Tus Thawj Kws Kho Mob

Qhov cib fim uas kuv nyiam heev yog kev ncig mus ub mus no—kom kawm los ntawm kuv cov viv ncaus nyob thoob plaws lub ntiaj teb no. Tsis muaj ib yam dab tsi zoo npaum li kev koom siab koom ntsws nrog nej sawv daws.

Muaj ib zaug, ib tug thawj coj hauv Koom Haum Niam Tsev nug hais tias, “Puas muaj ib yam tseem ceeb uas cov poj niam yuav tsum tsom ntsoov rau?”

Kuv teb hais tias, “Muaj mas!” thiab ua rau kuv xav txog Thawj Tswj Hwm Russell M. Nelson zaj lus “Kev Thov rau Kuv cov Muam.” Thawj Tswj Hwm Nelson qhia hais tias, “Peb xav tau cov poj niam uas to taub Khetos cov lus qhuab qhia tiag tiag.”¹

Nifais piav txog Khetos cov lus qhuab qhia li no hais tias:

“Vim lub qhov rooj uas nej yuav tsum nkag yog txoj kev hloov siab lees txim thiab txoj kev ua kev cai raus dej; thiab tom qab ntawd yuav los ib txoj kev zam nej tej kev txog kev txhaum los ntawm hluav taws thiab los ntawm tus Vaj Ntsuj PligDawb Huv. …

“Thiab nim no … kuv yuav nug tias seb txhua yam puas tau tiav? Saib seb, kuv hais rau nej tias, yeej tsis tau tiav; vim nej tsis tau los deb npaum li no yog tsis muaj Khetos txoj lus uas nrog txoj kev ntseeg nraim … nws, vam khom tag nrho rau tej hauj lwm zoo ntawm nws tus uas muaj hwj chim cawm tau.

“Yog li ntawd, nej yuav tsum thawb mus lawm tom hauv ntej nrog txoj kev ntseeg Khetos [uas khov kho], muaj ib txoj kev cia siab uas ci kawg nkaus, thiab muaj ib txoj kev hlub ntawm Vajtswv thiab ntawm tib neeg sawv daws. Yog li ntawd, yog tias nej yuav thawb lawm tom hauv ntej, mloog nkaus rau Khetos tej lus, thiab tiv kom mus txog thaum kawg, saib seb, Leej Txiv hais li no tias: Nej yuav muaj txoj sia nyob mus ib txhis.

“… Qhov no yog txoj kev; thiab yeej tsis muaj dua lwm txoj kev los sis lwm lub npe uas muaj nyob hauv qab ntuj no uas tib neeg yuav raug cawm dim tau mus nyob rau saum Vajtswv lub nceeg vaj. Thiab nim no, saib seb, qhov no yog Khetos txoj lus qhia.”²

Vim li cas peb thiaj yuav tsum to taub tej ntsiab cai no tiag tiag?

Kuv pheej ntsib cov poj niam uas yog Haiv Neeg Ntseeg hauv Hnub Nyoog Kawg uas xav tau kev pab heev, tiam sis lawv tsis thov tus uas pab tau lawv mus ib txhis li. Ntau zaus lawv nrhiav kev txawj ntse nyob hauv “lub tsev loj thiab dav.”³

Thaum peb kawm ntxiv txog Khetos cov lus qhuab qhia, peb kawm tias peb haj yam to taub txog Vajtswv “txoj hau kev zoo siab.”⁴ Peb kuj paub tias peb tus Cawm Seej, Yexus Khetos, yog tus tseem ceeb tshaj plaws ntawm txoj hau kev ntawd.

Thaum peb kawm siv Khetos cov lus qhuab qhia hauv peb lub neej, peb txoj kev hlub tus Cawm Seej loj hlob tuaj. Thiab peb paub tias “txawm peb xav tias nyias txawv nyias, peb txhua tus yuav tsum txais tau tib txoj Kev Theej Txhoj uas nyob mus ib txhis.”⁵ Peb paub tias Nws yog peb lub hauv paus—“lub pob zeb ntawm peb tus Txhiv Dim, … ib qho chaw cuab zog uas yog [peb] cog rau saud lawm [peb] yuav vau tsis tau.”⁶

Cov lus qhuab qhia no yuav foom koob hmoov li cas rau peb thaum peb nrhiav kev nyob kaj siab lug thiab kev txawj ntse thiab siv zog nyiaj kom mus txog thaum kawg nyob hauv peb lub neej hauv lub ntiaj teb no?

