Ang Ginuong JesuCristo Nagatudlo sa Aton nga Magpangamuyo

Sang 1977, nag-alagad ako bilang misyonero sa Cusco, Peru. Ang kaupod ko kag ako gintugotan nga magdala sa tanan nga mga misyonero sang Cusco zone sa matahum nga mga ginub-an sang Machu Picchu.

Sa katapusan sang amon pagbisita sa mga ginub-an, ang pila sa mga misyonero luyag magkadto sa Inca Bridge, bahin sang alagyan sa bukid. Sa gilayon, nabatyagan ko sa akon tagipusuon ang Espiritu nga nagapamilit sa kon nga indi magkadto didto. Ang alagyan ara sa kilid sang bukid nga may pil-as nga dos mil piye (610 m) ang kataason. Ang pila ka bahin sini may kasangkad lamang agud nga isa ka tawo lang ang makaagi. Kami sang kaupod ko nagsiling sa ila nga wala sang magkadto sa Inca Bridge.

Apang ang mga misyonero nagpamilit nga maglakat. Nangin mabaskog ang mga pagpangabay, kag walay sapayan sa ginpahibalo sang Espiritu sa akon, nagsugot ako kag naghambal sa ila nga magbisita lamang kami sa taytay kon maghalong gid ang tanan.

Nagsulod kami sa alagyan padulong sa Inca Bridge nga naulihi ako sa grupo, kag sa una ang tanan mahinay nga naglakat, subong sa amon ginhisugtan. Dayon ang mga misyonero nagsugod sa paglakat sing madasig kag nagdinalagan. Ginbaliwala nila ang mga pangabay ko nga maghinay. Napilitan ako nga mag-apas sa ila, agud hambalan sila nga magbalik. Naulihi gid ako sing tuman, kag nagdalagan ako sing madasig agud malab-ot sila.

Sang nag-abot ako sa likoan, sa makitid nga alagyan para sa duha ka tawo, nakit-an ko ang isa ka misyonero nga nagasandig ang likod sa mga bato. Ginpamangkot ko sia kon ngaa nagatindog sia didto. Siling niya nakabaton sia sang pagpabatyag nga magpabilin sa sinang lugar sa isa higayon kag dapat nga mag-una ako sa iya.

Nagdalidali ako nga malab-ot ang mga nauna sa akon, gani ginbuligan niya ako nga makalampuwas sa iya, kag nakapadayon ako sang diutay kalayo sa alagyan. Natalupangdan ko nga ang duta may mga dahon nga berde. Nagtapak ako sa duta, didto ko nabal-an, samtang nahulog ako, nga wala sing duta sa idalum sang mga dahon. Desperado ako nga nagpangapyut sa mga sanga nga ara sa idalum sang alagyan. Sa isa ka higayon, nakit-an ko ang idalum, mga dos mil piye sa ubos ko, ang suba sang Urubamba nga nagatabok sa Sacred Valley sang mga Incas. Nangluya ako, kag nabal-an ko nga sa indi madugay mahulog ako. Sa sinang higayon, mabaskog ako nga nagpangamuyo. Malip-ot gid ato nga pangamuyo. Nagsiling ako, “Amay, tabangi ako!”

Ang mga sanga mahuyang kag indi sarang magsuporta sang akon kabug-at. Malapit na ang katapusan ko. Sa sina gid nga higayon sang ako hana nga mahulog, nabatyagan ko ang isa ka mabakod nga kamot nga nagbutong sang akon butkon pasaka. Sa tabang sina nagpadayon ako sa pagsaka kag nakabalik sa alagyan. Ang misyonero nga nagpabilin amo ang nagluwas sa akon.

Apang sa pagkamatuod ang Amay sa Langit ang nagluwas sa akon. Ginpamatian Niya ang akon tingog. Nabatian ko sang una ang tingog sang Espiritu tatlo ka beses, nagsiling sa akon nga indi magkadto sa Inca Bridge, apang wala ako nagpamati. Ginkugmat ako, nagpalanglapsi, kag di-nabal-an ang ihambal. Dayon nadumdoman ko ang iban nga mga misyonero nga nauna sa amon, kag ginpangita namon sila tubtob nga amon sila nasapwan kag gin-istorya sa ila ang natabo sa akon.

Nagbalik kami sa Machu Picchu, mainandamon, kag mahipos. Sa amon pagpauli, mahipos ako, kag ang ideya nag-abot sa akon hunahuna nga ang Dios nagpamati sa akon tingog apang ako wala magpamati sa Iya. May kasakit nga nabatyagan ako bangud sang akon di-pagtuman sa Iya tingog kag sa amo man nga tion may madalum nga pagpasalamat bangud sang Iya kalooy. Wala Niya ako ginhukman, apang sa Iya dakong kalooy, ginluwas Niya ang akon kabuhi (lantawa Alma 26:20).

Sa katapusan sang adlaw, sa tion na sang akon pagpangamuyo, nagpangamuyo ako halin sa akon tagipusuon sa “Amay sang mga kalooy, kag Dios sang tanan nga kasulhay” (2 Corinthians 1:3). Nagpangamuyo ako nga may “sinsero nga tagipusuon, tunay nga tinutuyo, [kag] may pagtuo kay Cristo” (Moroni 10:4).

