2010–2019
Lod Jisas Kraes i tijim yumi blong prea
Oktoba 2016


Lod Jisas Kraes i Tijim Yumi blong Prea

?Taem yu prea, yu rili stap prea o yu stap talem ol prea nomo?

Long 1977, mi bin stap givim seves olsem wan misinari long Kasko, Peru. Kompanion blong mi mo mi i bin kasem raet ia blong tekem evri misinari long eria blong Kasko i go long Maju Pikju.

Kolosap en blong visit, sam misinari oli wantem go long Inka brij, we i pat blong rod long maonten ia. Kwik nomo, mi filim Spirit i stap stopem mi blong no go long ples ia. Brij ia i stap long saed blong klif i stret i go daon blong 610 meta. Long sam ples long rod ia, hem i inaf blong wan man nomo i pas be i no plante wantaem. Kompanion blong mi mo mi i talem long olgeta se mifala i no go long Inka Brij.

Be, ol misinari oli fos blong mifala i mas go. Oli askem gogo mi nomo save talem no, nomata wanem we Spirit i talem long mi, mi folem tingting blong olgeta mo talem se bae mifala i visitim brij wetem bigfala hol andanit be sapos nomo mifala i lukaot gud.

Mifala stad blong go long rod ia blong go kasem Inka brij ia wetem mi long en blong grup, mo long stat evriwan i wokbaot slo nomo, olsem we mifala agri. Afta ol misinari oli stat blong wokbaot kwik mo ron tu. Oli no wantem save long toktok blong mi blong slo daon. Mi filim se mi mas kasem olgeta, blong talem long olgeta se mifala mas gobak. Mi stap longwe biaen long olgeta, mo mi mas ron kwik blong kasem olgeta.

Taem mi tanem long wan kona, long wan rod we i smol tumas blong tu man i wokbaot, mi faenem wan misinari i stap stanap kwaet wetem bak blong hem i fas long ston blong hil. Mi askem hem from wanem hem i stanap ia. Hem i talem long mi se hem i fil se bae hem i stap long ples ia smol taem mo mi bae mi go fastaem.

Mi filim strong blong mas kasem olgeta ia long fored, mekem se hem i helpem mi blong pasem hem, mo mi bin save wokbaot smol i go daon long rod ia. Mi luk se graon i fulap wetem ol grin gras. Mi putum raet leg blong mi long graon ia, mo mi luksave taem mi foldaon se i nogat graon andanit long grin gras ia. Kwik taem mi hang long sam branj we i stap andanit long rod ia. Mi bin luk smol i go daon andanit samples 600 meta i go daon, Urubamba reva we i krosem tabu vale ia blong ol Inka. Mi filim olsem we paoa blong mi bin livim mi, mo bae i no long taem bae mi foldaon. Long tetaem ia, mi prea strong. Hem i wan sot prea. Mi openem maot mo talem, “!Papa, helpem mi!”

Ol branj oli no strong blong holemtaet mi from mi hevi. Mi save se bae mi ded. Stret long taem ia taem we mi rere blong foldaon, mi filim wan han i holemtaet strong han blong mi mo stap pulum mi i kam antap. Wetem help ia, mi gohed blong faet strong blong kambak antap long rod ia. Misinari we i stap biaen ia, hem nao i helpem mi.

Be rili se Papa long Heven nao i sevem mi. Hem i harem voes blong mi. Mi harem voes blong Spirit tri taem bifo, we i stap talem long mi blong no go long brij ia, be mi no bin obei long voes ia. Mi bin sek, fes i jenis, mo mi no save wanem blong talem. Afta mi tingbaot se ol nara misinari oli stap go fored blong mifala, mo mitufala i go lukaotem olgeta kasem taem mitufala i faenem olgeta mo talem wanem we i bin hapen long mi.

Mifala i gobak long Maju Pikju, sloslo mo kwaet nomo. Long trip i gobak long haos mi stap kwaet nomo mo tingting ia i kam long maen blong mi se Hem i bin lisin long voes blong mi be mi no bin lisin long Hem. Hat blong mi i fulap long harem nogud from mi no obei long voes blong Hem mo semtaem filim tangkyu from sore blong Hem. Hem i no bin yusum jastis blong Hem long mi, be long bigfala sore blong Hem, Hem i bin sevem laef blong mi (luk Alma 26:20).

Long en blong dei, taem i bin taem blong mi prea, mi prea wetem wan tru hat i go long “Hem we i God blong yumi we i gat sore, Hem i God we i stamba blong fasin blong givhan”. (Seken Korin 1:3). Mi prea “wetem wan tru hat, wetem tingting we i tru blong wantem save, wetem fet long Kraes” (Moronae 10:4).

