Li nimla k’uub’anb’il na’leb’ re li tojb’al-ix
Ninnaw naq sa’ xhoonalil naq taqajal qak’a’uxl chi yaal, te’sachmanq li qamaak—ut maak’a’eb’ chik!
Junjunqeb’ chaq li po rub’elaj lix kamik li Awa’b’ej Boyd K. Packer, eb’ laj jolominel re li tijonelil ut li k’anjenel ch’uut ke’osob’tesiik rik’in rab’inkil li raatin. Ink’a’ naru nasach sa’ inch’ool li k’a’ru kixye. A’an kixwotz naq xtz’ilom rix xkutankileb’ lix yu’am re xsik’b’aleb’ lix maak li ak kixjal chi yaal lix ch’ool chirix, a’b’an ink’a’ kiru chixtawb’aleb’. Sa’ xk’ab’a’ lix mayej aj tojol-ix li qaraarookil Kolonel, li Jesukristo, ut rik’in li jalb’a-k’a’uxlej chi anchal li ch’oolej, sachb’il chixjunileb’ lix maak, jo’ chanru naq maajun sut ke’uxman. Toja’ ut naq li Awa’b’ej Packer koxtaqla jo’ aj jolominel naq taqach’olob’ xyaalal naq yaal a’in choq’ reheb’ chixjunileb’ li neke’xjal xk’a’uxl chi yaal.
Ninnaw chirix jun li winq li ki’ok sa’ li nimla maak junjunqeb’ chihab’ chaq. Chiru jarub’aq kutan, jwal nim lix xutaan ut xikenaq xch’ool chi k’oxlak chirix, ut ink’a’ kiru chixxootoninkil lix maak chiru li rixaqil ut chiruheb’ lix jolominel sa’ li tijonelil. A’an kiraj xjalb’al xk’a’uxl chi tz’aqal a’ut kixye naq q’axal wi’chik wan xch’ool chixsachb’al lix kolb’al chiru xk’eeb’al chi nume’k li rixaqil ut li ralal xk’ajol chiru li rahil ch’oolejil, li xutaan, malaj yalaq k’a’ru taa’uxmanq rik’in naq tixch’olob’ lix maak.
Naq nokomaakob’k, laj Satanas naxyal chi kok’ aj xsa’ chiqab’alankil chixk’oxlankil naq us naq taqamuq li qamaak chiru jalaneb’ re naq ink’a’ te’raho’q sa’ xch’ool rik’in xnawb’al li qab’aanuhom, jo’kan ajwi’ naq ink’a’ taqach’olob’ li qamaak chiru li obiisp, us ta a’an naru taarosob’tesi li qayu’am rik’ineb’ lix laawil sa’ li tijonelil jo’ jun b’eresinel raqol aatin sa’ Israel. A’b’anan, li yaal a’an naq li k’a’ru us, jo’ tixb’aanu raj li Kristo, a’an xch’olob’ankil li qamaak ut xjalb’al qak’a’uxl. A’an a’an lix nimal k’uub’anb’il na’leb’ li qaChoxahil Yuwa’ re li kolb’a-ib’.
Sa’ roso’jik, li chaab’il winq a’in kixxootoni lix maak chiru li rixaqil tiik chi paab’ank jo’ ajwi’ lix jolominel sa’ li Iglees, chixk’utb’al nimla rahilal sa’ xch’ool. Us ta q’axal wi’chik ch’a’aj chiru yalaq k’a’ru xb’aanuhom sa’ xyu’am, li eek’ahom re k’ojob’ank ch’oolej, tuqtuukilal, b’antioxink, ut rahok choq’ re laj Kolol qe, ut jun nawom naq li Qaawa’ yoo chiriiqankil li riiq q’axal aal ut chixk’amb’al chaq kixk’e li winq chi saho’k sa’ xch’ool, us ta ink’a’ kixnaw li k’a’ru taak’ulmanq sa’ xyu’am.
