Katak ko an Kraist

Pinmuur eo an Kraist ekōm̧m̧ane jekjek ko bwe jen maron̄ pedped ioon “tōlloke, im turiam̧okake, im jouj eo an Messaia eo Ekwojarjar,”⁶ “weepān lo [Kraist],”⁷ bōk aolep men ko rem̧m̧an⁸, im bōk mour indeo.⁹

Katak ko an Kraist ilo bar juon wāween rej iaļ eo—ial eo wōt—me jemaron̄ bōk aolep kōjeraam̧m̧an ko rededeļo̧k n̄an kōj kōn Pinmuur eo an Jisōs. Ej Katak ko an Kraist rej kōm̧m̧an bwe jen maron̄ bōk kajoor eo an jetōb me emaron̄ ļōn̄aj kōj jān mour in jetōb eo jej pād ie kiiō n̄an jon̄an eo jemaron̄ weppān ļo̧k āinwōt Rilo̧mo̧o̧r.¹⁰ Jān wāween bar ļotak in, Elder D. Todd Christofferson eaar kwaļo̧k: “N̄an bar ļo̧tak, ejjab āinwōt ad kar ļotak ilo kanniōk, ej āinwōt juon jerbal im jab jerbal bajjōk. Im ilo kilaan jerbal in ej itok jibadbad eo an mour wabanban.”¹¹

Jen etale kajjojo m̧ōttan katak ko an Kraist.

Mokta, tōmak ilo Jisōs Kraist im Pinmuur eo An. Rikanaan ro rekar kwaļo̧k bwe tōmak ej jino kōn ron̄ naan kōn Kraist.¹² Naan ko an Kraist rej kam̧ool kōn pinmuur eo An im jiron̄ kōj wāween eo jemaron̄ bōk jeo̧rļo̧k bōd ko ad, kōjeraam̧m̧an ko, im mour āinwōt Anij.¹³

Ilo ad ron̄ naan kōn Kraist, jej kōjerbal tōmak ilo ad kālet n̄an ļoore katak ko im waanjon̄ak ko an Rilo̧mo̧o̧r eo.¹⁴ N̄an kōm̧m̧ane men in, Nipai eaar kwaļo̧k bwe jej aikuj “atartar wōt ion tōllo̧ke ko an Eo ekajoor n̄an lo̧mo̧o̧ren.”¹⁵ Kōnke Jisōs ekar juon Anij ilo mour eo m̧okta, ¹⁶ ekar mour jim̧we, ¹⁷ im ilo tōre in Pinmuur eo An ekar kakūrm̧ool aolep jim̧we n̄an kwe im̧ n̄a,¹⁸ E ewōr ippān aolep kajoor im ki ko n̄an bōktok jerkakpeje eo an aolep armej,¹⁹ im ekar kōm̧m̧an bwe tūriamo̧ en maron̄ anjo̧ ioon ekajet jim̧we kōn ukweļo̧k.²⁰ N̄e jej meļeļe bwe jemaron̄ bōk anjo̧ jen tōllo̧ke ko an Kraist, emaron̄ “lōn̄ ad tōmak n̄an ukweļo̧k.”²¹ N̄an lukkkuun likūt wōt aolep ad leke ioon tōllo̧ke ko an Kraist innām jen leke bwe Eaar kōm̧m̧ane ta eo ekkar n̄an lo̧mo̧o̧ren kōj bwe jen jerbale tōmak eo ad.²²

Tōmak ej barāinwōt kōm̧m̧an bwe jen jab inepata kōn ta eo ro jet rej ļōmņak kōn kōj im jino lukkuun ļōmņak kōn ta eo Anij ej ļōmņak kōn kōj.

