua li no, Nifais qhia hais tias peb yuav tsum tso siab “tag nrho rau tej hauj lwm zoo ntawm [Khetos] tus uas muaj hwj chim cawm tau.”15 Vim Yexus yog ib tug Vajtswv hauv lub neej ua ntej yug los hauv ntiaj teb,16 Nws tsis tau ua txhaum,17 thiab thaum Nws theej peb lub txhoj, Nws tau them tus nqi ntawm kev txim lij rau nej thiab kuv,18 Nws muaj lub hwj chim thiab cov yuam sij kom tsa txhua tus neeg sawv rov los,19 thiab Nws qhib kev rau kev hlub tshua kov yeej kev txim lij yog tias yus hloov siab lees txim.20 Thaum peb to taub tias peb yuav txais tau kev hlub tshua dhau los ntawm Khetos tej hauj lwm, peb muaj peev xwm “muaj kev ntseeg los hloov siab lees txim.”21 Yog li ntawd kev tso siab tag nrho rau Khetos tej hauj lwm txhais hais tias peb ntseeg Nws tau ua tej yam uas yuav tsum ua kom cawm peb thiab peb yuav tsum ua raws li peb txoj kev ntseeg.22

Kev ntseeg ua rau peb tsis txhawj ntau txog qhov uas lwm tus xav li cas txog peb thiab pib txhawj txog Vajtswv tej kev xav txog peb.

Qhov thib ob, hloov siab lees txim. Xamuyees tus Neeg Lamas qhia hais tias, “Yog nej ntseeg [Khetos] lub npe nej yeej yuav hloov siab lees tag nrho nej tej txim huv tib si.”23 Kev hloov siab lees txim yog ib lub txiaj ntsim los ntawm peb Leej Txiv Saum Ntuj Ceeb Tsheej uas muaj dhau los ntawm Nws Tib Leeg Tub txoj kev txi. Yog tus txheej txheem uas Leej Txiv muab rau peb kom peb hloov peb tej kev xav, tej yam peb ua, thiab peb tus kheej kom peb rais los ua neeg zoo li tus Cawm Seej zuj zus.24 Kev hloov siab lees txim tsis yog rau tej kev txhaum loj xwb tiam sis yog tus txheej txheem peb siv txhua hnub kom ntsuam xyuas peb tus kheej thiab ua neeg zoo dua25 uas pab peb kov yeej peb tej kev txhaum, tej yam ua yuam kev, thiab tej yam tsis zoo txog peb.26 Kev hloov siab lees txim ua rau peb coj raws li Khetos tiag tiag, peb thiaj li muaj kev hlub puv npo27 thiab ua rau peb tsis ntshai.28 Kev hloov siab lees txim tsis yog qhov peb yuav ua yog peb tsis ua neej zoo tag nrho xwb.29 Kev hloov siab lees txim tsis tu ncua yog tib txoj kev uas ua rau peb muaj kev xyiv fab uas kav ntev thiab ua rau peb tsim nyog rov qab mus nrog peb Leej Txiv Saum Ntuj Ceeb Tsheej nyob.

Dhau los ntawm kev hloov siab lees txim peb thiaj li coj raws li Vajtswv lub siab nyiam. Tiam sis peb tsis ua li no peb tus kheej. Thaum peb paub tias Vajtswv yeej zoo thiab peb tsis zoo tag nrho,30 thiab peb siv zog kom coj raws li Vajtswv lub siab nyiam,31 ces peb thiaj li muaj kev tshav ntuj hauv peb lub neej.32 Kev tshav ntsuj yog “Vajtswv txoj kev pab los sis txhawb nqa, uas muab dhau los ntawm Yexus Khetos txoj kev hlub tshua … kom ua tej hauj lwm zoo uas [peb] yuav ua tsis taus yog [peb] yuav tsum ua peb tus kheej.”33 Vim kev hloov siab lees txim yog kev rais los ua neeg zoo li tus Cawm Seej, uas peb ua tsis tau peb tus kheej, peb yuav tsum muaj tus Cawm Seej txoj kev tshav ntuj kom peb thiaj li hloov tau peb lub neej.

Thaum peb hloov siab lees txim, peb muab tej yam peb ua tsis ncaj ncees, tej yam peb ua yuam kev, tej yam tsis zoo tag nrho, thiab tej kev ntshai pauv kom coj yam ntxwv thiab ntseeg tej yam uas pab peb nyob ze tus Cawm Seej thiab pab peb rais los ua neeg zoo li Nws.