Ch’olch’ sa’ xch’ool naq q’axal te’raho’q li rixaqil ut li ralal xk’ajol—ut jo’kan ki’uxman; ut naq taaq’use’q ut taa’isiiq sa’ xb’oqb’al sa’ li Iglees—ut jo’kan ki’uxman. Ch’olch’o sa’ xch’ool naq taaq’ete’q xch’ool, taaraho’q xch’ool, ut taajosq’oq li rixaqil—ut jo’kan ki’uxman. Ut ch’olch’o ajwi’ sa’ xch’ool naq li rixaqil tixjach’ rib’ rik’in ut tixk’ameb’ chaq li ralal xk’ajol rik’in—a’b’an ink’a’ ki’uxman chi jo’kan.
Wan naq na’ux li jachok-ib’ xb’aan li nimla maak, ut wan naq maare tento taak’ulmanq a’an. A’ut kisach xch’ool li winq a’in naq li rixaqil kixq’alu ut kixk’e xch’ool chixtenq’ankil sa’ yalaq k’a’ru naru chiru. Chiru xnumikeb’ li kutan, kiru chixkuyb’al lix maak. Kireek’a lix wankil lix tojb’al rix li maak xb’aan li Kolonel choq’ re. Junxil chaq a’an, ut toj kaweb’ ut tiikeb’ chi paab’ank li sumal a’in ut li oxib’ li ralal xk’ajol anajwan. Li winq ut li rixaqil neke’k’anjelak sa’ li santil ochoch ut jwal chaab’il lix sumlajik nujenaq rik’in rahok. Moko ch’a’aj ta xk’eeb’al reetal xchamalil lix nawom xch’ool li winq a’in ut li rahok ut b’antioxink choq’ re li Jesukristo.
Laj Amulek kixch’olob’ xyaalal, “Nawaj raj naq chexchalq ut naq inkʼaʼ chik teekawobʼresi eeraam; … wi teejal eekʼaʼuxl … , saʼ junpaat taaʼuxmanq choqʼ eere li nimla kʼuubʼanbʼil naʼlebʼ re li tojbʼal-ix.”1
Naq kink’ajelak wochb’een lin b’eelom naq a’an kijolomin re jun li mision, sa’ jun eq’la koowulak sa’ li aeropuerto re xk’ulb’al jun nimla ch’uut chi misioneer. Kiqak’e reetal jun reheb’ li saaj winq. Kink’oxla naq ra xch’ool, naq nim li riiq, ut chanchan naq q’axal ra li wan wi’. Chiru li kutan yooko chirilb’al. Sa’ ewu, li saaj winq a’in kixxootoni lix maak, ut eb’ lix jolominel ke’xye naq tento taasutq’iiq sa’ rochoch. Us ta q’axal ra qach’ool naq kiwan xb’alaq’ ut ink’a’ kixjal xch’ool naq maji’ naxik sa’ xmision, naq yooko chi xik sa’ li aeropuerto kiqaye re rik’in rahok naq nim lix kawilal xch’ool rik’in xxootoninkil lix maak, ut kiqak’e sa’ aatin naq rajlal too’aatinaq rik’in.
Li chaab’il saaj winq a’in osob’tesinb’il rik’ineb’ li chaab’il na’b’ej yuwa’b’ej, jolominel sa’ li tijonelil, ut jun li chaab’il teep aj rahonel. Chirix jun chihab’ re xjalb’al xch’ool chi tz’aqal ut chi tz’aqonk sa’ lix tojb’al rix li maak xb’aan li Kolonel, a’an kiru chi sutq’iik sa’ li mision. Ch’a’aj chiwu xch’olob’ankil li sahil ch’oolejil kiqeek’a naq koowulak re xxoqb’al li saaj winq a’in sa’ li aeropuerto. Nujenaq rik’in li Musiq’ej, sa xch’ool, kaw xch’ool chiru li Qaawa’, ut q’axal anchal lix ch’ool chixz’aqob’resinkil lix mision sa’ tiikilal. Ki’ok jo’ jun misioneer q’axal chaab’il, ut chirix li mision, laa’in wochb’een inb’eelom koo’osob’tesiik chi tz’aqonk sa’ lix sumlajik sa’ li santil ochoch.
