Te ha’api’ira’a tumu ’a te Mesia
Na te ha’api’ira’a tumu ʼa te Mesia e faʼatiʼa ia tātou ’ia fāriʼi i te mana vārua o te faʼateitei ia tātou mai tō tātou fāito vārua i teie taime i te hōʼē fāito i reira tātou e nehenehe ai e maitaʼi roa atu.
’Ua fa’anaho-maita’i-hia te tere ’o Iesu i te Ati Nephi i muri a’e i Tōna Ti’a-fa’ahou-ra’a nō te haʼapiʼi ia tātou i te mau mea faufaʼa rahi roa. ’Ua haʼamata te reira nā roto i te faʼaʼiteraʼa pāpū ʼa te Metua ē ʼo Iesu Tāna « Tamaiti Here, ’ua māuruuru roa [ʼOia] iāna ».1 I muri iho ’ua pou mai ʼo Iesu Iho ʼe ’ua faʼaʼite i te parau nō Tāna tusia Tāra’ehara,2 ma te ani i te nunaʼa ‘ia ʼite pāpū ē ʼo ʼOia te Mesia nā roto i te haereraʼa mai e fāfā i te puta auri i Tōna ʼaoʼao ʼe te mau puta naero i roto i Tōna nā rima ʼe nā avae.3 ’Ua haʼapāpū mai teie mau ʼiteraʼa ma te fēʼaʼa ’ore ē ’ua hope mau te Tāra’ehara a Iesu ’e ’ua rave faʼaoti te Metua i Tāna fafauraʼa ’ia hōroʼa mai i te hōʼē Faʼaora. ’Ua haʼapiʼi Iesu i muri iho i te Ati Nephi e nāhea ’ia fariʼi i te mau haʼamaitaʼiraʼa atoʼa o te ʼōpuaraʼa ʼoaʼoa ’a te Metua, o te noaʼa ia tātou maoti te Tāraʼehara a te Faʼaora, nā roto i te haʼapiʼiraʼa ia rātou i te haʼapiʼiraʼa tumu ’a te Mesia.4
E faʼatumu tāʼu parau poroʼi i teie mahana i niʼa i te haʼapiʼiraʼa tumu ’a te Mesia. Tē faʼataʼa mai nei te mau pāpaʼiraʼa moʼa i te haʼapiʼiraʼa tumu ’a Iesu Mesia, mai te faʼaʼohiparaʼa i te faʼaroʼo i te Mesia ʼe Tāna Tāra’ehara, te tātarahaparaʼa, te bāpetizoraʼa, te fariʼiraʼa i te hōroʼa ʼa te Vārua Maitaʼi, ʼe te faʼaʼoromaʼiraʼa e tae noa atu i te hopeʼa.5
E faʼatiʼa te ha’api’ira’a tumu ’a te Mesia ia tātou ’ia fariʼi i te mau haʼamaitaʼiraʼa nō te Tāra’ehara ’a te Mesia.
E faʼatupu te Tāra’ehara ʼa te Mesia i te mau tītauraʼa e nehenehe ai ia tātou ’ia tiʼaturi « i te mana, ʼe te aroha, ʼe te maitaʼi ’o te Mesia Moʼa »,6 « ’ia maitaʼi roa i te [Mesia] »,7 ‘ia roaʼa mai te mau mea maitataʼi atoʼa ra,8 ʼe ‘ia noaʼa te ora mure ʼore.9
’Ua riro atoʼa te ha’api’ira’a tumu ’a te Mesia ’ei rāve’a---hōʼē anaʼe ra rāveʼa---e nehenehe e noaʼa ia tātou te mau haʼamaitaʼiraʼa atoʼa tei hōroʼahia ia tātou nā roto i te Tāraʼehara ’a Iesu. nā te ha’api’ira’a tumu ʼa te Mesia e faʼatiʼa ia tātou ’ia fāriʼi i te mana vārua o te faʼateitei ia tātou mai tō tātou fāito vārua i teie taime i te hōʼē fāito i reira tātou e nehenehe ai e maitaʼi roa atu.10 ’Ua haʼapiʼi Elder D. Todd Christofferson nō teie rāveʼa nō te fānau-faʼahou-raʼa : « ’Ua riro te fānau-fa’ahou-raʼa, tei ta’a ’ē i tō tātou fānauraʼa tino, ʼei hōʼē rāveʼa hau atu i te hōʼē ʼohipa tei tupu. E te tomoraʼa i roto i taua rāveʼa ra o te fā tumu ïa nō te oraraʼa tāhuti nei ».11
E hiʼo nā tātou i te tufaʼa tātaʼitahi nō te ha’api’ira’a tumu ’a te Mesia.
