Karōk eo Eļap an Pinmuur eo
Ijeļā bwe n̄e jej lukkuun ukweļo̧k jen jerawiwi ko ad, rej lukkuun jako—ilo ejjeļo̧k jeno̧k!
Jet allōn̄ m̧okta jān an kar Būreejtōn Boyd K. Packer kar jako, doulul eo eļap an priesthood im ritōl ro an radik ko ekar wōr aer iien em̧m̧an bwe en kōnono n̄an kōm̧. Ejaab maron̄ bōjrak aō ļōmņak kōn ta eo eaar ba. Eaar kwaļo̧k bwe eaar reilikļo̧k kōn aolepen mour eo an, pukōt kam̧ool ko kōn jerawiwi ko an ko ekar kōm̧m̧ani im kar ukweļo̧k jāni, im eaar jab maron̄ lo jono̧kier. Kōn en̄taan in pinmuur eo ejitenbōro an ad Rilo̧mo̧o̧r, Jisōs Kraist, im kōn m̧ool in ukwelo̧k, jerawiwi ko an rekar kajju jako, āinwōt n̄e rekar jab waļo̧k. Innām būreejtōn Packer eaar kipeļ kōm̧ āinwōt ritōl ro bwe iien eo n̄an kam̧ool bwe menin em̧ool n̄an kajjojo iaam̧ ej n̄e juon ej ukweļo̧k.
Ijeļā juon em̧m̧aan eo im ekar lokjak ilo men ko an mour in jet iiō ko remo̧o̧tlo̧k. Ewōr jet iien, em̧m̧aan in ekar en̄jake an lukkuun jo̧o̧k im lukkuun inepata n̄an jelm̧ae kōrā eo ippān im ritōl ro an ilo priesthood. E lukkuun kar kōnan ukweļo̧k ak ekar kwaļo̧k ke emōnōnō lo̧k n̄e ejjab bōk lo̧mo̧o̧r indeeo jān an likut lio ippān im ajri ro nejin ilo būrom̧ōj, jo̧o̧k, im wāween ko jet im remaron̄ waļo̧k itok jān an kwaļo̧k ruōn.
N̄e jej kōm̧m̧an bōd, Setan eitok wōt bwe en kareel kōj bwe wāween ad jab ļōmņak kōn kōj make ej ilo ad kōjparok ro jet bwe ren jab jeļā ta ko jaar kōm̧m̧ani, ekoba kwaļo̧k ruwōd n̄an bisop eo ad, eo im emaron̄ kōjeram̧m̧an mour ko ad kōn kii ko an priesthood āinwōt juon eo ej ekajet in Isreal. M̧ool eo, ijowōt ke, ej n̄e jejjab ļōmņak kōn kōj make im ļoore wāween ko an Kraist ilo ad kwaļo̧k im ukweļo̧k. En̄in ej karōk eo eļap an Jemedwōj Ilan̄ kōn pinmuur eo.
Aliktata, em̧m̧aan in ekar kwaļo̧k bōd in an n̄an kōrā eo ippān eniknik im ritōl ro an, ilo an lukkuun būrom̧o̧j. Mekarta n̄e ekar juon men eo ekar pen n̄an an kōm̧m̧ane, ekar en̄jaake an mera, aenōm̧m̧an, kam̧m̧olool, iakwe n̄an ad Rilo̧mo̧o̧r, im jeļāļo̧kjeņ eo me ejeļā bwe Irooj ekar kotake jān aolep edodo ko an im kotake bwe en maron̄ m̧ōņōņō eļap jān maron̄ kōmeļeļeik, jekdo̧o̧n ta eo enaaj waļo̧k n̄an e im ilju eo an.
Ekar jeļā ke kōrā eo ippān im ro nejin renaaj kar inepata—im rekar; im enaaj kar ukwelo̧k eaitok kitien im naaj kar kōtlo̧ke jān kūr eo an ilo m̧ōn jar eo im ekar. Ekar jeļā ke kōrā eo ippān enaaj kar rub būruōn, metak, im illu—im ekar. Im ekar bar jeļā bwe lio enaaj kar em̧m̧akut, bōke ajri ro nejier ippen— ak ekar jab.
Jet iien bōd ko reļļap rej tōl ļo̧k kōj n̄an jepel, im pedped wōt ioon jekjek ko, men in epidodo an waļok. Ak n̄an em̧m̧aan in ekar bwilōn̄lōn̄, ke kōrā in ippān ekar atabakuji im leļo̧k aolepen an n̄an jipan̄ e ilo jabdewōt wāween emaron̄e. Ālkin jet iien, kōrā in ekar maron̄ lukkuun joļo̧k an bōd. Kōrā in ekar en̄jake kajoor in Pinmuur eo an Rilo̧mo̧or eo n̄an e. Iiō ko tokālik, rūtto rein im jilu nejeir ajri rekar kajoor im lukkuun tiljek. Em̧m̧aan in im kōrā eo ippān rekar jerbal ilo tampeļ im pād eo aerro eaar lukkiun em̧m̧an, im kar obrak kōn iakwe. M̧wilaļ kōn naan in kam̧o̧o̧l in an em̧m̧aan in im an iakwe im kam̧m̧oolol kōn Pinmuur eo an Rilo̧mo̧o̧r eo rej waļo̧k ilo mour eo an.
