E Gran Plan di Redenshon

Algun luna promé ku Presidente Boyd K. Packer a fayesé, lidernan general di saserdosio i ousiliar tabatin e oportunidat presioso pa el a papia ku nos. Mi no tabata por stòp di pensa riba lokual el a bisa. El a bisa ku el a pensa riba tur e kosnan ku el a hasi durante su bida, buskando na evidensia di e pikánan ku el a kometé i ku el a arepentí di dje i no por a haña niun rasgodi nan. Nan no tabata eksistí mas. Despues el a testifiká ku pa medio di e sakrifisio ekspiatorio di nos Salbador stimá, JesuCristu, i mediante arepentimentu sinsero, su pikánan a kita kompletamente, manera ku nan no a sosedé nunka. Presidente Packer a manda nos komo lidernan e dia ei pa testifiká ku esaki ta bèrdat pa kada un di nos ku arepentí sinseramente.

Mi tin konosementu di un hòmber ku tabata envolví den transgreshonnan moral vários aña pasá. Durante algun tempu, e hòmber aki tabata sinti demasiado bèrgwensa i preokupashon pa aserká su kasá i su lidernan di saserdosio. E ke a arepentí kompletamente , pero en efekto el a ekspresá ku e tabata dispuesto pa entregá su propio salbashon eterno enbes di laga su kasá òf yunan pasa dor di tristesa, bèrgwensa, òf otro konsekuensianan ku por wòrdu kousá dor di su konfeshon.

Ora ku nos a peka, Satanas hopi biaha ta purba pa kombensé nos ku e kos desinteresá pa hasi ta pa protehá otronan for di e konosementu di nos pikánan, inkluso pa konfesá na nos obispu, ku por bendishoná nos bida pa medio di su yabinan di saserdosio komo un hues en general den Israel. E bèrdat sinembargo, ta ku e kos desinteresá i kristian pa hasi ta pa konfesá i arepentí. Esaki ta Tata Selestial su gran plan di redenshon.

Porfin, e kerido hòmber aki a konfesá su pikánan na su kasá fiel i lidernan di Iglesia, ekspresando duele profundo. Maske e tabata e kos di mas difísil ku el a yega di hasi, sentimentunan di alivio, pas,amor, gratitut pa nos Salbador, i un konosementu ku Señor tabata elevando su karga pisá i kargando e a okashoná goso ku no por wòrdu ekspresá, independientemente di e resultado i su futuro.

E tabatin sigur ku su kasá i yunan lo tabata destruí----i nan tabata; i ku lo bai tin akshon disiplinario i relevo for di su yamamentu---i esei a pasa. E tabatin sigur ku su kasá lo tabata desepshoná, ofendí, i rabiá---e tabata. E tabata kombensí ku su kasá lo a bai lag’é huntu ku e yunan---pero e no a hasié.

Tin biaha transgreshon serio ta hiba na divorsio, i dependé di e sirkunstansianan, ku lo por ta nesesario. Pero pa e hòmber aki su asombro, su kasá a bras’é i a dediká su mes pa yud’é den kualke manera ku e tabata por. Despues di tempu, e por a pordon’é kompletamente. El a sinti e poder sanadó di e Salbador su Ekspiashon p’e. Añanan despues e pareha aki i nan tres yunan ta fuerte i fiel. E esposo i esposa a sirbi den tèmpel i tin un matrimonio maravioso i amoroso. E profundidat di e hòmber su testimonio i su amor i gratitut pa e Salbador i Su Ekspiashon ta masha evidente den su bida.

Amulek a testifiká, “Mi ta deseá ku boso por bini dilanti i no hasi boso kurason duru mas; ... si boso ke arepentí … , inmediatamente e gran plan di redenshon lo funshoná pa boso.”¹

Tempu mi tabata sirbi huntu ku mi esposo miéntras e tabata presidí riba un mishon, nos a bai na e aeropuerto pa buska un grupo grandi di mishonero. Un hòmber hóben en partikular a kapta nos atenshon. E tabata parse tristu, agobiá, i kasi trastorná. E atardi ei nos a paga bon tinu na dje. Anochi, e hóben aki a hasi un konfeshon retrasá, i su lidernan a disidí ku e mester a regresá kas. Ounke nos tabata hopi tristu ku e tabata deshonesto i no a arepentí promé ku el a bai mishon, na kaminda pa aeropuerto nos ku sinseridat i amor a apresi’é pa tabatin e kurashi pa atmití su falta, i nos a primintié pa mantené kontakto ku n’e.

E hóben tremendo aki tabata bendishoná ku mayornan maravioso, gran lidernan di saserdosio,i un bario ku dun’é apoyo i amor. Despues di un aña di trabou duru pa arepentí kompletamente i partisipá di e Salbador su Ekspiashon, e por a regresá na su mishon. Ta difísil pa mi splika e sentimentunan di goso ku nos a sinti ora nos a busk’é for di aeropuerto. E tabata yená ku e Spiritu, felis, ku konfiansa dilanti Señor, i ansioso pa kumpli un mishon fiel. El a bira un mishonero eksepshonal, i despues mi kasá i ami tabatin e privilegio di partisipá na su seyamentu den tèmpel.

