2010–2019
Te Baire ae Korakora ni Kaboomwi
Okitobwa 2016


Te Baire ae Korakora ni Kaboomwi

I ataia bwa ngkana ti rairi nanora ni koaua man ara bure, ai bon akea ara bure—n akea tanetanen mwiia!

Tabeua namwakaina imwaain maten Beretitenti Boyd K. Packer, te tia kairiiri ngaia n te nakoanibonga ni kabuta ao ni bootaki n reken ana tai ae rang kakawaki n taetae nakoira. E aki kona n toki irou iangoan te bwai are e a tia n taekinna. E tuangiira bwa e a tia n iangoi bwaai ni kabane ake e a tia ni karaoi inanon maiuna, n tarai koauan bure ake e a tia ni karaoi ao n raira nanona ni koaua mai iai ao n aki kona ni kunei tanetanen mwiia. Ibukin ana karea ni kamaiu ara Tia Kamaiu ae tangira, Iesu Kristo, ao rinanon te rairannano ae koaua, akea ana bure, n aron ae a bon aki riki. E tuangiira ngkanne Beretitenti Packer n aroia taan kairiiri n te bong arei ni kakoaua bwa e koaua aei ibukira ni kabane ane e raira nanona ni koaua.

I ataa te mwaane are iai rekerekena ma uruakan aroaro tabeua te ririki n nako. Ibukin tabeua te tai, te mwaane aei e a maamaa ao n raoraoma ni kawara buuna ao ana taan kairiiri n te nakoanibonga. E tangiria n raira nanona n ae bwanin ma e kamataata ma te koaua bwa e tauraoi ni kabwara nanona man kamaiuana ae akea tokina nakon are buuna ma natina a na nanokawaki, maamaa, ke tabeua riki baika a kona n riki man ana kaotibure.

Ngkana ti a tia ni bure, angin te tai Tatan e kataia n anai nanora bwa te bwai ae tituaraoi karaoana bon katanaia tabeman man te urubwai are e na kaoti man ataakin ara bure, n raonaki ma tuukan te kaotibure nakon ara Bitiobi, are e kona ni kakabwaiai maiura rinanon kiingin ana nakoanibonga ngkai te tia moti ni kabuta iaon Iteraera. Te koaua, e ngae n anne, bwa te bwai ae tituaraoi kanga ai aron karaoan anuan Kristo bon te kaotibure ao te rairannano. Aio ana babaire ae korakora ni kaboomwi Tamara are i Karawa.

N tokina, te mwaane ae tangiraki aei e kaota ana bure nakon buuna ae kakaonimaki ao ana tia kairiiri n te Ekaretia, ni kaota raraomana ae korakora. E ngae ngke te kabanea ni kaangaanga ni bwai ae e a tia ni karaoia, namakinan te buokaki, te rau, te kakaitau, te tangira ibukin ara Tia Kamaiu, ao te atatai bwa te Uea e kabebetea uotana ao ni uouotakina e karika te kimwareirei ae korakora n aron are e kona ni kabwarabwara, n aki ongea mwiina ao ana bong aika a na roko.

Tamnei
E karaunano te Tia Kamaiu

E kakoaua bwa buuna ma natina a na nanokawaki—ao a bon rootaki; ao e na iai te reirei ni kataetaeaki ao te kamotirawaaki man nakoana—bon iai. E kakoaua bwa buuna e na bae n uruaki nanona, ni maraki ao n un—ao e bon koaua. Ao e anaaki nanona bwa e na bae n nako, ni kairiia ataei ma ngaia—ma e bon aki.

N tabetai riaoan te tua ae kakaiaki e karika te raure, ao ni kaeti ma aron baika a riki, n aron ae riai. Ma ni miimin teuaei, e rabwatia buuna ao n anga nanona bwa e na buokia ni kawai ake e kona. N tokina, e a kona ni kabwanina kabwaraan ana bure. E a tia n namakina mwaakan ana Mwakuri ni Kamaiu te Tia Kamaiu ibukina. Ririki ake imwiina, te taanga aei ma natiia aika teniman a rang korakora man kakaonimaki. Te buumwaane ao te buuaine a ibuobuoki n te tembora ao aia mare e nakoraoi, ma ni kakukurei. Korakoran ana koaua ao ana kakaitau ibukin te Tia Kamaiu e kakoauaki inanon maiuna.

