Na Yavu Levu ni Veivueti
Au kila ni gauna eda veivutunitaka vakaidina kina na noda ivalavala ca, era sa yali kalia—ka sega na mawena!
Vica na vula ni bera na nona leqa o Peresitedi Boyd K. Packer, a nona na madigi vakasakiti me vosa kivei ira na matabete raraba kei na iliuliu ni veimataisoqosoqo. Au sega ni guilecava rawa na veika a tukuna o koya. E wasea o koya ni a vakasaqaqara lesu ena nona bula taucoko, ena qarai ni vakadinadina ni valavala ca e so a vakayacora ka veivutunitaka vakaidina, a sega ni kunea e dua na kedramawe. Me baleta na solibula veisorovaki ni noda iVakabula daulomani, o Jisu Karisito, kei na veivutuni vakaidina, a yali vakadua na nona ivalavala ca, me vaka ga a sega ni yaco. A qai vakaroti keimami na iliuliu ena siga oya o Peresitedi Packer me keimami vakadinadinataka ni sa dina oqo kivei keda yadua ka veivutuni vakaidina.
Au kila e dua na turaga ka a coriti ena ivalavala ca ni tiko savasava ena vica na yabaki sa oti. Ena dua na gauna, a madua sara ka lomaleqa na turaga oqo me torovi watina kei ira na nona iliuliu ni matabete. A vinakata o koya me veivutuni vakataucoko ia a vakaraitaka ni sa lomasoli o koya me sorova na nona veivakabulai tawamudu ka kakua ni vakalaiva me ra kune rarawa, madua, se revurevu tale e so na watina se luvena ka rawa ni vakavu mai na nona vakatutusa.
Ni da sa cakacala, e dau saga o Setani me rawai keda ni sa ka matau me caka oya me ra taqomaki na tani mai na veivakaleqai ni kena kilai na noda ivalavala ca, oka kina na vakatutusa kivua na noda bisopi, ka sa rawa ni vakalougatataka na noda bula ena nona idola ni matabete vaka daunilewa e Isireli. Ia, na dina, oya na ka matau ka va-Karisito me caka sai koya na vakatutusa kei na veivutuni. Oqo na yavu levu ni veivueti ni Tamada Vakalomalagi.
Kena itinitini, a vakatutusa na turaga vinaka oqo kivua na watina kei ira na nona iliuliu ni Lotu, ena ivakaraitaki dina ni yalomalumalumu. Dina ga ni sa ka dredre duadua me qai bau cakava, na vakilai ni bula galala, vakacegu, loloma, na vakavinavinakataki ni noda iVakabula, kei na kena kilai ni sa laveta voli na Turaga na nona icolacola bibi ka tuberi koya tiko sa vakavuna na reki e tawavakamacalataki rawa, se cava ga na kena vatuka kei na nona icavacava.
Sa dei tu vua ni na kidroa vakalevu o watina kei ira na luvena—ka ra vakakina; ka na vakayacori na veilewai kei na veivagalalataki mai na nona veikacivi—ka sa vakakina. Sa dei tu vua ni na kavoro na uto i watina, mavoa, ka cudru—ka sa vakakina o koya. Ka sa nuiqawaqawa o koya ni na biubiu o watina, ka kauti ira na gone—ia a sega ni cakava.
So na gauna e dau muataki ki na sere ni vakamau na ivalavala ca bibi, ka vakatau mai na veituvaki, oya sa rawa ni ganita. Ia ki na kurabui ni turaga oqo, a ciqomi koya na watina ka soli koya me vukei koya voli ena sala cava ga e rawata. Ni toso tiko na gauna, a yaco o marama me vosoti watina vakataucoko. Ni oti e ruasagavulu ka lima na yabaki, rau sa kaukauwa ka yalodina na veiwatini oqo kei rau na luvedrau. Rau sa veiqaravi ena valetabu na veiwatini ka bulataka e dua na vakawati totoka, momona, ka taleitaki. Na bibi ni nona ivakadinadina na turaga oqo kei na loloma kei na vakavinavinaka me baleta na iVakabula e sa ivakaraitaki levu ena nona bula.