Amulek ekar kwaļo̧k, “ikōņaan bwe kom̧in wōnm̧aantak im jab kapene būruōmi ļo̧k wōt; … eļan̄n̄e jenaj ukweļo̧k … , ejidimkij an naaj karōk in lo̧mo̧o̧r eļap enaaj itok n̄an kom̧.”1
Ke ikar jerbal ippān ļeo ippa ilo an kar lale juon mijen, kom̧ro kar etal n̄an airport eo im bōk juon kurup in mijinede elōn̄ uwaer. Mejam̧ ekar ļap wōt an iookļo̧k juon likao mijenede. Ekar āinwōt ebūrom̧ōj, eddodo, inepata. Kōm̧ kar lukkuun kalimjōke ālkin rālepen eo. Ke ej jota ļo̧k, likao in ekar kwaļo̧k ruōn ilo ilo juon iien eo ejidimkij, im ri-tōl ro an rekar ļōmnak n̄an kōro̧o̧le. Ijoke kōm ear lukkun būrom̧o̧j kōn an kar jab kwaļo̧k m̧ool im kar jab ukweļo̧k m̧okta jen an kar itok n̄an mijen in an, ilo ial eo amim n̄an airport eo kōm ear lukkun nebar e ilo iakwe kōn an kar kajoor im wōnm̧aantak, im kōm kar kallimur bwe kōm naaj kepaake wōt im lale an ejet an pād.
Likao in em̧m̧an ded eaar eļap an kar jeraam̧m̧an kōn jinen im jemen ro rem̧m̧an, ritōl ro rem̧m̧an ilo priesthood, im ward eo eborak kōn iakwe im jipan̄. Ālkin juon iiō in jerbal eļap n̄an ukweļo̧k im bōk m̧ōttan Pinmuur eo an Rilo̧mo̧o̧r eo, ekar maron̄ bar jepļaaktok n̄an mijen eo am. Elukkuun pen aō kōmeļeļeik en̄jake ko aō relem̧ōņōņō ikar en̄jaki ke ikar ektake likao in jān airport eo. Ekar obrak kōn Jetōb, m̧ōņōņō, leke im̧aan Irooj, kijerjer in kakūrm̧ool juon mijen etiljek. Ekar erom juon mijenede eo ekajoor, im tokālik n̄a im ļeo pāleeō kōm̧ro kar etal im pād ilo iien liāp eo an ilo tampeļ.
N̄an ukwote tok, ijeļā kōn bar juon mijinede, eo me liin ekar jeļā ke ekar jab kwaļo̧k ruōn m̧okta jen mijen eo an im jeļā bwe enaaj kar m̧ōkaj an ro̧o̧l, ekar pepe ippān make ke enaaj buul jerbal ilo mijen eo an im kwaļo̧k ruōn n̄an mijen būreejtōn eo an jejjo raan m̧okta jen an kar jem̧ļo̧k mijen eo an. Liin ekar ekar jab būrom̧ōj im kar kajieon̄ kajekdoon karōk eo an Rilo̧mo̧o̧r eo ekar letok n̄an kōj kajojo.
Ilo iien mijen eo amim, ikar etal ippān ļo̧k ļeo ippa ilo an kar etal im kom̧m̧ane juon intōrpiu ippān juon em̧m̧aan n̄an peptaij. Ilo an kar ļeo ippa kōm̧m̧ane intōrpiu eo, ikar kōttar nabōj ippān sister mijinede ro im raar katakin em̧m̧aan in. Ke ekar dedeļok intōrpiu eo, ļeo ippa ekar ba n̄an mijinede ro bwe ļeiin emaron̄ peptaij. Em̧m̧aan in ejitōnbōro ekar jan̄ im bar jan̄ ilo an jeļā ke jerawiwi ko eaar kōm̧m̧ani ilo mour eo an ren kar bōbraeiki jān an peptaij. Iaar kam̧ool kōn lan̄lōn̄ im mōņōņō ilo an juon joļo̧k mour eo an mokta im bōk juon mour ekāāl āinwōt ta eo iaar kam̧ool ilo raan eo.
Elder D. Todd Christofferson ekar kam̧ool:
“Kōn tōmak ilo tiriam̧o kake eo an [ad] Ripinmuur im kajoor eo An, ebbwer ej oktak ļo̧k n̄an kōjatdikdik. Bōro ko rej oktak, im kōnaan n̄an oktak n̄an pokake kien ko an Anij. nb}…
“… Jekdo̧o̧n ewi jon̄an metak in ukweļo̧k eo, metak eo ejjab āinwōt lan̄lōn̄ eo n̄an jeorļo̧k bōd.”2
Iien kein rekakeememej eō kōn Inōs ilo Bok in Mormon, eo eaar“kūr n̄an [Irooj] ilo jar ekajoor” innām eaar ron̄ juon ainikien ej ba, “Inōs, jero̧wiwi ko am̧ rejako jān eok. …
“Im n̄a, Inōs, iaar jeļā bwe Anij ejamin riab; kōn menin, aō bōd kar bōkļo̧k.
