Ɔpon ho Nhyehyɛɛ Kɛse no
Minyim dɛ sɛ yenu hɛnho fi hɛn bɔn ho nokwar mu a, ne nyina kɔ ampaara a—wonngya nkekaa biara!
Abosoom kakra ansaana President Boyd K. Packer rutwa mu no, wiadze mfɛndzanan asɔfodzi na ekuw ekuw baanodzifo nyaa akwanya a ɔsom bo ma ɔnye hɛn kãsae. Dza ɔkãe no minngyaa dɛ morodwen ho. Ɔkãa dɛ ɔaadwen ahwehwɛ n’abrabɔ mu nyina asan ekyir, a ɔrohwehwɛ bɔn a ɔayɛ na oenu noho nokwar mu no ho sɛnkyerɛdze na oenntum ennhu no ho nkekaa biara. Osian hɛn dɔfo Agyenkwa, Jesus Christ No werdam afɔrbɔ no ntsi, na ɔnam nokwar nnuhu do no, no bɔn apepaa koraa, tse dɛ mbrɛ woennsi dabiarada. Afei President Packer hyɛɛ hɛn dɛm da no, dɛ yɛyɛ baanodzifo no, dɛ yɛngye ho dase dɛ iyi yɛ nokwar ma hɛn mu kor biara a oenu noho nokwar mu no.
Minyim banyin bi a nna mfe pii a abasen kɔ no ɔdze noho kɛhyɛɛ edwaman bra mu. Mber tsensten no nna banyin no fɛr na ɔhaaw no so dɛ ɔbɛkã ho asɛm akyerɛ ne yer na n’asɔfodzi baanodzifo no. Nna ɔpɛ dɛ onu noho emudzi mu naaso ɔkyerɛɛ no nokwar mu dɛ nna ɔwɔ pɛ dɛ obegyaa n’onnyiewiei nkwagye mu akyɛn dɛ ɔdze ne yer anaa ne mba bɔkɔ awerɛhow, enyito, anaa nsunsuando a ɔnam no bɔnkã do obotum dze abrɛ hɔn no.
Sɛ yɛyɛ bɔn a, Satan taa tu hɛn aso dɛ dza ɔnnyɛ pɛsɛankonyadze a yɛwɔ yɛ nye dɛ yɛbɔ binom ho ban amma wɔanntse hɛn bɔn no ma wɔanntseetsee hɔn, a yɛrekwetsir dɛ yɛbɛkã hɛn bɔn akyerɛ hɛn bishop a, obotum edua n’asɔfodzi nsaafee do dɛ Israel ɔdodow ɔtsɛmbuafo dze ehyira hɛn no, kã ho. Naaso, nokwar no nye dɛ dza ɔnnyɛ pɛsɛankonyasu na ɔyɛ Christ su a ɔwɔ dɛ yɛyɛ nye yɛbɛkã hɛn bɔn na yeenu hɛnho. Iyi nye Ɔsor Egya No ɔpon ho nhyehyɛɛ kɛse no.
Ewiei no, banyin dɔfo yi kãa no bɔn kyerɛɛ ne yer nokwafo na n’Asɔr baanodzifo, a ɔkyerɛɛ mfehoekyir ɔdɔ bun mu ara yie. Nna ɔyɛ dza ɔyɛ dzen dodow a ɔayɛ pɛn dze, naaso, ɔdwe ho atsenkã, asomdwee, enyisɔ, ɔdɔ ma hɛn Agyenkwa a onyae na nyimdzee dɛ Ewuradze riyi n’adzesoa duudur na Ɔrosoa no no maa no dɛwdzi a ɔtra ma obotum akã, a no nsunsuando na ne ndaamba no mmfa ho.
Nna onyim no pefee dɛ ne yer na ne mba bɛtseetsee—na ɔtsetsee hɔn so; na wɔbɛtsẽa no na oesian no efi ne ɔfrɛ mu—na ɔba mu so. Nna onyim pefee dɛ ne yer n’akoma bobubu, obedzi yaw, na no bo efuw—na ɔbaa dɛm so. Nna onyim dɛ ɔyer no begyaa no a ɔnye mbofra no akɔ—naaso ɔannyɛ dɛm.
Ɔtɔfabi a mfomdo a ɔyɛ dur no dze awargyaa ba, na gyinabew binom mu no, obehia dɛ ɔba no dɛm. Mbom dza ɔyɛɛ banyin yi ahobow nye dɛ, ne yer tuii fua no na otuu noho si hɔ dɛ ɔbɔboa no wɔ kwan biara a obotum do. Ewiei no, otumii dze no bɔn kyɛɛ no emu mu. Nna ɔatse Agyenkwa no No Werdambɔ ho ayarsã tum a ɔdze maa no ne nkã. Mfe pii ekyir yi, awarfo yi na hɔn mbofra baasa no ahyɛ dzen na wɔyɛ anokwafo. Kun na yer no som wɔ temple na hɔn awar ayɛ nwanwa, na ahomkã. Banyin yi ne dasegye no bun na no dɔ na enyisɔ ma Agyenkwa no na No Werdambɔ no da edzi dodow wɔ n’abrabɔ mu.