A vakadinadinataka o Amuleki, “Ia dou lako mai ka kakua ni vakaukauwataka tiko na yalomudou; … ia, kevaka dou sa yalomalumalumu ka veivutuni … , dou na vakabulai vakaidina.”1
Niu a veiqaravi vata tu kei na watiqu ena nona vakatulewataka e dua na tabana ni kaulotu, keirau a gole ki na rara ni waqavuka me kauta mai e dua na ilawalawa levu ni daukaulotu. Keirau a kauwaitaka vakatabakidua e dua na cauravou. E vaka me yalorarawa o koya, luluvu, ka yalolailai saraga. Keirau a vakawadravi koya matua ena yakavi oya. Ni sa bogi, a cakava na cauravou oqo e dua na vakatutusa malumu, ka mani navuca na nona iliuliu me sa lesu ki vale. Dina ga ni keirau rarawataka ni a sega ni yalodina o koya ka sega taumada ni veivutuni ni bera na nona mai kaulotu, ena ilakolako ki na rara ni waqavuka keirau a vakacerecerei koya dina ena yalololoma ena nona yalodoudou voli me vakatakilai koya, ka keirau yalataka me keirau veitaratara vakavoleka tiko kei koya.
A vakalougatataki na cauravou levu oqo ena itubutubu totoka, iliuliu ni matabete cecere e so, kei na dua na tabanalevu dauveitokoni ka veikauwaitaki. Ni oti e dua na yabaki ni cakacaka vakaukauwa voli me veivutuni vakataucoko ka vakaivotavota ena Veisorovaki ni iVakabula, sa rawa vua me lesu mai ki na neitou tabana ni kaulotu. E ka dredre vei au meu vakamacalataka na yalo ni reki keirau a vakila ni laki kau mai na cauravou oqo ena rara ni waqavuka. A vakasinaiti tu o koya ena Yalotabu, matamarau, yalodei tu vua na Turaga, ka maqusa voli me vakataucokotaka na nona kaulotu ena yalodina. A yaco o koya me dua na daukaulotu vakairogorogo, ka sa neirau na madigi vakaveiwatini emuri me keirau tiko ena nona vauci ena valetabu.
Kena veibasai, au sa kila talega e dua na daukaulotu ka, ni kilai tu na nona ivalavala ca tawatusanaki ni bera na nona kaulotu ena vakavuna vakaidina vua me vakau lesu totolo i vale, a cakava na nona ituvatuva vakaikoya me cakacaka vakaukauwa donuya na nona kaulotu ka vakatutusa vua na peresitedi ni kaulotu ni vo toka ga e vica na siga me cava na nona kaulotu. Na rarawa sa vaka na loma ni Kalou ka sa tovolea me vakatanitaka na kosi e sa solia tu na noda iVakabula lomani kivei keda yadua.
Donuya na neirau kaulotu, au a tomana na watiqu ena dua na gauna ni gole o koya me laki vakataroga e dua na turaga me baleta na papitaiso. Ni veivakatarogi voli na watiqu, au a wawa toka e tautuba vata kei rau na yalewa daukaulotu ka vakatavulica na turaga oqo. Ni sa cava na veivakatarogi, a tukuna vei rau na daukaulotu na watiqu ni sa rawa ni papitaiso na turaga oya. A tagi vakalevu na turaga vinaka oqo ni vakamacalataka voli ni a sa dei tu na lomana ni veika kece e a cakava tu ena nona bula ena tarovi koya mai na nona rawa ni papitaiso. Au sa dau vakadinadinataka vagauna na reki kei na yalomarau ni dua ka lako tani mai na butobuto ki na rarama me vakatauvatani ki na ka au a vakadinadinataka ena siga oya.
Vakadinadinataka o Elder D. Todd Christofferson:
“Ni da vakabauta na [noda] Dauveivueti yalololoma kei na Nona kaukauwa, na ka e vakavu yalolailai sa vuki me inuinui. Sa veisau vakakina na yalo kei na gagadre ni dua na tamata, ka sa yaco me vakasisilataki vakalevu sara na veivagarogaroi ni valavala ca. …
“… Se vakacava na isau ni veivutuni, e sa tilomi tu ena reki ni veivosoti.”2
Na veika oqo e vakananumi Inosi vei au ena iVola i Momani, ka “masu ka kerekere vagumatua vua [na Turaga],” ka qai rogoca e dua na domo ni kaya, “Inosi, sa bokoci na nomu ivalavala ca. …
“Ia ko i au ko Inosi, au kila ni sa sega ni rawa ni lasu na Kalou; ka sa bokoci dina na noqu ivalavala ca.