Raws li Nifais qhia, kuv xav kom peb muaj “kev ntseeg nraim [Khetos], vam khom tag nrho rau tej hauj lwm zoo ntawm nws tus uas muaj hwj chim cawm tau.”⁷ Peb txoj kev ntseeg Yexus Khetos ua rau peb muaj peev xwm kov yeej txhua yam teeb meem.

Muaj tseeb tiag, thaum peb raug teeb meem, peb txoj kev ntseeg yuav loj tuaj thiab peb haj yam yuav sib raug zoo nrog Leej Txiv Saum Ntuj Ceeb Tsheej thiab Nws Leej Tub. Cia kuv qhia txog peb qho piv txwv rau nej.

Qhov thib ib, tus Cawm Seej, tus Thawj Kws Kho Mob, muaj hwj chim hloov peb lub siab thiab muab kev nplij siab rau peb kom txhob muaj kev tu siab uas los ntawm peb tej kev txhaum. Thaum tus Cawm Seej qhia tus poj niam Xamalis nyob ntawm lub qhov dej, Nws paub txog tus poj niam tej kev txhaum. Tiam sis, “tus Tswv saib neeg lub siab,”⁸ thiab Nws paub tias tus poj niam muaj ib lub siab xav kawm.

Thaum tus poj niam tuaj txog lub qhov dej, Yexus—uas yog cov dej uas muaj txoj sia—hais tias, “Cev me ntsis dej rau kuv haus.” Ib yam li ntawd, peb tus Cawm Seej yuav siv ib lub suab peb paub thaum peb los cuag Nws—vim Nws paub peb zoo li cas. Nws pab peb txawm peb yog neeg zoo li cas los xij. Thiab vim Nws yog Yexus thiab Nws tau theej peb lub txhoj, Nws thiaj li to taub peb. Vim Nws tau raug peb txoj kev mob, Nws thiaj muab tau cov dej uas muaj txoj sia thaum peb nrhiav. Nws tau qhia tus poj niam Xamalis li no thaum Nws hais tias, “Yog koj paub yam uas Vajtswv yuav pub rau koj, thiab paub tus uas thov dej ntawm koj haus yog leej twg, ces koj yeej yuav thov nws, thiab nws yuav muab cov dej uas cawm txoj sia rau koj haus.” Thaum tus poj niam to taub, nws muaj kev ntseeg thiab nug hais tias, “Tus Tswv, thov koj muab cov dej uas koj hais ko rau kuv haus kom kuv yuav tsis nqhis dua.”

Tom qab tus poj niam Xamalis ntsib tus Cawm Seej li no, nws, “txawm muab nws lub hub dej tso plhuav tseg; nws rov qab mus rau tom nroog, thiab nws hais rau cov neeg hauv nroog hais tias,

“Nej cia li mus saib tus txiv neej uas nyob tod saib, nws qhia txhua yam uas kuv tau ua tas los lawm huv tib si rau kuv mloog! Nws puas yog tus Mexiyas?”

Nws tau txais ib qho tim khawv—nws tau pib txais cov dej uas cawm txoj sia—thiab nws xav ua tim khawv txog Yexus rau lwm tus.⁹

Thaum peb txo hwj chim thiab muaj siab xav kawm es peb los cuag Nws—tsis hais thaum peb ua yuam kev ntau los yog ua txhaum ntau los yog—Nws hloov tau peb lub siab, “vim nws muaj hwj chim cawm peb dim.”¹⁰ Thiab thaum peb hloov siab lawm, peb yuav ua zoo li tus poj niam Xamalis mus ua tim khawv txog Nws, mus rau peb lub nroog—peb lub tsev, lub tsev kawm ntawv, thiab qhov chaw ua hauj lwm—kom ua tim khawv txog Nws.