A tahi, te faʼaroʼo ia Iesu Mesia ʼe Tāna Tāra’ehara. ’Ua haʼapiʼi te mau peropheta ē e haʼamata te faʼaroʼo nā roto i te faʼaroʼoraʼa i te parau ʼa te Mesia.12 Tē faʼaʼite pāpū nei te mau parau ʼa te Mesia nō niʼa i Tāna tusia tāraʼehara ʼe tē faʼaʼite nei te reira ia tātou nāhea e nehenehe ai e noaʼa ia tātou te faʼaʼoreraʼa hara, te mau haʼamaitaʼiraʼa, ʼe te faʼateiteiraʼa.13
Na roto i te faʼaroʼoraʼa i te mau parau ʼa te Mesia, e faʼaʼohipa ïa tātou i te faʼaroʼo nā roto i te māʼitiraʼa ’ia peʼe i te mau haʼapiʼiraʼa ʼe te hiʼoraʼa ʼo te Faʼaora.14 Nō te rave i te reira, ’ua haʼapiʼi Nephi ē e tiʼa ia tātou ’ia tiʼaturi « māite i te maitaʼi nō [te Mesia], tei pūai ’ia faʼaora ».15 Nō te mea e Atua ʼo Iesu i roto i te oraraʼa mātāmua,16 ’aita ʼOia i rave i te hara,17 ’e nā roto i Tāna Tāraʼehara ’ua pāhono ʼOia i te mau tītauraʼa a te parau-tiʼa nō ʼoutou ʼe nōʼu,18 e mana ʼe e tāviri Tāna nō te faʼatupu i te tiʼa-faʼahou-raʼa o te taʼata atoʼa,19 ’e ’ua hōroʼa ʼOia i te rāveʼa e tiʼa ai i te aroha i te faʼa’ore i te tītauraʼa a te parau faʼaʼutuʼa mai te au i te mau tītauraʼa nō te tātarahaparaʼa.20 ’Ia māramarama anaʼe tātou ē e nehenehe e nōaʼa ia tātou te aroha nā roto i te maitaʼi ʼo te Mesia, e noaʼa ïa ia tātou « te faʼaroʼo e tae noa atu i te tātarahapa ».21 Nō reira te tiʼaturiraʼa i te maitaʼi ʼo te Mesia o te tiʼaturi ïa ē ’ua rave ʼOia i te mea i tītauhia nō te faʼaora ia tātou ʼe ’ia haʼa mai te au i tō tātou faʼaroʼo.22
E tūraʼi atoʼa te faʼaroʼo ʼe ’ia faʼaea tātou i te haʼapeʼapeʼa rahi nō niʼa i te mea tā vetahi ’ē e manaʼo ra nō tātou ’e ’ia haʼamata i te haʼapaʼo rahi atu i te mea tā te Atua e manaʼo nō niʼa ia tātou.
