Ewe Chon Echikar Mi Nap

Ew wachemuken nifang seni ai sai fetan—uwa tongeni kaeo seni fefinei kewe ir mei toropas fetan won fonufan. Ese wor mettoch epwe usun seni ach pusin angang fengen won pouch, nene fengen non mesach, o pwan achu fengeni netipach.

Nupwen ew ekei fansoun, emon meinap non ach ewe mwichen Fin Anisi a eis, “Mei wor mettoch kich fefin sipwe ekipwichi fengeni?”

Uwa ponuweni, “Ewer!” usun chok an Preseten Russell M. Nelson ewe afanafan itenapan “Ew Tungor Ngeni Fefinei Kewe” a tonong non mokurei. Preseten Nelson a aiti kich, “Kich sia men aneani epwe wor Fefin, ekewe ra fen unus eoch ar sinei me wewe non ekewe annuk mei ennet an Kraist.”¹

Iei usun an Nifai awewei ekewe annuk mei ennet an Kraist:

“Pun asamen ewe tit minne oupwe tonong non iei aier me paptais ren konik; iewe mwirin epwe feito ew omusomusen ami kewe tipis seni ekkei me seni ewe Ngun mi Fel. …

“Iwe iei … upwe eis ika meinisin a wesino? Ngengeni, upwe apasa ngenikemi, Apw; pun ouse mwo feito ikei tiwenon chok ika epwe me ren ewe kapasen Kraist fiti pochokunen nuku non I, unusen anukunuk won ekewe nimenimochun fofforun I ewe mi manaman ne amanaua kich.

“Ina minne, oupwe nikitu fiti tipepos non Kraist, epwe wor ami unusochun saramen apinukunuk, me ew tongen Kot me aramas meinisin. Ina minne, ika oupwe fieno mwemi, kametip won ewe kapasen Kraist, me nikitu tori nesoponon, nengeni, iei anon ewe Sam: Oupwe weri ewe manau esemuch.

“… Iei ewe aan; iwe ese pwan wor ew aan ika it a kawor me fan nang ren minne aramas repwe tongeni manau non ewe muun Kot. Iwe iei, nengeni, iei ewe nongonong mi ennet an Kraist.”²

Pwata a auchea ngeni kich epwe wor ach foun nongonong non ach wewe non ekei nongonong?

Fansoun chommong, uwa churi Fiin ach ei mwichefenin Aramas Mi Pin Non Fansoun Soponon ra weires ne kutta anninis, nge rese fen sapengeni Ii ewe Anaemon mei tongeni ngenir ewe nifangen anininis esemuch. Fan chommong ra kutta ar repwe weweiti non “ewe neni mei amwarar oh wachemuk.”³

Nupwen sia awatena ach weweiti ekewe annukun Kraist, sia mutir ne kuna pwe a napeno anononun ach weweiti ewe “kokkotun pwapwa esemuch.”⁴Iwe sia pwan kuna pwe ach ewe chon Amanau, Jises Kraist, Ii ewe foun nongonongun ei kokkot.

Fansoun kich sia aea ekewe annukun Kraist non manauach, ach tong non ach ewe chon Amanau epwe napeno. Nge sipwe pwan kuna pwe “ika mo awor ach tipefesen, kich meinisin sipwe tongeni angei tufich seni ewe achasefan esemuch.”⁵ Sia pwan sinei pwe Ii ach ewe foun nongonong—“Ewe foun nongonongun ach ewe Chon Angaseno …ewe foun fau mei pochokun, ew foun nongonongun manauach esapw tongeni kiteterino.”⁶

Epwe ifa usun an ekei annuk epwe afieieochu kich non ach sipwe kutta manau mei kinamwe pwan wor ach weweiti ach sipwe achocho ne nikitu non pwapwa non fansoun ach ei manauan inis?

Upwe tungor sipwe poputa won anon Nifai, a apasa, “fiti pochokunen nuku non I, unusen anukunuk won ekewe nimenimochun fofforun I ewe mi manaman ne amanaua kich.”⁷ Ach nuku non Jises Kraist a ngeni kich ach pochokun pwe sisapw kuf ren sokopaten metoch mei weires.

Mei ennet, pwe kich sia kuna pwe a fokkun onononono oh pochokuneno ach nuku non Semach Won Nang me Neun murin ach kuna me mefi riaffou me weires. Upwe ngeni kemi unungat awewe.

Akawein, ewe chon Amanau, ewe Chon Echikar Mi Nap, awor an pochokun an epwe siwini netipach oh pwan epichikicheno seni ach netipechow ren pokiten ach tipis. Nupwen an ach ewe Chon Amanau a aiti ewe fiin Samaria me nukun ewe ito, Ii afen sinei pwe neminewe emon aramas mei tipis napanap. Nge, “ewe Samol a nengeni non netipan,”⁸ Iwe Ii a sinei pwe neminewe mei netipeoch.