Qhov thib ob, tus Thawj Kws Kho Mob yuav nplij peb lub siab thiab txhawb peb lub zog thaum peb raug mob dhau los ntawm lwm tus txoj kev ua tsis ncaj ncees. Kuv twb tau sib tham nrog ntau tus poj niam uas ris tej lub nra hnyav heev. Lawv txoj kev khi lus hauv lub tuam tsev yog ib txoj kev taug uas nyuaj heev rau lawv txais txoj kev kho mob. Ua rau lawv tu siab vim tau muab txoj kev khi lus tso tseg, thiab ua rau lawv lub siab tawg tag, thiab tsis muaj kev cia siab. Ntau tus raug txoj kev txom nyem no rau ntawm kev deev luag poj luag txiv thiab raug cem, thiab raug lwm tus mob, thiab thuam, feem ntau yog los ntawm lwm tus neeg txoj kev muaj yees ua tej yam no.

Txawm yog lawv tsis tau ua txhaum, tej yam no ua rau lawv xav tias lawv muaj txim thiab lawv txaj muag. Vim lawv tsis paub kav tej kev xav hauv lawv lub siab, feem coob lawv tau khaws zais tej yam no nyob rau hauv lawv tej siab.

Kev kho mob thiab kev cia siab yeej tsis nyob ntawm kev tsaus ntuj nti tiam sis nyob hauv qhov kaj thiab kev hlub ntawm peb tus Cawm Seej, Yexus Khetos.¹¹ Txwj Laug Richard G. Scott ntuas hais tias: “Yog tias nej tsis tau ua txhaum loj nej tus kheej, tsis txhob raug txom nyem los ntawm lwm tus neeg tej kev txhaum. … Nej muaj tau kev khuv leej. … Tiam sis nej yuav tsum tsis txhob xav tias nej lav ris tej kev txhaum ntawd. …Thaum nej tau ua txhua yam nej ua tau kom pab tus uas nej hlub, cia li muab nej lub nra tso rau ntawm tus Cawm Seej txhais ko taw. … Thaum nej ua li ntawd, nej yuav nyob kaj siab lug thiab nej yuav qhia tias nej muaj kev ntseeg tus Cawm Seej hais tias Nws yuav ris lub nra ntawm tus uas nej hlub txoj kev txhaum thaum tus ntawd hloov siab lees txim thiab mloog lus.”

Nws hais ntxiv hais tias: “Kev kho mob tag nrho yuav los ntawm nej txoj kev ntseeg Yexus Khetos thiab Nws lub hwj chim thiab lub hwj huam, dhau los ntawm Nws txoj Kev Theej Txhoj, kom kho tej yam uas los ntawm qhov uas tsis ncaj ncees thiab tsis tsim nyog raug.”¹²

Yog tias nej raug xwm txheej li no, cov viv ncaus, tej zaum yuav siv sij hawm ntev kom kho qhov mob ntawd. Nej yuav tsum thov Vajtswv kom coj nej txoj hau kev thiab txais tau kev pab, xws li hais rau cov thawj coj uas tuav lub pov thawj hwj. Tsis txhob zais cia rau nej tus kheej, txiav txim siab yuav ua li cas, thiab tej zaum nrhiav kev pab los ntawm ib tug kws txawj pab tswv yim. Thaum ua li no nej yuav tsum txhawb nej lub dag zog los ntawm sab ntsuj plig! Nco ntsoov nej yog leej twg: nej yog ib tug ntxhais los ntawm Leej Niam Leej Txiv Saum Ntuj Ceeb Tsheej. Ntseeg nej Leej Txiv txoj kev nyob mus ib txhis rau nej. Txhua hnub ua kom to taub ntxiv txog Yexus Khetos txoj lus qhuab qhia. Siv nej txoj kev ntseeg txhua hnub kom haus dej los ntawm tus Cawm Seej lub qhov dej. Siv lub vaj txiaj ntsim hwj chim uas peb txhua tus muaj dhau los ntawm cov kab ke thiab kev khi lus. Thiab cia tus Cawm Seej thiab Nws txoj Kev Theej Txhoj lub hwj chim kho nej lub neej.

Qhov thib peb, tus Thawj Kws Kho Mob yuav nplij peb lub siab thiab txhawb nqa peb thaum peb raug tej yam mob hauv lub ntiaj teb no,¹³ xws li tej yam xwm txheej, kev mob hlwb, kab mob, kev mob kav ntev, thiab kev tuag. Tsis ntev tas los kuv ntsib ib tug ntxhais hluas zoo hu ua Josie uas muaj mob hlwb bipolar disorder. Nov yog ib feem ntawm nws lub neej uas nws qhia rau kuv:

“Qhov nyuaj tshaj plaws uas yog kev tsaus ntuj nti yog thaum kuv raug ib qho uas kuv tsev neeg hu ua ‘hnub vau rau hauv av.’ Hnub vau rau hauv av pib thaum kuv hnov tej lub suab, los yog teeb ci, los yog leej twg chwv kuv ua rau kuv mob heev. Ua rau kuv ntxhov siab kawg nkaus. Muaj ib hnub uas kuv yeej yuav nco ntsoov.

