Te Uea Iesu Kristo e Reireiniira bwa Ti na Tataro

N 1977, I beku bwa te mitinare ae bwanin ana tai i Cusco, Peru. Ngai ma toau ti karekea te kariaiakaki ni kairiia mitinare ni kabane ni mwakoron Cuscoe nako Machu Picchu ae urubwaiaki.

Ni kabanean mwanangara nakon te urubwai anne, tabeman mitinare a tangiria n nako n te Buriiti ae Inca, iteran kawain te maunga. N te tai ae waekoa, I namakina inanou te Tamnei ae kairoroai bwa N na aki nako ikekei. Te kawai e mena n iteran te maunga 2,000 te buuti (610 te miita) ni karokoaki iai. Inanon tabeua taabo, te kawai e bon tii tau rababana ibukin temanna te aomata ni buti n te tai anne. Ngai ma toau ti tuangiia bwa ti riai n aki nako n te Buriiti ae Inca.

E ngae n anne, mitinare a kairoroira bwa ti na nako. E rikirake ni korakora te bubuti, ao n aki ongea te bwai are e a tia ni kaotia nakoiu te Tamnei, I a ongo n aia kairoro rorou ao n tuangiia bwa ti na nako n te buriiti ma tii ngkana ti karaurau raoi.

Ti a roko n te kawai are e tiki nakon te Buriiti ae Inca ma ngai n te kabane n te kurubu, ao n te moan tai a bane n nakonako aomata ni karaurau, n aron ae boraraoiakinaki. Ngkanne mitinare a moanna ni kawaetitiia n nakonako ao ni biri naba. A aki tabe ma au taeka ae a na karaurau. I namakinna bwa I riai ni karokoai irouia, n tuangiia bwa ti riai n oki. I rang tio ibuki, ao I kabirimwaakai ni karokoai irouia.

Ngke I a roko n te tabo ae katobibi, n te kawai ae rang irariki ibukiia uoman ae a na nakonako iai, I kunea te mitinare ae tei n aki kakamwakuri ni katannako man taian bwaa. I titirakinna bwa bukin tera ngkai e teitei ikekei. E tuangai bwa e kanamakinna ae e riai n tei n te tabo arei inanon teutana te tai ao I riai ni waaki nako.

I namakinna ae N na kawaekoakoai ni karokoai irouia naake a rimoara, ngaia are e a buokai bwa N na rimoana, ao I a kan roroko riki n te kawai. I noora aontano bwa e onrake n aroka aika kiriin. I kamatoa waeu te atai ni karuoa iaontano, n noorakina, n aron ae I a bwaka, bwa akea aontano iaan aroka aika kiriin. I kawaekoai n buritii tabeua mwaanga ni kai ake a mena iaan te kawai. N te tai are I a kona n noora naano, 600 te miita iaau, te Karaanga ae Urubamba are e tei ni kaitara te Marua ae Tabu i Incas. I namakinna bwa kanga e a nako korakorau, ao bon tii inanon te tai imwaain ae I kuri n aki kona are imwiina. N te tai anne, I kakorakoraai n tataro. Bon te tataro ae uarereke. I kaurea wiiu ao n taku, “Tamau, buokai!”

Akea korakoran taian mwaanga ni kai are a na kamatoatoaai man tinebun rabwatau. I ataia bwa N nang bon mate. N te tai raoi are N nang bon bwaka iai, I namakina te bai ae matoatoa ae tauai ao ni katikairake. Ma te ibuobuoki anne I a kona n reitinako n tamarake ni kaokai nakon te kawai. Te mitinare are e tiku imwiira bon teuare e kamaiuai.

Ma n te koaua e kamaiuai Tamara are i Karawa. E ongo bwanaau. I a tia n ongo ni bwanaan te Tamnei teniua te tai mai imwaaina, n tuangai bwa N na aki nako n te Buriiti ae Inca, ma I aki ongeaba n te bwanaa anne. I bon tounako, I mainarake, ao I aki ataia bwa tera ae N na taekinna. Ngkanne I a uringnga bwa mitinare ake tabeman a rimoara, ao ngaia are ti a nako ni kakaiia ni karokoa are a reke iroura ao n tuangiia te bwai are e riki nakoiu.

Ti a oki nako Machu Picchu, ma te karaurau, ao n aki karongoa. N okin te mwananga, I reitinako ni kainabwaabu, ao e kaoti te iango inanou bwa E a tia ni kakauongo nakon bwanaau ma I aki kakauongo Nakoina. Iai te maraki ae korakora inanou ibukin aki ongou n Ana taeka ao n te tai naba anne te kakaitau ae moan te bati ibukin Ana nanoanga. E aki kabongana ana momotiraoi iaou, ma inanon Ana nanoanga, E a tia ni kamaiuai (taraa Aramwa 26:20).