Te piti, te tātarahapara’a. ’Ua haʼapiʼi Samuela te Ati Lamana ē, « ’ia faʼaroʼo ʼoutou i te iʼoa o te [Mesia] e tātarahapa atoʼa ʼoutou i tā ʼoutou mau hara ».23 ’Ua riro te tātarahapa ʼei hōroʼa faufaʼa rahi nō ’ō mai i tō tātou Metua i te Ao ra ʼe tei hōroʼahia mai nā roto i te tusia a Tāna Tamaiti Fānau Tahi. O te rāveʼa ïa tā te Metua i hōroʼa mai ia tātou e taui ai tātou, ʼaore rā e fāriu ai tō tātou mau manaʼo, mau ʼohipa, e tātou iho nō te riro atu ā mai te Faʼaora te huru.24 E ’ere noa nō te mau hara rārahi e rāveʼa rā i te mau mahana atoʼa nō te hiʼopoʼa ’e nō te haʼamaitaʼi ia tātou iho,25 o te tauturu ia tātou ’ia haʼavī i tā tātou mau hara, tō tātou mau ʼino riʼi, tō tātou mau paruparu, ʼe tō tātou mau ’aravihi ʼore.26 E tūraʼi te tātarahapa ia tātou ’ia riro « ’ei mau pīpī mau » nā te Mesia, tei faʼaʼī ia tātou i te aroha,27 ʼe tei ʼīriti ē atu i tō tātou mau mataʼu.28 E ʼere te tātarahapa i te hōʼē ʼōpuaraʼa mono ’ia ’ore anaʼe e manuia tā tātou ʼōpuaraʼa nō te ora maita’i roa.29 Te tātarahapa tāmau o te ’ēʼa anaʼe ïa e nehenehe e ’āfaʼi mai ia tātou te ʼoaʼoa hope ʼore ʼe o te faʼatiʼa ia tātou ’ia hoʼi e ora i piha’i iho i tō tātou Metua i te Ao ra.
E riro mai tātou nā roto i te tātarahapa ʼei feiā auraro ʼe te haʼapaʼo i te hinaʼaro o te Atua. E’ita rā te reira anaʼe. Te hōʼē ʼiteraʼa i te maitaʼi ʼo te Atua ʼe i tō tātou faufaʼa ʼore,30 ma te ʼāpitihia atu i tō tātou itoito atoʼa nō te faʼaʼāfaro i tō tātou huru mai te au i te hinaʼaro ʼo te Atua,31 nā te reira ïa e ’āfaʼi mai i te aroha i roto i tō tātou oraraʼa.32 Te aroha o te hōʼē ïa « rāveʼa hanahana nō te tauturu ʼaore rā te hōʼē pūai, tei hōroʼahia mai nā roto i te maitaʼi ʼe te aroha ʼo Iesu Mesia … ’ia rave i te mau ʼohipa maitaʼi e ʼore roa e noaʼa ia [tātou] ’ia tāpeʼa mai te mea mea nā roto noa anaʼe i tā tātou iho rāveʼa ».33 Nō te mea hoʼi ē te tātarahapa, o te riro-mau-raʼa ïa mai te Faʼaora, e ’ore hoʼi e noaʼa nā roto noa i tō tātou iho pūai, e tītau mau ïa tātou i te mana aroha ’o te Faʼaora nō te rave i te mau tauiraʼa e tītauhia i roto i tō tātou nei oraraʼa.
’Ia tātarahapa anaʼe tātou, e mono ïa te mau peu ʼe te mau tiʼaturiraʼa ʼāpī o te haʼafātata atu ia tātou i te Faʼaora ʼe o te tauturu ia tātou ’ia riro mai Iāna te huru i tō tātou mau huru tahito parau-tiʼa ʼore, te mau ʼino riʼi, te mau paruparu, ʼe te mau riʼariʼa.