Long eli moning blong semfala dei, mi bin prea wetem maot blong mi, mo taem mi rere blong ded, mi prea wetem wan tru hat i go long Hem. Mi tingting hevi long laef blong mi long taem ia. Mi faenem se long plante samting, Papa blong yumi long heven i bin gat bigfala sore long mi. Hem i bin tijim mi plante samting long dei ia long Maju Piju mo long Kusko, Peru. Wan long ol bigfala lesen nao, hem we mi sapos blong prea oltaem ““wetem wan tru hat, wetem tingting we i tru blong wantem save, mo praktisim fet long Kraes.”

Wan taem, Lod Jisas Kraes “i stap prea long wan ples,” mo “taem hem i finis, wan man blong Hem i talem long Hem se, Lod, yu tijim mifala, blong mifala i prea” (Luk 11:1).. Afta Hem i tijim ol disaepol blong Hem blong prea. Mo tedei Hem i tijim yu mo mi blong prea taem yumi pikjarem Hem long maen blong yumi we Hem i stap prea long Getsemane mo talem, “Be yu no mekem olsem we mi mi wantem, yu mekem olsem we yu nomo yu wantem” (Luk 22:42). ?Taem yu prea, yu rili talem wetem wan tru hat se “no mekem olsem we mi mi wantem, yu mekem olsem we yu nomo yu wantem”?

Pol i tokbaot gud olsem wanem Jisas i prea “long laef blong Hem long wol ia,” speseli long Getsemane: “Hem i stap prea long God i stap askem ol samting long Hem, i stap krae bigwan, we wota blong ae blong Hem i stap ron. God i gat paoa blong sevem Hem blong Hem i no ded, mo from we tingting blong Kraes i stap daon, God i harem Hem.” (Hibrus 5:7).. ?Taem yu prea, yu rili prea o yu stap talem wan prea nomo? ?Yu stap tingting hevi wetem ol prea blong yu?

Jisas i prea wetem paoa mo toktok wetem Papa blong Hem. “Mo i bin hapen, se Jisas i baptaes, mo taem Hem i stap prea, skae i open” (Luk 3:21).. ?Taem yu stap prea, yu stap filim olsem we skae i stap open? ?Wetaem nao i las taem we yu bin filim koneksen ia wetem heven?

Jisas i mekem Hemwan i rere blong mekem ol impoten desisen taem Hem i bin stap prea i go long Papa.

“Jisas i go antap long wan hil blong prea. Mo hem i stap long ples ya wan fulnaet, i stap prea long God.

“Nao taem i brok delaet, Hem i singaot ol man blong Hem oli kam long hem: mo Hem i jusumaot twelef man long olgeta” (Luk 6:12–13).

?Yu stap rere long yuwan blong mekem ol impoten desisen taem yu prea long Papa long Heven? ? Yu stap rere yuwan long taem blong prea?

Taem Jisas i bin kam long Amerika, Hem i tijim ol pipol blong prea. “Mo Jisas i talem long olgeta: Gohed blong prea, be oli no bin stop blong prea” (3 Nifae 19:26).

Jisas i stap invaetem yumi blong “gohed blong prea” (D&C 10:5).. Jisas i save se Papa blong yumi long Heven i stap harem mo givim wanem we i gud long yumi. ?From wanem samtaem yumi no wantem risivim? ?From wanem?

Long taem we yumi taem se, “Papa long Heven, “Hem i harem ol prea blong yumi mo save yumi mo ol nid blong yumi. Mo ol ae mo sora blong Hem naoia oli konek long yu. Hem i save tingting blong yumi, mo Hem i filim wanem i stap long hat blong yumi. Yu no save haedem samting long Hem. Nao, naesfala samting se Hem bae luk yu wetem ol ae blong lav mo sore—lav mo sore we yumi no save andastanem fulwan. Be lav mo sore oli stap wetem Hem long taem ia we yu talem, “Papa long Heven.”

Wan taem blong prea hem i wan tabu, tabu taem. Hem i no wan man we i se, “No, bae mi no lisin long yu naoia from yu kam long mi nomo taem yu stap long trabol.” Ol man nomo oli mekem olsem. Hem i no wan man ia blong talem se, “O, yu no luk se mi bisi naoia.” Ol man nomo bae oli talem olsem.

Blong yumi evriwan i prea olsem we Jisas i bin tijim yumi blong stap prea, hem i hop mo prea blong mi, long nem blong Lod Jisas Kraes, amen.