E kakoaua Amureki, “I tangiria bwa kam na waakirake man aki manga kamatoatoai nanomi; … ngkana kam rairananomi … , ngkai naba ao e na uotaki te babaire ni kaboomwi are e kakannato nakoimi.”1

Ngke I beku ma kainnabau ngke e tararua te mition, ti nako n te marae ni wanikiba ni butimwaiia kurubu ni mitinare aika mwaiti n te ingabong teuana. Temanna te ataeinimwaane ae anai nanora bwa ti na taraia. E taraa n nanokawaki, e rang rawawata, man aki kukurei. Ti karaua n tarataraia raoi n te bwakantaai anne. Ngke e a tairiki, te ataeinimwaane anne e a karaoa ana kaotibure are e taua ni kamanna, ao ana tia kairiiri a baireia bwa e riai n okira mweengana. E ngae ngke ti nanokawaki bwa e a tia n aki koaua ao n aki raira nanona imwaain rokona ni mitinare, ni kawaira nakon te marae ni wanikiba ti kamoamoa ma te tangira ibukin ninikoriana ni kaotakin ana kairua, ao ti berita bwa ti na teimatoa n rereitaki ma ngaia.

Te ataeinimwaane ae korakora aei e kakabwaiaki n rekeia ana karo aika kakateke, taan kairiiri aika korakora n te nakoanibonga, ao ana uoote ae tatangira ni boboutoka. Imwiin te ririki e a mwakuri korakora ni kabwanina ana rairannano ao ni katoonga uaan ana Mwakuri ni Kamaiu Kristo, e a manga okira ara mition. E bon kaangaanga irou kabwarabwaraan te namakin ni kimwareirei are ti namakinna ngke ti butimwaea te ataeinimwaane aei man te marae. E onrake n te Tamnei, e kukurei, e onimaki imatan te Uea, ao n ingainga ni kakoroa nanon ana mition. E riki bwa te mitinare ae rianako, ao imwiina Ngai ma kainnabau e reke ara tai n ira ana kabaebae n te tembora.

Ni kabotauana, I ataa temanna naba te mitinare are, e ataia bwa ibukin te bure are e karaoia imwaain ana mitinare e na kona ni karika moantaain kaokana nakon mweengana, e karaoa oin ana babaire ni kataboroa ana mwakuri n tain ana mition ao ni kaotia nakon te beretitenti n te mition tabeua te tai imwaain banen ana mition. E kabua te rawawata are mairoun te Atua ao ni kataia n tuka bairean te rairannano are e a tia n anganiira ara Tia Kamaiu ae tatangira ibukira ni kabane.

N tain ara mitinare, n tetaina I kamarooroa kainnabau ngke e nako bwa e na intawiu ma te mwaane ibukin te bwabetito. Ngke e kaira te intawiu kainnabau, I tataninga itinaniku ma uoman mitinare aine are a reireina te mwaane aei. Ngke e a tia te intawiu, e tuangiia mitinare kainnabau bwa e a kona ni bwabetitoaki te mwaane arei. Te mwaane ae tangiraki aei e a tang ma e a tang ngkai e kamataata bwa e a tia ni kakoaua bwa buure aika korakora ake e karaoi inanon maiuna e na tukia man bwabetitoakina. I burenibwai ni kakoaua kimwareirein ao kukurein temanna are e otinako man te rotongitong nakon te oota ni kabotaua ma are I kakoaua n te bong anne.

Tamnei
Te Tia Kamaiu e katauraoa te kantaninga

E kakoaua Unimwaane D. Todd Christofferson:

“Ma ara onimaki inanon [ara] Tia Kabooira ae nanoanga ao Mwaakana, te bwarannano e bitaki nakon te kantaninga. Nanon ma ana iango temanna e bitaki, ao te bure are e anainano riki e a rikirake n akea. …

“… Baikara boonmwiin te rairannano, e ongaki ni kimwareirein te rairannano.”2

Taneiai aikai a kauringai iroun Enoti n ana Boki Moomon, are, “wewete nakon [te Uea] inanon te tataro ma nanona ma tamneina ni kabane” ngkanne e ongo te bwanaa ae kangai, “Enoti, a na kabwaraaki am bure. …

“Ao Ngai, ae Enoti, I ataia bwa e aki kona ni kewe te Atua; mangaia ae a mauna namakinan te bure mairou.

