Mwet Kol Onwelah

Sie ma wo emet nuh sihk pa pacl nga kuh in forfor facluh—in lutlut sin tahmtahel luhk fin facluh nohfohn. Wacngihn ma sahyac oacna tuhkweni orekma, liye sie sin sie, ac aetuhi yuruwos.

Ke kain pacl ohinge, sie mwet kol luhn Rilif Sosaiti el siyuck, “Yac oasr ma se muhtwacn uh enenuh in porongo yohk nuh kac?”

Nga topuk, “Ahok!” ke sramsram lal Prestuhn Russell M. Nelson “Sie Nguhsr nuh sin Tahmtahel Wiyuck uh” tuhkuh nuh ke nuhnak luhk. Prestuhn Nelson el luti, “Kuht enenuh muhtwacn suc oasr kahlwem fokoko la ke mwe luti luhn Kraist.”¹

Nephi el ahkuhtweyac mwe luti luhn Kraist ke ohiyac se inge:

“Tuh muhtuhnpot se ma kowos enenuh in ilyak kac uh pa auliyak ac pacptaislac ke kof; ac na fah tuhkuh iyucklac luhn ma koluk lowos ke e ac ke Nguhn Muhtahl. …

“Ac inge … ngwac siyuck fin ma nuhkwewa oreklac? Liye, nga fahk nuh suwos, Moh; tuh kowos tiacna tuhkuh loesuhlah sahyacn na ke kahs luhn Kraist ke luhlahlfongi kuh in El, fungyang nohfohn nuh ke ohiyac wo Lal suc kuh in molwelah.

“Ohinge, kowos enenuh in ahkwot nuh met ke luhlahlfongi kuh in Kraist, in oasr kahlwem suwohs luhn finsrak, ac luhngse God ac mwet nuhkwewa. Ohinge, kowos fin ahkwot nuh met, mongo ke kahs luhn Kraist, ac muhtweng ne ke na sahflah, liye, ohinge Pahpah El fahk: Kowos fah moul ma pahtpaht.

“… Pa inge inkacnek; ac wacngihn kuhtwena inkacnek sahyac kuh ine utuckuh ye kuhsrao ma mwet uh kuh in moliyucklac ke tohkohsrahi luhn God. Ac inge, liye, pa inge mwe luti luhn Kraist.”²

Efuh kuht enenuh sie kahlwem fokoko ke ip yohk se inge?

Pacl puhs nga ohsun nuh sin muhtwacn Luhlahlfongi ke Lwen-sahflah uh suc enenuh yohk in eis kahsruh, tuh elos tiac ngwet nuh sin Sie suc kuh in sang kahsruh ma pahtpaht uh. Elos kwacna kena in kahlwem ke suk “lohm luhlahp ac mwesahs sac.”³

Ke kuht ahkyohkye kahlwem lasr ke mwe luti luhn Kraist, kuht sa konwacack lah kuht lotwelah yohk likina met ah sie kahlwem ke “plwacn wolacna luhn engan.”⁴ Kuht oacyacpac akihlen lah Mwet Lahngo lasr, Jisus Kraist, El oasr infulwen plwacn sacn.

Ke kuht lotwelah orekmakihn mwe luti luhn Kraist nuh ke kais sie ohiyac lasr sifacna, luhngse lasr nuh sin Mwet Lahngo lasr uh kapwack. Ac kuht akihlen “lah finne meac akihlenyuck in siena, kuht nohfohn enenuh Iwaclah ma pahtpaht sacn pacna.”⁵ Kuht akihlen lah El pa pwelucng lasr—“yot luhn Mwet in Molwelah lasr, … sie pwelucng pwacye … ma fin [kuht] muhsahi fac [kuht] tiacna kuh in puhtatlac.”⁶

Mwe luti inge kuh in ahkinsewowoye kuht fuhkah ke kuht suk mihslac ac kahlwem ac srihke in muhtweng ke ohiyac engan nuh ke fuhfahsryucsr kais sie luhn moul?