“Au sa kaya vua: Ena rawa vakaevei Turaga?
“A sa kaya vei au: Ena vuku ni nomu vakabauti Karisito. … Mo ia ka lako, sa vakabulai iko na nomu vakabauta.”3
Ni vakarautaki tiko na vosa oqo, au a via vakila se ra na kila deivaki vakacava na makubui keirau na veivutuni kei na nodra nanuma me baleta na iVakabula, kau mani kerei ira na luvei keirau me ra tarogi ira ena veitaro oqo. Au a luvuci ena nodra sausaumi na makubui keirau.
Na cava na veivutuni? “Ni o sabaka e dua, sa rawa ni o kaya ‘vosoti au’ ka vukei koya cake.”
Na cava o vakila ni o veivutuni? “Sa rawa ni o vakilai Koya; sa rawa ni o vakila Nona voleka tu, ka sa seavu tani na yalo ca.”
Na cava na nomu nanuma me baleti Jisu kei na Tamada Vakalomalagi ni o veivutuni? “Au nanuma ni vakila tu o Jisu ni sa yaga vakalevu sara me vakayacora na Veisorovaki, ka sa marau o Koya ni rawa meda bula vata tale kei Koya.”
Cava na vuna e vinakata kina o Jisu kei na Tamada Vakalomalagi meu veivutuni? Ena vosa nei makubuqu qase toka: “Baleta ni Rau lomani au! Me rawa niu toso ki liu ka yaco me vakataki Rau, sa gadrevi meu veivutuni. Au vinakata talega na Yalotabu me tiko vata kei au, ka sa gadrevi meu veivutuni e veisiga me rawati na Nona veitokani totoka. Ena sega ni rauta rawa na noqu vakavinavinakataki Rau.”
Ni rogoca o Brynlee ka yabaki va na veitaro oqo, e kaya, “Au sega ni kila, Ta. Mo vakatavulici au.”
Ena dua na koniferedi raraba sa oti, a cauraka o Elder Jeffrey R. Holland: “Se vakacava na levu ni kena bera o nanuma o sa bera tu kina, se vakacava na levu ni madigi o nanuma o sa calata, se vakacava na levu ni cala o nanuma o sa cakava, … , se vakacava na yawa ni vanua o nanuma ni o sa lakova mai vale kei na matavuvale kei na Kalou, au vakadinadinataka ni o se sega ni lako sivita na iyacoyaco ni loloma vakalou. E sega ni rawa vei iko mo lutu dromu ena vanua e caudre kina na rarama uasivi ni Veisorovaki i Karisito.”4
Sa dua na ka na noqu vinakati ira na luvequ yadua, makubuqu, kei kemuni yadua, na taciqu kei na ganequ, mo ni vakila na reki kei na voleka ni Tamada Vakalomalagi kei na noda iVakabula ni da veivutunitaka ena veisiga na noda ivalavala ca kei na malumalumu e so. Na luvena yadua na Tamada Vakalomalagi ka na saumi taro sa gadreva na veivutuni. Na ivalavala ca cava soti sa gadrevi meda veivutunitaka? Na cava e vesuki keda tiko? Na sala cava soti sa gadrevi meda vakavinakataki keda kina?
Au kila, me vaka a sotakaya ka vakadinadinataka o Peresitedi Packer, ni gauna eda veivutunitaka vakaidina kina na noda ivalavala ca, era sa yali kalia—ka sega na mawena! Au sa vakila dina na loloma, na reki, na vakacegu, kei na yalodei mai vua na Turaga niu sa veivutuni vakaidina.
Vei au, na veicakacaka mana levu duadua ena bula oqo e sega ni kena tawasei na Wasa Damudamu, na tosoi ni ulunivanua e so, se na kena vakabulai na yago. Sa yaco na cakamana levu duadua ni da torova ena yalomalumalumu na Tamada mai Lomalagi ena masumasu, ka kerekere ena yalomalua meda vosoti, ka qai mai savai yani ena veivalavala ca oya mai na solibula veisorovaki ni noda iVakabula. Ena yaca tabu i Jisu Karisito, emeni.