Nupwen an ewe fefin a feito ngeni ewe ito, Jises—ewe ionapen konikin manau—A apasa, “Wato upwe unumi.” Usun an ach ewe chon Amanau a porous ngeni kich non ewe mongungu kich sipwe esina fansoun ach feito ren Ii—Pokiten Ii mei sinei kich. Ii afen churi kich ian kich mei nonom ian. Nge pwan pokiten Ii ewe Anamemon, nge pwan Ii chok ewe chon nifang ngeni kich. Ii mei wor ewe wewe ren. Pokiten Ii afen mefi ach metek, Ii mei tongeni ngeni kich ewe nifangen konikin manau nupwen ach sipwe kuta ren Ii. Iei met a aiti ngeni ewe fiin Samaria a apasa “Ika kopwe chok sinei minne Kot epwe fang ngonuk o io ei mi tingoreok kopwe aunu konik, kopwe chok tingorei, iwe epwe ngonuk ewe konikin manau.”

Murin an ewe fiin Samaritan churi ewe chon Amanau, a “nikitatiw an we ruumen konik, a niwinsefanino non ewe teninimw o a ereni ekkewe aramas ra nom ikewe.”

“Oupwe feito nengeni ewe mwan a pwar ngeni ei mettoch meinisin ua fen fori. Met, epwe iei Ii ewe Kraist?”

Neminewe a kuna ew pekin pwarata—a pwan poputa ne angei tufichin ewe konikin—me neminewe a mochen epwe pwarata ngeni aramas usun ewe manaman.⁹

Nupwen kich sia feito ren Ii non tipetekisonun netipach—ina mo ika mei chou netipach ren ach mwanino, tipis, me foffor mei ngaw—Ii mei tongeni siwini kich “pokiten Ii mei wor an pochokun an epwe tongeni amanaua kich.”¹⁰ Nge ika awor akasiwin non netipach, kich sia tongeni, usun ewe fiin Samaritan, feino ngeni sopuch kewe—imwach kewe, ach nenien sukkun, me ach nenien angang—me pwarata usun Ii.

Aruwen, nupwen ewe Chon Echikar Mi Nap a ngeni kich ach kinamwe o apochokuna kicheno seni ach riafou mei feito seni an aramas foffor mei ngaw ngeni kich. A chommong fefin uwa kapas ngenir ra mefi chou seni ekei napanap. Iwe ar kewe pon mei pin mei fetan seni ewe Tempel a ew anen ngaseno seni ekei riafou. Awor riafou seni tano ar pon mei pin, a metek netiper, oh pwan morono ar nukuchar. Chomong ir ra feiengaw seni nisou, me kapas mei ngaw, pwan chuwererun fos mei ngaw, seni an ekoch foforungaw.

Ekei foffor, esapw seni turun netiper, a esenipato an chommong repwe mefi metekin ar tipis me saaw ren ar foffor. Iwe seni nafengawen ar repwe weweiti onononun metekin netiper seni ekei foffor, chommong ra chok sosot ne ireno ar kewe riaffou non netiper.

Epinukuk me chikareno ese nonom non ewe nenien rochopwak mei monomon. Nge non ewe saram me tong seni ach ewe chon Amanau, Jises Kraist.¹¹ Elder Richard G. Scott an pesepesen aninis ngeni kich a apasa “Ika pwe en mei nimenimeoch, ese wor om tipis napanap, kosap riafou fan iten an ekoch tipis. … En mei pwan tongeni mefi tong. …Nge kosap mefi pwe en kopwe wisen uwei choun ekewe foffor mei ngaw. … Nupwen om ka fori metoch mei tongeni anisi ion en mei tongei, isetiw choun ekewe foffor ren pechen ewe Chon Amanau. …Nupwen kopwe fori, kosap chok mefi ngaseno nge epwe pwan wor om pwarata ren om nuku non ewe pochokun mei nomw ren ach ewe chon Amanau an epwe kamworono choun tipis seni ion en mei tongei nupwen an epwe wor aier oh aneasochis.”

Iwe apwan sopeino: “Om chikar epwe unuseoch seni om nuku non Jises Kraist pwan seni ewe pochokun mei nonw ren Ii, seni An ewe Achasefan, an epwe amorono kinasen ekewe fofor mei ngaw o pwan mwan.”¹²

Ika pwe oua mefi pwe iei usun nonnomumi, pwi kana, meni ami chikar epwe ekis mang. A pwan anongonong non om achocho ne iotek ren epwe wor amwen, pwan kuta aninnis seni  chon pristut mi mi kefin. Ren ami kaeo ne poraus fengen, fori annuk, meni pwan kutta aninnis seni chon ani angangen aninnis non ekei sokkun. Tumunufichi tufichin nguun mei fokun auchea! Chemeni napanapemi mi pin: ami noun emon sam me in seni nang. Oupwe nukuchar non kokkotun sememi ese much. Sopweno iteiten ran ne aweteno om wewe  usun ekkewe nongonongun ewe kapas allim an Jises Kraist. Achocho non om nuku iteiten ran pwan un seni an ewe Chon Amanau ewe iton konikin manau Anongonong non ewe nifangen ewe pochokun mei kawor ngeni kich seni ekewe annuk me pwon. Mut ngeni ewe pochokunen echikar seni ewe Chon Amanau pwan An ewe niffangen Achasefan epwe tonong non manauom.