Lwelah nga in ngihsre kuht in muhtwacwacack, oacna Nephi el fahk, “ke luhlahlfongi kuh in [Kraist], fungyang nohfohn nuh ke ohiyac wo Lal suc kuh in molwelah.”⁷ Luhlahlfongi lasr ke Jisus Kraist lwelah kuht in kuhtanglah kuhtwena ma upac.

Pwacyena, kuht konwacack luhlahlfongi lasr ahkloalyeyuck ac kuhpahsr lasr yurin Pahpah Lucng ac Wen Nahtuhl fokokoi liki ma upac. Lwelah nga in sruhmuhn srihkasrak tolu.

Ma Set Met, Mwet Lahngo, Mwet Kol Onwelah sac, oasr kuh la in ekuhllah insiyacsr ac ahkkweye kuht ne tok liki ahsor ma sikyak ke srihpen ma koluk lasr. Ke Mwet Lahngo El luti muhtwacn Samaria se ke luhfin kof sac, El etuh ke ma koluk upac lal. Tuhsruhktuh, “[Leum El] liye insien mwet uh,”⁸ ac El etuh lah oasr inse puhsisacl lal.

Ke muhtwacn sacn tuhkuh nuh ke luhfinkof sacn, Jisus—suc ahol kof in moul—fahk na muh, “Ase nimuk kutu kof an.” Mwet Lahngo lasr El oacyacpac sramsram nuh sesr ke puhsra kuht kuh in akihlen ke kuht tuhkuh nuh Yohrohl—mweyen El etwekuht. El ohsun nuh sesr ke acn kuht oasr kac uh. Ac ke srihpen suc El an ac ma El oruh kacsr, El kahlwem. Ke srihpen El puhlakihn kweok lasr, El kuh in use kof in moul ke kuht suk. El luti ma inge nuh sin muhtwacn Samaria sac ke El fahk, “Kom tia etu ke mwe sang ma God El akoo in sot nu sum, ac kom tia pac etu lah su siyuk mwe nim sum. Kom funu etu, kom lukun siyuk sik ac nga sot nu sum kof in moul.” Sahflahiyac ke el kahlwem, muhtwacn sac topuk ke luhlahlfongi ac siyuck, “Leum se, use nimuk kutu kof sacn! Na nga fah tia sifilpa malu.”

Tukun muhtwacn Samaria sac puhlakihn ma inge yurin Mwet Lahngo ah, el “filiya sufa in kof lal ac folokla nu in siti uh, ac fahk nu sin mwet we,

“Fahsru liye mwet se su fahkma nu sik ma nukewa nga oru meet ah. Ya acnu tia el pa Christ?”

El eis mwe loh se—el muhtwacwacack in nihm ke kof in moul—ac el kena in fahkwack wolacna Lal nuh sin mwet sahyac uh.⁹

Ke kuht tuhkuh nuh Yohrohl ke inse puhsisacl ac kuh in lutiyuck—finne insiyacsr toasr ke tahfonglac ac ma koluk—El kuh in ikihlkuhtlac, “tuh El kuhlacna in molwelah.”¹⁰ Ac ke insiyac eklac uh, kuht kuh in, oacna muhtwacn Samaria sac, som nuh ke siti lasr sifacna—lohm, lohm lutlut, ac acn in orekma lasr—in mwet lohoh nuh Sel.

Ahkluo, Mwet Kol Onwelah sac kuh in ahkkweye ac ahkfokokoye kuht ke kuht puhla kweok ke srihpen mukwikwi koluk luhn mwet sahyac uh. Oasr pacl puhs nga sramsram yurin muhtwacn suc puhla muhnahs ke ma toasr. In karihngihn wuhlweacng elos oraclah ke tempuhl uh eklac soko inkacnek upac ke onwelah uh. Elos kweok ke wuhlweacng muhsahllah, insiyac muhsahllah, ac kuh ma tuhlac. Puhs selos oasr mukul tuhmwaclos orek kosro ac ahkkolukyeyuck ke kahs, mwe kosro, ac emtucng, inkaiyacn pacl ke srihpen ma pahlah luhn mwet sahyac uh.