Te toru, te bāpetizoraʼa ʼe te ʼōroʼa. ’Ua haʼapiʼi te peropheta Moromona ē « te bāpetizo, o tā te tātarahapa e hotu mai ».34 Nō te faʼahope i te reira, e tiʼa ïa te tātarahapa ’ia ’āpitihia atu i te ʼōroʼa nō te bāpetizoraʼa tei fa’aterehia e te hō’ē ta’ata tei mau i te mana o te autahu’ara’a a te Atua. Nō te mau melo ʼo te ʼEkālesia, e faʼaʼāpīhia ïa te mau fafauraʼa tei ravehia i te bāpetizoraʼa ʼe i te tahi atu mau taime ’ia ʼamu anaʼe tātou i te ʼōroʼa.35
I roto i te mau ʼōroʼa nō te bapetizoraʼa ʼe te ʼamuraʼa i te ʼōroʼa, e fafau tātou ’ia haʼapaʼo i te mau faʼaueraʼa ʼa te Metua ʼe ʼa te Tamaiti, ’ia haʼamanaʼo noa i te Mesia, ʼe ’ia hinaʼaro i te rave i te iʼoa ʼo te Mesia (ʼaore rā Tāna ʼohipa ʼe Tōna mau maitaʼi36) i niʼa ia tātou.37 E fafau mai ïa te Faʼaora e faʼaore, ʼaore rā e haʼamatara, i tā tātou mau hara,38 ʼe « ’ia niʼiniʼi rahi mai i tōna ra Vārua i niʼa iho ia [tātou] ».39 E fafau atoʼa mai te Mesia e faʼaineine ʼOia ia tātou nō te ora mure ʼore nā roto i te tautururaʼa ia tātou ’ia riro mai Iāna ra te huru.40
’Ua pāpa’i o Douglas D. Holmes, tauturu hō’ē i roto i te Peresidenira’a Rahi o te Feiā ’Āpī Tamāroa « E faʼahōhoʼa te mau ʼōroʼa nō te bāpetizoraʼa ʼe te ʼamuraʼa i te ʼōroʼa i te hopeʼa ʼe te rāveʼa nō te fānau-faʼahou-raʼa. I roto i te bāpetizoraʼa, e tanu tātou i te taʼata tahito ʼe e tiʼa-faʼahou-mai ʼei ora ʼāpī.41 I roto i te ʼōroʼa, e haʼapiʼi mai tātou ē teie tauiraʼa o te hōʼē ïa rāveʼa taʼahiraʼa, i roto i te reira tātou e taui-mārū-noa-hia ai, i te mau hebedoma ato’a, ’ia tātarahapa ʼe ’ia fafau anaʼe tātou, ’e nā roto i te mau hōroʼaraʼa ʼa te Vārua e riro mai ai tātou mai te Fa’aora ra te huru.42
E mea faufaʼa roa te mau ʼōroʼa ʼe te mau fafauraʼa i roto i te haʼapiʼiraʼa tumu ʼa te Mesia. nā roto i te fāriʼi-parau-tiʼa-raʼa i te mau ʼōroʼa nō te autahuʼaraʼa ʼe te haʼapaʼoraʼa i te mau fafauraʼa e fa’aʻitehia mai ai te mana nō te huru Atua i roto i tō tātou oraraʼa.43 ’Ua haʼamāramarama mai Elder D. Todd Christofferson ē « e haere mai teie mana paieti i roto i te ta’ata ’e nā roto i te fa’aurura’a o te Vārua Maitaʼi ».44
Te maha, te hōro‘araʼa ʼo te Vārua Maita’i. I muri aʼe i te bāpetizoraʼa e hōroʼahia ai ia tātou te hōroʼaraʼa ’o te Vārua Maitaʼi nā roto i te ʼōroʼa o te haʼamauraʼa.45 Mai te mea e fāriʼi tātou i teie hōroʼaraʼa, e faʼatiʼa te reira ia tātou ’ia fāriʼi i te ʼauhoaraʼa tāmau nō te hōʼē Atua,46 ʼe ’ia fāriʼi tāmau noa i te aroha e vai nei i raro aʼe i Tōna ra mana.
