E Doktrina di Cristu

E Ekspiashon di Cristu ta krea e kondishonnan riba kua nos por konta ku “e méritonan, i miserikòrdia, i grasia di e Santu Mesias,”⁶ wòrdu perfekshoná den [Cristu],”⁷ optené tur kos ku ta bon,⁸ i gana bida eterno.⁹

Di otro banda e doktrina di Cristu ta e medio---e úniko medio ---pa kua nos por optené tur e bendishonnan alkansabel na nos mediante Jesus su Ekspiashon. Ta e doktrina di Cristu ku ta permití nos pa tin akseso na e poder spiritual ku lo elevá nos for di nos estado spiritual aktual na un estado na unda nos por bira perfekto manera e Salbador.¹⁰ Di e proseso di renasementu aki, Elder D. Todd Christofferson a siña: “Nase di nobo, kontrali na nos nasementu físiko, ta mas un proseso ku un evento. I tuma parti dje proseso aki ta un propósito sentral di mortalidat.”¹¹

Laga nos eksplorá kada elemento di e doktrina di Cristu.

Promé, fe den JesuCristu i Su Ekspiashon.E profetanan a siña ku fe ta kuminsá dor di skucha e palabra di Cristu.¹² E palabranan di Cristu ta testifiká di Su sakrifisio ekspiatorio i ta bisa nos kon nos por optené pordon, bendishonnan, i eksaltashon.¹³

Despues di skucha e palabranan di Cristu, nos ta ehersé fe dor di skohe pa sigui e enseñansanan i ehèmpel di e Salbador.¹⁴ Pa hasi esaki, Nefi a siña ku nos mester konfia “kompletamente riba e méritonan di [Cristu,] ku tin poder pa salba.”¹⁵ Pasobra Jesus tabata un Dios den eksistensia premortal,¹⁶ a biba un bida sin piká,¹⁷ i durante Su Ekspiashon a satisfasé tur e demandanan di hustisia pa boso i ami,¹⁸ E tin e poder i yabinan pa hasi posibel e resurekshon di tur hende,¹⁹ i El a hasi posibel pa miserikòrdia vense hustisia riba e kondishonnan di arepentimentu.²⁰unabes ku nos komprondé ku nos por haña miserikòrdia mediante Cristu su méritonan, nos ta kapas pa”tin fe pa arepentimentu.”²¹ Pa konfia kompletamente riba Cristu su méritonan anto ta pa konfia ku El a hasi lokual tabata nesesario pa salba nos i despues pa aktua segun nos fe.²²

Fe ta pone ku nos ta stòp di prekupá asina tantu tokante kiko otronan ta pensa di nos i kuminsá prekupá muchu mas tantu tokante kiko Dios ta pensa di nos.

Di dos, arepentimentu.Samuel e Lamanita a siña, “Si boso ta kere den nòmber [di Cristu] boso lo arepentí di tur boso pikánan.”²³ Arepentimentu ta un regalo di nos Tata Selestial ku ta posibel pa medio di e sakrifisio di Su Yu Unigénito. E ta e proseso ku e Tata a duna nos pa kua nos por kambia, òf bira, nos pensamentunan, akshonnan, i nos propio ser p’asina nos por bira mas i mas manera e Salbador.²⁴ E no ta solamente pa pikánan grandi pero ta un proseso diario di evaluashon propio i mehoramentu²⁵ ku ta yuda nos vense nos pikánan, imperfekshonnan, debilidatnan, i nos defisiensia.²⁶ Arepentimentu ta laga nos bira siguidonan berdadero di Cristu, kual ta yena nos ku amor²⁷ i ta kita nos temornan.²⁸ Arepentimentu no ta un plan alternativo djis en kaso nos plan pa biba perfekto faya.²⁹ Arepentimentu kontinuo ta e úniko kaminda ku por trese nos goso duradero i ta permití nos pa bai biba bèk ku nos Tata Selestial.

