Irooj Jisōs Kraist Ej Katakin Kōj Kilen Jar

Ilo 1977, iaar jerbal āinwōt juon mijenede ilo Cusco, Peru. Ļeo mōtta im n̄a kar bōk mālim n̄an bōk aolep mijenede ro ilo zone eo an Cusco n̄an mōko rerup an Machu Picchu.

Turinļo̧k jemļo̧kin loļo̧k eo am n̄an moko rerup, jet iaan mijenede ro raar kōnaan etal n̄an Inca Bridge eo, mōttan juon ial in toļ. Ejjab etto, iaar en̄jake ilo būruwō an Jetōb eo dāpij eō bwe in jab etal n̄an ijeņ. Iaļ eo ej pād ilo tōrerein tōl eo ewōr jon̄an in 2,000-ne (600 m) wōtlo̧k ļo̧k. Ilo jet jikin ko ilo iaļ eo depakpak in eaar bwe wōt n̄an juon armej n̄an an eļļāļo̧k ilo juon iien. Ļeo mōtta im n̄a kar jiron̄ er bew kōmij aikuj jab etal n̄an Inca Bridge eo.

Mekarta, mijenede ro raar akweļap bwe kōmin etal. Akweļap ko raar eddoļo̧k, im kōjekdo̧o̧n ta eo Jetōb eo eaar kwaļo̧k n̄an n̄a, iaar ron̄jake kōņaan an ro m̧ōtta im kar jiron̄ er bwe kōm naaj kar etal n̄an bridge eo eļan̄n̄e wōt kōmij aikuj in kar kanooj mejmejkaruo.

Kōm ar deļo̧n̄e iaļ eo ej tōlļo̧k n̄an Inca Bridge eo ilo aō pād ilo tulik tata in kumi eo, im ilo jino in tata, aolep raar kadikdik etetal, āinwōt am kar errā. Innām mijenede ro raar jino etetal lukkuun ekairir im em̧ool ettōr. Raar kōjekdo̧o̧n akweļap ko aō n̄an kadikdik. Iaar en̄jake eddo eo n̄an tōpar er, n̄an ba n̄an er ke kōmij aikuj in kar ro̧o̧l. Iaar pād ettoļo̧k itulikier, im iaar aikuj in kōm̧ōkaj aō ettōr n̄an tōpar er.

Ilo aō kar itok n̄an juon jeer, ilo juon iaļ elukkuun in aidik n̄an an ruo armej etetal ie, iaar loe juon mijenede ej jutak ilo an lūkin atarak ilo dekā ko. Iaar kajjitōk ippān ejaam̧ jutak ijo. Eaar jiron̄ eō bwe eaar bōk juon im̧we n̄an pād wōt ijo ium̧win jidik iien im bwe ij aikuj etal wōt.

Iaar en̄jake libjōrjōr eo bwe in tōpar ro im̧aam, āindein eaar jipan̄ eō eļlāļo̧k jān e, im iaar maron̄ ļeļo̧k jidik im̧aan ilo iaļ eo. Iaar kile bwe ioon bwidej eaar kanooj kūtōk maroro. Iaar likūt neeō anbwijmaron̄ ioon bwidej, kile, ke ij wōtlo̧k, bwe eaar ejjeļo̧k bwidej ium̧win ijo emaroro. Iaar kanooj kōbkōb n̄an kōdāpdep ilo jet ra ko me raar pād ium̧win iaļ eo. Ium̧win jidik iien imaron̄ in kar lo laļ, 2,000 jim̧a ne ilaļū, Urubamba River eo me ej kijoon Sacred Valley eo an Incas. Iaar en̄jake āinwōt eļan̄n̄e kajoor eo aō eaar ilo̧k jān eō, im eaar wōt ilo jabdewōt iien m̧ōkta jān aō maron̄ kar jab dāpdep. Ilo tōre eo, iaar kanooj jar. Eaar juon jar eo ekanooj kadu. Iaar kōpeļļo̧k lo̧n̄iū im ba, “Jema, jipan̄ eō!”