Amulek gyee dase dɛ, “Nyew, mepɛ dɛ hom ba na dɛ hom mmpirim hom akoma bio; … na hom nu homho a … , wɔdze ɔpon nhyehyɛɛ kɛse no bɛma hom ntsɛmara.”1
Mber a menye mo kun somee ber a nna ɔhwɛ asɛmpakã dwuma do no, yɛkɔr wimuhɛngyinabea kɛfaa asɛmpasomafo kuw kɛse bi anapa bi. Hɛn enyiwa kɛdaa aberantsɛ kor bi do. Nna ɔyɛ dɛ no werɛ ahow, ɔaberɛ, na ɔayɛ basaa koraa. Dɛm ewiaber no hɛn enyi kɔr no do yie. Ewimbir no, aberantsɛ yi yɛɛ bɔnkã a nkyɛ ɔwɔ dɛ ɔkã no dada, na ne baanodzifo bɔɔ pɔw dɛ ohia dɛ ɔsan kɔ fie. Nna ɔwɔ mu dɛ hɛn werɛ ahow dze dɛ oenndzi nokwar na oennu noho ansaana ɔreba asɛmpakã edwuma no, yɛrokɔ wimuhɛngyinabea no yɛdze nokwar na ɔdɔ yii no ayɛw dɛ oenya akokodur dze akã nokwar, na yɛhyɛɛ bɔ dɛ yɛnye no bɔkɔ do edzi nkitaho.
Ɔyɛɛ nhyira ma aberantsɛ ɔbarimba yi dɛ onyaa awofo anwanwafo, asɔfodzi baanodzifo akɛse, na wardfo a wɔdze ɔdɔ boaa no. Ɔdze afe kor yɛɛ edwuma dzen dze nuu noho na onyaa kyɛfa wɔ Agyenkwa no No Werdambɔ mu emu mu no, otumii saan n’ekyir baa hɛn asɛmpakã mbew do hɔ. Ɔyɛ dzen ma me dɛ mebɛkã dɛwdzi ho nkã-tse a yɛtsee ber a yɛkɛfaa aberantsɛ yi fi wimuhɛngyinabea hɔ no. Nna Sunsum no ahyɛ no mã, n’enyi agye, ɔwɔ awerɛhyɛmu wɔ Ewuradze enyim, na n’enyi aber dɛ ɔbɔsom dɛ asɛmpakãnyi nokwafo. Ɔbɛyɛɛ asɛmpasomafo nwanwanyi, na ekyir no ɔyɛɛ emi na mo kun adom ma yɛkɔr ne temple nsɔawano.
Kor bi so no, minyim asɛmpasomafo ɔbaa bi a, nna onyim dɛ no bɔn a ɔannkã ansaana ɔrokõ asɛmpakã no bɛma ampara wɔdze no akɔ fie ntsɛm no, yɛɛ noara n’adwen dɛ ɔbɛyɛ edwuma dzen wɔ n’asɛmpakã ber mu na ɔaka no nda kakra ma oewie n’asɛmpakã edwuma no ɔakã no bɔn akyerɛ asɛmpakã president no. Nna onnyi nyamesuro awerɛhow na ɔbɔɔ mbɔdzen dɛ ɔbɛkyẽa nhyehyɛɛ no a hɛn Agyenkwa dɔfo dze ama hɛn mu kor biara no.
Hɛn asɛmpakã ber mu no, ber bi menye mo kun kɔree ber a nna ɔrekɛyɛ banyin bi kokoa mu mpɛnsapɛnsamu ma oenuma no. Ber a mo kun reyɛ kokoa mu mpɛnsapɛnsamu no menye asɛmpasomafo nkyerɛbaa no a wɔkyerɛkyerɛɛ banyin yi adze no tweɔɔn wɔ abowano. Wowiee kokoa mu mpɛnsapɛnsa mu yɛ no, mo kun kãa kyerɛɛ asɛmpasomafo no dɛ banyin no botum enya enuma. Banyin dɔfo yi sũii sũii ber a ɔkyerɛkyerɛɛ mu dɛ onyim pefee dɛ bɔn akɛse a ɔayɛ no wɔ n’abrabɔ mu no besiiw no kwan ma onnkotum enya enuma. Minntaa nnhu obi a ofi sum mu aba kan mu ne dɛwdzi na n’enyigye ho dase a ɔtse dɛ dza muhun no dɛm da no.
Elder D. Todd Christofferson gyee dase:
“Hɛn gyedzi wɔ [hɛn] ehumbɔbɔr Pomfo na No tum mu no, ma abawgura obotum aba no dan yɛ enyidado. Nyimpa n’akoma n’apɛdze ankasa sesã, na bɔn a nkyɛ ɔyɛ no akɔndo no ba bɛyɛ ekyiwadze korakora. …
“… Mbrɛ nnuhu ne yaw tse biara no, bɔnfakyɛ ne dɛwdzi men no.”2
Sũahu yinom kaa me Enos a ɔwɔ Mormon Nwoma mu no ho asɛm, a “[ɔ]dze mpaabɔ a ɔyɛ dzen sũii frɛɛ [Ewuradze],” na afei ɔtsee ndze a ɔrese dɛ, “Enos, wɔdze wo bɔn akyɛ no. …
“Na emi, Enos, minyim dɛ Nyankopɔn nndzi ator; dɛm ntsi, wɔpepaa m’afɔdzi.