Pa medio di arepentimentu nos ta bira sumiso i obediente na Dios su boluntat. Awor esaki no ta wòrdu hasí su so. Un rekonosementu di Dios su bondat i nos insignifikansia,³⁰ kombiná ku nos mihó esfuersonan pa dirigí nos komportashon ku Dios su boluntat,³¹ ta trese grasia den nos bida.³² Grasia “ta medionan dibino pa yuda òf fortalesé, duná pa medio dje gran miserikòrdia i amor di JesuCristu  ... pa hasi bon obranan ku [nos] di otro manera lo no ta kapas pa logra si tabata pa [nos] propio medionan.”³³ Pasobra arepentimentu ta realmente tokante bira manera e Salbador, ku ta imposibel pa nos mes, nos ku desesperashon mester di e Salbador su grasia pa por hasi kambionan nesesario den nos bida.

Ora nos arepentí, nos ta kambia nos komportashonnan, debilidatnan, imperfekshonnan, i temornan bieu, ku komportashon, kerensianan nobo ku ta hiba nos mas serka di e Salbador i ta yuda nos bira mas manera E.

Di tres, boutismo i e santa sena.E profeta Mormon a siña ku “e promé frutanan di arepentimentu ta boutismo.”³⁴ Pa ta kompletu, arepentimentu mester ta kombiná ku e ordenansa di boutismo hasí pa un hende ku ta poseé e outoridat di saserdosio di Dios. Pa miembronan di Iglesia, e kombenionan hasí na boutismo i otro okashonnan ta wòrdu renobá ora nos partisipá di e santa sena.³⁵

Den e ordenansanan di boutismo i di e santa sena, nos ta hasi kombenio pa warda e mandamentunan di e Tata i e Yu, kòrda Cristu semper, i ta dispuesto pa tuma Cristu su nòmber (òf Su obra i atributonan)³⁶) riba nos.³⁷ Di su banda, E Salbador, ta hasi kombenio pa pordoná, òf redimí, nos pikánan³⁸ i drama su Spiritu mas abundante riba [nos].³⁹ Cristu a primintí tambe pa prepará nos pa bida eterno dor di yuda nos bira manera E.⁴⁰

Douglas D. Holmes, Promé Konsehero den e Presidensia General di Hombres Jóvenes, a skibi: “Ámbos e ordenansa di boutismo i e santa sena ta simbolisá e resultado final i e proseso di nase di nobo. Den boutismo, nos ta dera e hòmber bieu di karni i ta sali dilanti na un bida nobo.⁴¹ Den e santa sena, nos ta siña ku e kambio aki ta un proseso di paso a paso, [unda] tiki tiki, siman pa siman, nos ta kambia ora nos arepentí, hasi kombenio, i mediante oumento di investidura di e Spiritu [ ta bira manera e Salbador].”⁴²

Ordenansanan i kombenionan ta esensial den e doktrina di Cristu. Ta pa medio di risibí e ordenansanan di e saserdosio dignamente i warda e kombenionan asosiá ku e poder di deidat ta manifestá den nos bida.⁴³ Elder D.  Todd Christofferson a splika ku “e poder di deidat aki ‘ ta bini den e persona i dor di e influensia di e Spiritu Santu.”⁴⁴

Di kuater, e don di e Spiritu Santu. Despues di boutismo nos ta haña e don di e Spiritu Santu pa medio di e ordenansa di konfirmashon.⁴⁵ E don aki, si nos risibié, lo permití nos pa tin e kompania konstante di un Dios⁴⁶ i akseso kontinuo na e grasia ku ta un parti esensial di Su influensia.

Komo nos kompañero konstante, e Spiritu Santu ta duna nos poder òf fortalesa adishonal pa warda nos kombenionan.⁴⁷ Tambe E ta santifiká nos,⁴⁸ ku ta nifiká pa hasi nos “sin piká, puru, limpi, i santu dor di e ekspiashon di JesuCristu.”⁴⁹ E proseso di santifikashon no ta solamente limpia nos, pero tambe ta dota nos ku e donnan spiritual nesesario òf atributonan dibino di e Salbador⁵⁰ i ta kambia nos propio naturalesa,⁵¹ di moda “ku nos no tin deseo mas pa hasi malu.”⁵² Kada biaha ku nos risibí e Spiritu Santu den nos bida mediante fe, arepentimentu, ordenansanan, servisio kristian, i otro esfuersonan, nos ta kambia te ora paso a paso, tiki tiki nos bira manera Cristu.⁵³