Ra ko raar jab ļap aer dipen n̄an aer an̄inwōļāiki eddo in ānbwinnū. Iaar jeļā ke jem̧ļo̧k eo eaar epaak. Ilo lukkuun tōre eo me iaar itōn wōtlo̧k, iaar en̄jake juon pā ekūjn̄en̄e bōk eō kōn pein im kanōk lōn̄ļo̧k eō. Kōn jipan̄ eo, iaar maron̄ wōnm̧aanļo̧k wōt in kakkōt im bar bōkļo̧k eō n̄an iaļ eo. Mijenede eo me eaar pād ilūk eaar juon me eaar lo̧mo̧o̧ren eō.

Ak ilo m̧ool Jemed Ilan̄ eaar lo̧mo̧o̧ren eō. Eaar ron̄jake ainikiō. Iaar ron̄ ainikien Jetōb eo jilu attan m̧okta, jiron̄ eō bwe in jab etal n̄an Inca Bridge eo, ak iaar jab pokake ainikien eo. Eaar ļo̧kjeņaō, iaar kaimera, im iaar n̄ak in ba ta. Innām iaar kememej ke mijenede ro jet repād im̧aanim, im āindein kōm̧ro kar etal im kappukōte er m̧ae kōm̧ro loe er im ba n̄an er ta eo eaar waļok n̄an n̄a.

Kōm ar ro̧o̧l n̄an Machu Picchu, lukkuun mejmejkaruo, im ilo ikōn̄. Ilo ro̧o̧lļo̧k eo, iaar ikōn̄ wōt, im lōm̧ņak eo eaar itok n̄an aō ļo̧m̧ņak ke Eaar ron̄jake ainikiō ak iaar jab ron̄jake Ainikien. Eaar lōn̄ juon metak em̧wilaļ ilo būruwō kōn̄ aō jab pokake Ainikienn im ilo ejja iien eo wōt juon kōļmenļo̧kjeņ in kam̧m̧oolol kōn tūriam̧o eo An. Eaar jab kojerbale jim̧we eo An ioō, ak ilo An tūriam̧o̧ eļap, Eaar lo̧mo̧o̧ren eō (lale Alma 26:20).

Ilo jemļo̧kin raan eo, ilo iien jar eo aō ippa make, iaar jar jān būruwō n̄an “Jemen tūriamokake, im Anij in kaenōm̧m̧an otemjej” (2 Korint 1:3). Iaar jar “kōn juon bōro eo em̧ool, kōn lukkuun kōttōpar, im wōr tōmak ilo Kraist” (Moronai 10:4).

Ilo jibbon̄ tata in raan eo wōt, iaar jar kōn tiō, im ilo aō kar tin jakoļo̧k, iaar jar jān būruwō n̄an E. Iaar lūn̄ūri mour eo aō n̄an iien eo. Iaar loe ke ilo elōn̄ iien ko, Jemed ilo Ilan̄ eaar lukkuun tūriam̧o n̄an n̄a. Eaar katakin n̄a elōn̄ katak ko ilo raan eo ilo Machu Picchu im ilo Cusco, Peru. Juon iaan katak ko rem̧m̧antata ej ke ij aikuj jar aolep iien kōn juon bōro eo em̧ool, kōn lukkuun kōttōpar, kōjerbal tōmak ilo Kraist.”

Ilo juon iien Irooj Jisōs Kraist “ej jar ilo juon jikin” im “ke emoj, juon iaan ro rikaļoran e ba n̄an E, Irooj, Kwōn katakin kōm kōn jar” (Luk 11:1). Innām Eaar katakin rikaļoor ro An kilen jar. Im kiiō, Ej katakin kwe im n̄a n̄an jar āinwōt ad loe E ilo lōm̧ņak kein ad An jar ilo Getsemane im ba, “A enjab ankil Aō a Am̧ wōt” (Luk 22:42). Ilo am̧ jar, kwōj ke lukkuun in, ilo m̧ool, kōnaan bwe “enjab ankil aō, a Am̧ wōt”?