Sang aga sina nga adlaw, nagpangamuyo ako sa akon mga bibig, sang madali na ako mahulog, nagpangamuyo ako sa Iya halin sa tagipusuon. Ginbinagbinag ko ang akon kabuhi sa sinang tion. Natukiban ko nga sa madamo nga mga okasyon, ang aton Amay sa Langit nangin maloloy-on gid sa akon. Sia nagtudlo sa akon sang madamo nga leksyon sinang adlaw sa Machu Picchu kag sa Cusco, Peru. Ang isa sa pinakadakong mga leksyon amo nga dapat ako magpangamuyo sing dalayon, dalayon magpangamuyo nga “may sinsero nga tagipusuon, tunay nga tinutuyo, kag [nagagamit sang] pagtuo kay Cristo.”

Sa isa ka okasyon ang Ginuong JesuCristo “nagapangamuyo sa isa ka lugar,” kag “sang sia nag-untat, ang isa sa iya mga disipulo nagsiling sa iya, Ginuo, tudloi kami nga magpangamuyo” (Luke 11:1). Dayon gintudloan Niya ang Iya mga disipulo nga magpangamuyo. Kag karon nga adlaw Sia nagatudlo sa aton nga magpangamuyo samtang makit-an naton Sia sa aton mga hunahuna nga nagapangamuyo sa Gethsemane kag nagasiling, “Pero indi ang akon pagbuot ang matuman, kundi ang imo” (Luke 22:42). Kon kamo magpangamuyo, matuod,luyag gid bala ninyo nga “indi ang akon pagbuot ang matuman, kundi ang imo”?

Si Paul nagalaragway kon paano si Jesus nagpangamuyo “sa mga adlaw sang iya pagkamortal,” labi na sa Gethsemane: “Sang sia naghalad sang mga pangamuyo kag mga pakitlooy nga may mabaskog nga pagpanaghoy kag mga luha sa iya nga sarang magluwas sa iya sa kamatayon, kag sia nabatian gani sia nagtuman” (Hebrews 5:7). Kon kamo nagapangamuyo, matuod gid bala nga kamo nagapangamuyo ukon nagahambal lamang sang pangamuyo? Hapaw bala ang inyo mga pangamuyo?

Si Jesus mabaskog nga nagpangamuyo kag naghambal sa Iya Amay. “Natabo ini, nga si Jesus nga ginbunyagan man, kag nagapangamuyo, ang langit nabuksan” (Luke 3:21). Kon kamo nagapangamuyo, mabatyagan bala ninyo nga ang langit nabuksan? San-o ninyo ulihi nga nabatyagan inang kaangtanan sa langit?

Si Jesus naghanda sang Iya kaugalingon nga maghimo sang importanteng mga desisyon paagi sa pagpangamuyo sa Iya Amay.

“Nagtaklad Sia sa bukid agud magpangamuyo, kag nagpadayon sa bilog nga gab-i sa pagpangamuyo sa Dios.

“Kag sang kaadlawon, gintawag niya ang iya mga disipulo: kag sa ila nagpili sia sang napulogduha” (Luke 6:12–13).

Nagahanda bala kamo sa paghimo sang importanteng mga desisyon paagi sa pagpangamuyo sa Langitnon nga Amay? Nagahanda bala kamo sa tion sang pagpangamuyo?

Sang si Jesus nagkari sa kontinente sang America, Sia nagtudlo sa katawhan nga magpangamuyo. “Kag si Jesus nagsiling sa ila: Padayuna ang pagpangamuyo; walay sapayan sini sila wala mag-untat sa pagpangamuyo” (3 Nephi 19:26).

Si Jesus nagadapit sa aton nga “magpangamuyo sing dalayon” (D&C 10:5). Si Jesus nakabalo nga ang aton Langitnon nga Amay nagapamati kag nagahatag sang labing maayo para sa aton. Ngaa nga kon kaisa indi kita luyag nga magbaton? Ngaa?

Sa tion gid nga kita nagasiling, “Amay sa Langit,” mabatian Niya ang mga pangamuyo naton kag nabal-an Niya ang aton mga kinahanglan. Gani ang Iya mga mata kag mga dalunggan karon nagatalupangod sa inyo. Mabasa Niya ang aton mga hunahuna, kag mabatyagan Niya ang aton mga tagipusuon. Wala kamo sang malikum sa Iya. Karon, ang matahum nga butang amo nga Sia nagalantaw sa inyo nga may gugma kag kalooy—gugma kag kalooy nga di naton matungkad. Apang Sia may gugma kag kalooy sa tion gid nga kamo magsiling, “Amay sa Langit.”

Gani ang tion sang pangamuyo tuman, tuman gid ka sagradong tion. Indi Sia isa ka tawo nga magsiling, “Indi, indi ako magapamati sa imo karon kay nagapalapit ka lamang sa akon kon ikaw may problema.” Tawo lamang ang nagahimo sina. Indi Sia isa ka tawo nga magsiling, “Oh, wala mo bala mabal-an kon daw ano kasako ako karon.” Mga tawo lamang ang nagasiling sina.

Kabay nga kita tanan magpangamuyo subong sa gintudlo ni Jesus sa aton nga magpangamuyo amo ang ginalauman kag pangamuyo ko, sa ngalan ni Ginuong JesuCristo, amen.