Ua Aoao Mai i Tatou e le Alii o Iesu Keriso ina ia Tatalo

I le 1977, sa ou auauna atu o se faifeautalai faamisiona i Cusco, Peru. Sa ma maua ma lau soa le faatagaga e ave ai faifeautalai uma o le sone a Cusco i mea matagofie na faaleagaina i Machu Picchu.

E latalata atu i le faaiuga o la matou asiasiga i mea na faaleagaina, sa mananao nisi o faifeautalai e o i le Alalaupapa o Inca, o se vaega o le auala i le mauga. Sa vave, ona ou lagona le taofia o au e le Agaga ina ia ‘aua nei o ai iina. Sa i autafa o se mauga le auala faatasi ai ma se tofe e 2,000-futu (610 m) . I nisi o eria sa lautele le auala mo na o le tagata e toatasi e sopoia i le taimi. Sa ma ta’u atu ma lau soa ia i latou e le tatau ona matou o i le Alalaupapa o Inca.

Peitai, sa mananao pea faifeautalai ina ia matou o. Sa oo ina faateteleina aioiga ma e ui i le mea na ta’u mai e le Agaga ia te au, sa ou usitai i le uunaiga a faifeautalai ma ta’u atu ia i latou o le a matou asiasi i le alalaupapa pe afai o le a matou faaeteete.

Sa matou ulufale atu i le auala e taitai atu i le Alalaupapa o Inca faatasi ai ma a’u i le tausiusiuga o le vaega, ma i le taimi muamua sa lemu le savavali o tagata uma, e pei ona autasi i ai. Ona amata lea ona saoasaoa tele le savavali a faifeautalai ma tamomoe foi. Sa latou le faalogo i la’u talosaga atu ina ia faifai lemu. Sa ou lagona e tatau ona ou tulituli atu ia i latou, e ta’u atu ia i latou e tatau ona matou toe foi. Sa ou mamao i tua o i latou, ma sa tatau ona ou tamoe faatopetope ina ia o’o atu ia i latou.

Ina ua ou o’o atu i se pioga, sa ou maua ai i se auala e vaiti tele e savavali ai ni tagata se toalua, se faifeautalai o loo tu ma lona papatua i ma’a. Sa ou fesili ia te ia pe aisea ua ia tu ai iina. Sa ia fai mai ia te a’u, sa ia maua se uunaiga e tu ai i le vaega lena mo se taimi, ma e tatau ona ou alu pea.

Sa ou lagona le manao ina ia tulituli atu ia i latou na muamua atu o matou, o lea na ia fesoasoani ai ina ia ou pasia o ia, ma sa mafai ai ona ou oo atu i le mamao teisi atu i lalo o le auala. Sa ou iloa sa lilofia le eleele i laau. Sa ou tuuina lou vae taumatau i le eleele, ma le iloaina, a o o’u pau atu, e leai se palapala o loo i lalo o laau. Sa ou pipii atu ma le popole i nisi o lala sa i lalo ifo o le auala. Mo se taimi, sa mafai ona ou vaai i lalo, i le 2,000 futu i lalo ifo o au, i le Vaitafe o Urubamba lea e tafe atu i le Vanu Paia o le Incas. Sa ou lagona sa pei ua alu ese atu lou malosi, ma e toe o se taimi ona le mafai lea ona ou toe pipii. I lena taimi, sa ou tatalo malosi ai. O se tatalo puupuu lava. Sa ou tatala lou gutu ma faapea atu, “Tama, fesoasoani mai ia te au!”

Sa le lava le malolosi o lala e lagolago ai le mamafa o lo’u tino. Sa ou iloa ua lata ona ou oti. I le taimi tonu lea o le a ou pau ai, sa ou lagonaina se lima malosi o tago mai i lou lima ma toso atu a’u i luga. Faatasi ai ma lena fesoasoani, sa mafai ona ou faaauau pea ona tauivi ina ia toe pe’a i luga o le ala. O le faifeautalai lea sa mulimuli o le tagata tonu lea sa faasaoina au.

Ae o le mea moni, sa faasaoina a’u e lo tatou Tama oi le Lagi. Sa ia faafofoga mai i lo’u leo. Sa faa-tolu ona ou lagonaina le leo o le Agaga i le taimi muamua, o ta’u mai ia te a’u ina ia aua nei alu i le Alalaupapa o Inca ae sa ou le usitaia lena leo. Sa ou te’i, ma sa ou sesega, ma ou te lei iloa le tala e fai atu. Ona ou manatua lea o isi faifeautalai na muamua atu ia i maua, lea sa ma o atu ai loa ma saili i latou seia oo ina maua i latou ma tau atu ia i latou le mea na tupu ia te au.

Sa matou toe foi atu i Machu Picchu, ma le faaeteete tele ma i le filemu. I le malaga e toe foi atu, sa faaauau pea ona ou filemu, ma sa oo mai le manatu i lou mafaufau sa Ia gauai mai i lou leo ae sa ou le gauai atu i Lona siufofoga. Sa i ai se tiga loloto i lou loto mo le le usiusitai i Lona siufofoga ma i le taimi lava e tasi o se lagona o le loto faafetai mo Lona alofa mutimutivale. Sa Ia le faaoo mai Lona faamasinotonu i luga o au, ae i Lona alofa mutimutivale tele, sa Ia faasaoina lou ola (tagai Alema 26:20).