“Im iaar ba: Irooj, ekōjkan an men in kōm̧m̧an?
“Im Eaar ba n̄an eō: Kōnke tōmak eo am̧ ilo Kraist. … Kwōn ilo̧k, am̧ tōmak eaar kōmour eok.” 3
Ilo aō kar kepooj katak in, ikar kōnan bōk juon en̄jaake kōn wāween ekōjkan an ajri rein jibum̧ meļeļe kōn ukweļo̧k im ewi wāween aer en̄jaak kōn Rilomo̧o̧r, innām ikar kajjitōkin ajri ro jibu kōn kajjitōk kein. Ikar m̧weeir kōn uwaak ko aer.
Ta in ukweļo̧k? “N̄e kwōj den̄ōt juon armej, kwomaron̄ ba ‘joļo̧k bōd’ im jipan̄ er.”
Ewi wāween am̧ en̄jaake ilo am̧ ukweļo̧k? “Kwomaro̧n̄ en̄jaake E; kwomaron̄ en̄jaake An o̧kmāāņāņ, im en̄jaake an nana ilo̧k.
Ewi wāween am̧ en̄jaake kōn Jisōs im Jemedwōj Ilan̄ n̄e kwōj ukweļo̧k? “Ij en̄jaake bwe Jisōs ej en̄jaake ke ekar wōr tokjen an kar kōm̧m̧ane Pinmuur eo, im Ej m̧ōņōņō bwe jemaron̄ bar mour Ippān.”
Etke Jisōs im Jemedwōj Ilan̄ rej kōnaan bwe jen ukweļo̧k? Ilo naan ko an leddik eo jibu me 17 an iiō: “Kōnke rej iakwe eō! N̄an an maron̄ wōnm̧aanļo̧k im āinwōt er, jej aikuj ukweļo̧k. Jej barāinwōt kōnan bwe Jetōb eo en ped ippād, bwe jen maron̄ ukweļo̧k kajojo raan bwe En maron̄ pād ippād. Illukkuun ban ba jon̄an aō kam̧m̧oolol er.”
Ke Brynlee eo im emān an iiō ekar ron̄ kajjitōk in, ekar ba, “Ijjab jeļā, baba. Kwon katakin eō.”
Ilo juon iaan kweilok ko reļļap m̧oktaļo̧k, Elder Jefffrey R. Holland ekar ba: “Kōjekdo̧o̧n ewi jon̄an an rum̧wij am̧ ļōmņak, jekdo̧o̧n ewi lōn̄ in iien ko kwoj ļōmņak kwar likjab, jekdo̧o̧ņ ewi lōn̄ in bōd ko kwoj en̄jake kwar kōm̧m̧ani … , ak ettoļo̧kūm̧ in jān kapijuknen ak baam̧le eo am̧ ak Anij eo kwoj en̄jake eaar itok itak, Ij kam̧ool bwe kwoj kwojjan̄in itok itak eļapļo̧k jān iakwe eo ekwojarjar maron̄ tōpare. Ejjab pidodo n̄an kwe n̄an rūm̧ļo̧k jān meram indeeo an Pinmuur eo an Kraist maron̄ tōpare.4
O, ikōnan bwe kajojo ro neju, ro jibū, im kajjojo iami, ro jeiū im jatū, ren en̄jake m̧ōņōņō im epaake ļo̧k Jemedwōj Ilan̄ im ad Rilo̧mo̧o̧r ilo ad ukweļok kajjojo raan jen jerawiwi im m̧o̧jņo̧ ko ad. Kajjojo ajri ro nejin Jemedwōj ilan̄ reaikuj ukweļok. Ta jerawiwi ko im jej aikuj ukweļok jen i? Ta ej kabōjrak kōj? Ilo wāween ta jej aikuj em̧m̧anļo̧k?
Ijeļā, āinwōt an kar Būreejtōn Packer lo im kar kam̧o̧o̧l, bwe ilo ad m̧ool in ukweļo̧k jen jerawiwi ko ad renaaj lukkun jako—ilo ejjeļok jeno̧k! N̄a make ij en̄jake lan̄lōn̄, rōļo̧k jān lokjak, im leke im̧aan Irooj ilo aō kar m̧ool in ukweļo̧k.
N̄an n̄a, menin kabwilōn̄lōn̄ ko reļļap ejjab ilo an kar Lom̧aļo̧ Ekiļm̧ur kar jepel, an tōļ ko em̧m̧akut, ak n̄an kemour ānbwin. Kwabwilōn̄lōn̄ eo eļap ej waļo̧k ilo ad epaake Jemedwōj Ilan̄ ilo jar ko ad ilo ettā im lukkuun akweļap n̄an jeorļok ad bōd, innām bar erreeo jen jerawiwi ko kōn en̄taan in pinmuur eo an ad Rilo̧mo̧o̧r. Ilo āt eo ekwojarjar an etan Jisōs Kraist, amen.