Kain mukwikwi inge, finne tiac ma koluk lalos sifacna, oruh in puhs selos in puhla mwacta ac mwekihn. Ac tiac etuh in moulkihn puhla fokoko ma elos puhla uh, puhs selos srihke in ngwetngwet lucngi, ac srihke in muhlkuhnlah.

Finsrak ac in onwelah tiac konweyuckyak ke ma lohsr luhn lukmac tuhsruhktuh ke kahlwem ac luhngse luhn Mwet Lahngo lasr, Jisus Kraist.¹¹ Elder Richard G. Scott el luti: “Kom fin nwacsnwacs sifacna ke ma koluk, tiac enenuh in kweok ke ma koluk luhn mwet sahyac. … Kowos kuh in puhla pahkomuhta. … Tuh kowos ac tiac eis nuh fowos sifacna kalyeiyuck ke mukwikwi ingacn. … Ke kowos oruh ma fal in kahsruh mwet kowos luhngse uh, fihliyac ma toasr uh ke niyacn Mwet Lahngo. … Ke kowos oruh an, kowos ac tiac konwacack mihslac muhkwena tuhsruhktuh fah ahkkahlwemye luhlahlfongi lowos ke kuh luhn Mwet Lahngo in eslah ma toasr luhn ma koluk liki mwet kowos luhngse ke auliyak ac ahkostwen lal.”

El kalweni: “Onweyucklac na pwacye fah tuhkuh ke luhlahlfongi lowos ke Jisus Kraist ac kuh ac wolacna Lal, ke Iwaclah Lal, in onwelah kihnet ke ma sesuwohs ac ma suhfal.”¹²

Kowos fin konwe kowosyak sifacna ke ohiyac inge, tahmtahel, onweyucklac uh kuh in enenuh lusen pacl loes. Ac fah enenuh kowos in pruhe in sokwack kahsruh ac kahsruh fal, wi pac in sramsram nuh sin mwet fal suc sruok pristut. Ke kom lotwelah sramsram suwohs, oraclah mahsrlo fal ac sahp sokwack kahsruh luhn professional. Karihngihn kuh luhn nguhn ke lusen pacl inge uh pa yohk srihpac emet! Esam acn lucng me kowos tuhkuh kac: kowos muhtwacn wolacna nuhtin Pahpah ac Ninac Inkuhsrao. Luhlahlfongi plwacn ma pahtpaht luhn Pahpah tuhmowos keiwos. Kalweni lwen nuh kwewa in yohkwelihk kahlwem lowos ke mwe luti luhn Jisus Kraist. Orekmakihn luhlahlfongi kais sie lwen in nihm loal ke luhfinkof luhn Mwet lahngo ke kof in moul. Luhlahlfongi ke kuh lucng ma kuh in tuhkuh nuh sesr nuh ke akwuck ac wuhlweacng. Ac lwelah kuh ke onwelah luhn Mwet Lahngo ac Iwaclah Lal nuh ke moul lowos.

Ahktolu, Mwet Kol Onwelah sac kuh in ahkkweye kuht ke kuht moulkihn “ma pwacye luhn moul,”¹³ oacna ongaiyac, mas ke nuhnak, mas in mahno, ngal tiac tui, ac misac. Nga tuhfahna ohsun nuh sin muhtwacn fuhsr wowo se suc inel pa Josie suc kweokkihn bipolar disorder. Pa inge kuhtuh srihk ke fahsr lal nuh ke onwelah ke el sruhmuhn nuh sihk ma inge:

“Pacl upac emet uh sikyak ke ma nga sucu luhk uh pahngon ‘lwen in oan infohk.’ Lwen inge muhtwacwacack ke sesseslah luhn puhla ac acsmak yohk ac sruhnga kuhtwena kain in puhsra, kahkah, kuh kahlwem. Ac oruh sie luhpan nuhnak kasrkuhsrak. Oasr sie lwen nga tiac kuh in muhlkuhnlah.