Sa’ li junpak’al, ninnaw ajwi’ jalan chik li misioneer li kixnaw naq xb’aan lix maak li kixb’aanu rub’elaj lix mision ut li moko xootoninb’il ta, naru taataqlaaq sa’ ochoch. A’an kixk’uub’ xna’leb’ naq taak’anjelaq chi kaw sa’ lix mision ut tixxootoni lix maak chiru li awa’b’ej re li mision yal junjunqeb’ li kutan ma naraqe’ lix mision. Maak’a’ rik’in li choxahil rahil ch’oolej ut kixyal xjalb’al li k’uub’anb’il na’leb’ li k’eeb’il re li junjunq qe xb’aan laj Kolol qe aj rahonel.
Sa’ li qamision, xkohin jun sut wochb’een lin b’eelom sa’ jun li tz’ilok-ix choq’ re xkub’iha’ jun li winq. Naq lin b’eelom yoo chixb’aanunkil li tz’ilok-ix, kinkana chirix chiroyb’eninkil wochb’eeneb’ li misioneer ixq li ke’xtzol li winq a’in. Naq kiraqe’ li tz’ilok-ix, lin b’eelom kixye reheb’ li misioneer ixq naq li winq taaruuq taakub’eeq xha’. Li winq a’in kiyaab’ak chi kaw ut kixch’olob’ naq ch’olch’o sa’ xch’ool naq ink’a’ taaruuq raj taakub’eeq xha’ xb’aan li ninqi maak xb’aanuhom sa’ xyu’am li te’ramoq raj re lix kub’iha’. Ka’ajwi’ wiib’ oxib’ sut wilom lix sahil xch’ool junaq li yoo chi elk chaq sa’ li aak’ab’ ut chi ok sa’ li kutan jo’ naq kiwil sa’ li kutan a’an.
Li Elder D. Todd Christofferson kixch’olob xyaalal a’in:
“Rik’in paab’aal chirix laj Tojol qix ut lix wankilal, najale’ xmaak’a’il li yo’onihom ut na’ok choq’ yo’onihom. Lix ch’ool ut li rajom junaq neke’jale’, ut li maak li xraj xb’aanunkil junxil na’ok choq’ k’a’ruhaq q’axal yib’ ru chiru. …
“… Maak’a’ naxye k’a’ru lix tz’aq li jalb’a-k’a’uxlej, a’an sub’b’il rib’ rik’in li sahil ch’oolejil re xkuyb’al li qamaak.”2
Eb’ li seraq’ a’in nikine’xk’e chixjultikankil laj Enos sa’ lix Hu laj Mormon, li “[ki’elajin] chiru [li Qaawa’] rik’in tijok,” toja’ ut naq kirab’i jun xyaab’ kuxej li kixye, “At Enos, kuyb’il aamaak. …
“Ut laa’in, aj Enos, kinnaw naq li Dios ink’a’ kiru chi tik’ti’ik; jo’kan naq oso’jenaq li maak sa’ inb’een.
“Ut laa’in kinye: At Qaawa’, chan ru nab’aanuman?
“Ut a’an kixye we: Sa’ xk’ab’a’ laa paab’aal chirix li Kristo, … ayu, laa paab’aal xk’irtesink aawe.”3
Sa’ xkawresinkil li aatin a’in, xwaj xnawb’al k’a’ru neke’xtaw ru li qimam chirix li jalb’a-k’a’uxlej ut k’a’ru neke’reek’a chirix li Kolonel, jo’kan naq xinpatz’ re li qalal qak’ajol naq te’xpatz’ reheb’ li patz’om a’in. Xtoch’e’ inch’ool rik’in lix sumenkileb’ li qimam.
K’a’ru li jalb’a-k’a’uxlej? “Naq naqaket anihaq, naru taapatz’ xkuyb’al aamak ut taatenq’aheb’ chi xaqliik.”