Al kontrario, mi konosé un otro hermana mishonero, ku sabiendo ku su piká sin konfesá promé ku su mishon ku siguridat lo poné regresá kas tempran, a hasi su mes plan pa traha èkstra duru durante su mishon i konfesá su piká na su presidente di mishon djis algun dia promé di kaba su mishon. E no tabatin tristesa ku ta agradá Dios i a purba pa evitá e plan ku nos Salbador amoroso a ofresé kada un di nos.

Durante nos mishon, mi a kompañá mi kasá un biaha ora el a bai pa entrevistá un hòmber pa por wòrdu batisá. Miéntras mi kasá tabata hasi e entrevista, mi a warda pafó ku e hermananan mishonero ku a siña e hòmber aki. Ora e entrevista a kaba, mi kasá a informá e mishoneronan ku e hòmber por wòrdu batisá. E kerido hòmber aki a keda yora segun e tabata splika ku e tabatin sigur ku e pikanan serio ku el a kometé den su bida lo a strob’é pa wòrdu batisá. Masha poko biahe mi a presensiá un goso i felisidat di un persona ku a sali for di skuridat pa klaridat manera di e dia ei.

Elder D. Todd Christofferson a testifiká:

“Ku fe den[nos]Redentor miserikordioso i Su poder, desesperashon potensial ta bira speransa. Un hende su kurason i deseonan ta kambia, i e piká ku un tempu tabata atraktivo ta bira kada biaha mas repugnante.  ...

“ ...  Kualke sea e presio di arepentimentu, e ta wòrdu gulí den e goso di pordon.”²

E eksperensianan aki ta rekordá mi di Enos den e Buki di Mormon, ku a “implorá na[Señor] den orashon intenso,” despues a tende un bos bisando, “Enos, bo pikánan ta pordoná. ...

“I ami, Enos, tabata sa ku Dios no por gaña; asina ku, mi kulpa a wòrdu kitá kompletamente.

“I mi a bisa: Señor, kon esei a sosodé?

“I el a bisa: Pa motibu di bo fe den Cristu, ... Bai, bo fe a salba bo.”³

Den preparashon di e diskurso aki, mi ke a haña un sentimentu pa sa kon nos nietunan ta komprondé arepentimentu i kon nan ta sinti tokante nos Salbador, pues mi a puntra nos yunan pa hasi nan e siguiente preguntanan. Mi a keda emoshoná pa e kontestanan di nos nietunan.

Kiko ta arepentimentu? “Ora bo dal un hende, bo por bisa ‘sòri’ i yud’é lanta ariba.”

Kon bo ta sinti ora bo arepentí? “Bo por sintié; bo por sinti Su kalor, i e mal sentimentu ta kita bai.”

Kon bo ta sinti tokante Jesus i Tata Selestial ora bo arepentí? “Mi ta sinti ku Jesus ta sinti ku tabata bal la pena pa hasi e Ekspiashon, i E ta felis ku nos por biba ku n’E atrobe.”

Di kon Jesus i Tata Selestial ke pa mi arepentí? Den e palabranan di mi nietu teenager: “Pasobra nan ta stima mi! Pa por progresá i bira meskos ku Nan, mi mester arepentí. Tambe mi ke tin e Spiritu huntu ku mi, p’esei mi tin ku arepentí tur dia pa tin Su kompania maravioso. Nunka lo mi no por ta kapas pa gradisí Nan sufisiente.”

Ora Brynlee di kuater aña a skucha e preguntanan aki, el a bisa, “Mi no sa, Papi. Bo por siña mi.”

Den un konferensia general pasá, Elder Jeffrey R. Holland a deklará: “Maske kon lat boso ta pensa ku boso ta, maske kuantu oportunidat ku boso por a pèrdè, kuantu eror boso ta sinti ku boso a hasi ...  ,òf kon leu for di kas i famia i di Dios boso ta sinti di a biaha, mi ta testifiká ku boso noa biaha mas leu ku e alkanse di amor dibino. No ta posibel pa boso senk asina profundo ku e brio di e lus infinito di e Ekspiashon di Cristu no ta alkansá boso.”⁴

Mi tin masha deseo pa kada un di mi yunan, nietunan, i kada un di boso---mi rumannan, sinti e goso i e serkania na Tata Selestial i nos Salbador ora nos arepentí diariamente di nos pikánan i debilidatnan. Kada yu di Tata Selestial ku ta responsabel tin mester di arepentimentu. Di kua pikánan nos tin ku arepentí? Kiko ta stroba nos? Den kiko nos tin ku mehorá?

Mi sa, meskos ku Presidente Packer a eksperensiá i testifiká, ku ora nos arepentí sinseramente, nos pikánan ta bai realmente----sin niun rasgo. Mi a sinti personalmente e goso, e alivio, i konfiansa dilanti di Señor ora mi a arepentí sinseramente.

Pa mi, e milagernan di mas grandi den e bida aki no ta e divishon di e Laman Kòrá, e movementu di serunan, òf hasta e sanashon di e kurpa. E milager di mas grandi ta sosodé ora nos ku humildat aserká nos Tata den Shelu den orashon, roga ku fervor pa wòrdu pordoná i despues ta limpiá di e pikánan mediante di e sakrifisio ekspiatorio di nos Salbador. Den e nòmber sagrado di JesuCristu, amèn.