“Na mesee dɛ: Ewuradze, ɔyɛ dɛn yɛ?
“Nna ɔsee me dɛ: Osian wo gyedzi a ɔwɔ Christ mu. … Dɛm ntsi kɔ, wo gyedzi agye wo.”3
Mereyɛ asɛm yi ahoboa no, nna mepɛ dɛ menya nkã-tse wɔ mbrɛ hɛn mbanãna si tse nnuhu ase na mbrɛ hɔn nkã-tse wɔ Agyenkwa noho si tse, ntsi meserɛɛ hɛn mba no dɛ wombisa hɔn nsɛmbisa a odzi do no. Hɛn mbanãna hɔn ngyedo no kaa m’akoma.
Ebɛnadze nye nnuhu? “Sɛ ibɔ obi a, ibotum akã ‘mepa wo kyɛw’ na aboa hɔn ma ɔasoɛr.”
Sɛ inu woho a ɔtse dɛn? “Ibotum atse Ne nkã, ibotum enya Noho hyew no n’atsenkã, na nkã-tse bɔn no bɔkɔ.”
Sɛ inu woho a ebɛn nkã-tse na inya no wɔ Jesus na Ɔsor Egya ho? “Metse nkã dɛ Jesus wɔ atsenkã dɛ nna ɔfata dɛ Ɔyɛ Werdambɔ no, na N’enyi gye dɛ yebotum nye No atsena bio.”
Ebɛnaze ntsi na Jesus na Ɔsor Egya pɛ dɛ munu moho? Me babun banãna basia buaa dɛ: “Osiandɛ Wɔdɔ me! Ama meetum aakɔ kan na maabɛyɛ tse dɛ Hɔn no, ohia dɛ munu moho. Mepɛ so dɛ Sunsum no nye me bɛtsena daa, ntsi ohia dɛ munu moho daa daa ma menya N’anyɛnkoyɛ nwanwa no. Munnkotum ada Hɔn ase yie dabiarada.
Mber a mfe-anan Brynlee tsee nsɛmbisa yinom no, ɔkãa dɛ, “Paapa, minnyim. Ɔwo kyerεkyerε me.”
Wiadze mfɛndzanan ehyiadzi bi a abasen mu no, Elder Jeffrey R Holland paa mu kãa dɛ: “Mbrɛ isi dwen dɛ aka ekyir no, mbrɛ isi dwen akwan horow pii a wo nsa annka no, mbrɛ isi tse mfomdo pii dɛ ayɛ no … , anaa mbrɛ isi tse dɛ wo ntamu atwe efi fie na ebusua na Nyankopɔn ho no, megye dase dɛ wo ntamu nntra bea a ɔdɔ krɔnkrɔn no nnoktum edu. Onnkotum aba no dɛ ibɔdɔ koraa akyɛn bea a onnyiewiei kan no a Christ No Werdambɔ hyerɛn no nnkodu.”4
O, mbrɛ mesi pɛ dɛ me mba, me mbanãna kor biara, na hom mu kor biara—mo nuanom na me nkyerɛbaa, bɛtse dɛwdzi na yɛabɛn Ɔsor Egya na hɛn Agyenkwa, ber a daa daa yenu hɛnho wɔ hɛn bɔn na mberɛwyɛ ho. Ɔsor Egya ne ba biara a oedu nkontaabu ber no hia nnuhu. Ebɛn bɔn na hom hwɛ a yehia ho nnhu? Ebɛnadze na ɔtwe hɛn ekyir? Ebɛn akwanhorow mu na yehia mpontu?
Minyim, dɛ mbrɛ President Packer hunii na ɔgyee ho dase no, dɛ sɛ yenu hɛnho fi hɛn bɔn ho nokwar mu a, ne nnyina kɔ ampaara a—wonngya nkekaa biara! Mara maatse dɛwdzi no, enyigye no, na awerɛhyɛwmu wɔ Ewuradze n’enyim ber a nokwar mu ara meenu moho.
Emi dze, abrabɔ mu anwanwadze akɛse no nnyɛ Epo Memen no a no mu paa no, mbepɔw a otutuii, anaa nyimpadua n’ayarsã no mpo. Anwanwadze akɛse no si ber a ahobrɛadze mu ara yɛbɛn hɛn Egya a ɔwɔ Sor na yɛ totɔserɛ No dzendzenndzen ma Ɔdze hɛn bɔn akyɛ hɛn na nkyii ɔnam hɛn Agyenkwa no werdam afɔrbɔ no do hɛnho tsew efi bɔn no ho. Wɔ Jesus Christ Ne dzin krɔnkrɔn no mu, amen.