“Ao I taku nakon te Uea, e kanga n karaoaki aio?

“Ao e taku nakoiu: Ibukin korakoran am onimaki iroun Kristo. … Toua nako kawaim, e kamaiuko am onimaki.”3

Ni katauraoan te marooro aei, I tangiria ni kan karekea au atatai bwa a kanga tibura n oota n te rairannano ao a kanga aia namakin ibukin te Tia Kamaiu, ngaia are I a butiia ara ataei bwa N na titirakiniia titiraki aika imwiina. I rootaki n aia kaeka tibura.

Tera te rairannano? “Ngkana ko orea temanna, ko tii kona ni kangai, ‘kabwara au bure’ ao ni buokia.”

E kanga ami namakin ngkana kam rairi nanomi? “Kam kona n namakina ana tangira te Tia Kamaiu ao te rau Mairouna, ao te namakin ae buakaka e toki.”

E kanga ami namakin ibukin Iesu ao te Tama are i Karawa ngkana kam raira nanomi? “I namakinna bwa Iesu e namakina materaoin karaoan ana Mwakuri ni Kamaiu, ao E kukurei bwa ti kona ni manga maiu riki ma Ngaia.”

Bukin tera e tangirai Iesu ao te Tama are i Karawa bwa N na raira nanou? N ana taeka tibu te kairake: “Ibukina bwa A tangirai! N te aro bwa I aonga n rikirake ao n riki n Ai aroia, I riai n raira nanou. I tangiria naba bwa e na memena irou te Tamnei, ngaia are I riai n raira nanou ni katoa bong ni karekea ana Iraorao. N na bon aki kona ni kaitauia n ae tau.”

Ngke e ongo titiraki aikai mairoun tamana Brynlee ae aua ana ririki, e taku, “I aki ataia, Tamau. Ko riai n reireinai.”

Tamnei
Brynlee ao tamana

N te maungatabu ae nako, e kabwarabwara Unimwaane Jeffrey R. Holland: “E aki kakawaki maanra ae ko iangoia, e aki kakawaki mwaitira taai ake ko taku bwa ko kabuai, e aki kakawaki mwaitira kairua ake ko namakin bwa ko karaoi … , ke e aki kakawaki bwa raroara man mweengami ao ami utu ao te Atua ni mwanangam are ko nako iai, I kakoaua bwa ko aki mwananga n riaon are ko na karoko iai ibukin te tangira ae tabu. E aki kona ae ko na karinanoko nakon te rotongitong n tamnei ae e na aki roko iroum ootan ana Mwakuri ni Kamaiu Kristo.”4

O, I rang tangiriia natiu n tatabemaniia nako, tibu, ao ngkami ni kabane, tariu ao mwaaneu, bwa a na namakina te kimwareirei ao te uakaan riki ma te Tama are i Karawa ao nakon ara Tia Kamaiu ngkai ti rairi nanora ni katoa bong man ara bure. Iangoia tera buure ake ti riai n rairi nanora mai iai. Tera ae tukiira? Ni kawai raa ae ti riai ni katamaroaira iai?

I ataia, n aron are e rinanona Beretitenti Packer ao ni kakoaua, bwa ngkana ti rairi nanora ni koaua man ara bure, ai bon akea ara bure—n akea tanetanen mwiia! I namakina te tangira, te kimwareirei, te buokaki, ao te onimaki imatan te Uea ngkai I a tia n raira nanou ni koaua.

Irou, kakai aika korakora n te maiu tiaki bwenauaakin Taari ae Uraura, kamwaingan taian maunga, ke kamarurungan te rabwata. Te kakai ae korakora e riki ngkana ti nanorinano n tataro nakon Tamara are i Karawa ni bubuti bwa a na kabwaraaki ara bure ao ngkanne ni kaitiakaki man buure akanne rinanon ana karea ni kamaiu ara Tia Kamaiu. I a atong baikai n aran Iesu Kristo ae tabu, amen.