2010–2019
Koasoandi Kaselel en Komourla
Oakotohpe 2016


Koasoandi Kaselel en Komouro

I ese me ni atail kin koluhkihla dipatail kan ni mehlel, re kin sohrala ni mehlel— sohte ekis lipwarail!

Sounpwongte depe mwohn President Boyd K. Packer eh sipallao, priesthood lapo oh kaun en auxiliary ko ahnikihdi ansou mwahu en lukehla pwe en mahsenieng kiht. I saikinte kak sohla medewe duwen dahme e koasoaiao. E ndahngkit me e medewehier soahng koaros me wiawihier nan ah mour raparapahki kadehdepen dihp kan me e wiadahr oh koluhkilahr ni mehlel oh e sohte kak diar lipwerail Re solahr sansal. Pwehki tomwen tohnmetei en atail Soukomour kempokeo, Sises Krais, oh sang ni koluhla mehlel, dipe ko ahpw sohrala douluhl, likamwete re sohte wiawi. Ahn President Packer ah kehkehlikieng kiht rahno me pwehki atail wia kaun kei en Mwomwohdiso iei kitail en kadehde me met mehlel ong emen emen kitail me koluhla ni mehlel.

I tamanda ohl emen me iang kawehla kosonned sounpar kei samwalahro. Ansou reirei, ohl menet inenen namenekla oh pwunodkihda mehlel koasoaiahieng ah pwoudo oh ah kaun en priesthood ko. E anahne mehlel koluhla ahpw kawehwehda mehlel me e pwungki pwilikihdi pein ah mour soutuk ah kaidehn kiheng ah pwoud oh nah seri kan nan nsensuwed, namenek, de soangen lipwalipw teikan me kak pwaradahsang ah wehkada dihpe.

Ni ansou me kitail kin dipada, Sedan kin kalap song wia kitail en kamehlele me tohnmetei me kitail en wia iei silehsang mehteikan ohla me pahn pwaradahsang ni arail wehwehki duwen dipatail kan, iangahki dehr wehkadahng atail bishop, me kak kapaikitailda sang ni ahn priesthood kih kan me duwehte emen sounkopwung nan Israel. Dahme keieu mehlel iei tohnmetei oh kahlamangih doadoahk en Christ me iei wehkada oh koluhla. Met iei Sapwellimen Sahm Nanleng koasoandi kaselel en komourla.

Ni imwio, ohl mwahu menet wehkada dipe kan ong ah pwoud loalloapwoato oh kaun kan en ah Mwomwohdiso, kasalehda pahtou laud. Tehn e wia mehkot me keieu apwal me e wiahda, pepehm kan en meleilei, kaping oh limpoak ong atail Soukomouro, oh pohnese me Kauno ketikihsang ah kotoutou apwahpwalih me elehda nsenamwahu me sikisang ah kak kawehwe mendahte dahme pahn pwarada oh duwen ih ehu rahn.

Kilel
Sounkomour kaloalamwahu

E ese me ah pwoud oh nah seri pahn likidekla—oh ihme wiawi; oh e pahn mie wiepe pahn wiawiheng oh ah pwukoah pahn kohsang—oh ihte mwo. E ese me ah pwoud pahn nsensuedla, medekila, oh lingeringer—oh ihme e wia. Oh e ese me e pahn kohkohla, wahsang serihko—ahpw e sohte wia mwo.

Ekei ansou mwekid sapwung kan kin elehda mweipeseng, oh dahme pahn pwarada, soahngo kak wiawi. Ahpw ohl menet pwuriamwei pwe e sohte leme me ah pwoiudo pahn pwungkihla ih oh pein inoukihdi me e pahn sewese ohlo ni soahng koaros me e kakohng. Mwurin ansou kei, e kakehr mahkohng ohlo ni unsek. E kehn manaman en kamwahula sang Sapwellimen Soukomouro Tomwo ong ih. Sounpar kei mwuri, pwopwoud wet oh neira seri silimen kehlailda oh pwosonla. Ohlo oh ah pwoud pweila nan tehnpas sarawio oh wiahla pwopwoud mwahu oh limpoak. Uwen mehlel en ahn ohl menet kadehde oh ah limpoak oh kaping ong Sounkomouro oh Sapwellime Tomwo inenen sansal nan ah mour.