I le faaiuga o le aso, ina ua oo i le taimi o lou tatalo patino, sa ou tatalo mai i lou loto i “le Tama e ona le alofa mutimutivale, ma le Atua foi e ana le faamafanafanaga uma” (2 Korinito 1:3). Sa ou tatalo “ma le loto faamaoni, ma le manatu moni i ai, ma le faatuatua ia Keriso” (Moronae 10:4).

I le taeao po o lena lava aso, sa ou tatalo ai ma ou laugutu, ma ina ua tauau ina ou fano, sa ou tatalo mai le loto ia te ia. Sa ou mafaufau loloto i lou olaga i lena tulaga. Sa ou iloa ai i le tele o taimi, sa tele le alofa mutimutivale o le Tama oi le Lagi ia te au. Sa Ia aoao mai ia te au le tele o lesona i lena aso i Machu Picchu ma i Cusco, Peru. O se tasi o lesona silisili e faapea e tatau pea, ona ou tatalo pea “ma se loto faamaoni, ma le manatu moni i ai, ma le faatinoina o le faatuatua ia Keriso.”

I se tasi o taimi “ua tatalo [le Alii o Iesu Keriso i le tasi mea],” ma “[ina] ua uma, ona fai mai lea ia te ia o le tasi o lona au soo, Le Alii e, ia e aoao mai ia te i matou i tatalo” (Luka 11:1). Ona Ia aoao lea o Ona soo ina ia tatalo. Ma i le aso, ua Ia aoao mai ia te oe ma au ina ia tatalo a o tatou vaai ia te Ia i o tatou mafaufau o loo tatalo i Ketesemane ma faapea atu, “A e aua le faia lo’u loto, a o lou finagalo” (Luka 22:42). Pe a e tatalo, faamata o loo e manao moni ma faamaoni ia “le faia lo’u loto, a o lou finagalo”?

Sa faamatala e Paulo le ala na tatalo ai Iesu “i ona po na tino tagata mai ai,” aemaise lava i Ketesemane: “O ia lenei sa tatalo atu i ona po na tino tagata mai ai, ma aioi atu ma le tagi tele ma loimata i le na mafaia ona faaola ia te ia nai le oti, na faafofogaina foi o ia i le mea na ia fefe ai” (Eperu 5:7). Pe a e tatalo, faamata o loo e tatalo moni lava pe tau lava o le faia o tatalo? Pe o e faafoliga i au tatalo?

Sa tatalo malosi Iesu ma talanoa i Lona Tama. “Ona papatisoina ai lea o Iesu, ua tatalo ia, ona faaavanoaina ai lea o le lagi” (Luka 3:21). Pe a e tatalo, mata e te lagonaina e pei o loo tatala mai le lagi? O le a le taimi mulimuli na e lagona ai lena sootaga ma le lagi?

Sa saunia e Iesu o Ia Lava ina ia faia ni faaiuga taua e ala i le tatalo i Lona Tama.

“O aso lava ia ua maliu ae ai o ia i le mauga e tatalo, ua aoina lana tatalo i le Atua.

“Ua ao foi, ona valaau atu lea o ia i ona soo: ua filifilia e ia ni o latou e toasefulu ma le toalua” (Luka 6:12–13).

Mata e te saunia oe lava e faia ni faaiuga taua e ala i le tatalo atu i lou Tama Faalelagi. Mata e saunia oe lava mo se taimi o le tatalo?

Ina ua afio mai Iesu i le konetineta o Amerika, sa Ia aoao tagata ina ia tatalo. “Ma sa fetalai atu Iesu ia te i latou: Ia outou tatalo pea; e ui i lea sa le tuua lava le tatalo atu” (3 Nifae 19:26).

Ua valaaulia i tatou e Iesu ina ia tatalo “e le aunoa” (MF&F 10:5). E silafia e Iesu e faafofoga ma tuuina mai e le Tama Faalelagi mea e sili ona lelei mo i tatou. Aisea tatou te le mananao ai i nisi taimi ina ia maua mea ua tuuina mai e le Tama Faalelagi? Aisea?

I lena lava taimi tatou te faapea atu ai, “Tama oi le Lagi,” Na te faafofoga mai i a tatou tatalo ma e mafaufau ia i tatou ma o tatou manaoga. Ma o lea e fesootai mai ai Ona fofoga ma Ona taliga ia te oe i le taimi nei. Na te faitauina o tatou mafaufau, ma Na te lagonaina o tatou loto. E le mafai ona e natia se mea mai ia te Ia. Ia, o le mea matagofie e Na te silasila mai ia te oe ma ni fofoga o le alofa ma le alofa mutimutivale—le alofa ma le alofa mutimutivale e le mafai ona tatou malamalama atoatoa i ai. Ae e ia te Ia le alofa ma le alofa mutimutivale i le taimi lava e te faapea atu ai, “Tama oi le Lagi.”

O lea la o le taimi o le tatalo, o se taimi e paia tele. E le o Ia o se tagata e faapea mai, “Leai, ou te le faalogo atu nei ia te oe, aua e na o taimi lava e te oo ai i faigata e te sau ai ia te a’u.” E na o tagata e faia lena mea. E le o Ia o se tagata e faapea mai, “Oi, e le mafai ona e vaai faalemafaufau i lou pisi i le taimi nei.” E na o tagata e faia lena mea.

Tau ina ia tatou tatalo uma e pei ona sa aoao mai i tatou e Iesu ia tatalo ai, o lau tatalo ma le faamoemoe lea i le suafa o le Alii o Iesu Keriso, amene.