Kein karuo̧, ukweļo̧k. Samuel Rilamen eo ekar kwaļo̧k, “Eļan̄n̄e kom̧ naaj tōmak ilo Etan [Kraist] kom̧ naaj ukeļo̧k jān aolep jero̧wiwi ko am.”²³ Ukeļo̧k ej juon menin letok eo eaiboojoj jen Jemedwōj Ilan̄ im ej waļo̧k kōn wōt en̄taan eo an Nejin Jitōn bōro. En̄in ej wāween jerbal eo Jemed eaar letok n̄an kōj bwe jen oktak, ak ukōt, ļōmņak ko ad, kōm̧m̧an ko ad, im aolepān ad bwe jen maron̄ erom̧ im āinwōt Rilo̧mo̧o̧r.²⁴ Ejjab kōn jero̧wiwi ko wōt im reļļap ak wāween ad etale mour ko ad im kōkkōm̧anm̧an ļo̧ki²⁵ menin ej jipan̄ kōj anjo ioon jero̧wiwi ko ad, jab wānōk, ad m̧ojņo̧, im ad likjab.²⁶ Ukeļo̧k ekōm̧m̧an bwe jen erom “m̧ool in rikaļoor” ro an Kraist, me ej kō̧jprak kōj kōn iakwe²⁷ im joļo̧k ad mijak.²⁸ Ukeļo̧k ejjab juon karōk ej bōk jikin n̄an kōkōm̧anm̧anļo̧k mour kein ad eļan̄n̄e karōk in mour ilo wānōk ko ad rejjab tōprak.²⁹ Ukeļo̧k eo ejjeļo̧k jem̧ļo̧kin ej iaļ eo de ne enaaj boktok m̧ōņōņō ejjeļo̧k jem̧ļo̧kin im kōm̧m̧an bwe jen maron̄ jepļaak im mour ippān Jemedwōj Ilan̄.

Kōn ukeļo̧k jej jino ettā n̄an pokake ankilaan Anij. Kiiō, men in ejjab dedeļo̧k make ian. Kōn kile jouj eo an Anij im jaje ko ad,³⁰ ekobaik kijejeto ko ad make kōn piktokiid ippān ankilaan Anij,³¹ ebōktok jouj n̄an mour ko ad.³² Jouj “ej juon ial kokwōjarjar n̄an bōk jipan̄ ak kōkajoor, tok jen tūriam̧o im iakwe an Jisōs Kraist … n̄an kōm̧m̧an jerbal em̧m̧an me [kōj] n̄e jeban maron̄ kōm̧m̧ane im likūt ippād innām jeban maron̄ kōm̧adm̧ōde eļan̄n̄e jenaaj kōm̧m̧ane jekjek ko ad make.”³³ Kōnke ukeļo̧k ej lukkuun n̄an kōj bwe jen āinwōt Riļo̧mo̧o̧r eo, me elukkuun pen n̄an kōj make, jelukkuun aikuji jouj eo an Rilo̧mo̧o̧r n̄an kōm̧m̧an oktak ilo mour ko ad.

Ilo ad ukeļo̧k, jej juļo̧k, m̧wil ko ad ad renana, m̧ōjņo̧ ko, bōd ko, im mijak ko kōn m̧wil im tōmak kāāl ko rej kepaak ļo̧k kōj n̄an Rilo̧mo̧o̧r im jipan̄ kōj erom̧ āinwōt E.

Jilu, peptaij im kwojkwoj eo. Rikanaan Mormon ekar kwaļo̧k “leen ko m̧oktata an ukeļo̧k ej peptaij.”³⁴ Bwe en dedeļo̧k, ukeļo̧k ej aikuj koba ippān kain̄i eo an peptaij kōm̧m̧ane jen juon eo ej kabwijer mālim in priesthood eo an Anij. N̄an membōr ro lo kabun̄ in, bujen ko me kar kōm̧m̧ane ilo iien peptaij im iien ko jet jej kōkāāli ilo ad bōk kwōjkwōj eo.³⁵

Ilo kain̄i ko an peptaij im kwōjkwōj eo, jej kallim̧ur n̄an kōjparok kien ko an Jemān im Nejin, keememej Kraist iien otemjej, im mōņōņō in bōk etan Kraist (ak jerbal eo an im piktokiin³⁶) iood. ³⁷ Rilo̧mo̧o̧r eo, n̄an kōro̧o̧ltok, ej kallim̧ur n̄an jeo̧rļo̧k bōd, ak jo̧ļo̧k, jerawiwi ko ad³⁸ im enaaj ļapļo̧k An lutōk tok an Jetōb [iood].” ³⁹ Kraist ej barāinwōt kallim̧ur n̄an kapoo̧j kōj n̄an mour indeeo ilo an jipan̄ kōj erom̧ āinwōt E.⁴⁰