Qhov thib peb, kev cai raus dej, thiab lub cim nco txog. Tus yaj saub Maumoos qhia tias, “thawj thawj cov txiv ntawm txoj kev hloov siab lees txim yog txoj kev cai raus dej.”34 Yog peb xav hloov siab lees txim tag nrho peb yuav tsum ua txoj kab ke ua kev cai raus dej los ntawm ib tug uas tuav Vajtswv txoj cai pov thawj hwj. Rau cov mej zeej ntawm lub Koom Txoos, peb rov qab cog lus ua raws li peb tej kev khi lus uas ua thaum ua kev cai raus dej thiab lwm lub sij hawm thaum peb txais lub cim nco txog.35

Nyob hauv ob txog kab ke ua kev cai raus dej thiab txais lub cim nco txog, peb khi lus tias peb yuav ua raws li Leej Txiv thiab Leej Tub cov lus txib, nco ntsoov txog Khetos, thiab txaus siab ris Khetos lub npe (los yog Nws tej hauj lwm thiab tej cwj pwm36).37 Ces tus Cawm Seej, khi lus tias Nws yuav zam txim rau peb tej kev txhaum38 thiab tso Nws tus Ntsuj Plig rau peb ntxiv.39 Khetos kuj cog lus kom npaj peb txais txoj sia nyob mus ib txhis thaum Nws pab peb ua neeg zoo li Nws.40

Douglas D. Holmes, tus Pab Cuam thib Ib nyob hauv Koom Haum Tub Hluas Pawg Tuam Thawj Tswj Hwm, sau hais tias: “Ob txog kab ke ua kev cai raus dej thiab lub cim nco txog yog lub cim txog txoj kev thiab tus txheej txheem ntawm kev yug dua tshiab. Thaum peb ua kev cai raus dej, peb muab peb lub qub neej faus cia thiab yug los rau ib lub neej tshiab.41 Thaum peb txais lub cim nco txog, peb kawm tias txoj kev hloov no yog ib tug txheej txheem, [uas] txhua lub lim tiam peb hloov me ntsis thiab me ntsis ntxiv thaum peb hloov siab lees txim, khi lus, thiab [rais los ua neeg zoo li tus Cawm Seej] dhau los ntawm lub txiaj ntsim ntawm tus Ntsuj Plig.”42

Cov kab ke thiab tej kev khi lus yeej tseem ceeb kawg nyob hauv Khetos txoj lus qhuab qhia. Thaum peb tsim nyog txais cov kab ke ntawm lub pov thawj hwj thiab ua raws li peb tej kev khi lus peb thiaj muaj Vajtswv lub hwj chim nyob hauv peb lub neej.43 Txwj Laug D. Todd Christofferson piav hais tias, “‘Vajtswv lub hwj chim’ no yeej los ntawm thiab dhau los ntawm tus Vaj Ntsuj Plig Dawb Huv lub hwj huam.”44

Qhov thib plaub, lub txiaj ntsim Vaj Ntsuj Plig Dawb Huv. Tom qab peb ua kev cai raus dej peb txais lub txiaj ntsim Vaj Ntsuj Plig Dawb Huv los ntawm txoj kab ke pom zoo.45 Yog peb txais yuav lub txiaj ntsim no, peb yuav muaj Vajtswv nrog nraim peb nyob46 thiab yuav txais kev tshav ntuj txhua lub sij hawm uas yeej los ntawm Nws lub hwj huam.

Vim tus Vaj Ntsuj Plig Dawb Huv nrog nraim peb nyob, nws ua rau peb muaj hwj chim thiab dag zog ntxiv kom ua raws li peb tej kev khi lus.47 Nws kuj ua kom peb dawb huv,48 uas txhais hais tias ua kom peb “tsis muaj kev txhaum, ua neeg ntshiab, ua neeg huv, thiab ua neeg dawb huv dhau los ntawm Yexus Khetos txoj Kev Theej Txhoj.”49 Tus txheej txheem ua neeg dawb huv ua rau peb ua neeg huv, thiab ua rau peb txais tej txiaj ntsim ntawm sab ntsuj plig thiab tus Cawm Seej tej cwm pwm50 thiab hloov peb tus kheej,51 peb thiaj li “tsis muaj siab xav ua phem ntxiv lawm.”52 Txhua lub sij hawm peb txais tus Vaj Ntsuj Plig Dawb Huv nyob hauv peb lub neej dhau los ntawm kev ntseeg, kev hloov siab lees txim, cov kab ke, kev pab lwm tus zoo li Khetos pab, thiab lwm yam kev ncaj ncees, ces peb hloov siab zuj zus mus txog thaum peb rais los ua neeg zoo li Khetos.53

Qhov thib tsib, nyiaj mus kom txog thaum kawg. Tus yaj saub Nifais qhia tias tom qab peb txais lub txiaj ntsim Vaj Ntsuj Plig Dawb Huv peb yuav tsum “nyiaj kom mus txog thaum kawg, ua raws li Vajtswv tus uas tseem muaj txoj sia nyob Leej Tub tus yam ntxwv.”54 Txwj Laug Dale G. Renlund piav txog tus txheej txheem nyiaj mus kom txog thaum kawg zoo li no hais tias: “Peb yuav rais los ua neeg zoo tag nrho thaum peb … muaj kev ntseeg Nws, hloov siab lees txim, txais lub cim nco txog kom rov qab khi lus thiab txais cov koob hmoov ntawm kev cai raus dej, thiab txais tus Vaj Ntsuj Plig Dawb Huv los ua peb tus khub txhua lub sij hawm. Thaum peb ua li no, peb rais los ua neeg zoo li Khetos ntxiv thiab nyiaj mus txog thaum kawg.”55