Paul ej kōmeleleiki wawein an Jisōs jar “ilo iien eo Ear pād ilo wāween kanniōk” eļaptata ilo eļap tata ilo Getsemane: “Ke Ear katok kōn jar ko im akweļap ko, im eļap An lam̧ōj im jan̄ n̄an Eo ear maron̄ in lo̧mo̧o̧ren E jān mej, im em̧ōj eo̧ron̄ E kōn an kautiej” (Hibru 5:7). Ilo am̧ jar, kwōj ke lukkuun in jar ak ba wōt jar ko? Ej ke pejpej jar ko am̧?

Jisōs eaar lukkuun jar im kenono ippān Jemān. “Barāinwōt Jisōs ej peptaij, im ke Ej jar, lan̄ emjaļļo̧k” (Luk 3:21). N̄e kwōj jar, kwōj ke en̄jake āinwōt n̄e lan̄ emjaļļo̧k? N̄āāt eo āliktata kwar en̄jake ekkejel eo ippān lan̄?

Jisōs eaar kapooj E make n̄an kōm̧m̧ani kālet aorōk ko ilo An jar n̄an Jemān Ilan̄.

“Ear ilo̧k ilo toļ bwe En jar, im pād aolepen bon̄ ilo jar n̄an Anij.

“Im ke e raantak Ej ān̄in̄intok to rūkaļoran, im Ej kāālōt jon̄oul im ruo” (Luk 6:12–13).

Kwōj ke kapooje kwe make n̄an kōm̧m̧ani kālet ko raorōk ilo am̧ jar n̄an Jemōm̧ Ilan̄? Kwōj ke kapooje kwe make n̄an juon iien am̧ jar?

Ke Jisōs eaar tok n̄an aelōn̄ in Amedka, Eaar katakin armej ro kilen jar. “Im Jisōs Eaar ba n̄an er: Kom̧in jar wōt; mekarta raar jab bōjrak jān jar” (3 Nipai 19:26).

Jisōs Ej karuwaineneik kōj n̄an “jar iien otemjej” (K&B 10:5). Jisōs Ejeļā bwe Jemād Ilan̄ Ej ron̄ im letok ta eo em̧m̧antata n̄an kōj. Etke jet iien jejjab kōnaan bōke? Etke?

Ilo lukkuun iien eo jej ba “Jemād ilo Ilan̄,” Ej ron̄jake jar ko ad im Ej kea kōn kōj im aikuj ko ad. Im āindein Mejān im Lo̧jiln̄ūn̄ rej kiiō ekkejel n̄an kwe. Ej riiti ļōm̧ņak ko ad, im Ej en̄jake būruwōd. Kwōjjab maron̄ ņooj aolep men jān E. Kiiō, men eo elukkuun em̧m̧an ej bwe Enaaj lo kwe kōn mej in iakwe im tūriam̧o—iakwe im tūriam̧o eo me jejjab maron̄ lukkuun melele kake. Ak iakwe im tūriam̧o rej pād Ippān ilo iien eo wōt kwoba “Jemād ilo Ilan̄.”

Āindein juon iien in jar ej lukkuun, lukkuun iien ekwojarjar. Ejjab juon armej ej ba “Jaab, ijjamin naaj ron̄jake eok kiiō, konke kwōj itok wōt n̄an n̄a n̄e kwōpād ilo airuwaro.” Armej wōt rej āindein. Ejjab juon em̧m̧an eo ej ba, “O, kwōjjab maron̄ lo eo jon̄an aō boub.” Armej wōt rej āindein.

Bwe jān maron̄ jar āinwōt an Jisōs kar katakin kōj kilen jar ej aō kōjatdikdik im aō jar. Ilo etan Irooj Jisōs Kraist, amen.