N tokin te ngaina anne, ngke e a roko au tai ibukin au tataro ae onoti, I tataro mai inanou nakon “te Tama ae nanoangaea te aba, ae te Atua ae te tia karika kabebetean te nano” (2 I-Korinto 1:3). I tataro “ma te nano ae koaua, ma nanou raoi, ao te onimaki iroun Kristo” (Moronaai 10:4).

Ni karangainan te bong naba anne, I tataro man riau, ao ngke kanga N nang bon mate, I tataro mai nanou Nakoina. I iangoa maiu n te bwai are e riki. I kunea bwa inanon bwaai aika mwaiti aika a riki, e a tia n nanoangai Tamara are i Karawa. E reireiai reirei aika mwaiti n te bong anne i Machu Picchu ao i Cusco, Peru. Teuana te reirei ae rangin kakawaki bwa I riai n tataro n taainako, n taainako “ma te nano ae koaua, ma nanou raoi, ni kamwakura au [onimaki] iroun Kristo.”

N teuana te tai ae riki te Uea Iesu Kristo “e tataro n te tabo teuana,” ao “ngke e a toki, ao e taku ana reirei temanna nako Ina, Te Uea, Ko na reireiniira arora n tataro” (Ruka 11:1). Ngkanne E reireiniia Ana reirei bwa a na tataro. Ao n te bong aei E reireiniko ao Ngai bwa ti na tataro ngkai ti nooria n ara iango n tataro i Ketetemwane ao n taku, “Ma akea au taeka, ma e na tauaki am taeka” (Ruka 22:42). Ngkana ko tataro, ko bon rang tangira raoi anne “ma akea au taeka ma e na tauaki am taeka”?

Bauro e kabwarabwara aron Iesu n tataro “ngke e maeka n rabata,” ai moarara riki i Ketetemwane: “E angan Teuare kona te kamaiua man te mate taian tataro ma bubuti ma te tang ae korakora ma rannimatana, ao e ongo te Atua i Rouna i bukini makan te Atua i Rouna” (Ebera 5:7). Ngkana ko tataro, ko tataro raoi ke ko tii atonga te tataro? E aki bwanin am tataro?

E kakorakora n tataro Iesu ao n taetae ma Tamana. “E koro bukina, bwa e bwabetitoaki naba Iesu, ao E tataro, ao e kaukaki naba karawa” (Ruka 3:21). Ngkana ko tataro, ko namakinna bwa e kaukaki karawa? N nningai te kabanea n tai ae ko namakina te reitaki anne ma karawa?

E katauraoi Iesu ni karaoi babaire aika kakawaki man ana tataro nakon Tamana.

“E nako n te maunga ba E na tataro, ao e kangaina n tataro nakon te Atua.

“Ao ngke e a ngaina, ao e wetei’a ana reirei: ao e rinei’a tengaun ma uoman mai buakoia” (Ruka 6:12–13).

Ko katauraoiko ni karaoi babaire aika kakawaki n tataroakin nakon Tamam are i Karawa? Ko katauraoiko ibukin te tai n tataro?

Ngke e roko Iesu iaon Amerika, E reireiniia aomata bwa a na tataro, “Ao e taku Iesu nakoia: Waaki tataro; ma e ngae n anne a bon aki katoka aia tataro” (3 Nibwaai 19:26).

E kaoira Iesu bwa ti na tataro n taainako (D&C 10:5). E ataia Iesu bwa Tamara are i Karawa e ongo ao n anga te bwai are e tamaroa ibukira. Bukin tera bwa n tabetai ti aki tangiria ni kan karekea te bwai are e anganiira? Bukin tera?

N te tai raoi anne ti kangai, “Tamara are i Karawa,” E ongo ara tataro ao e namakiniira ma kainnanora. Ao ngaia are matana ao taningana a reitaki ma ngkoe. E atai ara iango, ao E namakini nanora. Ko aki kona ni karaba te bwai teuana mai Irouna. Ngkai, te bwai ae kamiimi bwa E nooriko ma matana n tangira ao n nanoanga—te tangira ao te nanoanga are e aki bwanin ara atatai iaona. Ma te tangira ao te nanoanga a mena Irouna n te tai raoi are ko kangai, “Tamara are i Karawa.”

Ngaia are n te tai n tataro bon te tai ae e rang, n tabu. Tiaki te aomata ae e na kangai, “Tiaki, N aki ongo iroum ngkai ibukina ko tii kawarai ngkana ko a reke n te kaangaanga.” Tii aomata ae a karaoa anne. Tiaki temanna ae e na kangai, “O, ko aki kona n iangoia bwa tabetabera ngai ngkai.” Tii aomata ae a taekina anne.

Bwa ti bia tataro ni kabane n aron are e reireiniira Iesu bwa ti na tataro bon au kantaninga ao au tataro n aran te Uea Iesu Kristo, amen.