Kaun Sises Krais Kaweid kiong Kitail en kin Kapakap

Nan pahr 1977, I wia ahi missin nan Cusco, Peru. Ngehi oh iengeio alehdi mweimwei en wahda misineri koaros nan Cusco zone kohla ni kanihmw en mehn mahs kaselel iou Machu Picchu.

Kerenlahng imwin aht mwemweit nan kanihmwo, ekei misineri ko men kohla ni kisin piris me wia kisehn ahl en kodahla pohn nanahu, me adaniki Inca Bridge. Ni ahnsowohte, I kehn nan ahi mohngiong Ngehno ah padahkiong ie Ien deh kohla wasao. Kisin ahlo mih palio dohlo oh ileileki piht 2,000 (610 m). Wasa kei pohn kisin ahloko tehlap ki uwen emen aramas en alu powe. Ngehi oh iengeio eri ndahng irail me se sohte pahn kohla Inca Bridge.

Ahpw, misineri ko ngihtehte ki sen kohla. Pekpek ko laudla, oh mendahte dahme Ngehno padahkiong ieo, I lohdi pahrail oh sapengkin irail me mwahu se pahn mwemweitla ni piriso ahpw ihte se pahn anahne kanaiehng.

Se lel ni ahlen kohla ni piris-o, ngehi me keieu lahs nan aht kapar-o, tep te, koaros alialu wawai, ni duwen aht pwungkidahr-o. Oh mwuri misineri ko tepda seimek oh pil tepier tang. Irail pohnsehsehla ahi peki sen wawai kohlahu. I pein kehn me I anahne pwaki irail, oh padahkiong irail me se pahn anahne pwurasang mwo. I dohsang irail, oh I pahn anahne tenge irail marahra pwe ien pwakiraildi.

Ansou me I lel ni kahp iou, ni ahl iou me nohn tehtik ong meh riemen en alu powe, I diar emen misineri keskesihnen sohte mwekid idengekla nan tinsouwehu pasehng te ni takai ko. I idek reh dahme e keskesihnenki wasao. E sapengkin ie me mehkot ndahng en kesihnen dah te wasa e mih ieo pwe Ien tiengla sang.

I kehn me I anahne pwakiedi me tieng ko, eri e mweidong ie Ien daulih kohla, I ekis dohla sang ni ahlo. I tehkada me pohn pwehl-o me moasulkihla dihpw. I kahkadahng nehi me mih pali koaiok e powe, oh diarada, ni ansou me I pwopwehr-o me sohte pwelen pohn dihpw ko. I nantieng daper ehu rahn tuhke me mih pohn kisin ahlo. Kisin ansou kis I kak kilengdi kilang, mwein piht 2,000 pahnangi, pillap en Urubamba me keredihlasang wasa Sarawi nan Wahu en Incas-o. I kehn me ahi kehl koaros tangasang ie, oh ansou mwotomwot I pahn solah kak kolkol eng. Ahnsouwohte, I kapakap ni ngoang. Kapakap mwotomwot iou. I kihpeseng eweie oh ndahla, “ Semei, sewese ie!”

Kisin rahn tuhke ko sohte kehlail en pwokada uwen toutou en paliwereie. I ese me idin ahi mour me keren. Kisin ansou kis ni ahi kerenieng eh pahn pwopwidier-o, I kehnda pehn aramas kehlail ah daper pehi ie oh apihiehda. Sang ni sawase me lel ieo, I kakehr doudalahng pohn kisin ahlo. Misineri me uhdi oh mweidiehlao me kapitiehla.

Ahpw ni mehlelo, Samatail Nanleng me kapitiehla. E rong ngilei e. I rong ngilen Ngehno pak siluh mwowesango, ni eh padpadahkiong ie Ien deh kohla Inca Bridge, ahpw I sohte peikiheng ngihlo. Uhdahn I pwuriamwei, pohn mesei wekila, oh I sehsela dah I pahn nda. Eri I tamanda misineri me tihenglahr ko, kiht eri doula rapahkinirailla lao se diar iraildi oh kosoiahng irail dahme wiawi ong ieo.

Se ahpw pwurala Machu Picchu, inenen kanahieng, oh sohte me mwesei. Ni aht pwurasangehr aht mwemweit-o I sohte mwesei, oh madamadau iou kohdo nan moangeiet me E karonge ngihleie ah I sohte rong Ih. Mohngiongi medengki pwehki ahi sapeikiong Ih oh ni ansouohte I kaping kalahngan kiong Sapwellime mahk.. E sohte song kadeik ie, ahpw Sapwellime mahk lapalap, me E ketin kapitkila ahi mour. (tehk Alma 26:20).

Ni imwin rahno, ni eh lelehr ahnsou en ahi kapakap, I kapakap sang nan mohngiong ong Sahm me diren kalahngan, oh Koht en koaloaloamwahu” (2  Korint 1:3). I kapakapki “ni mohngiong mehlel, ni ineng mehlel, sang ni pwoson Krais” (Moroni 10:4).