ʼEi hoa tāmau nō tātou, e hōroʼa mai te Vārua Maitaʼi i te tahi atu ā mana ʼaore rā pūai nō te haʼapaʼo i tā tātou mau fafauraʼa.47 E haʼamoʼa atoʼa ʼOia ia tātou,48 ’oia hoʼi e « faʼatiʼamā ʼOia ia tātou i te hara, e tāmā, e haʼaviʼiviʼi ʼore, ʼe e haʼamoʼa ʼOia ia tātou nā roto i te tāra’ehara ʼa Iesu Mesia ».49 E’ita teie rāve’a nō te haʼamoʼaraʼa e tāmā noa ia tātou, e haʼamaitaʼi atoʼa rā te reira ia tātou i te mau hōroʼaraʼa vārua e hinaʼarohia ʼaore rā te mau maitaʼi hanahana ʼo te Faʼaora,50, ʼe e taui ʼOia i tō tātou iho huru natura,51 « ’ia ʼore tātou e hinaʼaro i te rave i te ʼino ».52 I te mau taime atoʼa e fāriʼi tātou i te Vārua Maitaʼi i roto i tō tātou oraraʼa nā roto i te faʼaroʼo, te tātarahapa, te mau ʼōroʼa, te tāviniraʼa mai te Mesia te huru, ʼe te tahi atu mau ʼohipa parau-tiʼa, e tauihia tātou hōʼē taʼahiraʼa i niʼa i te hōʼē taʼahiraʼa, te tahi vāhi iti ʼe te tahi vāhi iti e tae roa e riro mai tātou mai te Mesia ra te huru.53
Te pae, te faʼaʼoroma‘iraʼa e tae noa atu i te hopeʼa. ’Ua haʼapiʼi te peropheta Nephi ē i muri aʼe i te fāriʼiraʼa i te hōroʼaraʼa ʼo te Vārua Maita’i e tiʼa ia tātou ’ia « mau pāpū e tae noa atu i te hopeʼa, i te ’ono’onoraʼa atu i te hiʼoraʼa ʼo te Tamaiti ʼa te Atua ora ».54 ’Ua tātara mai Elder Dale G. Renlund i te raveraʼa nō te faʼaʼoromaʼiraʼa e tae noa atu i te hopeʼa mai teie te huru : « E riro tātou i te maita’i roa mai nā roto … i te faʼaʼohipa-tāmau-noa-raʼa i te faʼaroʼo [i te Mesia], te tātarahaparaʼa ; te ʼamuraʼa i te ʼōro‘a nō te faʼaʼāpī i te mau fafauraʼa ʼe te mau haʼamaita’iraʼa nō te bāpetizoraʼa ʼe te fāriʼiraʼa i te Vārua Maita’i ʼei hoa tāmau i te hō’ē fāito teitei a‘e. ’A rave ai tātou i te reira, e riro rahi mai tātou mai te Mesia ra te huru ’e e ti‘a ia tātou ’ia fa’a’oroma‘i e tae noa atu i te hope’a, e te mau tītaura’a ato’a nō te reira ».55
’Oia hoʼi, nā roto i te fāriʼiraʼa i te Vārua Maitaʼi ʼe te tauiraʼa tā te fāri’ira’a e fa’atupu i roto ia tātou e ha’apaʼari-atu-ā-hia tō tātou faʼaroʼo. E arataʼi te faʼaroʼo rahi i te tahi atu ā tātarahaparaʼa. E nō reira ’a faʼatusia ai tātou i tō tātou mau ʼāʼau ʼe tā tātou mau hara i niʼa i te fata nō te ʼōroʼa, e fāriʼi ïa tātou i te Vārua Maitaʼi nā roto i te tahi fāito rahi aʼe. nā te fāriʼiraʼa i te Vārua Maitaʼi nā roto i te tahi fāito rahi aʼe e turaʼi ia tātou i niʼa i te ’ēʼa nō te fānau-faʼahou-raʼa. ’Ia tāmau anaʼe tātou i roto i teie nei raveraʼa ʼe ia noaʼa anaʼe ia tātou te tāʼātoʼaraʼa o te mau ʼōroʼa faʼaora, e fāriʼi ïa tātou i « te aroha nō te aroha » ʼe tae noa atu e fāriʼi tātou i te ʼīraʼa.56
E tiʼa ia tātou ’ia faʼaʼohipa i te haʼapiʼiraʼa tumu ʼa te Mesia i roto i tō tātou oraraʼa
Te mau taeaʼe ʼe mau tuahine, ʼa faʼaʼohipa ai tātou i te haʼapiʼiraʼa tumu ʼa te Mesia i roto i tō tātou oraraʼa, e haʼamaita’ihia tātou i te pae tino ʼe i te pae vārua, e tae noa atu i roto i te mau tāmataraʼa. I te pae hopeʼa e nehenehe tātou e « tāmau ai i te mau mea maitataʼi atoʼa ra ».57 Te faʼa’ite pāpū nei au ē ’ua tupu teie raveraʼa ʼe te tāmau noa ra i te tupu i roto i tōʼu iho nei oraraʼa, te hōʼē taʼahiraʼa i niʼa i te hōʼē taʼahiraʼa, te tahi vāhi iti ʼe te tahi vāhi iti.