Amulek kadehdehkidahr, “I pahn me kumwail pahn kohdo oh ieremen kahpwaliala amwail mohngiong kan; …ma kumwail pahn koluhla … , ni ansouohte koasoandi laud en doarehla pahn wesikdo rehmwail.”1

Ni ansou me I kin iang ahi pwoudo oh kin sawas ni eh moangehda ehu missino, ehu mensengo se kohla wasahn sompihro pwe sen ale misineri kei. Emen ohl ahpw moahl mwoht. E mwomwen pahtou, toutou, kerenieng rerrer. Se inenen tetehk ohlo ni keneinei. Nisoutuko, mwahnakapwo ahpw wehkada ah wiewia ni ansou reirei, oh ah priesthood me kaun ko eri pehmada me e anahne pwurala ni imweo. Tehn se inenen nsensuwedkihla ah sohte mehlel oh sohte koluhla mwohn kohdohng nan ah mission, ni aht tangatangala wasahn sompihro se kapingkihong ih ni karakarahk oh limpoak pwehki eh eimahki eh wehkada ah wiewia, oh inoukihda me se pahn kin koasoakoasoailahng

Mwahnakapw mwahu menet alehdi kapai en nohnohki oh pahpahki ohl oh lih mwahu, kaun mwahu kan en priesthood en ward me ahniki utuht. Mwurin sounpar ehu en doadoahk laud pwehn uhdahn koluhla oh alehda sapwellimen Sounkomour Tomwo, e kakala pwurala ni aht missiono. E apwalohngie I en kawehwehda pepehm en nsenamwahu me se ahniki ni ansou me se idanda mwahnakapw menet sang wasahn sompihro. E direkihla Ngehno, peren, likilik rehn Kauno, oh mentehn kanekelahr ehu kapwukoah me kehlail. E wiahla emen mesneri me wad, oh mwuri ngehi oh ahi pwoud ahnikihdi ansou mwahu en iang towehda ah katengteng nan tehnpas sarawio.

Me weksang met , I medemedewe pil emen misneri me, sohte wehkada ah sapwung kan me e wiahda mwohn ah pahn wiahla misneri pwehki e ese me e pahn kak karehieng ah kopwurpwurla ni imwehu , , elehieng e wiahda ah koasoandi me e pahn doadoahk laud nan ah mission oh wehkohng mission presiden rahn depe mwohn eh pahn kanekeha ah missiono. E Sohte ale nsensuwed me Koht kin ketin doadoahngki oh song soikala pilahn me atail Sounkomouro ketikidohngehr emen emen kitail.

Nan ansoun aht missiono, ehu pako I iang ahi pwoud, me wia mission president , ni ansou me e kohla pwe en koasoaieng ohl emen me pahn papdais. Ni ansou me ahi pwoudo koasoakoasoaieng ohlo, I iang sister misneri ko me pahdahkiher ohlo oh awiawih likio. Ni kapeideko eh nekiero, ahi pwoudo ahpw katamankiheng misineri ko me ohlo pahn kak papdaisla. Ohl mwahu menet lapalahn eh wie sengiseng ni eh kawehwehda me e kamehlele me dihp akan me e wiadahr nan ah mour pahn irehdihsang en dehr papdaisla. I sohte kalapw kilang peren oh popohl rehn emen aramas me weliakapwala sang, dihp, me pahrekieng dahme I kadehdehier rahno.

Kilel
Sounkomouro ketkidahr koapwoaroapwoar

Elder D. Todd Christofferson kadehdehki:

“Ahneki pwoson [atail] Soundor kalahngano oh Sapwellime manaman, dahme pahn kansensuwed pahn wekideklahng koapworopwor. Atail mohngiong oh ineng kan pahn wekila, oh dihp me mwomwen kanoreko pahn kamasepwehkla. …

“… Sohte lipilipil wen laud en koluhla, e peren en alehdi mahk pahn powehdi.”2

Kemwekid pwukat katamanohngie duwen Enos nan Pwuhk en Mormon, me lukwerieng Kauno ni kapakap kehlail, oh mwuri rong ngihl ehu me koasoaia: Enos, dipomw kan lapwadahr . …

“Oh Ngehi, Enos, wehwehki me Koht sohte kak likamw; kahrehda, dipei kan mwakelekeladahr.