K’a’ru nakaweek’a naq nakajal aak’a’uxl? “Naru taaweek’a’ li Kolonel; naru taaweek’a lix q’ixnal, ut na’el li rahil eek’ahom.”
K’a’ru nakaweek’a chirix li Jesus ut li qaChoxahil Yuwa’ naq nakajal aak’a’uxl? “Naweek’a naq li Jesus nareek’a naq wan xyaalalil xb’aanunkil lix tojb’al rix li maak, ut sa xch’ool naq tooruuq chi wank wi’chik rik’in.”
K’a’ut naq li Jesus ut li qaChoxahil Yuwa’ neke’raj naq tinjal ink’a’uxl? Sa’ raatin li wimam: “Xb’aan naq nikine’xra! Re naq tinruuq chi xik chi uub’ej ut tin’ok jo’ chanruheb’ a’an, tento tinjal ink’a’uxl. Nawaj ajwi’ naq junelik taakanaaq li Musiq’ej wik’in, jo’kan naq tento tinjal ink’a’uxl wulaj wulaj re taa’ochb’eeninq we. Maajo’q’e tinruuq raj chi kanaak chi b’antioxink chiruheb’.”
Naq li xBrynlee li haye’ kaahib’ chihab’ xyu’am kirab’iheb’ li patz’om a’in, a’an kixye, “Laa’in ink’a ninnaw, at yuwa’. K’ut b’i’ chiwu.”
Sa’ jun li jolomil ch’utub’aj-ib’ ak xnume’, li Elder Jeffrey R. Holland kixye: “Us ta najt li hoonal xatb’ay wi’, us ta naab’al hoonal xasach, us ta nakaweek’a naq xatmaakob’k naab’al sut … , malaj us ta nakaweek’a naq najt xatwulak rik’in laa wochoch ut laa junkab’al ut li Dios, ninch’olob’ xyaalal naq maji’ xat-el chaq chiru li choxahil rahok. Moko naru ta naq tatkub’eeq chi rub’elaj lix junelikil saqen lix tojb’al rix li maak li kixb’aanu li Kristo.”4
Jwal nawaj naq li junjunqeb’ li walal ink’ajol, li wimam, ut chejunilex—ex was wiitz’in, te’reek’a li sahil ch’oolejil ut li nach’il rik’in li qaChoxahil Yuwa’ ut li Kolonel naq naqajal qak’a’uxl chirix li qamaak ut li qamajelal wulaj wulaj. Li junjunq li ralal xk’ajol li Dios li tz’aqaleb’ xna’leb’ naraj ru li jalb’a-k’a’uxlej. K’oxlahomaq k’a’ruheb’ li maak tento taqajal wi’ qach’ool. K’a’ru naramok qe? K’a’ru tento taqab’aanu re toochaab’ilo’q?
Ninnaw, jo’ yeeb’il ut ch’olob’anb’il xyaalal xb’aan li Awa’b’ej Packer, naq sa’ xhoonalil naq taqajal qak’a’uxl chi yaal, te’sachmanq li qamaak—ut maak’a’eb’ chik! Naweek’a li rahok, li sahil ch’oolejil, lix k’ojob’ankil inch’ool, ut lix kawilal inch’ool chiru li Qaawa’ naq ninjal ink’a’uxl chi anchal inch’ool.
Choq’ we, li xninqaleb’ ru sachb’a-ch’oolej sa’ li yu’am moko a’an ta xjachb’al rib’ li Kaqi Palaw, xjalb’al xna’aj li ninqi tzuul, malaj xk’irtesinkil li tib’elej. Li sachb’a-ch’oolej q’axal nim na’uxman naq nokowulak chi tuulan li qach’ool chiru li qaYuwa’ sa’ choxa ut sa’ li tijok naqatz’aama chi anchal li qach’ool chiru naq taakuye’q li qamaak, toja’ naq ch’ajob’resinb’ilo chirix li maak a’an rik’in ut sa’ xk’ab’a’ lix mayej aj tojol-ix laj Kolol qe. Sa’ lix loq’laj k’ab’a’ li Jesukristo, amen.