Aunungatin, ewe Meinapen chon Echikar epwe angasok me tumunuk non om fansoun metekin riafoun non ei “manauan iei,”¹³ ren usun an epwe wor wate osukosuk, wate semwenin non ekiek, semwenin inis, semwenin metek, me pwan mano. Ngang uwa keran pwan sisinei emon fopun mei fokkun amwarar a iteni Josie mei uri semwenin non ekiek. Iei ekis tutunapan anen manauan ngeni an a kuna chikar sefan ren usun an aporousa ngeni ei:

“Nupwen a tori wateno rochopwaken ai ei semwen, chon ai famini ra aita ngeni ‘ranin nepwun’ Ekei ran a poputa nupwen akon wachemuk sokopaten metoch a tonong non mokurei nge apwan mecheres ai upwe mefi me ai usapw mefi sokopaten akurang, metoch ngang mei tongeni atapa, ika pwan saram. Iei popunapan riafoun non ai ekiek. Awor ew ran usapw tongeni namenano.

Fansoun nepoputan fetanin ai ei riafou, iwe a esenipato ai upwe kon mefi wate ai noninen ren. Uwa chemeni ai mesikesik, a surutiw chonun mesei nge uwa resin ngasangas. Nge ei ukukun wachemuken riafou ese aukuk ngeni ukukun metekin ai uwa kuna inei we an a wesen wate an osukosuk seni an mochen anisi ei.

“Ai semwenin ekiek a esenipato metekin netipan inei we. Nge am ouse mo sinei pwe iwe mo non onononun ewe rochopwak, am wa chok kanengeni am pwe ne mefi ew wachemuken feioch.

“Iwe nesoponon murin ew awa, inei we a eniwini ne ngunungunu pwe ‘Ii epwe feri ese pwan nifinifin an epwe angei seni ei ai we riafou.’

“Nge non ewe fansoun, ewe rochopwak afen napeno, nge uwa ekieki pwe use chiwen tongeni ewe ukukun riafou, iwe fen pwan non chok ewe fansoun a fis ew metoch mei fokkun amwarar.

“Uwa mefi ew sokun pochokun a tori non inisi. Iwe, ewe sokun pochokun a napeseni pusin an inisi,’¹⁴Uwa fokkun apasa ngeni inei we non ai nukuchar engon me nimu foun kapas a siwini manauei ren ai upwe ponuweni an ewe epini ne eniwini an mochen angei seni ei ai we riafou. Uwa apasa, ‘Kose pwan chiwen osukosukok, pwe afen wor Emon a angei ai ei riafou.’”

Seni non ewe nenien rochopwakun riafoun semwenin ekiek, Josie a kokori ewe pochokunen an epwe pwarata an nuku non Jises Kraist me An ewe Achasefan.

Ina mo an neminewe ese unuseoch an chikareno non ewe ran, nge afen angei ewe saramen epinukunuk non fansoun rochopwak. Iwe, ikenai, a angei aninis seni foun nongonong non an weweiti ekewe annuk an Kraist nge apwan apwan ekesiwineno iteiten ran seni an ewe chon Amanau ewe konikin manau. Josie a sopeino an fetan ngeni an epwe chikareno nge apwan sopeino non an nuku non ewe Meinapwen chon Echikara kich, neminewe a tongeni epwene wisen anisi ekoch. Nge a apasa “Non fansoun a napeno ai mefi rochopwak, Ngang uwa chok anonga ai chemeni pweteten An umoumoch. Ikei met uwa efisi pwe ewe saram mei emweni ei non fansoun ai riafou.”¹⁵

Pwi kewe, Uwa pwarata pwe—

En kosapw chiwen sopeino ne uwei chou om netipechou seni tipis—non om anaemon.

En kosapw chiwen uwei chou ewe metek a fisito seni an ekewe ir mei foforungaw—non om anaemon.

En kosapw chiwen mefi ekewe metekin ei manauen iei—non om ana emon.

Ewe Chon Amanau A tingor:

“Ousap niwin ngeniei iei, me aier seni ami kewe tipis, me siwin, pwe upwe tongeni echikarakemi?”

“… Ika opuwe feito ngeniei oupwe angei manau esemuch. Nengeni, pei mi umoumoch a keitiuu ngenikemi, iwe ion chok epwe feito … I upwe etiwa; me efeioch ir ekkewe ra feito rei.”¹⁶

“[Ii] epwe feri ese pwan nifinifin metoch ren an epwe angei ei riafou sonuk.” Nge mei ennet, “[Ii] afen angei.” Fan itan Jises Kraist ewe Chon Echikar Mi Nap, amen.