“Hnub ntawd yog thaum nyuam qhuav pib muaj mob li no, ua rau kuv ntshai heev. Kuv nco ntsoov tias kuv quaj heev, kua muag ntws si ntawm kuv lub ntsej muag thaum kuv huas pa. Tiam sis qhov uas kuv raug mob npaum li ntawd yeej tsis npaum li kuv ua rau kuv niam ntshai thiab txhawj heev, thaum uas nws xav pab kuv kawg nkaus.

“Kuv txoj kev mob hlwb ua rau kuv niam lub siab tawg mob tas. Txoj kev tsaus zuj zus no, txawm tias wb tsis tau paub wb yuav tau txais ib qho txuj ci uas tseem ceeb heev.

“Sij hawm dhau mus, ua rau kuv niam pheej ntxhi lus hais tias, ‘Kuv yuav ua txhua yam kom tshem qhov no tawm ntawm koj mus.’

“Qhov kev tsaus no haj yam muaj ntxiv, thiab thaum kuv xav tias kuv nyiaj tsis tau ntxiv lawm, thaum ntawd ces muaj ib qho ua rau kuv xav tsis thoob.

“Zoo li muaj ib lub hwj chim zoo kawg nkaus uas los kav kuv lub cev. Ces, ua rau kuv muaj zog tshaj kuv li tau muaj,¹⁴ kuv hais ib co lus teb rau kuv niam txoj kev xav hais tias nws yuav tshem kuv txoj kev mob mus. Kuv hais tias, ‘Koj tsis tas tshem; Vim muaj lwm tus twb tau tshem lawm.’”

Ntawm txoj kev mob tsaus ntuj uas Josie tau raug no, nws nrhiav tau dag zog txaus kom ua tim khawv txog Yexus Khetos thiab Nws txoj Kev Theej Txhoj.

Tsis tau kho nws qhov mob tag nrho hnub ntawd, tiam sis nws twb txais qhov kaj ntawm kev cia siab thaum ib lub sij hawm uas nws nyob hauv kev tsaus ntuj nti. Thiab hnub no, vim nws to taub Khetos cov lus qhuab qhia tiag tiag thiab nws niaj hnub txais tus Cawm Seej cov dej uas cawm txoj sia, Josie tseem txais kev kho mob thiab muaj kev ntseeg tus Thawj Kws Kho Mob. Nws pheej pab lwm tus. Thiab nws hais tias, “Thaum muaj txoj kev tsis tu ncua no, ua rau kuv cia siab rau Nws txoj kev muaj siab hlub. Qhov no yog qhov kaj uas coj kuv txoj hau kev thaum kuv raug tej yam nyuaj li no.”¹⁵

Cov viv ncaus, kuv ua tim khawv tias—

Nej tsis tas ris lub nra ntawm kev tu siab uas los ntawm kev txhaum nej tus kheej xwb.

Nej tsis tas ris lub nra ntawm qhov mob uas los ntawm lwm tus tej kev ua tsis ncaj ncees nej tus kheej xwb.

Nej tsis tas raug tej xwm txheej ntawm lub neej hauv lub ntiaj teb no nej tus kheej xwb.

Tus Cawm Seej thov hais tias:

“Nim no nej puas tseem tsis kam tig rov los cuag kuv, thiab hloov siab lees txim ntawm nej tej kev txhaum, thiab hloov siab los ntseeg, xwv kom kuv yuav kho tau nej?

“… Yog nej yuav los cuag kuv nej yuav tau txoj sia nyob mus ib txhis. Saib seb, kuv txhais npab hlub tshua twb muab cev tuaj rau nej, thiab tus uas yuav los, kuv yuav txais yuav tus ntawd.”¹⁶

“[Nws] yeej yuav ua txhua yam kom tshem qhov no ntawm nej mus.” Muaj tseeb tiag, “[Nws] twb ua li ntawd lawm.” Los ntawm Yexus Khetos, tus Thawj Kws Kho Mob, lub npe dawb ceev, amees.