Qhov uas peb txais tus Vaj Ntsuj Plig Dawb Huv thiab txoj kev hloov nyob hauv peb uas muaj vim peb tau txais tus ntawd ua rau peb txoj kev ntseeg loj tuaj ntxiv. Kev ntseeg uas loj tuaj ntxiv ua rau peb xav hloov siab lees txim ntxiv. Ces thaum peb muab peb lub siab thiab peb tej kev txhaum txi tso rau ntawm lub thaj rau lub cim nco txog, peb haj yam txais tau tus Vaj Ntsuj Plig Dawb Huv ntxiv. Kev txais tus Vaj Ntsuj Plig Dawb Huv ntxiv ua rau peb taug txoj kev yug dua tshiab mus ntxiv. Thaum peb ua raws li tus txheej txheem no thiab txais tag nrho cov kab ke thiab tej kev khi lus cawm seej ntawm txoj moo zoo, peb txais ib qho txuj ci tas mam li txais ib qho ntxiv, mus txog thaum peb txais tag nrho.56

Peb Yuav Tsum Ua Raws li Khetos cov Lus Qhuab Qhia Nyob hauv Peb lub Neej

Cov kwv tij thiab cov muam, thaum peb ua raws li Khetos cov lus qhuab qhia hauv peb lub neej, peb tau koob hmoov ntawm sab cev nqaij daim tawv thiab sab ntsuj plig, txawm peb raug kev sim siab los yog. Thaum kawg peb yuav “tau txhua yam uas zoo.”57 Kuv ua tim khawv hais tias muaj tus txheej txheem no nyob hauv kuv lub neej thaum yav tas los thiab tam sim no, ib qho me ntsis ntxiv rau ib qho zuj zus mus.

Tiam sis, qhov tseem ceeb tshaj yog qhov uas peb yuav tsum ua raws li Khetos cov lus qhuab qhia hauv peb lub neej vim yog tib txoj kev rov qab mus cuag peb Leej Txiv Saum Ntuj Ceeb Tsheej. Yog tib txoj kev txais yuav tus Cawm Seej thiab kev rais los ua Nws cov tub thiab cov ntxhais.58 Muaj tseeb tiag, tib txoj kev kom txhiv peb dim ntawm kev txhaum thiab kom peb vam meej ntawm sab ntsuj plig yog txoj kev ua raws li Khetos txoj lus qhuab qhia nyob hauv peb lub neej.59 Thiab, tus Thwj Tim Yauhas qhia tias, “Tus uas qhia tshaj tej lus uas Yexus Khetos qhia, tus ntawd yeej tsis paub Vajtswv.”60 Thiab Yexus qhia cov Thwj Tim uas yog Neeg Nifais tias yog peb tsis rau siab ntseeg Khetos, hloov siab lees txim, ua kev cai raus dej, thiab nyiaj kom mus txog thaum kawg, peb yuav “raug ntov vau thiab muab pov rau hauv qhov cub, qhov ntawd [peb] yuav tsis muaj cuab kav tig rov qab tau ntxiv lawm.”61

Yog li ntawd peb yuav ua li cas kom ua raws li Khetos txoj lus qhuab qhia ntxiv nyob hauv peb lub neej? Ib qho peb ua tau yog ua tib zoo npaj txais lub cim nco txog txhua lub lim tiam thaum peb siv sij hawm thov Vajtswv seb peb yuav tsum ua dab tsi kom ua neeg zoo dua ntxiv. Ces peb muab ib yam uas ua rau peb tsis ua neeg zoo li Yexus Khetos tso rau ntawm lub thaj rau lub cim nco txog, thov Vajtswv kom txais kev pab, thov kom txais tej lub txiaj ntsim ntawm sab ntsuj plig uas yuav tsum muaj, thiab khi lus tias peb yuav ua zoo dua thaum lub lim tiam tom ntej.62 Thaum peb ua li no, tus Vaj Ntsuj Plig Dawb Huv yuav los rau peb lub neej ntxiv, thiab peb yuav muaj dag zog ntxiv kom kov yeej peb tej kev txhaum.

Kuv ua tim khawv tias Yexus Khetos yog tus Cawm Seej ntawm lub ntiaj teb thiab Nws lub npe yog tib lub npe uas cawm tau peb.63 Txhua yam uas zoo yeej los ntawm Nws xwb.64 Tiam sis yog peb xav “tuav txhua yam uas zoo,”65 tsis hais txoj sia nyob mus ib txhis los yog, peb pheej yuav tsum ua raws li Khetos txoj lus qhuab qhia nyob hauv peb lub neej. Los ntawm Yexus Khetos lub npe dawb ceev, amees.