Nimenseng en rahno, I kapakapki sang ni kilineweie, oh ni ahi kereniong mehlahu, I uhd kapakap ong Ih sang nan ahi mohngiong. I uhd madmadau loalki duwen ahi mour sang mwurin ansou o. I diarada me pak tohto, Samatail Nanleng kin mahk ongie. E padahkiong ie soang tohto rahno nan Machu Picchu oh nan Cusco, Peru. Ehu mehkot me keiou kesemwpwal iei me I pahn udahn kin anahne kapakap sang nan ahi mohngiong unsek ansou koaros, oh ni ineng mehlel, [kalaude] ahi pwoson rehn Krais.”

Rahn ehu Kauno Sises Krais wie loulou wasahkis oh ni Ah kaerala Sapwellime loulouwo, emen Sapwellime tohnpadahng ko ahpw patohwan ong, Maing at Kaun, komw ketin padahkiong kiht duwen aht pahn kapakap (Luk 11:1). Ih eri ketin padahkiong Sapwellime wahnpoaron ko duwen kapakap. Eri rahnwet E ketin kaweidkin komwi oh ngehi duwen kapakap nin duwen atail pahn kilengla kilang ni madamadau duwen Eh ketin loulou nan Kedsemeni oh ni Eh ketin Mahsanier, Kaidehkin nsenei, pwe kupwuromwihte en pweida (Luk 22:42). Ni ansou me ke kin kapakap, mehlel ke, mehlelki me “kaidehn nsenomw,ahpw kupwure, en pweida”?

Paul kawehweda iamwomwen Sapwellimen Sises loulouwo, Nan sapwellime mour pohn sampah, ahpw mehlel nan Ketsemeni. Sises ketin loulou oh peki ni ngidingid oh kapitie laudida, oh pil ketin tentenihr iangahki pilen silangi, ong Koht me kak doarehsang ih pwoula (Ipru 5:7). Ni ansou me ke kin kapakap, mehlel ke wie kapakap de ke kosokosoite mwomwen me ke wie kapakap? Ke mehlelki omw kapakap kan?

Sises ketin loulou oh mahsanih ong Semehu. “Kedekedeo, Sises pil ketin iang papdaisla,oh ketin loulou, nanleng pa ritpeseng (Luk 3:21). Ni ansou me ke kin kapakap, ke kak pehm nanleng ah ritpeseng? Iahd lahs en omw kehn omw karanih nanleng?

Sises ketin kaunopada pein IH en kak koasondi ni keneinei ansou me E ketin kapakap ong Seme Nanleng.

“E apw ketdahla pohn dohl ehu pwe en loulou ie,eri ketiket wasao wie loulou ong Koht lao rahnpeseng.

“Nimensengo e ahpw ketin malipepene sapwellime tohnpadahk ko oh ketin pilada sang rehrail me ehk riemen” (Luhk 6:12:13).

Ke kin kaunop uhk mwahu duwen omw pahn wiada koasondi kesemwpwal kan ni ansou me ke kin kapakap ong Samatail Nanleng? Ke kin kaunopada pein kowe ansou kis mwohn kapakap?

Ni ansou me Sises ketdo nan wein America, E padakiong aramas ko kapakap. “Oh Sises ketin mahsani ong irail: wie Kapakap; eri irail sohte uhdisang kapakap” (3 Nephi 19:26).

Sises lukeiong kitail en kin “kapakap ansou kaoros” (D&C 10:5). Sises mwahngih me Samatail Nanleng kin ketin karonge oh ketkiong kitail dahme keieu mwahu ong kitail. Dahme karehda ekei pak kitail sohte kin men aleh ki? Pwehda?

Ni ansou me kitail kin nda, “ Samat me ketiket Nanleng,” E kin ketin karonge atail kapakap akan oh e kin ketkiong kitail atail anahn akan. Eri sihlangi oh karonge kan koaros sohpai uhk. E mwahngih atail madmadau kan,, oh kin ketin kehn atail mongiongitailkan . Ke sohte pahn kak ekihsang IH mehkot . Met, dahme kesemwpwal iei Ah kak irong uhk ki sihlangi limpok oh mahk—limpok oh mahk me kitail sohte kak wehwehki mwahu. Apw limpoak oh mahk kin ieiang IH ni ansouohte ni omw kin nda, “Semei Nanleng.”

Eri ansoun kapakap udahn, mehlel udahn wia ansou me sarawi. E sohte wia aramas en kosoia, “Soh, I sohte pahn rong uhk met pwe ke kin kohdo te rehi ansou me kek lel omw kahpwal.” Kitail aramas te me kin wia me. E sohte wia aramas en kosoia, “Eri, ke sohte wehwehki uwen ahi kediropw ansouwet.” Kitail aramas te me kin nda met.

Kitail eri kin kapakap nin duwen Sises ah ketin padahkiong kitailehr, iei ihme wia ahi koapworoapwor oh kapakap, ni mwaren Kaun Sises Krais, amen.