“Pa ke tuhfahna muhtwacwacack ah, oraclah in mukwikwi na ahksahngweng se. Nga kuh in esam nga tuhng, sronin muhtuhk kahkkahk ke nga srihke in momong. Tuhsruhktuh finne kweok yohk an tiacna yohk oacna kweok ma tuhkuh tok ke nga liye sahngweng luhn ninac kiyuck ah, ma sruasralacna in kahsrweyuc.

“Ke nuhnak ahsor luhk oruh in muhsahllah insiyacl. Tuhsruhktuh kuht nihkihn lah finne puhla lohsr uh loal, kuht apkuhran in sun pacl nuh ke ma usrnguck yohk.

“Ke lusen ao na loes se kalweniyuck, ninac kiyuck ah sifilpac mahmah pacl ekahsr, ‘nga ac oruh kuhtwena ma in eislah ma se inge liki kom.’

“Ke ma inge, lohsrlohsr uh yohkwelihk, ac ke nga luhlahlfongi muh nga tiac kuh in sifil muhtweng, pacl sacna ma wolacna se sikyak.

“Sie kuh lucng ac wolacna sa in raunwelah monuk. Na, ke ‘kuh yohk likina kuh luhk sifacna,’¹⁴ nga fahkwack nuh sin ninac kiyuck ke kuh yohk kahs oalkohsr ma ekuhllah moul uh in topuk nuh ke kena lal in eislah kweok luhk. Nga fahk, ‘Kom tiac enenuh, Mwet Se Sahyac oruh tari.’”

Ke acn lohsr ke mas upac luhn nuhnak, Josie el siyuck ke kuh in fahkwack luhlahlfongi ke Jisus Kraist ac Iwaclah Lal.

El tiac onweyucklac nohfohn ke lwen se ingacn na, tuhsruhktuh el eis kahlwem luhn finsrak ke pacl luhn lohsr na upac. Ac mihsenge, ahkkweyeyuck ke pwelucng in kahlwem ke mwe luti luhn Kraist ac ahksasucyeyuck lwen nuh kwewa ke kof moul luhn Mwet Lahngo, Josie el kalweni ke fuhfahsryucsr lal nuh ke onwelah ac orekmakihn luhlahlfongi kuh ke Mwet Kol Onwelah sac. El kahsruh mwet el ohsun nuh se uh. Ac el fahk, “Ke ma lohsr uh kalweniyuck na uh, nga luhlahlfongi ke mwe esam luhn pahkotwen Lal. Oacna mwe kol luhn kahlwem ke nga fahsr ke pacl upac uh.”¹⁵

Tahmtahel, nga fahkwack luhlahlfongi lah—

Kowos tiac enenuh in kalweni us ma toasr ke ma ahsor sikyak ke ma koluk uh—muhkwena.

Kowos tiac enenuh in us kweok ma sikyak ke ma koluk luhn mwet sahyac uh—muhkwena.

Kowos tiac enenuh in puhlakihn mwe kweok pwacye luhn moul se inge—muhkwena.

Mwet Lahngo El fahk:

“Yac kowos inge ac tiac fohlohkoh nuh Yuruk, ac auliyak ke ma koluk lowos, ac forlah eklac, tuh Nga in kuh in unwe kowoslac?

“… Nga fahk nuh suwos, kowos fin tuhkuh nuh Yuruk kowos fah eis moul ma pahtpaht. Liye, paho pahkotwen Luhk ahsroeyucklac nuh yuruwos, ac el suc fah tuhkuh … fah eisacl.”¹⁶

“[El] ac oruh kuhtwena ma in eslah ma se inge [liki kowos].” Pwacyena, “[El] oruh tari.” Ke inen Jisus Kraist, Mwet Ono Suwohs, amen.