Douglas D. Holmes, Rikakpilōklōk eo Kein Kajuon ilo Doulul eo Eļap an Likao ro, eaar ba: “kain̄i ko an peptaij im kōkaļļe ko an kwojkwoj rej jim̧or jem̧ļo̧k in jerbal eo an bar ļotak. Ilo peptaij, jej utikļo̧k armej eo m̧okta im wōnm̧aantok kōn juon mour ekāāl. ⁴¹ Ilo kwojkwoj eo, jej jeļā bwe oktak in ej juon jeno̧k in jerbal, [ijo] jidik kōn jidik, wiik n̄an wiik, jej oktakļo̧k ilo ad ukweļo̧k, kallim̧ur, im ilo ad kōļapļo̧k menin letok eo an eo ekwojarjar an jetōb n̄an [erom̧ āinwōt Rilo̧mo̧o̧r eo].”⁴²

Kain̄i im bujen ko remenin aorōk iloan katak ko an Kraist. Ej itok jen ad erreeo ilo ad bōk kain̄i ko an priesthood im kōjparok bujen ko me kajoor ko an anij rej waļo̧k ilo mour ko ad.⁴³Elder D. Todd Christofferson ekar kōmeļeļeik ke “kajoor in ‘āinwōt Anij’ ej itok n̄an armej jen im̧we eo an Jetōb Kwojarjar.”⁴⁴

Emān, menin letok eo an Jetōb Kwojarjar. Ālkin peptaij jej bōk menin letok eo an Jetōb Kwojarjar jen kain̄i in kapene.⁴⁵ Menin letok in, eļan̄n̄e jej bōke, ekōm̧man bwe jen maron̄ wōnmaanļo̧k jemjerā eo ad ippān juon Anij ⁴⁶ im ekowōnm̧aanļo̧k maron̄ eo n̄an bōk jouj eo ej itok jān kadeel eo An.

Āinwōt juon eo mōttad, Jetōb Kwojarjar ej letok n̄an kōj eļapļo̧k kajoor ak maron̄ n̄an ad kōjparok bujen ko ad. ⁴⁷ Ej bāreinwōt kwokojarjar kōj, ⁴⁸ meļeļe in ej kōm̧m̧an bwe jen “rōļo̧k jen jerawiwi, wānōk, erreeo, im kwojarjar jen pinmuur eo an Jisōs Kraist.” ⁴⁹ Ial in n̄an ekwojarjar ejjab karreeo ki wōt kōj, ak ej barāinwōt kōjeram̧m̧an kōj kōn menin letok ko an jetōb ko rej menin aikuj ak m̧wiļ ko an Rilo̧mo̧o̧r rekwojarjar⁵⁰ im rej koktak mour ko ad,⁵¹ bwe “en ejjeļļo̧k ad ikdeleel n̄an kōm̧m̧an nana.”⁵² Kajjojo iien jej bōk Jetōb Kwojarjar jen ad tōmak, ukeļo̧k, kain̄i ko, jerbal in jipan̄ āinwōt Kraist, im jerbal ko jet rijim̧we, jej oktak m̧ae bun̄tōn kōn bun̄tōn, jidik kōn jidik jenaaj āinwōt Kraist.⁵³

Ļalem, niknik n̄an jem̧ļo̧kin. Rikanaan Nipai ekar kwaļo̧k bwe ālkin bōk menin letok eo an Jetōb Kwojarjar jej aikuj “niknik n̄an jemļo̧kin, n̄an ļoor wanjon̄ok eo an nejin Anij eo ej mour.”⁵⁴ Elder Dale G. Renlund ekar kameļeļe wāween kilen niknik n̄an jemļo̧kin āinwōt in: “jemaron̄ in wānōk ilo ad āliji im lukkuun  … kōjerbale tōmak eo ad ilo [Kraist], ukweļo̧k, bōk kwōjkwōj eo n̄an kōkāāle bujen ko im kōjeram̧m̧an ko an peptiaj, im bōk Jetōb Kwojarjar āinwōt juon m̧ōttam̧ ilo juon jon̄an eo eļapļo̧k. Ilo ad kōm̧m̧ane men kein, enaaj ļapļo̧k ad āinwōt ad Rilo̧mo̧o̧r im jemaron̄ niknik n̄an jemļo̧kin, ippān aolep men ko ālikier.”⁵⁵