Te mea hau atu ra i te faufaʼa rahi, e tiʼa ïa ia tātou ’ia faʼaʼohipa i te haʼapiʼiraʼa tumu ʼa te Mesia i roto i tō tātou oraraʼa nō te mea e hōroʼa mai te reira i te hōʼē noa ’ēʼa nō te hoʼi i tō tātou Metua i te Ao ra. O te reira ana’e te rāve’a nō te fāri’i i te Fa’aora ’e ia riro ’ei mau tamāroa ’e ei mau tamāhine Nāna.58 ʼOia mau, te hōʼē anaʼe rāveʼa ’ia faʼaorahia i te hara ʼe ’ia nuʼu i mua i te pae vārua o te faʼaʼohiparaʼa ïa i te haʼapiʼiraʼa tumu ʼa te Mesia i roto i tō tātou oraraʼa.59 ’Ua haʼapiʼi atoʼa mai te ’āpōsetolo Ioane ē « o tei ʼore … i tāpeʼa tāmau ra i te parau ʼa te Mesia ra, ʼaore iāna te Atua ».60 ’E ’ua parau ʼo Iesu Iho i te ʼAhuru ma Piti nō te Ati Nephi ē ’ia ʼore tātou e faʼaʼohipa i te faʼaroʼo i te Mesia, e tātarahapa, e bāpetizohia, e faʼaʼoromaʼi e tae noa atu i te hopeʼa, « e hurihia atu ïa tātou i roto i te auahi, ʼe e ʼore e tiʼa ia [tātou] ’ia hoʼi mai ».61
Nō reira nāhea ïa e nehenehe ai ia tātou ’ia faʼaʼohipa rahi atu ā i te haʼapiʼiraʼa tumu ʼa te Mesia i roto i tō tātou iho oraraʼa ? Te hōʼē rāveʼa o te faʼaitoito-māite-raʼa ïa i te mau hebedoma atoʼa ’ia faʼaineine nō te ʼamuraʼa i te ʼōroʼa nā roto i te raveraʼa i te tahi taime nō te feruri nā roto i te pure i te vāhi e tiʼa ia tātou ’ia haʼamaitaʼi atu ā. E nehenehe tātou i muri iho e ʼāfaʼi atu i niʼa i te fata nō te ʼōroʼa te hōʼē tusia nō te hōʼē aʼe mea o te tāpeʼa nei ia tātou ’ia riro mai ia Iesu Mesia te huru, ma te tāparu ma te faʼaroʼo i te tautururaʼa, ma te aniraʼa i te mau hōroʼaraʼa vārua e hinaʼarohia, ʼe te fafauraʼa ’ia haʼamaitaʼi atu ā i roto i te hebedoma i mua.62 ’Ia nā reira anaʼe tātou, e tae mai ïa te Vārua Maitaʼi i roto i tō tātou oraraʼa ma te hōʼe fāito rahi aʼe, ʼe e noaʼa ïa ia tātou te tahi atu ā pūai nō te haʼavī i tō tātou mau paruparu.
Te faʼa’ite pāpū atu nei au ē ʼo Iesu Mesia te Faʼaora o te ao nei, ʼe ʼo Tōna anaʼe te iʼoa ʼe nehenehe ai ia tātou ’ia faʼaorahia.63 E noaʼa te mau mea maitataʼi atoʼa nā roto anaʼe Iāna.64 Nō te « tāmau māite rā i te mau mea maitataʼi atoʼa ra »,65 mai te ora mure ʼore, e tiʼa ïa ia tātou ’ia tāmau noa i te faʼaʼohipa i te haʼapiʼiraʼa tumu ʼa te Mesia i roto i tō tātou oraraʼa. nā roto i te i’oa mo’a o Iesu Mesia ra, ’āmene.