“Oh Ngehi eri nda: Kaun, ia mwomwen met ah wiawihier ?

“Oh e ahpw mahsanihongie: Pwehki ahmw pwoson Krais. … kohla, pwe ahmw pwoson me wiaiong uhk ken unsekla.3

Ni ahi kaukaunop padahk wet, I mentehn ese ma nein nait seri ko serihko wehwehki dahkot koluhla oh ia arail pepehm me pid atail Sounkomouro, ngehi oh ahi pwoudo eri peki rehn nait seri ko en uhd idek rehn neirail serihko peidek pwukat. Ahn seri ko me wia nein nait seri ko pasapeng ko inenen sair ie.

Dahkot koluhla? “Ahnsou me ke loieng emen, ke kak nda ‘mahk’ oh sowesehda.”

Ia duwen ahmw pepehm ni ahmw kin koluhla? “Ke kak pehm Ih; ke kak pehm Sapwellime limpoak  oh pepehm me suedo kin sohla.”

Ia duwe ahmw pepehm me pid Sises oh Sahm Nanleng ansou me ke kin koluhla? “I kin pehm me Sises kin ketin pehm me kesempwal wia Tomwo, oh E ketin peren pwehki kitail kak pwurehng kousonla reh.

Dahme kahrehda Sises oh Sahm Nanleng men I en koluhla? Pasapeng en nein nei seri: “Pwehki arail poakehng ie! Pwe I en kak keirda oh duwehla Ira, i anahne koluhla. i pil men Ngehno en ieiang ie, kahrehda I anahne koluhla rahn koaros pwe ien kak ieiang Ih. I sohte kak itarkihla kalahngan me I men kiheng Ira.”

Ni ansou me Brynlee-sounpar pahieuo rong peidek pwukat me ah pahpao idek, e koasoaia, “I sehse, Pahpa. Ke uhdahn pahn kasukuhliekinie.”

Kilel
Brynlee oh ah pahpa

Nan ehu tiepene lap me nekier, Elder Jeffrey R. Holland pakairki: Sohte katepen ia uwen pwand me kumwail leme, sohte katepen ia uwen ansou mwahu kan me kumwail leme kumwail peselsang, sohte katepen sapwung depe … , sohte katepen ia uwen doh sang wasahn kousoan oh peneinei oh Koht kumwail kin pehm me kumwail seiloakier, I kadehdehki me kumwail saikinte seiloakla pallahsang idin limpoak sarawi. E sohte mengei ong kumwail en pwopwidilahng nan soangen rotorot en ngehno me sohte idin marain en Sapwellimen Krais Tomwo sohte kak lella rehmw.”4

Oh, I inenen anahne emen emen nei seri kat, nen nei seri kat, oh emen emen kumwail riei ohl akan oh lih akan, en pehm popohl oh karanih mehlel Sahm Nanleng oh ong atail Sounkomour ni atail kin rahn koaros kolukihla dipatail kan oh luwet akan. Emen emen seri en Sahm Nanleng me pwukoahki kin anahne koluhla. Medewe soangen dihp da me kitail anahne koluhkihla? Ni soangen wiepe da me kitail anahne wia pwe kitail en keirda?

I ese, nin duwen me President Packer wehwehkiher oh kadehdehier, me ni ansou me kitail koluhkihla dipatail kan ni mehlel, re kin sohrasang ni mehlel—ni sohte luhwehki ekis arail sain! I pein pehm limpoako, popohl, saledek, oh likiliko rehn Kauno ni ei kolulahr ni mehlel.

Ongie, mwekid me keieu wad akan nan mour wet iei pwalpeseng en Sehd Weitahtao me mweidehng mehn Israel ko ren kotehla nan wasa ngalangal oh pitisang mehn Egypt ko, mwekimwekid en nahna kan, de pil kamwahulahn paliwar. Mwekid keieu kesempal kin wiawi ansou me kitail kin kapakap ong Sahm Nanleng ni karakarahk, oh peki ni lamalam kehlail pwe kitail en alehdi mahkepen dipatail kan, oh kamwakelehsang dihp ko oh ahpw wekila sang ni sapwellimen Sounkomouro tomw en tohnmeteio. Ni lengileng sarawi en Sises Krais, amen.