Ilo bar jet naan, jibadbad eo an Jetōb Kwojarjar im jibadbad eo an oktak ilo kōj ej n̄an kōkajoor tōmak ko ad. Kōjoorļo̧k ilo tōmak ej tōl ļo̧k n̄an ukweļo̧k. Ilo ad kōm̧m̧ane kōkaļļe in katok ko ilo buruōd im ad jero̧wiwi ioon jikin kwōjkwōj eo, jej bōk Jetōb Kwojarjar ilo juon jon̄an euteejļo̧k. Bōke Jetōb Kwojarjar ilo juon jon̄an eo euteejļo̧k ekōm̧akūt kōj n̄an iaļ in bar ļotak. Ilo ad wōnm̧aanļo̧k ilo ial in im bōk aolepān kain̄i in lo̧mo̧o̧r ko im bujen ko an gospel in, jej bōk “jouj kōn jouj” n̄an n̄e jenaaj bōk tarlepin.⁵⁶

Ro jeiū im jatū, ilo ad mour kōn katak ko an Kraist ilo mour ko ad, jej jeraam̧m̧an jimo̧r lo kanniōk im jetōb, barāinwōt ilo iien mālijjon̄ ko. Ejjab to jemaron̄ “ekkejel pen ioon men otemjej em̧m̧an.”⁵⁷ Ij kam̧ool bwe men in ekar waļo̧k im enaaj wōnm̧aanļo̧k im waļo̧k ilo mour e aō, bun̄tōn kōn bun̄tōn, jidik kōn jidik.

Ak men eo eļap an aorōk, jej aikuj mour kōn katak ko an Kraist ilo mour ko ad kōnke ej bōktok juon wōt iaļ n̄an ro̧o̧lļo̧k ippān Jemedwōj Ilan̄. Ej iaļ eo dein n̄an ad bōk ad Rilo̧mo̧o̧r im erom m̧aan im kōrā ro nejin.⁵⁸ Ilo m̧ool, iaļ eo de n̄an bōk lo̧mo̧o̧r jen jero̧wiwi im wōnm̧aanļo̧k ilo jetōb ej jen ad mour kōn katak ko an Kraist ilo mour ko ad. ⁵⁹ Ilo bar juon wāween, Rikaļoor Jon ekar kwaļo̧k bwe “jabdewōt eo...jab pād wōt ilo katak an Kraist, Anij e jab ippān.” ⁶⁰ Im Jisōs make ekar jiron̄ļo̧k Rijilōk ro Jon̄oulruo an RiNipai ro bwe eļan̄n̄e jej likjab n̄an kōjerbal tōmak ilo Kraist, ukeļo̧k, peptaij, im niknik n̄an jem̧ļo̧kin, jenaaj “jokak im joļo̧k ilo kijeek, jān ijo [n̄an kōj] rejjab maron̄ bar ro̧o̧l.”⁶¹

Kiiō ekōjkan ad mour kaki katak ko an Kraist eļapļo̧k ilo mour ko ad? Juon iaļ ej wāween ad lukkuun ļōmņak im kappopo n̄an ad bōk kwojkwoj eo ilo ad jar im lukkuun lale ia eo jej aikuj in kōkōm̧anm̧anļo̧k. Innām jemaron̄ bōktok juon katok kōn juon wōt men me emaron̄ dāpij kōj bwe jen jab āinwōt Kraist ilo lokatok in kwojkwoj eo, akweļap ilo tōmak kōn jipan̄, kajjitōk kōn menin letok ko an jetōb im remenin aikuj, im kōm̧m̧an bujen n̄an am kōkōmanmanļo̧k ilowaan wiik in tok.⁶² Ilo ad kōm̧m̧ane menin, Jetōb Kwojarjar enaaj itok n̄an mour ko ad ilo jon̄an eo eutiejļo̧k, im enaaj ļapļo̧k ad kajoor n̄an ad anjo̧ ioon jab wānōk ko ad.

Ij kam̧ool bwe Jisōs Kraist ej Rilo̧mo̧o̧r eo an laļ im Etan ej āt eo wōt im jemaron̄ bōk lo̧mo̧o̧r.⁶³ Aolep men ko im rem̧m̧an rej itok jen E wōt.⁶⁴ Ak n̄an lukkuun “ekkejel pen ioon men otemjej em̧m̧an,”⁶⁵ ekoba mour indeeo, jej aikuj wōnmaanļo̧k im mour kōn katak ko an Kraist ilo mour ko ad. Ilo āt eo ekwojarjar etan Jisōs Kraist, amen.