Di sinku, perseverá te na fin.E profeta Nefi a siña ku despues di risibí e don di e Spiritu Santu nos mester “perseverá te na fin, i sigui e ehèmpel di e Yu di e Dios bibu.”⁵⁴ Elder Dale G. Renlund a deskribí e proseso aki komo siguiente”: “Nos por ta perfekto dor di repetidamente i progresivamente  ... ehersé fe den[Cristu], arepentí, partisipá di santa sena pa renobashon di e kombenionan, i bendishonnan di boutismo, i risibí e Spiritu Santu komo un kompañero konstante na un grado mas haltu. Hasiendo asina, nos lo bira mas manera Cristu i ta kapas pa perseverá te na fin, ku tur lokual esei ta enserá. ⁵⁵

Ku otro palabranan, e resepshon di e Spiritu Santu i e kambio ku e resepshon aki ta krea den nos lo sigui edifiká nos fe. Oumento di fe ta hiba na mas arepentimentu. Ora nos simbólikamente sakrifiká nos kurason i nos pikánan riba e altar di e santa sena, nos ta risibí e Spiritu Santu na un grado mas haltu. Esaki ta hiba nos mas dilanti riba e kaminda di nasementu di nobo. Segun nos sigui den e proseso aki i optené tur e ordenansanan i kombenionan di salbashon di e evangelio, nos ta risibí “grasia riba grasia” te ora nos risibí un plenitut.⁵⁶

Rumannan, segun nos apliká e doktrina di Cristu den nos bida, nos ta wòrdu bendishoná temporalmente i spiritualmente, hasta den pruebanan. Eventualmente nos ta kapas pa “optené tur kos bon.”⁵⁷ Mi ta testifiká ku e proseso aki a pasa i ta sigui pasa den mi mes bida, paso a paso, tiki tiki.

Pero mas importante, nos mester apliká e doktrina di Cristu den nos bida pasobra e ta proveé e úniko kaminda bèk na nos Tata Selestial. E ta e úniko manera pa risibí e Salbador i bira Su yunan.⁵⁸ De hecho, e úniko manera pa wòrdu redimí di piká i progresá spiritualmente ta pa apliká e doktrina di Cristu den nos bida.⁵⁹ Komo alternativa [Alternativamente] e apòstel Juan a siña ku “esun … ku no permanesé den e doktrina di Cristu, no tin Dios.”⁶⁰ I Jesus mes a bisa e Diesdos Nefitanan ku si nos faya den ehersé fe den Cristu, arepentí, wòrdu boutisá, i perseverá te na fin, nos lo “wòrdu di kap i bentá den kandela, for di unda [nos] no por bini bèk.”⁶¹

Pues kon nos por apliká e doktrina di Cristu mas kompletamente den nos bida? Un manera lo ta pa hasi un esfuerso konsiente kada siman pa prepará pa e santa sena dor di tuma algun tempu pa konsiderá bou di orashon unda nos por mehorá mas tantu. Nos por trese un sakrifisio di por lo ménos un kos ku ta stroba nos di bira manera JesuCristu na e altar di santa sena rogando ku fe pa yudansa, pidi pa donnan spiritual nesesario, i hasi kombenio pa mehorá durante e siman benidero.⁶² Ora nos hasi asina, e Spiritu Santu lo bini den nos bida na un grado mas haltu, i nos lo tin fortalesa adishonal pa vense nos imperfekshonnan.

Mi ta testifiká ku JesuCristu ta e Salbador di e mundu i ku Su nòmber ta e úniko pa kua nos lo por wòrdu salbá.⁶³ Tur kos ku ta bon ta alkansabel solamente pa medio di Dje.⁶⁴ Pero pa realmente “kohe tur kos bon tene,” ⁶⁵ inkluso bida eterno, nos mester apliká e doktrina di Cristu kontinuamente den nos bida. Den e nòmber sagrado di JesuCristu, amèn.